Tain teTai i Buranti, iroun James Taylor Harwood

Tianuare 18–24

Reirei ao Berita aika Tabu 3–5

“Au Mwakuri E na Bon Waaki Nako”

Koroi bwa tera ae ko a tia n reiakinna ao n namakinna inanon am tai ni kamatebwai koroboki aika tabu. Aio are e na buokiko ni uringi namakin akanne ao n tibwauai ma tabeman.

Korei Am Namakin

Inanon tabeua ana moan ririki ngkai ana burabeti te Uea, Iotebwa Timiti e tuai n atai bwaai ni kabane n taekan te “mwakuri ae kamiimi” are e weteaki bwa e na karaoia. Ma te bwai teuana n ana moan taneiai ae e reiakinna bwa e na tau nakon ana mwakuri te Atua, matana a riai n riki “teuana nakon mimitongin te Atua” (Reirei ao Berita aika Tabu 4:1, 5). Ibukin te katooto, ngkana te Uea e anganna te reirei are e riaon oin are e tangiria, e kainanoa iriiran ana reirei te Uea. Ao riki ngkana e karekei “mwaitin kaotioti, ao … mwaaka ni karaoi mwakuri aika mwaaiti aika korakora,” ngkana bon oin ana kataninga e na riki n raka ni kakawaki nakoina nakon ana kantaninga te Atua, e “riai ni bwaka” (Reirei ao Berita aika Tabu 3:4). Ma Iotebwa e reiakina te bwai teuana n aron kakawakin taekan karaoan ana mwakuri te Atua: “te Atua e nanoanga,” ao ngkana Iotebwa e raira nanona ni koaua, e na bon “teimatoa n rineaki” (te kibu 10). Ana mwakuri te Atua bon, mwin bwaai ni kabane, te mwakuri ni kaboan maiura. Ao te mwakuri anne “e aki kona n totokoaki” (te kibu 1).

Iango ibukin Am Kamatebwai I Bon Iroum ni Koroboki Aika Tabu

Reirei ao Berita aika Tabu 3:1–15

I riai ni kakoaua te Atua nakon riki maakan te aomata.

Inanon moan ana mwakuri Iotebwa Timiti, raoraona aika tamaroa a kaangaanga bwa e na kuneiia—riki raoraona n aron Martin Harris, ae karineaki, nakoraoi arona, are e bon mena n te nakoa ni karekei boutoka aika kakawaki. Ao Martin e kukurei ni boutokaa Iotebwa, e ngae ngke e na kakeaaki karineana mairouia raoraona ao kainanoan te anganano n te mane.

Ngaia are e bon bebete norana bwa bukin tera Iotebwa e tangiria ni kakoroa ana bubuti Martin ni uota moan mwakoron te rairairi n Ana Boki Moomon ni kaotia nakon buuna, are e nanououa n te koaua n ana Boki Moomon. Iotebwa e reitinako n tuanga te Uea n taekan te bubuti aei, e ngae ngke E aki kariaia, ni karokoa n tokina, imwin ana katenua n tai Iotebwa, te Uea e a taekina eng. Te kananokawaki, taian koroboki a bua are a mena iroun Martin, ao Iotebwa ao Martin a katuaeakaki n ae matoatoa iroun te Uea (taraa Aomata aika Itiaki, 1:51–53).

Ngkai ko wareka Reirei ao Berita aika Tabu 3:1–15, iangoia raoi bwa e kanga aia kakairi n anainano tabeman aomata nakoim. Ko na ataia naba bwa n reitan reireian Iotebwa Timiti, te Uea e taekin taeka n nanoanga. Tera ae ko reiakinna man te kawai are te Uea e kaai ni kaeta ao ni kaungaa Iotebwa? Tera te reirei are ko na kunea bwa e na kona ni buokiko ngkana ko kataaki ni makuia tabeman aomata riki nakon te Atua?

Taraa naba “The Contributions of Martin Harris,” Revelations in Context, 1–9, history.ChurchofJesusChrist.org.

Reirei ao Berita aika Tabu 4

Te Uea e tuangai bwa na beku Ibukina ma nanou ni kabane.

Mwakoro 4 e bon kaineti nakoia mitinare ake a bwanin aia tai. E ngae n anne, e rang kakaongora n ataakina bwa te kaotioti aei e kaokaki i bon ibukin Iotebwa Timiti te ikawai, are e aki weteaki nakon te mition ma e teimatoa n “tangiria ni beku nakon te Atua” (kiibu 3).

Teuana te kawai ni wareka te mwakoro aei bon iangoana n aron kabwarabwaran te mwakuri ibukin temanna are e tangiria ni karaoa ana mwakuri te Uea. Tera rabakaun te aomata ae kainanoaki? Bukin tera taian konabwai ke anua a riai n reke? Tao ko kona n tataromwaaka n rinea teuana te bwai ae ko kona ni karaoia ni katamaroa “n tau [nakoim] nakon te mwakuri” (te kibu 5).

Reirei ao Berita aika Tabu 5

I kona ni karekea oin au koaua n Ana Boki Moomon.

Martin Harris, iroun Lewis A. Ramsey

Ngkana ko weteaki bwa ko na anga am kakoaua n te kabowi iaon taekan koauan Ana Boki Moomon, tera te kakoaua are ko na anga? Te titiraki ae ti tebo iaon ana iango Martin Harris ngke buna ae Lucy, e taekina bwa Iotebwa Timiti e mwamwanaia aomata bwa aongkoa e rairi bwaatua koora (taraa Saints, 1:56–58). Ngaia are Martin e tuanga Iotebwa ibukin kakoaua riki bwa taian bwaatua koora a bon koaua. Reirei ao Berita aika Tabu 5 bon te kaotioti nakon ana bubuti Martin.

Tera ae ko reiakinna man Reirei ao Berita aika Tabu 5 iaon bwaai aikai:

• E kanga ana namakin te Uea n aron taekaia te koraki ake aki kakoauai koaua n tamnei ni karokoa a tibwa noori kakoaua raoi (tarai kiibu 5–8; taraa naba Ioane 20:24–29).

• Te katabeaki ni kakoaua inanon ana mwakuri te Uea (tarai kiibu 11–15; taraa naba 2 I-Korinto 13:1).

• E kanga karekean te koaua n ana Boki Moomon i bon ibukim (taraa te kiibu 16; taraa naba Moronaai 10:3–5).

Reirei ao Berita aika Tabu 5:1–10

Te roro aei e na karekei ana taeka te Atua rinanon Iotebwa Timiti.

Tera ae e reireiniko Reirei ao Berita aika Tabu 5:1–10 n taekan kakawakin katabean Iotebwa Timiti i inanon ara bong—ao inanon maiura? Iangoia bwa ko na kanga ni karekea ana taeka te Atua rinanon te burabeti Iotebwa Timiti. Iangoia ni koroia inanon am tienoo ke tibwaia ma temanna am kakaitau ibukin taian koaua ake a kaokaki ke kamatataaki nakoina.

Taraa naba 2 Nibwaai 3:6–24.

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Reirei ao Berita aika Tabu 3:1–4.Tuanga kaain te utu n nakonako n te rain ae “bwabwaoua” ao ngkanne inanon te rain ae “eti”. Tera ae nanonaki nakoia ara utu n ataia bwa kawain te “[Atua] a bon eti”?

Reirei ao Berita aika Tabu 3:7–10.Ngkana temanna e imanonoira n aki ongotaeka nakon te Atua, tera koaua ni kiibu aikai are e na kona ni buokiira n tiku n tei matoa ni kakaonimaki? Tao kaain te utu a kona ni takakaro n aron are temanna e na tiku ni kakaonimaki n aki ongea taian imanono n aki ongotaeka nakon te Atua.

Reirei ao Berita aika Tabu 4.Ngkai am utu a maroroakina bwa tera ae e nanonaki ni mwakuri n ana tawana te Atua, a na konaa ni karaoa aio i inanon te o n aroka (ke aongkoa a karaoia). Tera bwaai ni mwakuri ake a kainanoaki ibukin te mwakuri n o n aroka? Tera ae kabwarabwara te Atua n mwakoro 4 are e kona n riki iangoan bwaai ni mwakuri ake a kainanoaki ni karaoan ana mwakuri? Am utu a kona ni maroroakinna bwa bukin tera bwaai ni mwakuri n tatabeua nako a kakawaki ni karaoan ana mwakuri te Atua.

Reirei ao Berita aika Tabu 5:7.Tera katooto tabeua n taian koaua ake ti kakoauai ma ti aki noori? Ti na kanga ni kaeka nakon raoraora are e tangira te kakoaua bwa ana Boki Moomon e bon koaua?

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Anene aika Rineaki: “I Will Be Valiant,” Aia Boki n Anene Ataei, 162.

Kanakoraoan Am Kamatebwai I Bon Iroum

Kamatenanoa te kibu. “Ni kamatenanoi koroboki aika tabu bon karekean te iraorao ae boou. Bon ti te arona ma kuneakin temanna ae boou are e konaa n ibuobuoki n tain kainaoakiia, n anga te kairi ao te karaunano, ao riki bwaai n ibuobuoki n kaunganano ibukin kainanoan te bitaki” (Richard G. Scott, “Mwaakan Booki Aika Tabu,” Ensign ke Riaona, Nob. 2011, 6).

Karawawata ni Buan 116 Baan te Boki iroun Kwani Povi Winder