“Tianuare 18–24. Reirei ao Berita aika Tabu 3–5: ‘E na Bon Waaki Nako Au Mwakuri,’” Nakomai, Iriirai—ibukin te Moanrinan: Reirei ao Berita aika Tabu 2021 (2020)
“Tianuare 18–24. Reirei ao Berita aika Tabu 3-5,” Nakomai, Iriirai—Ibukin te Moanrinan: 2021
Te Tai ae Taiaki i Buranti, Iroun James Taylor Harwood
Tianuare18–24
Reirei ao Berita aika Tabu 3–5
“E na Bon Waaki Nako Au Mwakuri”
Ngkai ko kamatebwaia Reirei ao Berita aika Tabu 3–5, ko na bae ni karekei namakin bwa tera ae a tangiria ni kan kamataataki iai ataei ake ko reireiniia. Waaki ni kakukurei inanon te kamataata aei a na bae n anganiko naba tabeua iango.
Korei Am Namakin
Kaungaa te Tibwatibwa
Kaota tamnein Iotebwa Timiti man te kamataata n te wiiki aei inanon Nakomai, Iriirai—Ibukiia Aomata n Tatabemaniia ao Utu, ao buokiia ataei n tibwaua aia atatai iaona are e kabwarabwaraa. Buokiia bwa a na uringa karakinan Martin Harris are e kabuai moan iteranibaan ana Boki Moomon ake a na rairaki (taraa “Mwakoro 4: Martin Harris ao Iteraniba aika a Bua,” Karaki n Reirei ao Berita aika Tabu, 18–21; ke Aika Itiaki, 1:51–56).
Reirei te Reirei: Ataei aika a Uarereke
Reirei ao Berita aika Tabu 3:7–10
I kona n rinea te eti ngkana a kataia tabeman n tuangai bwa N na karaoa ae bure.
Buokiia ataei n reiakina are e reiakinna Iotebwa Timiti: ngkana a onimakina Tamara are i Karawa, E na bon “rao [niia] n aia tai ni kangaanga nako” (Reirei ao Berita aika Tabu 3:8).
Waaki ni Kakukurei aika a Kona ni Karaoaki
-
Rinanoa rongorongon Martin Harris baan taian boki ake a bua (taraa Karaki n Reirei ao Berita aika Tabu, 18–21, ke witeo aika iai rekerekeia iaon ChurchofJesusChrist.org). Tibwauaia ma ataei tabeua taabo aika a bongana ngke a kariiriaki bwa a na karaoa te bwai ae ataia bwa e aki eti. E kanga Tamara are i Karawa ni buokiira n rinea te eti? (taraa Reirei ao Berita aika Tabu 3:8).
TamneiMartin HarrisMartin Harris, iroun Lewis A. Ramsey
-
Wareki taeka aikai man Reirei ao Berita aika Tabu 3:8: “E na bon arora baina ao man boutokaiko.” Kaoiia ataei bwa a na tei ao n taakin baia ngkai ko manga wareka riki te kibuntaeka. Tibwauai tabeua kawai ma ngaiia are e arora iai baina te Uea ni buokiia ngke tabeman a kataia n tuangiia bwa a na karaoa ae kairua. Kariaia bwa a na ikaruoruo n arora baia ngke a taekin tabeua kawai ngke te Uea e arora baina bwa e na buokiira.
Te Uea e kainnanoai bwa N na karaoa Ana mwakuri.
A kona ataei “n rin i nanon te beku ibukin te Atua, (Reirei ao Berita aika Tabu 4:2) ni kawai aika a mwaiti, ao a kona ni katauraoi ngkai ibukin taai aika a raka n aia bong aika a na roko.
Waaki ni Kakukurei aika a Kona ni Karaoaki
-
Wareka Reirei ao Berita aika Tabu 4:1 nakoia ataei. Uoti tamnei are e kaota “kamiimin” ana mwakuri te Atua ni boong aika kaitira (n aron tamneia mitinare, taian tembora, ao ana Boki Moomon). Kariaia ataei bwa a na ikaruoruo n rinea te tamnei ao ni marooroakinna. Tibwauaia bwa bukin tera e kaimiimi ana mwakuri te Uea iroum.
-
Buokiia ataei bwa a na iangoi mwakuri ke ni korei tamnei ni kaota te kibuntaeka “beku irouna ma nanomi, marurungimi, ami iango ao korakorami ni kabane” (Reirei ao Berita aika Tabu 4:2). Tibwaua ana katooto temanna ae ko ataia are e beku ibukin te Atua n te kawai aei.
-
Bootaki anenea te kuna ibukin te mwakuri ni mitinare, n aron “I Want to Be a Missionary Now” (Aia Boki n Anene Ataei, 168). Marooroakinna tera ae reiakinaki n te anene n arora ni kona ni buoka te Atua ni karaoa Ana mwakuri.
Reirei ao Berita aika Tabu 5:10
Ti a tia ni karekea ana taeka te Atua rinanon Iotebwa Timiti.
Ko na kanga ni buokiia ataei ni kakorakora aia koaua ae Iotebwa Timiti ao tabeman burabeti a reirei ana taeka te Atua?
Waaki ni Kakukurei aika a Kona ni Karaoaki
-
Karabaa tamnein Iotebwa Timiti i bon inanon te ruu (taraa Bokin Tamnein te Euangkerio, nambwa. 87). Wareka Reirei ao Berita aika Tabu 5:10, ao kaoiia ataei bwa a na kakaea te tamnei ao ni kakaea bwa antai te taeka ae “ngkoe” ae kaineti nakoina. Kaota am koaua bwa ti a tia ni karekea ana taeka te Atua rinanon Iotebwa Timiti.
-
Kaota nakoia ataei ana Boki Moomon ao Berita aika Tabu. Kabwarabwara ae te Atua e anganiira booki aika tabu aikai rinanon Iotebwa Timiti. Tibwauai tabeua kiibu aika a mamate nanomi iai man booki aikai, ao taekinna bukin tera ngkai ko kakaitau ibukiia.
Reirei te Reirei: Ataei aika a Ikawai
Reirei ao Berita aika Tabu 3:5–10; 5:21–22
I riai n tabe ma kakukureian riki te Atua nakon kakukureiaia tabeman.
Ngkai ataei a reiakina taekan te bwai are e rinanona Iotebwa Timiti ni buan baan ana Boki Moomon ake a na rairaki, a kona ni kaungaaki nanoia bwa a teimatoa ni kakaonimaki ngkana a kariiriaki irouia tabeman bwa a na aki ongotaeka.
Waaki ni Kakukurei aika a Kona ni Karaoaki
-
Tabeua te bong imwaina, kaoa temanna te ataei bwa e na roko n te kiraati ao e na tauraoi n tibwaua rongorongon Iotebwa Timiti ao Martin Harris ngke a kabua moan baan ana Boki Moomon ake a na rairaki (taraa Reirei ao Berita aika Tabu, 18–21; ke Aika Itiaki, 1:51–56). Bootaki wareka Reirei ao Berita aika Tabu 3:5–8; 5:21–22, ao tarai kakabwaia ake a na roko ngkana ti teimatoa ni koaua nakon te Atua.
-
Anganiia ataei aia tai n iangoa te kaangaanga ike e kataia raoraoia n tuangiia bwa a na karaoa ae kairua. Kaoiia bwa a na kakaea te karaki inanon Reirei ao Berita aika Tabu 3:5–8; 5:21–22 are e kona ni buokiia n tain kaangaanga akanne. Katea kain tabeua taian katooto.
Te Uea e kainnanoai ibukin karaoan Ana mwakuri.
Reirei ao Berita aika Tabu 4 e kona ni kaungai nanoia ataei n riki bwa mwakoron “ana mwakuri ae kamiimi” te Uea (te kibu 1).
Waaki ni Kakukurei aika a Kona ni Karaoaki
-
Korea iaon te burakibooti Beku ibukin te Atua. Kaoiia ataei bwa a na kakaea Reirei ao Berita aika Tabu 4 ao ni karaoi ni karinani bwaai ake a reiakin bwa tera ae nanonaki ni beku ibukin te Atua. Butiia bwa a na karin nakon baike a karinani ake a reiain man te aneneI Will Be Valiant” (Aia Boki n Anene Ataei, 162) ke te anene teuana ae taekan te beku ibukin te Atua.
-
Uoti bwaai ni mwakuri (ke tamnei ke bwaai ni mwakuri) are e na bae ni kabongana temanna ni mwakuri n te tawaana. A kanga bwaai ni mwakuri aikai ni kamanoira? Buokiia ataei ni kakaei bwaai inanon Reirei ao Berita aika Tabu 4:5–6 are kanga titebo ma bwaai ni mwakuri ibukin karaoan ana mwakuri te Atua.
-
Kaoiia mitinare aika a bwanin aia tai ke mitinare n te uoote bwa iai te bwai ae a na tibwauaia man Reirei ao Berita aika Tabu 4 are e a tia ni kaungai nanoia ni karaoa ana mwakuri te Atua. Tera ae ti kona ni karaoia n ibuobuoki n ana mwakuri te Atua?
Reirei ao Berita aika Tabu 5:1–7, 11, 16, 23–24
I kona n riki bwa te tia kakoua bwa e koaua Ana Boki Moomon.
E anganaki te berita Martin Harris bwa e kona n riki bwa temanna te tia kakoaua ibukin bwaatua koora ngkana e teimatoa ni kakaonimaki. Ti aki kona noori bwaatua n aron are e nooria Martin, ma ti kona ni karekea te kakoaua n tamnei ibukin ana Boki Moomon. Ko na kangaa ni buokiia ataei ni karekea ao n tibwaa aia koaua ibukin Ana Boki Moomon?
Waaki ni Kakukurei aika a Kona ni Karaoaki
-
Korei titiraki n aron akana imwiina iaon te burakibooti, ao buokiia ataei ni kakaei kaekaaia inanon Reirei ao Berita aika Tabu 5:1–3, 7, 11: Tera ae rangi ni kan ataia Martin Harris? Antai ae e na kona ni kaoti bwaatua aikai nakoina Iotebwa? Bukin tera noorakin bwaatua aikai kanga taraan ae e aki tau n anaakin nanon temanna ae e koaua ana Boki Moomon?
-
Titirakiniia ataei bwa tera te tia kakoaua ao bukin tera e kakawaki te tia kakoaua. Tera ae e riai ni karaoia Martin Harris bwa e na riki bwa te tia kakoaua ibukin bwaatua aika koora? (taraa Reirei ao Berita aika Tabu 5:23–24). E ngae ngke ti tuai noori bwaatua, tera ae ti kona ni karaoia n riki bwa taan kakoaua ibukin ana Boki Moomon? (taraa Reirei ao Berita aika Tabu 5:16; Moronaai 10:3–5).
Kaungaa te Kamatebwai n te Mweenga
Kaungaia ataei bwa a na korei aia koaua ibukin ana Boki Moomon ao n tibwauaia ma temanna are a kinaa.
Kanakoraoan Ara Anga reirei
Bitii waaki ni kakukurei ake a bootau ma aroia ataei aika aki toamau. Bitaki aika uarereke nakon waaki ni kakukurei e kona ni kakoauaaki bwa ataei ni kabane a kona n reiakinaki mai iai. Te katooto, ngkana te waaki ni kakukurei e taekinna bwa e na kaotaki te tamnei, kam kona n anenea te kuna ae irekereke ma ngaia ni kairia ataei ake iai aia kaangaanga n aia taratara.