“Tianuare 4–10. Iotebwa Timiti—Rongorongo 1:1–26: ‘I Noora te Boua ae te Ota,’” Nakomai, Iriirai—Ibukin te Moanrinan: Reirei ao Berita aika Tabu 2021 (2020)
“Tianuare 4–10. Iotebwa Timiti—Rongorongo 1:1–26,” Nakomai, Iriirai—Ibukin te Moanrinan: 2021
Te Buakonikai ae Tabu, iroun Greg K. Olsen
Tianuare 4–10
Iotebwa Timiti—Rongorongo 1:1–26
“I Noora te Boua ae te Ota”
Ngkai ko kamatebwai booki aika tabu, iangoia ataei ake ko reireiniia. E na kaunga nanom te Tamnei ae Raoiroi, rinanon namakin ake ko karekei, n ataia bwa tera ae ko na kabanea nanom iaona inanon te kiraati.
Korei Am Namakin
Kaungaa te Tibwatibwa
Kaoiia tabeman ataei bwa a na tibwaua aia atatai ibukin Iotebwa Timiti ao ana tataro n te Buakonikai ae Tabu (kaotakin tamnein te Moan Kaotioti e kona n ibuobuoki). Titirakiniia tera aron aia namakin ngke a ongo bwa Tamara are i Karawa ao Iesu Kristo a kawara Iotebwa Timiti. Ngkana e na kawara ara kiraati Iotebwa Timiti, tera ae ti na titirakinna ibukin bwaai ake e rinanona?
Reirei te Reirei: Ataei aika a Uarereke
Iotebwa Timiti—Rongorongo 1:3–20
E katauraoia Iotebwa Timiti n riki bwa ana burabeti te Atua.
N reiakina taekan Iotebwa Timiti ngke te kairake e kona ni buokiia ataei ni kairekerekea ma ngaia ao ni katauraoi n reirei man bwaai ake e rinanona. Tao ko kona ni buokiia n ataia bwa aekara aron ana taneiai Iotebwa ngke te ataeinimwaane ni katauraoia n riki bwa te burabeti.
Waaki ni Kakukurei aika a Kona ni Karaoaki
-
Butiia te ataei bwa e na taua tamnein Iotebwa Timiti (taraa Bokin Tamnein te Euangkerio, nambwa 87) ngkai ko tibwauai tabeua koaua ibukin Iotebwa ake a kuneaki inanon Iotebwa Timiti—Rongorongo 1:3–14 (taraa naba “Mwakoro 1: Iotebwa Timiti ao Ana Utu,” Karaki n Reirei ao Berita aika Tabu, 6–8, ke te witeo ae irekereke ma ngaia iaon ChurchofJesusChrist.org). Buokiia ni kabotaua rongorongoia ana utu ao maiuna nakon maiuia. Tibwaua am koaua bwa Iotebwa Timiti e rineaki iroun te Atua ao e katauraoi n riki bwa te burabeti (taraa “Bwanaa ibukin Kaokan Bwai: Ana Utu Iotebwa Timiti,” inanon Nakomai, Iriirai—Ibukiia Aomata n Tatabemaniia ao Utu). Ngkana e riai, reireiniia ataei bwa te burabeti bon temanna are e taetae ibukin te Atua.
-
Kaota te ataeinimwaane n te uoote bwa e na nakon am kiraati, n riki bwa aongkoa ngaia Iotebwa Timiti. Katauraoi tabeua titiraki ibukiia ataei n titirakinna ake a kaekaaki inanon Iotebwa Timiti—Rongorongo 1:3–20 (ko na bae n tangiria ni moantaai ni kan tibwauai titiraki aikai ma te ataeinimwane). Imwiina kaoa te ataeinimwaane bwa e na wareki tabeua oin ana taeka Iotebwa Timiti ibukin te Moan Kaotioti (n aron te katooto, Iotebwa Timiti—Rongorongo 1:25).
Iotebwa Timiti—Rongorongo 1:10–17
Tamara are i Karawa e ongo ao e kaekai au tataro.
Te bwai are e rinanona Iotebwa Timiti e kona ni kaungai nanoia ataei n tataro ma te onimaki bwa te Atua e ongo irouia.
Waaki ni Kakukurei aika a Kona ni Karaoaki
-
Tuangiia ataei taekan ana titiraki Iotebwa Timiti ake e anga (taraa Iotebwa Timiti—Rongorongo 1:10). Tera ae ti kona ni karaoia ngkana iai ara titiraki ibukin te Atua? Kaota te Baibara nakoia ataei, ao kabwarabwara bwa ngke e wareka te Baibara Iotebwa, e reiakinna bwa e kona ni “butiia te Atua” (Iakobo 1:5; taraa naba Bokin Tamnein te Euangkerio, nambwa 89). Kaota am koaua bwa ti kona ni butiia te Atua taian titiraki rinanon te tataro.
-
Taekinna rongorongon te bwai are ko rinanona ngke ko a kamangaoaki, ko butiia te Atua ana ibuobuoki, ao ko karekea te kaeka. Buokiia ataei n iangoi taai are ngke a kaekaaki iai aia tataro. Ko kona naba n tibwaua te karaki man ana maekatiin te Ekaretia ni kaekaakin ana tataro te ataei.
Iotebwa Timiti—Rongorongo 1:17–19
Iotebwa Timiti e noora Tamara are i Karawa ao Natina, Iesu Kristo.
Ko kona ni buokiia ataei ni kawenea aan aia koaua ae matoatoa n ana Moan Kaotioti Iotebwa Timiti. Tibwauaia ma ngaia bwa ko kanga ni karekea am koaua n te tai ae kakawaki aei.
Waaki ni Kakukurei aika a Kona ni Karaoaki
-
Kaota tamnein te Moan Kaotioti inanon te kamataata n te wiiki aei inanon Nakomai, Iriirai—Ibukiia Aomata n Tatabemaniia ao utu, ao n tibwauaia n oin am taeka te bwai are e riki ngke e tataro Iotebwa. Kaoiia ataei bwa a na korei oin aia tamnei man te karaki.
-
Kaoiia ataei bwa a na karana te iteraniba ibukin waaki ni kakukurei n te wiiki aei ao kabongana n taekina rongorongon te Moan Kaotioti (taraa naba “Mwakoro 2: Ana Moan Kaotioti Iotebwa Timiti,” Karaki n Reirei ao Berita aika Tabu, 9–12, ke witeo aika iai rekerekeia iaon ChurchofJesusChrist.org).
-
Wareka Iotebwa Timiti—Rongorongo 1:17, ao kotei taeka nakoia ataei ake e taekin Tamara are i Karawa nakon Iotebwa Timiti.
Reirei te Reirei: Ataei aika a Ikawai
Iotebwa Timiti—Rongorongo 1:10-13
E kona te Atua ni kaekai au titiraki rinanon booki aika tabu.
E kaungaaki nanon Iotebwa Timiti man te rongorongo are e warekia n te Baibara, ao aei e kairia nakon te Moan Kaotioti ao Kaokan ana Ekaretia Kristo. Buokiia ataei n taraia bwa e kanga aron kamatebwaian booki aika tabu ni kona ni buokiia ni kunei kaekaan aia titiraki n te maiu n tamnei.
Waaki ni Kakukurei aika a Kona ni Karaoaki
-
Kaota nakoia ataei booki aika a kakaokoro (n aron te encyclopedia ke te boki ni kuka), ao buokiia n iangoi titiraki ake a na kona ni kaekaaki man booki aikai. Imwiina kaota nakoia katooton booki aika tabu. Tera titiraki ake a kona ni kaekaaki man booki aikai? Ko kona ni katauraoa te katooto ibukin te titiraki are e kaekaaki ni booki aika tabu. Bootaki wareka Iotebwa Timiti—Rongorongo 1:10–11 ni kakaea bwa tera ana titiraki Iotebwa Timiti ake e karekei ao tera reeke ake e kunei inanon booki aika tabu.
-
Buokiia ataei ni kakaei taeka inanon te kibu 12 are a kabwarabwara bwa e kanga aron warekan Iakobo 1:5 n rootaki iai Iotebwa Timiti. Tibwaua te bwai ae ko karekea are ko a tia n rinanona ni booki aika tabu—n aron te katooto, ngke ko kunea kaekaan teuana am titiraki rinanon warekan booki aika tabu. Bootaki anenea “Search, Ponder, and Pray” (Aia Boki n Anene Ataei, 109).
Iotebwa Timiti—Rongorongo 1:10–19
Tamara are i Karawa e ongo ao e kaekai au tataro.
Te Atua e ataa Iotebwa Timiti, ao ngke e tataro Iotebwa, e ongo te Atua irouna. Ngkai a na bae ni kakaokoro bwaai ake a rinanona ataei ake ko reireinia ma are e rinanona Iotebwa, ko kona ni buokiia n namakinna bwa e kinaia te Atua ao e ongo irouia ngkana a tataro.
Waaki ni Kakukurei aika a Kona ni Karaoaki
-
Kaoa ana karo temanna te ataei bwa e na tei itinanikun te kiraatiruum ao ni kaekai aia titiraki ataei ni kabonganai aanga n aron ae e kanako rongorongo n tekiti, e tareboon, e korea te rongorongo, ke e kanakoa te tia uarongorongo. Tera tabeua kawai are e reitaki iai Tamara are i Karawa ma ngaira? (taraa “Te Kaotioti,” Bwai ni Kairi nakon Koroboki aika Tabu, scriptures.ChurchofJesusChrist.org). Ni kaineti ma Iotebwa Timiti—Rongorongo 1:16–19, e kanga Tamara are i Karawa ni kaeka ana tataro Iotebwa Timiti? E kanga ni kaekai ara tataro?
-
Bootaki Anenea “A Child’s Prayer” (Aia Boki n Anene Ataei, 12–13).
Tamneite ataeinnaine ae tataroTe Atua e ongo ao e kaekai ara tataro.
Iotebwa Timiti—Rongorongo 1:14–19, 25
Tamara are i Karawa ma Iesu Kristo a kaoti nakon Iotebwa Timiti.
Ataei n tatabemaniia ake ko reireiniia a kainnanoa aia kakoaua ibukin Iotebwa Timiti n te Buakonikai ae Tabu. Ko na kanga ni buokiia ni karekea ke ni kakorakorai aia koaua?
Waaki ni Kakukurei aika a Kona ni Karaoaki
-
N rinanoa rongorongon te Moan Kaotioti, korei ni kauarerekei ni katoai kiibu man Iotebwa Timiti—Rongorongo 1:14–19 iaon mwakoro ni beeba aika a uarereke. Katikui beeba inanon te kaonteina, ao kaoiia ataei bwa a na rinea teuana imwiin teuana ao ni katikui iaon te burakibooti ni karinani raoi ni nneia.
-
Kaoiia ataei bwa a na kamatui mataia ao n iangoia bwa e na aekakira aron ae ngke ngkoe Iotebwa ao ko wareki mwakoro ake a rineaki man Iotebwa Timiti—Rongorongo 1:14–17. Butiia bwa a na tibwauai aia iango ao aia namakin ibukin te bwai are e rinanona Iotebwa.
-
Kaota te witeo “Butiia te Atua: Ana Moan Kaotioti Iotebwa Timiti” (ChurchofJesusChrist.org) ao butiia ataei bwa a na tibwaua te bwai ae a reiakinna ibukin ana kaotioti Iotebwa ibukin Tamara are i Karawa ao Iesu Kristo.
-
Bootaki wareka ana koaua Iotebwa inanon Iotebwa Timiti—Rongorongo 1:25. Butiia ataei bwa a na kakaei taeka ke kibuntaeka are a kaota ana onimaki Iotebwa. Ti na kanga n teimatoa ni kakaonimaki nakon te Atua ao ara koaua ngke aki boorai tabeman ma ngaira?
Kaungaa te Kamatebwai n te Mweenga
Kaoiia ataei bwa a na tibwaua rongorongon ana Moan Kaotioti Iotebwa Timiti ma temanna—ngkana e kona, ma temanna are e bon tuai n ongo mai imwaaina. A kona ni kabongana te iteraniba ni kakukurei n te wiiki aei ni buokiia ni karakina te karaki.
Kanakoraoan Ara Anga reirei
Kaungaa te karinerine. Ni kauringia ataei bwa a na karinerine, ko na anenea ke n aam te anene, kaota tamnein Iesu, ke kabongana te bai n te kanikinaa are a kinaa ataei.