“Kabonganakin Nakomai, Iriirai—Ibukiia Aomata n Tatabemaniia ao Utu,” Nakomai, Iriirai—Ibukiia Aomata n Tatabemaniia ao Utu: Reirei ao Berita aika Tabu 2021 (2020)
“Kabonganakin Nakomai, Iriirai—Ibukiia Aomata n Tatabemaniia ao Utu,” Nakomai, Iriirai—Ibukiia Aomata n Tatabemaniia ao Utu: 2021
Kabonganakin Nakomai, Iriirai—Ibukiia Aomata n Tatabemaniia ao Utu
Antai Ibukina te Bwai n Ibuobuoki Aei?
Te bwai n ibuobuoki aei bon ibukiia aomata n tatabemaniia ao utu n te Ekaretia. E karaoaki bwa e na buokiko n reiakina te euangkerio—tao i bon iroum ke ma am utu. Ngkana ko tuai ni kamatebwaia te euangkerio n taai aika nako, e kona ni buokiko te bwai n ibuobuoki aei ni waakina am kamatebwai. Ngkana e a kaman tia n reke kateim ae raoiroi iaon reiakinan te euangkerio, e kona te bwai n ibuobuoki aei ni buokiko ni karekei am atatai aika a na rangi ni uaana riki.
N na Kanga ni Kabongana te Bwai n Ibuobuoki Aei?
Kabongana te bwai n ibuobuoki aei ni kawai aika e na ibuobuoki nakoim. Ko kona ni kunea bwa e rangin n ibuobuoki bwa te kairi ke te buoka ibukin kamatebwaiakan booki aika tabu i bon iroum ao am utu. Ko kona naba ni kabongana n te kainutu. Te kabwarabwara aei e katurui reirei ake a kuneaki n Reirei ao Berita aika Tabu, e anga iango ibukin te kamatebwai ao mwakuri ni kauring ibukiia aomata n tatabemaniia ao utu, ao e katauraoa te tabo ibukin korean aia namakin.
Nakomai, Iriirai—Ibukiia Aomata n Tatabemaniia ao Utu e aki kantaningaki bwa e na onei mwin ke n kaiangatoa ma bwaai aika tamaroa ake ko karaoi. Irii ana kairiiri te Tamnei ni baireia bwa ko na kanga ni kamatebwaia ana taeka te Atua.
E na Kanga te Bwai n Ibuobuoki aei ni Kaineti ma Tera ae Riki n te Ekaretia?
Te kamataata n te bwai n ibuobuoki aei a baireaki nakon bairean tain te wareware n te wiiki. Nakomai, Iriirai—Ibukin te Moanrinan ao Nakomai, Iriirai—Ibukin te Reirei n Tabati ira te babaire naba anne. Ni boutoka am kekeiaki n reirei ao ni maiuakina te euangkerio ni mweengam, a na anganiko am tia reirei n te aro am tai n tibwauai am atatai, am iango, ao am titiraki iaon koroboki aika tabu aika ko a tia ni kamatebwaia ni mweengami.
Bukina bwa te Reirei n Tabati e karaoaki tii uoua te tai n te namwakaina, taan reirei n te Reirei n Tabati a na rinea ke n taonna ke ni ikotii reirei ake a baireaki n teimatoa n irii babaire ni katoa wiiki. E kona naba ni karaoaki aei iaon wiiki ngkana a aki karaoaki bootakin te Ekaretia ibukin te maungatabu n te titeiki ke bukina riki tabeua. Inanon wiiki aikai ko kaoaki bwa ko na reitinako ni kamatebwaia Reirei ao Berita aika Tabu ni mweengam.
I Kainnanoia Bwa N na Ira te Babaire Anne?
Bairean te tai anne e na buokiko ni kabanea warekan Reirei ao Berita aika Tabu n tokin te ririki aei. Irarikin anne, irakin te aeka ni babaire anne n aroia tabeman e kona ni kairi nakon atatai aika uaana ni mweengam, n te ekaretia ao n taabo nako. Ma tai iangoia bwa ko na riai n ira taina ke te kairoroaki bwa ko na wareki kibu n bane, te baire anne bon ti te kairi n buokiko n barongaiko. Te bwai ae kakawaki bwa kam reiakina te euangkerio n tatabemani ngkami ao n ami utu.