“Beberuare 15–21. Reirei ao Berita aika Tabu 14–17: ‘N Tei bwa te Tia Kakoaua’” Nakomai, Iriirai—Ibukiia Aomata n Tatabemaniia ao Utu: Reirei ao Berita aika Tabu 2021 (2020)
“Beberuare 15–21. Reirei ao Berita aika Tabu 14–17,” Nakomai, Iriirai—Ibukiia Aomata n Tatabemaniia ao Utu: 2021
Beberuare 15–21
Reirei ao Berita aika Tabu 14–17
“N Tei bwa te Tia kakoaua”
N tabetai ana utu ao raoraon Iotebwa Timiti a tuangnga bwa e na karekea n te kaotioti bwa tera ae e tangiria te Atua ibukiia bwa a na karaoia. Ngkana ko wareki kaotioti aikai, iangoia bwa tera kawaim ae e anganiko te Uea.
Korei Am Namakin
E ngae ngke te mwakuri n rairairi e rangi n nakoraoi, inanon Meei 1829 te bwai ae riki i Harmony e a karika te kanganga ae korakora nakoia Iotebwa, Emma, ao Oliver. Te kakaitara mai irouia kain rarikiia e a rikirake ao te boutoka mai irouia ana utu Emma e a moana ni kerikaki. Bukina bwa aki namakinna bwa e a bon aki mano ibukiia ni maeka i Harmony, Pennsylvania Oliver e reitaki nakon raoraona ake a kaota nanoia ni kukurei n ana mwakuri Iotebwa: David Whitmer. E maeka David ma ana karo ao tarina ma mwanena i Fayette, New York, tao 100 te maire raroana. E kaitibo ma Oliver teuana te ririki imwaina, ao Oliver e kokorei ana reta aika mwaiti nakoina mai imwiin te tai anne. E bon tuai David ke tabeman n ana utu ni kaitibo ma Iotebwa mai mwaina. Ma ngke e tuatua Oliver ngkana e kona ngaia ao Iotebwa ni mwaing nakon mweengaia ana utu Whitmer ni karaoa kabanean rairan Ana Boki Moomon, ana utu Whitmer a kukurei ni butimwaiia. Ao te Uea e ataia bwa ana riki bwaai aika mwaiti riki ibukiia ana utu Whitmer nakon ae ti kamaekaan te Burabeti irarikiia. Iai te kaetieti ae e onoti ibukiia ae e kuneaki n Reirei ao Berita aika Tabu 14–17, ao inanon taina ana riki bwa teuana te moan utu n te Ekaretia ao taan kakoaua nakon kaotin te Ekaretia ae e Kaokaki.
Ibukin rongorongoia ana utu Whitmer, taraa Saints, 1:68–71.
Iango ibukin te Kamatebwai i bon Iroum ni Koroboki aika Tabu
I kona ni ira buakon Ana “mwakuri ae korakora ma ni kamimi” te Atua.”
Ngke e kaitibo ma Iotebwa Timiti, bon te ataeinimwaane David Whitmer ae e nanomatoa n ana mwakuri n aia onaroka ana utu. Ma te Uea iai ana iango ae e kaokoro ibukin ana mwakuri David—ae kanga bon ti te arona ma te mwakuri n te onaroka. Ngkai ko wareka Reirei ao Berita aika Tabu 14:1–4., nooria bwa e kanga te Uea ni kabotaua Ana mwakuri ma te mwakuri are e tataneiai iai David. Tera ae ko reiakinna iaon ana mwakuri te Uea man te kabotau aei?
Ko na kanga ni “karina [am] biti ni koro wiita”? (kibu 4). Iangoa te berita are e taekinaki rinanon nako te mwakoro aio nakoia ake a “ukoukora waakinan ao katean …Tion” (kibu 6).
Reirei ao Berita aika Tabu 14:2
Ana taeka te Atua “ae e maiu ma ni mwaaka.”
Te Uea e kabotaua Ana taeka ma te “kabaang aika uaitera wiina” (Reirei ao Berita aika Tabu 14:2). Tera ae e kaotia nakoim te kabotau aei ibukin ana taeka te Atua? N aron te katooto, e kanga ana mwakuri ni maiu, ni mwaaka, ao ni kakang? Ko kanga n tia n rinanon mwaakan ana taeka te Atua?
Iangoi tabeua kawai ae te Uea e kabwarabwara iai Ana taeka. Te katooto, tera ae ko reiakinna iaon ana taeka te Atua man taian kabotau inanon kibu n taeka aikai?
Te Uea e kabotaua Ana taeka ma te kabaang.
Reirei ao Berita aika Tabu 14:7
Te maiu ae akea tokina bon “ana bwai n tangira te Atua ae moan te korakora.”
Ngkai ko wareka Reirei ao Berita aika Tabu 14:7, iangoia bwa e aera te maiu ae akea tokina bon “te bwai n tutuaraoi ae moan te korakora mai ibuakon ana bwai n tituaraoi nako te Atua.” Te atatai ae nano aei mai iroun Beretitenti Russell M. Nelson e na kona n ibuobuoki: “Iaan ana babaire ae kakukurei te Atua, utu a kona ni kabaeaki n te tembora ao ni katauraoia n oki ni maeka n Ana tabo ae tabu n aki toki. Aio te maiu ae akea tokina!” (“Thanks Be to God,” Ensign ke Riaona, Meei 2012, 77).
Iangoia ni karekei riki kiibu nakon te kibu 7 are e na buokiko ni kamataatako riki iaon te maiu ae akea tokina (taraa “Maiu ae Akea Tokina” n te Topical Guide ke Bwai ni Kairi nakon Koroboki aika Tabu, scriptures.ChurchofJesusChrist.org). Tera ae ko reiakina ae e kaunga nanom ni kataia ni karekea te maiu ae akea tokina?
Reirei ao Berita aika Tabu 15–16
Kairakiia tamnei nakon Kristo bon te bwai ae moan te kakawaki.
John ao Peter Whitmer a tangiria n ataia bwa teraa “ae moan te kakawaki” inanon maiuia (Reirei ao Berita aika Tabu 15:4; 16:4). Ko a tia n titiraki n aron aio ibukim? Ngkai ko wareka Reirei ao Berita aika Tabu 15–16, iangoia bwa e aera kairaia tamnei nakon Kristo e rangi ni kakawaki. Ko na kanga ni kaoiia tamnei nakon Kristo?
Tara naba Reirei ao Berita aika Tabu 18:10–16.
Te Uea e kabonganaia taan kakoaua ni karababanakoa Ana taeka.
Tera te tia kakoaua? E aera te Uea e kabonganaia taan kakoaua ibukin Ana mwakuri? (taraa 2 I-Korinto 13:1). Iangoi titiraki aikai ngkai ko wareka ana taeka te Atua nakoia taan Kakoaua ake Teniman n Reirei ao Berita aika Tabu 17. E na bae naba ni ibuobuoki te rinanon “Aia Koaua Taan Kakoaua aika Teniman” n Ana Boki Moomon. A kanga taan kakoaua ni buoka kakoroan ana “waaki aika a raoiroi” te Atua? (kibu 4).
Ko ataia ae Mary Whitmer e karekea naba te kakoaua iaon bwaatua koora? Te anera Moronaai e kaotii nakoina ibukin ana mwakuri n anga nano are e karaoi ngke Iotebwa, Emma ao Oliver a tiku ni maeka ni mweengana (taraa Saints, 1:70-–71). Tera ae ko reiakinna man ana taneiai iaon karekean te kakoaua?
Taraa naba Saints, 1:73–75; Ulisses Soares, “Waeraken Ana Boki Moomon,” Ensign ke Riaona, Meei 2020, 32–35.
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Reirei ao Berita aika Tabu 14:1–4.Iangoia ni kaoiia am utu ni kakaei kibu n taeka aika a kaineti nakon te ununiki inanon kiibu aikai. E aera ngkai te Uea e kabotaua Ana mwakuri ma te tai? Tera ae ti kona ni karaoia ni buoka Ana mwakuri?
-
Reirei ao Berita aika Tabu 14:2.Te waaki ni kakukurei ibukin te kibu aei n “Iango ibukin Am Kamatebwai I Bon Iroum ni Koroboki Aika Tabu” e karinanii tabeua kiibu n koroboki aika tabu iaon ana taeka te Atua. Tao a na kona kain te utu ni wareki ao n tibwa te bwai are a reiakina. A kanga taekan koroboki aika tabu aikai ni kaungaira n “ongo n ana taeka” te Atua?
-
Reirei ao Berita aika Tabu 15:6; 16:6.Kiibu aikai a kona n kaira te marooro iaon bwaai ake moan te kakawaki nakoia am utu (taraa naba Reirei ao Berita aika Tabu 18:10).
-
Reirei ao Berita aika Tabu 17.A na kona am utu ni kukurei n korotamneia te bwai are a nooria Taan Kakoaua aika Teniman (taraa kibu 1). Ngkai ko wareka mwakoro 17, kakaei kibu n taeka ake a reiakina kakawakin Ana Boki Moomon. Ti na kanga n riki bwa taan kakoaua n Ana Boki Moomon? A kona naba kain am utu ni mataku n te witeo “A Day for the Eternities” (ChurchofJesusChrist.org).
Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Te anene ae rineaki: “Tao Tiaki Iaon Te Maunga,” Anene n Taromauri, nambwa 42.
Bwanaan Kaokan Bwai
Lucy Mack Smith ao Taan Kakoaua Aika Teniman
Te anera Moronaai e kaota te bwaatua koora nakon Iotebwa Timiti, Oliver Cowdery, David Whitmer, ao Martin Harris n te buakonikai irarikin mweengaia Whitmer i Fayette, New York. A na karo Iotebwa a kawariia ana utu Whitmer n te tai anne. Lucy Mack Smith, tinan Iotebwa, e kabwarabwaraa aron rotakiia n te taneiai ae kamimi aio i aoia taan kakoaua:
“Bon i marenan te aoa teniua ao aua. Kainaban Whitmer ao Smith ao ngai ti bane n tekateka n te ruu ni matu. I tekateka iaon rarikin te kainiwene. Ngke e rin Iotebwa, e a bwaka naba ni wene i rarikiu. ‘Tamau! Tinau!’ e taku. ‘Kam aki ata aron kukureiu. Te Uea e a tia ni kaota te bwatua nakoia teniman riki irarikiu, ake a tia naba n noora te anera ao a na taekina kokoauaan te koaua n te bwai are I a tia n taekina. Bwa a ataia i bon irouia bwa I aki nakonako ni mwamwanaia aomata. Ao I a namakina ae kanga I a kabebeteaki man te rawawata ae e kakamaku, are kanga e tara n rangi ni korakora irou bwa n a tokanikai iaona. Ma ngkai a nang buoka mwakorona, ao e angan nanou te kimwareirei bwa ai bon tiaki tii ngai n takarere inanon te aonaaba.’ Imwiina e rinako Martin Harris. E tara n ae e rabunaki n te kimwareirei ae korakora. E a taekina ngkanne koauan te bwai are e a tia n nooria ao n ongo, n aroia naba ake tabeman, Oliver ao David. Titebo aia koaua n te bwai are inanon Ana Boki Moomon. …
“Martin Harris kanga ngaia riki ae e aki kona n taua kaotan nanona n taekina. E taku, “I a tia n noora te anera mai Karawa are e bon koaua bwa e taekina kakoauaan te koaua ni baike I a tia n ongo ni kaineti ma te rekooti, ao e a tia n nooria matau. I a tia naba n noora te bwaatua ao n tautaua inanon baiu ao I kona n taekina koauana n taekana anne nakon te aonaaba ni kabutaa. Ma I a tia ni karekea ibukiu te kakoaua are e aki kona ni kabwarabwaraki n te taeka, ae e kona ni kabwarabwara te neewe, ao I kakabwaia te Atua ma nanou ni kabane bwa e a tia n ruo ni kamangoria ni karikai, ae bon ngai, te tia kakoaua ni korakoran ana mwakuri ao babaire [i] bukiia natiia aomata.’ Oliver ao David a reitia naba n te nebonebo ae tabu nakon te Atua ibukin ana raoiroi ao ana akoi. Ti okira mweengara [nako Palmyra, New York,] te bong are i mwiina ma te kukurei, ao ni kimwareirei.”1
Korobana iaon Oliver Cowdery, David Whitmer, ao Martin Harris iroun Lweis A. Ramsey
Lucy Mack Smith e mena naba ikekei ngke a oki rikaaki taan Kakoaua ake Waniman man te taneiai are a rinanona:
“Imwiin okiia taan kakoaua nakon te auti, e a manga kaoti riki te anera nakon Iotebwa; ao n te tai anne Iotebwa e a kaoka te bwaatua nako nanon baina. N te tairiki anne ti booa ara bootaki, are a bane iai ni kaotii aia koaua taan kakoaua ni kabane nakon koauan te bwai are a taekinna mai ieta; ao ni kabane ara utu, ao nakon Don Carlos [Smith], are ai tibwa 14 ana ririki, e taekina kakoauan te koaua ibukin tokin boong ni boong aika kaitira—are e a moanaki ngkai rokona.”2
Korobanna n te atiibu iaon Iotebwa Timiti ao taan Kakoaua ake Waniman iroun Gary Ernest Smith
Te Anera Moronaai e Kaotii Bwatua Koora nakon Iotebwa Timiti, Oliver Cowdery, ao David Whitmer, iroun Gary B. Smith