“Iango ni Kanakoraoa Am Kamatebwai ni Koroboki Aika Tabu,” Nakomai, Iriirai—Ibukiia Aomata n Tatabemaniia ao Utu: Reirei ao Berita aika Tabu 2021 (2020)
“Iango ni Kanakoraoa Am Kamatebwai ni Koroboki Aika Tabu,” Nakomai, Iriirai—Ibukiia Aomata n Tatabemaniia ao Utu: 2021
Iango ni Kanakoraoa Am Kamatebwai ni Koroboki Aika Tabu
Aikai tabeua kawai aika a bebete ni kawaekoa am kamatebwai n ana taeka te Atua inanon koroboki aika tabu.
Tataro ibukin te Kairiri
Koroboki aika tabu bon ana taeka te Atua, ngaia are butiia bwa e na buokiko n oota iai.
Kakaai Koaua ibukin Iesu Kristo
Koroboki aika tabu a reireiniira bwa bwaai nako a kakoaua Kristo (tara 2 Nibwaai 11:4; Mote 6:63), ngaia are korei ao mwaaken kiibu ake a kakoaua te Tia Kamaiu, kananoa am tangira ibukina, ao n reirei aron Iriirana.
Kakaai Taeka ao Mwakoro n Taeka Aika a Kaunga te Nano
Ko kona ni kunea bwa taeka ao mwakoro n taeka inanon booki aika tabu a taraa ni kakawaki nakoim, ae kanga titebo ma a koreaki ti ibukim. A kona n ae a namakinna n ae e kaineti ao ni kaunga ao n anai nano nakoim. Iangoia ni mwaken inanon am boki aika tabu ke koroi inanon am tieno ni kamatebwai.
Taratarai Koaua n te Euangkerio
N tabetai koaua n te euangkerio (n tainako a atongaki bwa reirei ke tuua) a taekinaki ni kaineti, ao n tabetai a katautauaki rinanon te katooto ke te karaki. Titirakiniko, “Tera koaua aika akea tokiia aika reireinaki inanon kiibu aikai?”
Kakauongo nakon te Tamnei
Tarai raoi am iango ao am namakin, e ngae ngke aki kaineti nakon te bwai ae ko warekia. A kona iango aikanne n riki bwa bwaai raoi aika e tangiria Tamara are i Karawa bwa ko na reiakinna.
Kabotaui Kanoan Koroboki AikaTabu Nakon Maiura
Iangoia bwa a na kanga karaki ao reirei inanon booki aika tabu ni kaineti nakon maium. Te katooto, ko kona n titirakiniko, “Tera taneiai aika I a tia ni karekei aika ti tebo ma aika I wareki?” ke “N na kanga n ira ana banna ni katooto te aomata aei inanon koroboki aika tabu?”
Tabeka te Titiraki ngkana ko Kamatebwai
Ngkana ko kamatebwai koroboki aika tabu, ko kona n iangoi titiraki. A kona titiraki aikai ni kaineti nakon te bwai ae ko warekia ke nakon maium ni kabuta. Iangoi titiraki aikai ao tarai rekeia ngkana ko reitinako ni kamatebwai koroboki aika tabu.
Kabonganai Ibuobuoki ni Kamatebwaian koroboki Aika Tabu
Ni karekei nonoori riki n taian kibu aika ko wareki, kabongana bwaai aika a na taraaki inano, te Topical Guide, te Bible Dictionary, te Kairi nakon Koroboki aiika Tabu (scriptures.lds.org) ao buokan te kamatebwai ake tabeua.
Iangoi Kanoan Koroboki Aika Tabu
Ko kona ni karekei atatai aika uaana n koroboki aika tabu ngkana ko taraa te boto n iango—n ikotaki ma bwaai aika a riki ke te tabo are nako mai iai. Te katooto, ataakin aroia ao aia onimaki aomata are e taetae te Atua nakoia e kona ni buokiko n mataata riki n nanon Ana taeka.
Korei Am Iango ao Am Namakin
A mwaiti kawai aika ko kona ni koroi iai mwiin am namakin aika a roko n am tai ni kamatebwai. Te katooto, ko kona ni mwaakena te taeka ae uaana ke mwakoron taeka ao koroi am iango bwa te bwai ae e na taraaki inanon am boki ni booki aika tabu. Ko kona naba ni kawakina te tieno ibukin atatai aika nano, namakin, ao iango aika ko karekei.
Kamatebwaia aia Taeka Burabeti ao Abotoro ni Boong Aika Kaitira
Wareki bwaai aika a tia n reirei burabeti ao abotoro ni boong aika kaitira ibukin taian reirei aika ko kunei inanon booki aika tabu (te katooto, taraa conference.ChurchofJesusChrist.org ao ana maekatiin te Ekaretia).
Tibwauai Atatai Aika a Nano
Maroroakinan atatai aika a nano n oin am kamatebwai tiaki ti te kawai ae tamaroa n reireiniia tabeman, ma e ibuobuoki naba ni kakorakora otam n te bwai ae ko a tia ni warekia.
Maiu man te Bwai ae Ko Reiakinna
Kamatebwaian koroboki aika tabu a na aki tii kaungaira ma e na kairiira naba nakon aron maiura. Kakauongo nakon ana kairoro te Tamnei n te bwai ae ko na karaoia ngkana ko wareware, ao ni motinnanoia bwa ko na karaoi kairoro aikanne.
E taku Unimwaane David A. Bednar: “Ti riai n aki kantaningaa te Ekaretia ngkai te bootaki ngaia bwa e na reireiniira man tuangiira bwaai ni kabane ake ti kainnanoi bwa ti na atai ma ni karaoi n riki bwa taan iriiria aika kakaonimaki ao n teimatoa n ninikoria ni karokoa te toki. Ma, tabera ae onoti bon te reirei iaon te bwai ae ti riai n reiakinna, maiuakinan te maiu are ti bon ataia bwa ti riai ni maiuakinna, ao te riki bwa aomata are e kantaningaia te Matita ibukira. Ao mwengara bon boton te tabo ibukin te reirei, maiu, ao te riki nako iai” (“Prepared to Obtain Every Needful Thing,” Ensign ke Riaona, Meei 2019, 102).