Iango ni Kanakoraoa Am Kamatebwai ni Utu ni Koroboki Aika Tabu

Kamatebwaian koroboki aika tabu n te utu n tainako bon te kawai ae korakora ae e na buokiko n reiakina te euangkerio. Mwaitira ao maanra ae ko warekia ni bootaki ma am utu e aki kakawaki riki nakon ae ko na teimatoa n am kekeiaki. Ngkana ko karaoa te kamatebwai ni booki aika tabu bwa te waaki ae kakaawaki n am utu, ko na buokiia kaain am utu n kaan imarenaia ao nakon Iesu Kristo ao ni katea aia koaua iaon aan Ana taeka.

Iangoi titiraki aikai:

• Ko na kanga ni kaungaia kaain am utu bwa a na kamatebwai booki aika tabu i bon irouia?

• Tera ae ko kona ni karaoia ni kaungaia am utu bwa a a tibwaua te bwai ae a reiakinna?

• Ko na kanga ni kamatatai reirei aika ko a tia n reiakin n Reirei ao Berita aika Tabu n taai n reirei ni katoabong?

Uringnga bwa te mweenga bon te tabo ae katauaki ibukin reiakinan te euangkerio. Ko kona n reiakinna ao n anga reirei iaon te euangkerio n te mweenga ni kawai ake a kona ni karaoaki inanon te kiraati n te Ekaretia. Ko na rangi ni kakauiango ngkana ko iangoi kawai ni buokiia am utu n reirei man booki aika tabu.

Iango iaon waaki ni kakukurei

Iangoi tabeua iango aikai ni katamaroaa am kamatebwai ni booki aika tabu:

Kabongana te katangitang

Anenei anene aika a na kakorakorai reirei aika reiakinaki n koroboki aika tabu. Te anene ae tamaroa ke aia anene ataei bon kanoan naba te kabwarabwara ni katoa wiki. Ko kona n anga titiraki iaon taeka ke kibun te kuna. N raonaki ma te anene, a kona am utu ni karaoi kaiia are e nako ma te anene ke n ongora nakon te anene bwa katangitang n te baekiraun ngkana a karaoi mwakuri riki tabeua.

Tibwauai koroboki aika tabu aika a uaana

Anganiia kaain te utu aia tai n tibwauai mwakoron koroboki aika tabu ake a tia ni kunei aika uaana n tain aia kamatebwai.

Kabonganaa oin am taeka

Kaoia kaain te utu bwa a na taekinna ni kakimototoa n oin aia taeka te bwai ae a tia n reiakinna man koroboki aika tabu.

Kauaei koroboki aika tabu nakon maium

Imwiin warekan te mwakoro man koroboki aika tabu, tuangiia kaain te utu bwa a na tibwauai kawai bwa e kanga te mwakoro anne ni kaineti nakon maiuia.

Anga te titiraki

Kaoiia kaain te utu bwa a na tabeka te titiraki iaon te euangkerio, ao kabanea te tai ni kakaai kiibu are e na kona ni buokia ni kaekaa te titiraki.

Kaota te kibu

Rinea te kibu ae ko kunea bwa e uaana, ao kateia n te tabo are a na kona n nooria iai kaain te utu. Kaoia kaain te utu ake tabeman bwa a na rinea te kibu are a na kaotia.

Karaoa karinanin kiibu

Ni kabane kaain te utu, rinei tabeua kiibu ake ko tangiria ni maroroakinna n te wiiki ae e na roko.

Kamatenanoi kiibu

Rinea te mwakoro man te kibu are e uaana nakon am utu, ao kaoiia kaain te utu bwa a na kamatenanoa man kaokiokia ni katoabong ke n takakaro n te keim ni kauring.

Tibwauai reirei man bwaai ni kabootau

Kakaai bwaai aika irekereke nakon mwakoro ao kiibu ake ko wareki n te utu. Kaoia kaain te utu bwa ana taekinna bwa a kanga bwaai n tatabeua nako n irekereke ma reirei inanon koroboki aika tabu.

Rinea atuun te reirei

Tuangiia kaain te utu bwa ana karekea aia tai n rinei atuun reirei are ana bane ni kamatebwaia kaain te utu. Kabongana te Topical Guide, te Bible Dictionary, ke te Kairi nakon Koroboki aika Tabu (scriptures.lds.org) ni kakaai kiibu iaon atuun te reirei.

Korea te tamnei

Wareki tabeua kiibu n te utu, ao imwiina karekea aia tai kaain te utu bwa a na korea te bwai teuana are e irekereke ma te bwai ae ko warekia. Kabanea te tai ni maroroakin aia tamnei temanna imwiin temanna.

Karaoa te kaotioti n te karaki

Imwiin warekan te karaki, kaoia kaain te utu bwa ana karaoa kaina. Imwiina, taekinna bwa e kanga te karaki n irekereke ma bwaai aika ko a tia n taneiai ni karaoi n tatabemaniia ao n te utu.

Reiakinaia Ataei

Ngkana iai ataei aika a uarereke n am utu, aikai tabeua waaki ni kakukurei aika a na kona ni buokiia n reiakin:

Anene

Anene n taromauri ao anene man Aia Boki n Anene Ataei a anga reirei ma te mwaaka. Reirei nako n te boki aei e kakanoa naba n te anene ae tamaroa. Ko kona ni kabongana te intekiti ibukin atuun te rongorongo mai buki n aia Boki n Anene Ataei ni kakaei anene ake a irekereke ma reirein te euangkerio ake ko anga. Buokiia am ataei ni kairekerekei rongorongo n taian anene nakon maiuia.

Ongora nakon ke karaoa kain te karaki

Ataei aika a uarereke a tatangiri karaki—man booki aika a tabu, man maium, man rongorongon te Ekaretia, ke man ana maekatiin te Ekaretia. Kakaai kawai aika ko na katabeia iai n te karaki. A kona n taui tamnei ke bwaai, koroi tamnein bwaai aika a ongo, karaoa kain te karaki, ke n ibuobuoki n taekina te karaki. Buokiia am ataei bwa a na atai koaua n te euangkerio inanon karaki aika ko tibwauai.

Wareka te kibu

Ataei aika a uarereke a aki baati ni wareware, ma ko kona naba ni katabeia bwa a na reirei man koroboki aika tabu. Ko na bae ni kainnanoia ni kabanea aia iango iaon teuana te kibu, mwakoron te kibu, ke te taeka.

Taraa te tamnei ke mataku n te witeo

Anga titiraki ibukin te tamnei ke te witeo are irekereke ma reirein te euangkerio are maroroakinaki. Te katooto, ko kona n titiraki, “Tera ae riki n te tamne aei? E kanga am namakin iai?” Te Gospel Library app, te Gospel Media Library iaon ChurchofJesusChrist.org, ao children.ChurchofJesusChrist.org bon taabo aika raoiroi ibukin tamnei ao witeo.

Karaoia

Ataei a kona ni kateitei, korotamnei, ke ni karana te bwai are e irekereke ma te karaki ke reirei ake a reiakinii.

Ira buakon te reirei n bwaai ni kabotau

Te reirei ma te bwai ni kabotau e kona ni buokiia am ataei n ataa te reirei n te euangkerio ae kaangaanga te ota iai. Ngkana ko kabongana te reirei ma te bwai ni kabotau, kakaai anga aika a na kona iai am ataei n tibwatibwa. A na reiakina ae mwaiti riki man taneiai ni marooro nakon ae ti taraakin te kamataku.

Kataneiai

Ngkana a karaoi kataneiai ataei ni baika a kona n riki are a kona ni kaitarai ni maiuia, a na kona n oota riki bwa a kanga reirein te euangkerio ni uaana nakon maiuia.

Manga kaoki karaoan mwakuri

Ataei aika a uarereke a na kainnanoia n ongoraeakin iango tabeua te tai bwa a aonga n oota iai. Te katooto, ko kona n tibwaua te karaki tabeua te tai ni kawai aika a kakaokoro—wareware man koroboki aika tabu, kakimototoi n oin am taeka, kariaia am ataei bwa a na buokiko n karakina te karaki, kaoiia bwa a na katea kain te karaki, ao a mwaiti riki.

Kairekerekea ma oin aia kouru ibukin te rikirake

Kamatebwaian koroboki aika tabu n te utu e kona n anga te kaunganano nakoia te roronrikirake ao ataei n katei kouru ibukin aroia n te tamnei, rabwata, wanawanaia ao reitakia (tara Ruka 2:52).

Reiakinaia Kairake

Ngkana iai am ataei n am utu, aikai tabeua waaki ni kakukurei aika a na kona ni buokiia n reirei:

Kaoiia bwa a na anga reirei

E bati riki ae ti reiakinna ngkana ti anga reirei nakon are ti te ongoraeakini. Angania kairake aia tai n kairi marooro n te utu ibukin koroboki aika tabu.

Kairekereka ma te tiemenari

N te ririki aei ataei a kamatebwaia Reirei ao Berita aika Tabu. Ngkana am ataei e kakaea te tiemenari, kaoiia bwa a na tibwaua baike a reiakin ikekei.

Kauaei koroboki aika tabu

N tabetai e kangaanga irouia kairake bwa a na noora reitakin koaua ao reirei n koroboki aika tabu ma maiuia. Buokiia n nooria bwa a kanga karaki ao reirei n koroboki aika tabu n kaineti ma waaki ake a kaitara ma ngaai n te mwenga, n te reirei, ke ma raoiraoia.

Anga titiraki aika kaungaa te iango

A mwaiti kairake aika a tamaroa aia kaeka nakon titiraki are e angania te kona n kaota aia iango ma namakin n koroboki aika tabu nakon are manga kaokan are taekinaki n te kibu. N aron te katooto, ko kona n titiraki, “Tera ae rereiniko te Uea n kiibu aikai?” ke “Ngkoe iroum bukin tera e rang ibuobuoki te kaotioti aei nakoia Aika Itiaki inanon 1830 tabun?”

Kairekerekea ma oin aia kouru ibukin te rikirake

Kamatebwaian koroboki aika tabu n te utu e kona n anga te kaunganano nakoia te roronrikirake ao ataei n katei kouru ibukin aroia n te tamnei, rabwata, wanawanaia ao reitakia (tara Ruka 2:52).

Butimwaei aia titiraki

Te titiraki mairoun te kairake bon te tai ae kakaawaki n tibwaua te koaua ao n ukora te mataata n atuun te reirei are e nano iai neienne ke teuanne. Tai maaku n taian titiraki ke n katibanakoi, e ngae ngke aki irekereke ma atuun te reirei. Tiaki te kangaanga ngkana akea iroum kaeka ni kabane. Te mweenga bon te tabo ae tamaroa n kaai ni kakaei reeke.

Kaungaia bwa a na tibwauai aia nonoori

Iai aia taratara ae onoti kairake ao aia iango n reita kamatebwaian koroboki aika tabu n te utu. Kaotia nakoia bwa ko nano n baike e reireiniia te Tamnei n koroboki aika tabu. Ko kona naba n tuangiia bwa a na tibwauai aia nonoori man oin aia kamatebwai.

Rooti bwaai nako

Ngkana iai am ataei ae aki kan ira buakon kamatebwaian koroboki aika tabu n te utu, kakaei anga riki tabeua n reitaki ma neienne ke teuanne. N aron te katooto, ko kona n marooroakina te euangkerio n arona ae aki raka ke n tibwaua te kibu ae tamaroa n te aro ae aki wii ni mitinare ke n riao? Kamatebwaian booki aika tabu tiaki n ae e na titebo arona n utu nako. Tabeman ataei e tamaroa irouia kamatebwaian koroboki aika tabu ibon irouia. Bwaina te tataro ao ira ana wirikiriki te Tamnei.

E taku Beretitenti Russell M. Nelson “I berita bwa ngkai kam botumwaaka ni mwakuri ni manga karika mweengami bwa te tienta n reirein te euangkerio, inanon te tai ami Tabati a na kakukurei. Natimi a na kukurei n reiakina ao ni maiuakin Ana reirei te Tia Kamaiu, ao korakoran te kakaitara inanon maiumi ao ni mweengami e na keerikaki. Bitaki n am utu e na korakora ao e na teimatoa” (“Becoming Exemplary Latter-day Saints,” Ensign ke Riaona, Nobembwa. 2018, 113).