Beberuare 8–14

Reirei ao Berita aika Tabu 12–13; Iotebwa Timiti—Rongorongo 1:66–75

“Iaomi Raou ni Mwakuri”

Ataei ake ko reireinia a roko man taabo aika a kakaokoro ao ni kakaokoro kainnanoia. Ngkai ko katauraoi, iangoia bwa ko na kanga ni buokiia n reiakin koaua ake a taekinaki inanon Reirei ao Berita aika Tabu 12–13 ao Iotebwa Timiti—Rongorongo 1:66–75.

Korei Am Namakin

Kaungaa te Tibwatibwa

Kaoiia ataei bwa a na tibwauai taai ngke a tia n noora temanna ni bwabetitoaki ke ni karekea te kakabwaia n te nakoanibonga. E kanga Iotebwa Timiti ao Oliver Cowdery ni karekea te nakoanibonga?

Reirei te Reirei: Ataei aika a Uarereke

Reirei ao Berita aika Tabu 13

Ioane te Tia Bwabetito e kaoka te Nakoanibonga ae te Aaron.

Ni Meei15, 1829, e kaoti Ioane te Tia Bwabetito nakon Iotebwa Timiti ao Oliver Cowdery ao n angania te Nakoanibonga ae te Aaron. E kanga aron reiakinan te bwai ae riki aei ni kakabwaiaia ataei ake ko reireiniia?

Waaki ni Kakukurei aika a Kona ni Karaoaki

• Tuangiia ataei bwa e kanga ni kaokaki te Nakoanibonga ae te Aaron (taraa Iotebwa Timiti—Rongorongo 1:68–70; taraa naba “Mwakoro 6: Iotebwa ao Oliver a Anganaki te Nakoanibonga,” Karaki ibukin Reirei ao Berita aika Tabu, 26–27). Ke kaoa te mwaane n te uoote nakon te kiraati ao ni karaki ae aongkoa ngaia Ioane te Tia Bwabetito, wareka nakoia ataei te bwai are e taku Ioane nakon Iotebwa Timiti ao Oliver Cowdery.

• Kaota tamnein Ioane te Tia Bwabetito ngke e bwabetitoa te Tia Kamaiu ao ni kaoka te Nakoanibonga ae te Aaron (Bokin Tamnein te Euangkerio, 35, 93; taraa naba te tamnei are inanon te kamataata n te wiiki aei inanon Nakomai, Iriirai—Ibukiia Aomata n Tatabemaniia ao Utu). Kaoiia ataei bwa a na tibwaua te bwai ae ataia n te bwai ae e riki n tamnei akanne (taraa Mataio 3:13–17; Reirei ao Berita aika Tabu 13; Iotebwa Timiti—Rongorongo 1:68–70).

• Buokiia ataei n reireiniia te anene ae taekan te nakokanibonga, n aron “The Priesthood Is Restored” (Aia Boki n Anene Ataei, 89). Kaoiia ataei bwa a na mwaati ni katobibia nanon te ruu ngkai a anene, n ikaruoruo n taua te tamnei man te kamataata n te wiiki aei inanon Nakomai, Iriirai—Ibukiia Aomata n Tatabemaniia ao Utu.

Reirei ao Berita aika Tabu 13

Te nakoanibonga bon mwaakan te Atua.

Reirei ibukin kaokan te Nakoanibonga ae te Aaron bon taai aika a kakawaki ni buokiia ataei ni matataia raoi bwa tera te nakoanibonga ao e na kanga ni kona ni kakabwaiaia.

Waaki ni Kakukurei aika a Kona ni Karaoaki

• Uoti tabeua bwaai ni kakairi nakon te kiraati, n ikotaki ma te kiing. Kaotii bwaai ni kakairi, ao butiia ataei bwa a na kakauongo ngkai ko wareka Reirei ao Berita aika Tabu 13 ao ni kakaea te bwai ni kakairi are e taekinaki n te boki ae tabu. Tera ae ti kona ni karaoia ma te kiing? Kaotii tamnein bwaai ake ti kona ni karaoi ibukina ngkai e a tia ni kaokaki te Nakoanibonga ae te Aaron (taraa te iteraniba bukin waaki ni kakukurei n te wiiki aei; taraa naba Bokin Tamnein te Euangkerio, 103–4, 107–8). Tuangiia ataei bwa e kanga te nakoanibonga n tia ni kakabwaia maium.

• Ni buokiia ataei n reireiniia te kibuntaeka Te nakoanibonga bon mwaakan te Atua, butiia bwa a na uboubo ngkai a atong mwakoron taeka n tatabeua. Kaota te bwai are e kainnanoa te baetere bwa e aonga ni maiu, ao reireia anne, n aron te baetere e uota te korakora nakon te bwai, te nakoanibonga e uota mwaakan te Atua nako nanon maiura. Kaota am koaua ibukin kakabwaia ake ko karekei ibukin te nakoanibonga.

Iotebwa Timiti—Rongorongo 1:66–75

I kona ni bwabetitoaki.

Iotebwa Timiti ao Oliver Cowdery a wareka taekan te bwabetitio n ana Boki Moomon ao a kan ataa riki ae mwaiti. Ko kona ni buokiia ataei ake ko reireiniia ni kaingaingai nanoia nakon aia bwabetito ao n reiakina riki ae mwaiti ibukin te otenanti ae tabu aei.

Waaki ni Kakukurei aika a Kona ni Karaoaki

• Kaota te witeo “Restoration of the Aaronic Priesthood” (ChurchofJesusChrist.org). Katokitoka te witeo n titirakinia ataei n aron titiraki aika “Bukin tera ngkai Iotebwa Timiti ao Oliver Cowdery a nako n te buakonikai?” ao “E kanga am iango irouia Iotebwa Timiti ao Oliver Cowdery n aia namakin imwiin tiaia ni bwabetitoaki?” Butiia bwa a na tibwaua aron aia iango n aia namakin ngke a bwabetitoaki.

• Tuangiia ataei taekan Iotebwa Timiti ao Oliver Cowdery ngke a bwabetitoaki (taraa Iotebwa Timiti—Rongorongo 1:68–74; taraa naba “Mwakoro 6: Iotebwa Timiti ao Oliver A Anganaki te Nakoanibonga,” Karaki n Reirei ao Berita aika Tabu, 26–28). Katuruturua te kimwareirei are a namakinna Iotebwa ao Oliver, ao tuangiia ataei taekan am bwabetito. Kaoiia bwa a na korei tamneia ngke a bwabetitoaki n te taina.

  

  I kona ni bwabetitoaki ibukina ngkai e a tia ni kaokaki te nakoanibonga.

Reirei te Reirei: Ataei aika a Ikawai

Reirei ao Berita aika Tabu 13; Iotebwa Timiti—Rongorongo 1:66–72

Ioane te Tia Bwabetito e Kaoka te Nakoanibonga ae te Aaron.

Rongorongon kaokan te Nakoanibonga ae te Aaron e kona ni buokiia ataei ake ko reireinia ni kaotaia ni kakawakin taian koaua ibukin te nakoanibonga ao otenanti n te nakoanibonga.

Waaki ni Kakukurei aika a Kona ni Karaoaki

• Bootaki wareka Iotebwa Timiti—Rongorongo 1:66–72, ao kaoiia ataei bwa a na korei tamnein bwaai ake a kabwarabwaraaki ni kiibu aikai. Ngkanne kariaia ataei bwa a na karaki ni kabonganai aia tamnei. Kaoa temanna bwa e na tibwaua te bwai are e rinanona ngke teuanne ke neienne e noora temanna ni katabuaki nakon te nakoa n te nakoanibonga. E kanga n ti te arona anne ma are a katabuaki iai Iotebwa ao Oliver n aron ae kabwarabwaraaki inanon Iotebwa Timiti—Rongorongo 1:66–72?

• Angania ataei tabeua te miniti bwa a na korei ni karinani bwaai ni kabane n aia atatai ibukin Ioane te Tia Bwabetito, ao imwiina kariaia bwa a na tibwaua te bwai are a koreia. Kaoiia ataei bwa a na ikatoatoa ni mwakuri ni wareka teuana te rongorongo ao ni karinna ibuakon baike a karinani ni korei: Mataio 3:13–17; Reirei ao Berita aika Tabu 13; Iotebwa Timiti—Rongorongo 1:66–72.

Reirei ao Berita aika Tabu 13

I karekei kakabwaia rinanon te Nakoanibonga ae te Aaron.

Ti karekei kakabwaia aika a mwaiti rinanon te Nakoanibonga ae te Aaron. Tera ae ko kona ni karaoia ni buokiia ataei ake ko reireinia ni kaotaia bwa kakabwaia aikai a reke ibukin ae e a tia ni kaokaki te Nakoanibonga ae te Aaron?

Waaki ni Kakukurei aika a Kona ni Karaoaki

• Kaaki tamnein te bwabetito ao te toa inanon te kaonteina ae kainnanoa kaukana n te king. Kabwarabwaraa bwa bukin tera ngkai a kakawaki taian king, ao kariaia ataei bwa a na kabongana te king ni kauka iai te kaonteina. Kaoiia ataei bwa a na wareka Reirei ao Berita aika Tabu 13 ao kakaei taeka are a reireinaki bwa kakabwaia a roko man te Nakoanibonga ae te Aaron.

• Kaota te witeo “Blessings of the Priesthood” (ChurchofJesusChrist.org), ao butiia ataei bwa a na kinai kawai are aomata inanon te witeo a kakabwaiaki ibukin te nakoanibonga.

Iotebwa Timiti—Rongorongon 1:73–74

Te Tamnei ae Raoiroi e kona ni buokai ni kaotaai ni booki aika tabu.

Imwiin tiaia ni bwabetitoaki Iotebwa ao Oliver Cowdery, te Tamnei ae Raoiroi e buokiia riki ni kaotaia ni booki aika tabu. E bae ni kauanganano aei nakoia ataei, ake a kunea bwa e kaangaanga ae a na ota ni boki aika tabu.

Waaki ni Kakukurei aika a Kona ni Karaoaki

• Uota te bwai ni kamwaninga ae bebete nakon te kiraati, ao kaoiia ataei bwa a kaai ni kanimnimmwa. Ngkai a karaoia, titirakinia e kanga warekan booki aika tabu n ti te arona ma kanimnimwakin te bwai ni kamwaninga. Bootaki wareka Iotebwa Timiti—Rongorongo 1:73–74, ao kaoiia ataei bwa a na tibwauaia bwa tera are a buoka Iotebwa ao Oliver ni kaotaia ni booki aika tabu. Tera ae ti kona ni karaoia n ukera ana ibuobuoki te Tamnei ae Raoiroi ngkai ti kamatebwai booki aika tabu?

• Kaoiia ataei bwa a na kanikinaea aia boki ae tabu ni kauringia bwa a na ukoukora ana ibuobuoki te Tamnei ae Raoiroi ngkana a wareware. Tao a kona ni kakaea te kibuntaeka ae kaunganano inanon Iotebwa Timiti—Rongorongo 1:74 are a na kona ni koreia iaon aia boki are a kanikinaea.

Kaungaa te Kamatebwai n te Mweenga

Ngkana e aki reke am tai ibukia ataei bwa a na katiaa te iteraniba ibukin waaki ni kakukurei inanon te kiraati, iangoia ni kanakoi katooto nakon mweengaia ataei bwa a aonga ni kona ataei ni mwakuri iaona ma aia utu.

Kanakoraoan Ara Anga reirei

Kakauiango ao kakauongo nakon te Tamnei. Tai taku bwa ko kabonganai iango aika inanon te kamataata aei. Ko kinaia ataei ake ko reireinia, butiia Tamara are i Karawa bwa e na kairiko nakon kawai aika tamaroa ni buokiia n reiakina reirein te euangkerio ao n nikoa aia onimaki.