“Tianuare 11–17. Reirei ao Berita aika Tabu 2; Iotebwa Timiti—Rongorongo 1:27–65: ‘A na Rairi nanoia Naati nakon Tamaia,’” Nakomai, Iriirai—Ibukin te Moanrinan: Reirei ao Berita aika Tabu 2021 (2020)
“Tianuare 11–17. Reirei ao Berita aika Tabu 2; Iotebwa Timiti—Rongorongo 1:27–65,” Nakomai, Iriirai—Ibukin te Moanrinan: 2021
E Weteai n Arau, iroun Michael Malm
Tianuare 11–17
Reirei ao Berita aika Tabu 2; Iotebwa Timiti—Rongorongo 1:27–65
“A na Rairi nanoia Naati nakon Tamaia”
Moana am katauraoi man warekan Reirei ao Berita aika Tabu 2 ao Iotebwa Timiti—Rongorongo 1:27–65. Taian iango inanon aei a kona ni buokiko n reirei koaua ake inanon kibuntaeka aikai.
Korei Am Namakin
Kaungaa te Tibwatibwa
Ko kona ni moana am kiraati ni butiia ataei bwa a na tibwaua aia atatai ibukin te anera Moronaai ngke e kawara Iotebwa Timiti.
Reirei te Reirei: Ataei aika a Uarereke
Rongorongon—Iotebwa Timiti 1:27–54
Tamara are i Karawa e wetea Iotebwa Timiti bwa e na buokiia ni karaoa Ana mwakuri.
E kona ni kakorakoraaki aia kakaitau ataei ngkai a reiakina taekan te mwakuri are e weteaki iai iroun te Uea bwa e na karaoia.
Waaki ni Kakukurei aika a Kona ni Karaoaki
-
Kaota tamnein Moronaai ngke e kawara Iotebwa Timiti (taraa Bokin Tamnein te Euangkerio, nambwa 91). Butiia ataei bwa a na kotei bwaai ake a noori n te tamnei. Kakimototoa rongorongon Moronaai ngke e kawara Iotebwa. N aron ae kainnanoaki, taraa Iotebwa Timiti—Rongorongo 1:27–54 ao “Mwakoro 3: Te Anera Moronaai ao Bwaatua aika Buraati” (Karaki n Reirei ao Berita aika Tabu, 13–17). Kaoiia ataei bwa a na riki bwa aongkoa ngaiia Iotebwa Timiti n aanga aika kakaokoro n te karaki man rukuman baia n aron are ngkoa a tataro, ngkoa are a tamwarakea te Tabuki are Kumora, ao a mwaiti riki.
-
Wareka Iotebwa Timiti—Rongorongo 1:33 ni kabaibati, ao butiia ataei bwa a na teirake ngkana a ongo te kibuntaeka ae “Iai ana mwakuri te Atua ibukiu ae N na karaoia.” Tera ae tangiria te Atua bwa e na karaoia Iotebwa? Tera are E tuangiira bwa ti na karaoia? Kariaia ataei bwa a na korei tamnein bwaai ake e tangiria te Atua bwa a na karaoi, n aron te tataro, te beku, ke warekan booki aika tabu.
Eria e angan Iotebwa Timiti te mwaaka ibukin kabaeakiia utu ni kabane.
N reiakina aron te mwaaka ni kabaebae are e kaokaki rinanon Iotebwa Timiti e kona ni buokiia ataei ni kakaitau n taian kakabwaia ibukia utu ae akea tokina.
Waaki ni Kakukurei aika a Kona ni Karaoaki
-
Buokiia ataei n atonga te ara ae “Eria” tabeua te tai. Butiia bwa a na kakauongo ibukin te ara aei ngkai ko wareka Reirei ao Berita aika Tabu 2:1. Kabwarabwara bwa aikai ana taeka Moronaai nakon Iotebwa Timiti, ao a taekinna bwa e na roko Eria ni manga kaoka te kariaia ibukin te nakoanibonga. Imwiina riki ao e kaoti Eria nakon Iotebwa Timiti n te Tembora ae Kirtland ao e angan te Burabeti te mwaaka ibukin kabaeakiia utu ni kabane.
-
Tuangiia ataei bwa a na tuangko bwa tera ae a tangiria n aia utu. Kaota tamnein te utu irarikin te tembora—oin am utu, ngkana e konaa (ke taraa Bokin Tamnein te Euangkerio, nambwa. 120). Kaota am koaua bwa Tamara are i Karawa e tangirira bwa tina maeka ma ara utu n aki toki, ao aio bukina ngkai E anganira taian tembora.
-
Bootaki anenea “Families Can Be Together Forever” (Aia Boki n Anene Ataei, 188). Tera ae taekinaki n te anene aei ae ti kona ni karaoia bwa ti aonga ni maeka ma ara utu n aki toki?
Reiakinan rongorongoia au bakatibu e kona ni uota te kimwareirei nakoiu.
E ngae ngke ataei aika a uarereke a kona ni kukurei ibukin ao n namakina te kimwareirei ibukin rongorongon te utu.
Waaki ni Kakukurei aika a Kona ni Karaoaki
-
Kaoa ana karo temanna te ataei bwa e na roko n te kiraati ao n tibwaua rongorongoia ana bakatibu (ao ni kaota te tamnei ngkana e tauraoi). Marooroakina taekan kimwareireim ngke ko reiakina rongorongoia am utu.
-
Anganiia ataei ni kabane te aati ae karaoaki man te beeba. Buokiia ni korei araia ao “I berita bwa N na ururingiia au bakatibu” ake iaona. Wareka Reirei ao Berita aika Tabu 2:2, ao kabwarabwara bwa e roko Eria bwa e na rairi nanora nakoia ara bakatibu.
Reirei te Reirei: Ataei aika a Ikawai
Iotebwa Timiti—Rongorongo 1:28–29
I kona n tataro ibukin kabwaraakin au bure.
Ataei ake ko reireinia n tabetai a na bae n “namakina ae a bure ibukin mamaara[ia] ao aki kororaoia” (Iotebwa Timiti—Rongorongo 1:29) n aron are e karaoia Iotebwa Timiti. Buokiia n ataia bwa a kona n rairaki nakon Tamara are i Karawa ibuin kabwaraakin aia bure.
Waaki ni Kakukurei aika a Kona ni Karaoaki
-
Wareware ma ataei n Iotebwa Timiti—Rongorongo 1:29. E kanga ana namakin Iotebwa Timiti ibukin ana kairua? Tera ae e karaoia nako iai? Tera ae ti kona n reiakinna man ana katooto Iotebwa are e kona ni buokiira ngkana ti karaoi kairua? Titirakiniia ataei bwa a kanga n ataia ae Iotebwa Timiti e weteaki mairoun te Atua e ngae ngke e aki kororaoi.
-
Bukin tera ngkai e kakawaki bwa ti na iangoia n “ata arora ao nnera imatan te [Atua]”? (Iotebwa Timiti—Rongorongo 1:29). Tuangiia ataei te bwai ae ko karaoia ngke ko miimi bwa ko tei iaa ma te Atua.
Iotebwa Timiti—Rongorongo 1:30–54
E weteaki Iotebwa Timiti iroun te Atua bwa iai te mwakuri ae e na karaoia ae kakawaki.
Kamatebwaian ana rongorongo Moronaai nakon Iotebwa Timiti e kona ni buokiia ataei ni kakorakora aia koaua ibukin wetean Iotebwa ae tabu.
Waaki ni Kakukurei aika a Kona ni Karaoaki
-
Kaoiia ataei bwa a na katea kain ke ni korea tamnein baika a riki man Iotebwa Timiti—Rongorongo 1:30–54, n aron kaotin Moronaai nakon Iotebwa (kiibu 30–47), e taetae Iotebwa nakon tamana (kiibu 48–50), ao Iotebwa ngke e kunei taian bwaatua (kiibu 51–54). Tera ae ti reiakinna man te rongorongo aei ibukin te mwakuri are e weteaki Iotebwa bwa e na karaoia?
-
Wareware ma ataei n Iotebwa Timiti—Rongorongo 1:33–35, ao butiia bwa a na kakauongo bwa tera are e tangiria Moronaai bwa e na ataia Iotebwa ibukin te mwakuri are e weteaki nako iai bwa e na karaoia. Ti kanga n ae ti a tia ni kakabwaiaaki ibukina bwa e a tia Iotebwa Timiti ni kakoroa nanon ana mwakuri ae te tia raira ana Boki Moomon? Kaoiia ataei bwa a na wareka ana Boki Moomon ni katoa tai.
Tamara are i Karawa e tangiria utu bwa a na kabaeaki inanon te tembora.
Moronaai e tuanga Iotebwa Timiti bwa e na roko Eria ni “kaoka … te Nakoanibonga” (te kibu 1). Aei e kaineti nakon te mwaaka ni kabaebae n te nakoanibonga are e kariaia utu bwa a na ikotaki n akea tokina ao n anganiira te kona ni karekei otenanti ibukia ara bakatibu inanon te tembora.
Waaki ni Kakukurei aika a Kona ni Karaoaki
-
Butiia ataei bwa a na wereka te taetae ni burabeti inanon Reirei ao Berita aika Tabu 2:1. Butiia bwa a na kakaea bwa antai ae e na kanakomaia te Uea ni boong aika kaitra ao tera ae e na kaokia te aomata aei. Kaota tamnein Eria n te Kirtland Tembora (taraa Bokin Tamnein te Euangkerio, nambwa 95), ao marooroakinna e kanga te taetae ni burabeti aei ni korobukina 13 te ririki imwiin rokon Moronaai (taraa Reirei ao Berita aika Tabu 110:13–15).
-
Kabwarabwara bwa e a tia Eria ni kaokii kiingin te nakoanibonga are e kariaia utu bwa a na kabaeaki ni kabane n aki toki. Kaoti tabeua bwaai are e na kona ni buokiia ataei ni kaotaia bwa tera ae nanonaki ni kabaean te bwai teuana, n aron te tiin n amwarake ke te baeki ae te buraetitiki ibukin kawakinan bwaai ma bwain kainana ae katikitiki. A kanga bwaai aikai ni buokiira ni kaotaira bwa tera ae nanonaki ibukin te utu ae e na kabaeaki?
-
Kaota tamnein te tembora, ao buokiia ataei n taekini tabeua bwaai ake ti karaoi inanon taian tembora. Kabwarabwara te bwabetito ibukiia maate, te mare ae akea tokina, ao kabaeakiia utu inanon te tembora a kona ni bane ni karaoaki ibukin kingin te nakoanibonga are e kaokia Eria.
-
Kaoa te ataeinnaine ke te ataeinimwaane n te uoote bwa e na tibwaua te bwai are e rinanona are ngke teuanne ke neienne e kunea aran ana bakatibu ao e bwabetitoaki ibukin ana bakatibu anne inanon te tembora.
TamneiPalmyra New York TemboraA kabaeaki utu inanon te tembora man te mwaaka are e kaokaki mairoun Eria.
Kaungaa te Kamatebwai n te Mweenga
Kaungaia ataei bwa a na butiia aia karo bwa a na karakina rongorongon temanna aia bakatibu ke buokiia ni katauraoa te amwarake ae e mamate nanoia iai ana bakatibu ao a na uaia ni kanna.
Kanakoraoan Ara Anga reirei
Buokiia ataei aika a uarereke n reireiaki man koroboki aika tabu. Ni buokiia ataei bwa a na reiakinaki man koroboki aika tabu, kabanea am tai iaon te kibu teuana ke te koroboki ke bon boton raoi te kibuntaeka. Ko na bae ni kaoiia ataei bwa a na teirake ke ni katei baia ngkana a ongo te taeka ke te kibuntaeka. (Taraa Reirei n ana Kawai te Tia Kamaiu, 21.)