Iotebwa Timiti ao Taan Kakoaua Aika Teniman a katorobubua n tataro

Beberuare 15–21

Reirei ao Berita aika Tabu 14:7

“Tei bwa te Tia Kakoaua”

Ko na kanga ni buokiia ataei n tei bwa taan kakoaua ibukin te euangkerio? Waaki ni kakukurei aika inanon te kamataata aei a na bae n anganiko taian iango.

Korei Am Namakin

te aikaon ibukin te tibwatibwa

Kaungaa te Tibwatibwa

Iangoia ni kaoiia tabeman ataei bwa a na tibwaua te bwai are a tia n reiakinna n te wiiki aei, ni mweengaia ke n te Moanrinan, are a ataia bwa e koaua.

te aikaon ibukin te anga reirei

Reirei te Reirei: Ataei aika a Uarereke

Reirei ao Berita aika Tabu 14:1–7

I kona ni buoka te Uea ni karaoa Ana mwakuri.

Iangoa aron ana taeka te Uea nakon David Whitmer ni kona ni buokiia ataei ni kaotaia bwa a na kanga n ira waakin ana mwakuri te Atua.

Waaki ni Kakukurei aika a Kona ni Karaoaki

• Tibwauai ni kakimototoa tabeua rongorongon ana utu Whitmer (taraa Aika Itiaki, 1:68–71 ke te kamataata n te wiiki aei n Nakomai, Iriirai—Ibukiia Aomata n Tatabemaniia ao Utu). N aron te katooto, tibwauaia bwa antai David Whitmer ao e kanga ngaia ma ana utu ni buoka Iotebwa Timiti ngke e raira ana Boki Moomon.

• Buokiia ataei ni kaotaia n taian kabootau imarenan te mwakuri n te tawana ao n ira ana mwakuri te Atua “te mwakuri ae korakora ma ni kamimi” (te kibu 1). N aron te katooto, te bwai ae taiaki uaana e kona n tei ibukin kairakiia aomata nakon Kiristo. Ko kona ni kaota tamnein te utu, uoti kunnikaia taan ununiki ibukiia ataei bwa a na karini iaoia, ke marooroakin mwakuri ake a kakaraoi taan ununiki ni katoa bong. Kabwarabwara bwa David Whitmer bon te tia ununiki are e kan ataia bwa e na kanga ni kona ni buoka te Uea. Wareka Reirei ao Berita aika Tabu 14:3–4 nakoia ataei, ao buokiia bwa a na kunea te bwai are e tuangaki David Whitmer iroun te Uea bwa e na karaoia. Ti na kanga ni buoka ana mwakuri te Uea?

• Kabongana te bwaintangira n reireiniia ataei taekan ana bwaintangira te Atua are te maiu ae akea tokina. N aron te katooto, kaota te bwaintangira nakoia ataei ma te beeba ae koreaki inanona, “Te Maiu ae Akea Tokina” (Reirei ao Berita aika Tabu 14:7). Tuangiia ataei bwa a na kauka te batia, ao wareka Reirei ao Berita aika Tabu 14:7 ni kabaibati. Kabwarabwara nakoia ataei bwa nanon te maiu ae akea tokina bon te maeka ma te Atua n akea tokina ao n riki n ai Arona. Tibwaua am koaua ibukin kakabwaia ni kawakinan tuua ao karekean te maiu ae akea tokina.

  mitinare a reireina te utu

  Te mwakuri ni mitinare bon teuana te kawai ae ti kona iai ni buoka karaoan Ana mwakuri te Uea.

Reirei ao Berita aika Tabu 15:6; 16:6

I kona ni buokiia tabeman ni uotiia ni kaaniaki riki nakon Iesu Kristo.

John Whitmer ao Peter Whitmer Jr. bon tarin David Whitmer. N aron David, a kan ataia bwa a na kanga aroia ni buoka te Uea. E tuangiia bwa a na ibuobuoki ni “uotiia aomata” Nakoina.

Waaki ni Kakukurei aika a Kona ni Karaoaki

• Tuangiia ataei bwa a na kabwarabwara te bwai are a taku bwa e kakawaki ke ae rangi ni bongana nakoia (n aron te bwaintakakaro, te boki, ke te takakaro). Wareka Reirei ao Berita aika Tabu 15:6 ke 16:6, ao tuangiia ataei bwa a na katei baia ngkana a ongo te bwai are e taekinna te Uea ae “rangi ni kakawaki.”

• Ma ataei, koroi ni karinani tabeua kawai ake a kona ni buoka temanna n iriira Iesu Kristo, n arom n riki bwa te rao nakoia tabeman, n tibwauai booki aika tabu ma raoraom, ke n tataro ibukin temanna are e kainnanoa buokana. N anganiia ataei iango, ko kona ni kaoti tabeua tamnei aika a manena man ana maekatiin te Ekaretia ke Bokin Tamnein te Euangkerio. Ke a kona ataei ni korei oin aia tamnei. Kaoiia bwa a na kataa te bwai teuana iaon baike a tia ni korei inanon te wiiki.

Reirei ao Berita aika Tabu 17

I kona n riki bwa te tia kakoaua ni bwaai ake e karaoi te Atua ibukiu.

David Whitmer e riki bwa temanna mai buakoia Taan Kakoaua aika Teniman n ana Boki Moomon, ao aman tarina a mena ibuakoia Taan Kakoaua aika Waniman. N aron David ao tarina, ngaira n tatabemaniira ti kona n “tei bwa te tia kakoaua” ibukin te koaua (Reirei ao Berita aika Tabu 14:8).

Waaki ni Kakukurei aika a Kona ni Karaoaki

• Tuangiia ataei rongorongoia Taan Kakoua aika Teniman ao aika Waniman (taraa “Mwakoro 7: Taan Kakoaua A Noori Bwaatua aika Koora” [Karaki man Reirei ao Berita aika Tabu, 31–33], ke te tamnei ae iai rekerekena iaon ChurchofJesusChrist.org). Kaoiia ataei bwa a na korea tamneia taan kakoaua ngke a noori bwaatua.

• Kaoiia ataei bwa a na karana te iteraniba ibukin waaki ni kakukurei n te wiiki aei, ao kabongana ni karakina rongorongoia Taan Kakoaua aika Teniman.

• Tabeka ieta katooton ana Boki Moomon, ao warekia nakoia ataei te kabanea n rain n Reirei ao Berita aika Tabu 17:6: “N aron ae e maiu am Uea ao Atuam e bon koaua.” Tuangiia ataei bwa ko kanga n ataia bwa e koaua ana Boki Moomon. Kaoiia ataei bwa a na riki bwa taan kakoaua n ana Boki Moomon man warekana ao n tataroakinna ni kan ataia ngkana e koaua ao ngkanne tibwauai aia kakoaua ma tabeman.

te aikaon ibukin te anga reirei

Reirei te Reirei: Ataei aika a Ikawai

Reirei ao Berita aika Tabu 14–16

I kona ni buoka te Uea ni karaoa Ana mwakuri.

Ngkai ko marooroakini kaotioti nakoia tarin Whitmer, ko kona ni tibwauai tabeua kawai are e kaoira te Uea n tatabemaniira ni buokia n Ana mwakuri.

Waaki ni Kakukurei aika a Kona ni Karaoaki

• Tibwauai tabeua rongorongon David Whitmer ma ana utu are ko namakinna bwa a anaaki iai nanoia ataei (taraa Aika Itiaki, 1:68–71). E kanga te Uea ni kamanenaia ana utu Whitmer ni buokia ni katea abanueana?

• Iaon mwakoro ni beeba, korei titiraki aika a bebete ao n irekereke ma taekan booki aika tabu man Reirei ao Berita aika Tabu 14–16. N aron te katooto: Aekakira aron ana taeka te Atua? (14:2). Tera ana bwaintangira te Atua ae te kabanea ni korakora? (14:7). Tera ae taekinna te Uea ae te bwai ae moan te kakawaki? (15:6; 16:6). Kaoiia ataei n tatabemaniia bwa a na rinea ao ni kakaei kaekaia inanon kiibu.

• Korei uoua atuun rongorongo iaon te buraibooti: Te Mwakuri n Ribana ao Ana Mwakuri te Uea. Buokiia ataei ni kakaea Reirei ao Berita aika Tabu 14:3–4 ibukin kibuntaeka are a irekereke ma te mwakuri n ribana, ao korei iaan te moan atuu. Tera ae a reireiniira rongorongo aikai ibukin ana mwakuri te Atua? Korei aia reke ataei iaan te kauoua n atuu. Ti na kanga n ibuobuoki n ana mwakuri te Uea?

Reirei ao Berita aika Tabu 17

I kona n riki bwa te tia kakoaua ni bwaai ake e karaoi te Uea ibukiu.

N Reirei ao Berita aika Tabu 17, te Uea e tuanga Oliver Cowdery, David Whitmer, ao Martin Harris are a na riki bwa Taan Kakoaua aika Teniman ibukin ana Boki Moomon. Buokiia ataei n reireiniia aroia ae a na kona n riki iai bwa taan kakoaua naba.

• Kaoa te ataei bwa n rokona ao e na tauraoi n tibwaua rongorongoia Taan Kakoaua ake Teniman (taraa “Mwakoro 7: Taan Kakoaua A Noori Bwaatua aika Buraati” [Karaki man Reirei ao Berita aika Tabu, 31–33], te tamnei ae iai rekerekena iaon ChurchofJesusChrist.org). Tera ae ti kona n reiakinna man te rongorongo aei n aron ae ti na kanga n riki bwa taan kakoaua aika a ninikoria? Ko na bae naba ni kaoti baike a rineaki man te witeo“A Day for the Eternities” (ChurchofJesusChrist.org; te mwakoro n rongorongoia Taan Kakoaua aika Teniman ae moanaki n 15:00).

• Bootaki ni wareka ana berita te Uea inanon Reirei ao Berita aika Tabu 17:1–3, ao buokiia ni kakaea kakoroan bukina n “Aia Koaua Taan Kakoaua aika Teniman” n ana Boki Moomon.

• Bootaki wareka Reirei ao Berita aika Tabu 17:3–5 kakaea taekana bwa tera ae a tuangkai Oliver Cowdery, Martin Harris, ao David Whitmer bwa a na karaoia imwiin tiaia n noori bwaatua aika koora. Tera tabeua koaua ake ti kona ni kakoaua ibukina? Taekinna bwa ko kanga n tia n tibwaua am koaua nakoia tabeman, ao kaoiia ataei bwa a na tibwauai bwaai ake a tia n rinanona.

te aikaon ibukin te kamatebwai

Kaungaa te Kamatebwai n te Mweenga

Kaoiia ataei bwa a na riki bwa taan kakoaua n te bwai are a reiakinna n te kiraati n te bong aio. Tuangiia bwa a na tibwauaia bwa a kanga ni karaoa aei n te kiraati n te wiiki ae e na roko.

Kanakoraoan Ara Anga reirei

Kariaia ataei bwa a na kakau iango. Ko na ni kateitei iaon tein aia kakauiango ataei man kaoakiia bwa a na katea kain te karaki ke ni karaoi mwakuri ake a irekereke ma te anene ke te rongorongo man booki aika tabu. (Taraa Reirei n Ana Kawai te Tia Kamaiu, 25–26.)

iteraniba ibukin waaki ni kakukurei: I kona n riki bwa ana tia kakoaua te Atua