Ritembwa 28–Tianuare 3

Reirei ao Berita aika Tabu 1

“Ongora, O Ngkami Au Aomata”

Iangoia bwa Reirei ao Berita aika Tabu 1 bon ngaia oin ana kabwarabwara te Uea ibukin te boki aei man Ana kaotioti n boong ni kaitira. Tera ae E tangiria iroum bwa ko na atai man taekan Reirei ao Berita aika Tabu? Iangoa raoi te titiraki aei, ao koroi namakin ngkana iai are e roko ngkai ko wareka mwakoro 1.

Korei Am Namakin

Inanon Nobembwa 1831, ana Ekaretia Iesu Kristo ai bon tiba teuana ao te iterana ririkina. E ngae ngke e rikirake, bon te kurubu n onimaki ae a tuai ataaki ake a uamaenako ma ni karako mwaitiia ni maeka n tian te aba, kairaki iroun te burabeti ae ai tibwa uabwui tabun ana ririki. Ma te Atua e karaoiia taan onimaki aikai n riki bwa ana tia mwakuri ao Ana tia uarongorongo, ao E tangiri taian kaotioti ake E a tia n anganiia bwa ana katanoataaki nakon te aonaaba.

Reirei ao Berita aika Tabu 1 bon ana moan taeka te Uea ibukin te boki ni kaotioti aikai, ao e bon rangi ni mataata ma e ngae ngke membwa n te Ekaretia e uarereke mwaitiia, bon akea uarereken taekan ana rongorongo te Atua are e tangiriia Ana Aomata aika Itiaki n tibwauaia. Bon te “bwanaa ni kauring” ibukiia kaain te aonaaba ake a maeka iai,” n reireiniia n rairi nanoia ao ni katea ana “reirei te Atua ae akea tokina” (kiibu 4, 8, 22). Taan mwakuri ni uota te rongorongo aei ae “naake a maamara ao aki reirei,” ma au taan mwakuri ake a nanorinano bon ngaiia ae e kainanoiia te Atua—ngkai ao n tai nako—ni uota Ana Ekaretia n “kaotinakoa mai nanon te rootongitong” (kiibu 23, 30).

Ibukin riki taekan te rongorongo ni moan reken Reirei ao Berita aika Tabu 1, taraa Saints, 1:140–43.

Iango ibukin Am Kamatebwai I Bon Iroum ni Koroboki Aika Tabu

Reirei ao Berita aika Tabu 1

Te Uea e kaoai ni “ukeri tuua aikai.”

Te moan taeka e kabwarabwara te boki. E kakoauai ana botoniango te boki ao oin bukina ao ni buokiia taan wareware n tauraoi ni warekia. Ngkai ko wareka mwakoro 1—ana “moan taeka” te Uea ibukin Reirei ao Berita Aika Tabu (kiibu 6)—tarai botoniango ao oin bukina are e anga te Uea ibukin Ana kaotioti. Tera ae ko reiakinna man mwakoro 1 are e na buokiiko ni karekea moan kakabwaia man am kamatebwaia Reirei ao Berita Aika Tabu? Ibukin te katooto, ko riai n iangoia raoi bwa tera ae e nanonaki n “ongo bwanaan te Uea” inanon kaotioti aikai (kiibu 14) ke ni “ukori tuua aikai ” (kibu 37).

Taraa naba kabwarabwaraan Reirei ao Berita aika Tabu.

Reirei Ao Berita aika Tabu 1:1–6, 23–24, 37–39

Te Atua e taetae rinanon Ana tia mwakuri, ao Ana taeka a na koro bukiia.

Mwakoro 1 e moanaki ao ni kainaki ma ana katanoata te Atua are E taetae rinanon Ana tia mwakuri ake e rineiia (taraa kiibu 4–6, 23–24, 38). Koroia bwa tera are ko reiakina man te kaotioti aei n taekan te Uea ao Bwanaana. Tera ae ko reiakinna n taekan ana tia mwakuri te Uea? Ningai ae ko atia n ongo bwanaan te Uea inanon bwanaan Ana tia mwakuri? (taraa kiibu 38).

Burabeti ao abotoro a reireira ana tua te Atua.

Reirei ao Berita aika Tabu 1:3, 24–28, 31–33

Ngkana I nanorinano, aboaakira mai iroun te Uea e na kona ni kairai n raira nanou.

Kaetieti are n kiibu 3 ao kiibu 24–28, e taku te Uea bwa aia bure aomata ao kaairuaia ana bon bane ni kaotaki. N aron taekana teuana aio e na bon kammaraki, rinanon kananokawaki, ao n aron taekana teuana e bon riki bwa te kairi. Bukin tera aroaro aikai a kaokoro? Ingaoia bwa e kanga arom ngkana ko atai am bure ao mamaaram. Baikara aroaro aika a raraoi ake ko na kunei n kiibu 24-28 are e na kona ni buokiko ni kaeka inanon te kawai ae eti? Tera taekan kiibu aikai, n airi ma kiibu 31–33, ae a reireiniko bwa e kanga te Uea n noori mamaaram ao am bure?

Taraa naba Taeka n Rabakau 3:11–12; Ita 12:27; Moronaai 6:8.

Reirei ao Berita aika Tabu 1:12–30, 35–36

Te Uea e kaoka Ana euangkerio ni buokai ni kaitarai kakaewenakoau inanon boong aika kaitira.

E ngae ngke mwakoro 1 e kauring ni kaangaangan boong aika ana roko, bon iai naba inanona taeka ni karaunano: “Ngai te Uea, ataakin te kaangaanga are e na roko i aoia kaain te aonaaba, I wetea au tia mwakuri ae Iotebwa Timiti te Ataei, ao n taetae nakoina mai karawa, ao n anganna tua (kibu 17).

Taraa te kaangaanga are e kauring te Uea i aona (taraa, ibukin te katooto, kiibu 13–16, 35). Tera tabeua kaangaanga are ko atai n te aonaaba ni boong aikai—ke inanon oin maium? Kiibu 17–30 a kabwarabwara bwa tera ae e a tia ni karaoia te Uea ibukim ni katauraoam man kaangaanga aikai. Iangoia ni koroi ni karinanii bwa tera ae ko kunei.

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Reirei Ao Berita aika Tabu 1:1–6, 37–39.Ni moana te marooro n taekan kauring mairoun te Uea, ko kona n taekina taekan kauring ake ti karekei mairouia tabeman n taekan kaangaanga ake ti aki noori—n aron aontano ae kamaranran, te angibuaka ae urubwai, ke te kaa ae roko. Tera ae e reireiniira taian katooto aikai ibukin ana kauring te Uea? Ni kaineti nakon Reirei Ao Berita aika Tabu 1:1–6, 37–39, e kanga te Uea ni kauringiira? Tera are E a tia ni kauringiira n taekana n taai aika? Tao ko kona ni mataku ke wareka te rongorongo n te maungatabu ni kabuta ae nako ao tarai ana katoto te Atua ni “bwanaa ni kauring.”

Reirei ao Berita aika Tabu 1:16.Tera ae nanonaki ni “katean [Ueana] n raoiroina”? Ti na kanga n ataia raoi bwa ti bon karaoa anne, nakon are n nakonako “inanon [oin] kawaira”?

Reirei ao Berita aika Tabu 1:30.Tera ae nanonaki n taekinna bwa te Ekaretia e bon “koaua ao e maiu”? Ni karekean aia iango kaain am utu n taekan te titiraki aei, tao ko kona n kaota nakoia tamnein bwaai aika maiu ao bwaai aika aki maiu. Ko kona naba ni marooro bwa tera ae ko kona ni karaoia ma am utu n buoka ni “uotarake [te Ekaretia] ni waaki nako mai nanon te roo ao te rootongitong.”

Reirei ao Berita aika Tabu 19:19.Iangoa te babaire ma am utu bwa kam na kanga n “ukori tuua aikai” iananon Reirei ao Berita Aika Tabu n te ririki aei. Ko na kanga ni karaoa am kamatebwai ni koroboki aika tabu bwa kanga ai anuan mwakoron maiuia am utu? Tera iango ni kamatebwai are e na kona ni buokiko n reiakinna man koroboki aika tabu? (Taraa “Iango ni Katamaroa Ami Kamatebwai n Koroboki aika Tabu n te Utu” ni moan te bwai ni ibuobuoki aei.)

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Anene aika rineaki: “Follow the Prophet,” Aia boki n anene Ataei, 110–11, riki te kabane ni kibu.

Kanakoraoan Am Kamatebwai

Kakaea Iesu Kristo. Oin bukin koroboki aika tabu bon kakoauan te Tia Kamaiu ao Ana euangkerio. Ngkai ko wareka Reirei ao Berita aika Tabu 1, iangoia ni maakena ke taui mwiin kiibu are reireiniko te bwai teuana n taekan Iesu Kristo.

Te moan kaotioti nakon kaokan te Ekaretia a ikoikotaki nakon te Boki n Tua.