“Tianuare 25–31. Reirei ao Berita aika Tabu 6–9: ‘Aio Bon Tamnein te Kaotioti,’” Nakomai, Iriirai—Ibukiia Aomata n Tatabemaniia ao Utu: Reirei ao Berita aika Tabu 2021 (2020)
“Tianuare 25–31. Reirei ao Berita aika Tabu 6–9,” Nakomai, Iriirai—Ibukiia Aomata n Tatabemaniia ao Utu: 2021
Tianuare 25–31
Reirei ao Berita aika Tabu 6–9
“Aio Bon Tamnein te Kaotioti”
Te Uea e kaota te koaua nakoira inanon ara iango ao nanora (taraa Reirei ao Berita aika Tabu 8:2–3). Ngkana ko wareka Reirei ao Berita aika Tabu 6–9, korei am namakin are ko karekei .
Korei Am Namakin
Inanon tain bwakan baan kaai n 1828, te tia reirei ae kairake arana Oliver Cowdery e riki bwa te tia reirei i Manchester, New York, ao e maeka ma ana utu Lucy ao Iotebwa Timiti tei ikawai. Oliver e ongo taekan natiia ae Iotebwa, are ngkai e maeka i Harmony, Pennsylvania, ao Oliver, are e namakina bwa te tia ukora te koaua, e tangiria ni kan ataia riki. Te Timiti e kabwarabwara rokon te anera, rekooti ae bwain ngkoa, ao te bwai n tutuaraoi n rairairi mairoun mwaakan te Atua. Oliver e anaaki nanona. E bon koaua? Lucy ao Iotebwa te ikawai a anganna reireiana are e kona naba ni kaineti nakon are e ukora te koaua: tataro ao bubutiia te Uea.
E tataro Oliver ao bubutia te Uea, ao te Uea e kaekaa, ma te taeka ae amaarau ao ni karaunano nakon ana iango Oliver. Te kaotioti, e kunea Oliver, bwa e konaa n roko i bon irouna—te bwai are e na reiakinna riki ae e rangi ni korakora inanon namakaina aika a na roko. Kaotioti tiaki tii ibukiia burabeti; bon ibukiia ake a tangiria ao n ukoria. Oliver e bon tuai atai bwaai ni kabane, ma e tau ana atatai ni waaki nako. Te Uea e karaoa te bwai teuana ae kakawaki rinanon Iotebwa Timiti, ao Oliver e tangiria n riki bwa mwakorona.
Ibukin taekan rongorongona bwa e kanga n reke Reirei ao Berita aika Tabu 6–9, taraa Saints, 1:58–64; “Days of Harmony” (witeo, ChurchofJesusChrist.org).
Iango ibukin Am Kamatebwai I Bon Iroum ni Koroboki Aika Tabu
Reirei ao Berita aika Tabu 6; 8–9
Tamara are i Karawa e taetae nakoiu rinanoia “Tamnein te koaua.”
Inanon te Tiburing 1829, e mwananga Oliver Cowdery nako Harmony ao e ibuobuoki n riki bwa ngaia ana tia koroboki Iotebwa Timiti ngkai a raira Ana Boki Moomon. Ngkai Oliver e a tia ni karekea tamnein raoi waakin te kaotioti n te rairairi. Te taneiai e kakukureia, ao e iangoia ngkana e kona naba ni kakabwaiaaki ma te bwai n tutuaraoi n rairairi. Te Uea e kariaiia ni kataia bwa e na rairairi, ma karekean te kaotioti e bon boou ibukin Oliver, ao ana kakatai e aki nakoraoi. E bon mwaiti bwaai are e na reiakin, ao Reirei ao Berita aika Tabu 6, 8, ao 9 e kaotaki iai bwa te Uea e bon kukurei n reireina.
Ngkana ko wareki mwakoro aikai, ataia bwa tera ae reireia te Uea n taekan te kaotioti i bon ibukim. E kanga Ana taeka n irekereke nakon te taneiai are ko a tia n rinanona—ke are ko tangiria ni karekea?
N aron te katooto, tera are Reirei ao Berita aika Tabu 6:5–7; 8:1; 9:7–8 ae taekinaki iai bwa tera ae kainanoia te Uea iroum imwain ae E kaota Ana kantaninga?
Tera ae ko reiakinna ma Reirei ao Berita aika Tabu 6:14–17, 22–24; 8:2–3; 9:7–9 n taekan kakakoron kawai ake a roroko iai kaotioti?
Iai riki bwaai ake ko reiakin n taekan kaotioti man mwakoro aikai?
N reiakinan riki taekan kaotioti, taraa Russell M. Nelson, “Revelation for the Church, Revelation for Our Lives,” Ensign ke Riaona, Meei 2018, 93–96; Julie B. Beck, “And upon the Handmaids in Those Days Will I Pour Out My Spirit,” Ensign ke Riaona, Meei 2010, 10–12. Ibukin riki rongorongon taekan “ana bwai n tutuaraoi Aaron” kabwarabwaraaki n mwakoro 8, taraa “Oliver Cowdery’s Gift,” Revelations in Context , 15–19.
Reirei ao Berita aika Tabu 6:18–21, 29–37
Taraa Kristo n ami iango ni kabane.
E ngae ngke Iotebwa e a kaman tia n rinanon “matoan kaangaanga” ngke e karaoa ana mwakuri te Uea (Reirei ao Berita aika Tabu 6:18), ngaia ao Oliver kanga aki ataia bwa e kanga matoan kaangaanga akanne ake ana roko nakon ririki ake mwiina. Ma te Uea e ataia, ao E ataia bwa tera kataakim nakon taai aika ana roko. Ana reirei nakon Iotebwa ao Oliver n Reirei ao Berita aika Tabu 6:18–21, 29–37 e konaa naba ni buokiiko. A na kanga Iotebwa ao Oliver ni karekea te namakin imwin ongoraean taeka aikai? Tera ae ko karekea inanon kiibu aikai are e buokiiko ni kakoaua te Uea? Ko na kanga n taraa Kristo riki inanon maium?
Oliver Cowdery, iroun Lewis A. Ramsey
Reirei ao Berita aika Tabu 6–7; 9:3, 7–14
“E ngae ngkana ko tangiria mairou e na bon reke.”
Nooria bwa mwaitira te taeka n aron “tangira” ke “tangiria” n oti inanon mwakoro 6 ao 7. Tera ae ko reiakinna man mwakoro aikai n taekan kakawakina are te Atua e katukua iaon baike ko tangirii? Titirakiniko ana titiraki te Uea n Reirei ao Berita aika Tabu 7:1: “Tera ae ko tangiria?”
Teuana te bwai ae tangiria Oliver Cowdery ae raoiroi—n rairairi n aron are karaoia Iotebwa—e aki koro nanona. Ngkana ko wareka Reirei ao Berita aika Tabu 7:14, tera te namakin are ko na karekea bwa e na buokiiko ngkana te bwai ae ko tangiria e aki koro nanona?
Taraa naba Reirei ao Berita aika Tabu 11:8; Dallin H. Oaks, “Tangiria,” Ensign ke Riaona, Meei 2011, 42–45.
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Reirei ao Berita aika Tabu 6;6-7,13.Ko na kanga ni buokiia kain am utu n oota bwa “kaubwai” ni koaua a kuneaki n te maiu ae akea tokina? (kiibu 7). Ko kona ni kaoiia kaain am utu ni karaoa aongkoa te mane ao koreia ke korotamnei iaona tabeua man kakabwaia aika mwaiti ake a karekea am utu ibukin te euangkerio ae kaokaki.
-
Reirei Ao Berita aika Tabu 6:15, 22–23; 8:2–3; 9:7–9.Warekan kiibu aikai n taekana bwa e kanga te Atua n taetae nakoia Natina tao bon te tai ae tamaroa n tibwaia ma am utu bwa e kanga n tia n taeta nakoim.
-
Reirei ao Berita aika Tabu 6:33–37.A kona kaain te utu n tibwai kawai ake a kona ni “karaoa ae raoiroi,” riki ngkana a namakina te maaku. E kona naba ni buokia ni matakuakin ni kabane ke tabeua ana rongorongo Unimwaane Ronald A. Rasband“Be Not Troubled” (Ensign ke Riaona, Nobembwa 2018, 18–21). Tera ae nanonaki n “taraa [Kristo] n am iango ni kabane”? (te kibu 36). Tera tabeua katooto mairouia aomata ake a rairaki nakon te Uea n tokanikai n te nanououa ao te maaku? (taraa, ibukin te katooto, Ita 4; Aramwa 26:23–31).
-
Reirei ao Berita aika Tabu 8:10.E na riki aio bwa te tai ae tamaroa n tibwaia bwa e kanga te onimaki iroun Iesu Kristo n tia ni kakorakorako ma am utu. Bukin tera e kakawaki bwa ti na “bubuti inanon te onimaki”? Tera kakabwaia ake ko a tia n noori man ukoran kaeka ke buoka inanon te onimaki?
Ibukin iango aika a mwaiti riki ibukiia ataei, taraa kamataata n te wiiki aei n Nakomai, Iriirai—Ibukin te Moanrinan.
Anene aika rineaki: “Dare to Do Right,” Aia Boki n Anene Ataei,158.
Bwanaa man Kaokan Bwaai
Rairan Ana Boki Moomon
Inanon Eberi 1829, te namakaina ngke mwakoro 6–9 man Reirei ao Berita aika Tabu ngke a karekeaki, oin ana mwakuri Iotebwa Timiti bon rairan Ana Boki Moomon. Ngke e titirakinaki rimwi bwa e na taekinna bwa e kanga te rekooti aei n rairaki, Iotebwa e taku “bwa e aki katauakibwa e na tuangaki te aonaaba ni kabane taekana.”1 E taekinna ni kabebetea bwa e bon rairaki man “ana bwaintituaraoi, ao mwaakan te Atua.”2
Tiaki atai kabwarabwara n ae nano ibukin te aro n rairairi are kakai, ma ti ataia bwa Iotebwa Timiti bon te tia mamata, ae buokaki man bwai ni buobuoki are e katauraoia te Atua: uoua atibu aika itiaki aika a aranaki bwa te Urim ao te Tummim ao teuana riki te atibu ae arana te atibu ni mamata.3
Te rongorongo ae i mwiina, man maata ni kakoaua nakon te waaki n rairairi, e boutokaa ana kakoaua Iotebwa Timiti.
E bon kakoauaaki bwa te bwaoki aei, are bon ana bwaoki Hyrum Smith, e bon kabonganaaki n te tai ae e uarereke ni kawakina te bwaatua koora.
Emma Timiti
“Ngke e raira Ana Boki Moomon kainabau , I korea mwakorona, ngke e taetaekina n tatabeua taekana, te taeka ibukin te taeka, ao ngke e roko iaon aara raoi ake e aki konaa ni tirebwarei, ke taeka ake abwabwaki, e tiberingiia, ao ngke I tabe ni koroi taekaia, ngkana I kaburea tiberingiana, e bon katokai ao e kaeta au tibering e ngae ngke e bon kaangaanga irouna n nooria bwa e kanga are I koroi n te tai anne. E ngae ngke te taeka Tiera e aki kona n tirebareia n te moan, ma e bon tiberingiia, ao I katirebarea ibukina.”4
“Te bwaatua n taainako a wene iaon te taibora n akean iangoan karabaakina, e niiraki n te kunikai ae bwain rabunan te taibora, are I anganna bwa e na niroaia inanona. I a tia n te taina n ringii bwaatua, ngke a kaweneaki iaon te taibora, n namakinii iaan baiuao aron teiia. A taraa n nimaonnon aiaron te beeba ae maten, ao ni kona n keruaatai n aron tangin biiti aika manii ngkana e kamwaingaki rarikina ma aobuanibai, n aron tabetai temanna e karaoa kabutan aobuanibaina n taraan te boki. …
“Au koaua n Ana Boki Moomon bon ae mairoun te Atua ni koaua—I a tia ni karekea te aki nanokokoraki n taekana. I bon rauaki bwa akea te aomata ae kona ni warekii koroboki aika ana rairaki ma ti ngkana e kairaki iroun te tamnei; ibukina bwa, ngke I bon mwakuri bwa a na tia koroboki, e kona [Iotebwa] ni warekia nakoiu teuana te aoa imwin teuana; ao ngkana e oki imwin amwarakena, ke imwin motirawana, e na bon waekoa ni moanna man are e a tia n toki iai, man aki manga taraa te beeba are korobokiaki ke n tangira warekan mwakorona nakoina. Aio te bwai ae e tataneiai iai ni karaoia. E na bon aki kona n reke aio nakon te aomata ae reiakinaki bwa e na kona ni karaoa aei; ao, ibukin temanna ae aki ataa te bwai ae e na karaoia ao n aki reiakinaki n aiarona , e a bon taraa ni kaangaanga.”5
Kabwarabwaraan Emma ao Iotebwa Timiti iroun Michael T. Malm
Oliver Cowdery
“I koroboki ma oin au been ni kabwanina korean Ana Boki Moomon (katukui tabeua baana) ngkai e bon nako mai wiin te burabeti, ngkai e rairia man ana bwai n tutuaraoi ao mwaakan te Atua, man kabonganaan te Urim ao Thummiim, ke, ngkai e bon aranaki man te boki, bwaai n raitaeka aika tabu. I bon noori n oin matau, ao n taui n oin baiu, tenaan bwaatua koora are karaoaki te rairairi mai iai. I noori bwaai n raitaeka.”6
Iotebwa Timiti ao Oliver Cowdery a reiakinna ae mwaiti rinanon waakin mwakurian rairakin bwaatua koora.