Mweengan Peter Whitmer iroun Al Round

Maati 1–7

Reirei ao Berita aika Tabu 20–22

“Rikiraken Ana Ekaretia Kristo”

Ngkai ko kamatebwaia Reirei ao Berita aika Tabu 20–22 te wiiki aio, iango n reirei a na roko n am iango. Ko kona ni kunei raon taian iango n reirei n te rongorongo aei.

Korei Am Namakin

Kaungaa te Tibwatibwa

Kaota te tamnei inanon te kamataata n te wiiki aei inanon Nakomai, Irirai—Ibukiia Aomata n tatabeman ao Utu, ao titirakiniia ataei n taekina ae ataia ibukin katean te Ekaretia. Bukin te buoka, taraa “Mwakoro 9: Kateakin Ana Ekaretia Iesu Kristo” (Karaki man Reirei ao Berita aika Tabu, 40–42).

Reirei te Reirei: Ataei aika a Uarereke

Reirei ao Berita aika Tabu 20–21

Ana Ekaretia Iesu Kristo E a Tia ni Kaokaki.

N Eberi 6, 1830, Iotebwa Timiti ao Oliver Cowdery a ikotaki ma tabeman ni katea ana Ekaretia Iesu Kristo ae kaokaki. Ko na kanga ni buokiia ataei ake ko reireiniia bwa a na ataa bonganan te bwai ae riki aei?

Waaki ni Kakukurei aika a Kona ni Karaoaki

• Kamanena atuun te mwakoro ibukin Reirei ao Berita aika Tabu 21 ke mwakoro 9 n Karaki man Reirei ao Berita aika Tabu ni kaongoia ataei ni kabebetea te bwai are riki n te tai are e kateaki iai te Ekaretia. Ni buokiia n ataa te bwai ae riki aei, kaota te witeo “Kateakin te Ekaretia” (ChurchofJesusChrist.org).

• Tuangiia ataei bukin ae ko onrake n te kaitau bwa e a reke iroura Ana Ekaretia Iesu Kristo ibukiia Aika Itiaki ni Boong aika Kaitira. Kabwarabwara bwa te riki bwa te membwa n te Ekaretia e katauraoira ni manga maeka ma te Atua. Buokiia bwa a na okiokira te mwakoro n taeka “Ngai kaain Ana Ekaretia Iesu Kristo Ibukiia Aika Itiaki ni Boong aika Kaitira” tabeua te tai ke anenea “Ana Ekaretia Iesu Kristo” (Aia Boki n Anene Ataei, 77).

Reirei ao Berita aika Tabu 20:37, 71–74

I a katauraoi bwa N na bwabetitoaki.

Ataei ake ko reireiniia a katauraoi bwa a na bwabetitoaki. Buokiia bwa a na ataa nanon te bwabetitoaki ao te bwai are a na kona ni karaoia bwa a na tauraoi.

Waaki ni Kakukurei aika a Kona ni Karaoaki

• Kaota tamein te ataei ngke e bwabetitoaki (taraa Bokin Tamnein te Euangkerio, nambwa. 104), ao titirakinia ataei bwa a na kotei bwaai aika a noori. Warekia ke kakimototoa Reirei ao Berita aika Tabu 20:71–74, ao buokiia ataei n nooria bwa a kanga tamnei ni bootau ma reirei inanon kiibu aikai. Kakoaua bwa ti na iriira ana katooto te Tia Kamaiu ao ni bwabetitoaki n te kawai are E a tia taekinna.

• Kakimototoa Reirei ao Berita aika Tabu 20:37. Tera ae ti reiakinna man te kiibu aei ibukiia aomata aika a kan bwabetitoaki? Kaotii tamnein kawai are a kona ataei ni katauraoi ibukin te bwabetito, n aekan ae te beku ibukiia tabeman ao te tataro.

• Anenea te anene ibukin te bwabetito, n aron “When I Am Baptized” (Aia Boki n Anene Ataei,103), ke taraa“The Baptism of Jesus” (biblevideos.ChurchofJesusChrist.org). Kaoiia ataei bwa a na tibwauai aia namakin n aron te bwabetitoaki.

Reirei ao Berita aika Tabu 20:75-79

Te toa e buokai n uringa Iesu Kristo.

Ko na kangaa ni buokiia ataei ni kaotaia riki bwa bukin tera ti kana te toa ni katoa te wiki?

Waaki ni Kakukurei aika a Kona ni Karaoaki

• Wareka Reirei ao Berita aika Tabu 20:77 nakoia ataei. Tuangiia bwa a na tei ngkana a ongo are ti na uringnga ngkana ti kana karikin te toa. Katiteboa karaoana ma te kibu 79. (Ko kona ni kaotia bwa ti nima te ran n onea mwiin te wain.) Ti na kanga ni kaotia bwa ti uringa Iesu?

• Tuangiia ataei taekan te tai are ngke ko karaoa te berita ao ni kawakinna. Kaoiia bwa a na taekini karaki aika titebo ma aia karaki. Kabwarabwaraa bwa ngkana ti kana te toa, ti karaoi berita. Wareka Reirei ao Berita aika Tabu 20:77, ni kamatatai taian berita ake ti karaoi bwa “n taainako ti na Uringa” ao ni “kawakin Ana tua.” Kaoiia ataei n tibwaa aia tai ngke a uringa te Tia Kamaiu ke n ongotaeka nakon ana tua.

  

  Te toa e kauringai ni iangoa Iesu Kristo.

Reirei te Reirei: Ataei aika a Ikawai

Reirei ao Berita aika Tabu 20:21

Ana Ekaretia Iesu Kristo e a tia ni kaokaki.

N te ongeaba nakon ana tua te Uea, Iotebwa Timiti, Oliver Cowdery, ao tabeman a katea Ana Ekaretia Iesu Kristo ae kaokaki n Eberi 6, 1830. Iangoi kawai ni buokiia ataei n nooria bwa e kanga te bwai aei n tia ni kakabwaiai maiuia.

Waaki ni Kakukurei aika a Kona ni Karaoaki

• Kauringiia ataei iaon bwaai tabeua aika a tia n riki aika kakawaki are a tia n reiakin—n aron kaokakin te nakoanibonga ao rairakin Ana Boki Moomon. Bukin tera bwa a na riai n riki bwaai aikai imwain ae kateaki te Ekaretia?

• Kaoti tamnein bwaai ake ti karaoi n te Ekaretia are a kabwarabwaraaki inanon mwakoro 20, n aron reiakinan aron te Atua ao Iesu Kristo, ni ibuobuoki, ni bwabetitoa, ao ni kanakin te toa. Buokiia ataei ni kabotaui tamnei aikai ma booki aika tabu ake a kabwarabwarai taekaia, n aron Reirei ao Berita aika Tabu 20:17–21, 47, 70, 72–74, 75–79, ao te atuu ibukin mwakoro 21. Tera kakabwaia aika ti a tia ni karekei ibukina ngkai ti kaaina te Ekaretia?

• Bootaki n anenea “Ana Ekaretia Iesu Kristo” (Aia Boki n Anene Ataei,77).

Reirei ao Berita aika Tabu 20:37, 77, 79

Ngke I bwabetitoaki, I berita bwa N na iriira Iesu Kristo.

Mwaitia ataei n am kiraati a tia ni bwabetitoaki. Kauringiia taian berita ake a karaoi “ni katoka iaoia Aran Iesu Kristo” (Reirei ao Berita aika Tabu 20:37).

Waaki ni Kakukurei aika a Kona ni Karaoaki

• Kaoiia ataei tabeman n roko n tauraoi n taekina te bwai are a namakinna ngke a bwabetitoaki. Tao a kona ni uota te tamnei man aia bong ni bwabetito ni kaotia nakon te kiraati. Bukin tera ngkai a rineia bwa a na bwabetitoaki? E kanga ngkai a tia ni bwabetitoaki ao ni karekea te Tamnei are Raoiroi ni kakabwaiaia?

• Bootaki ni wareka Reirei ao Berita aika Tabu 20:77, ao tuangiia ataei bwa a na kinai taian berita ake ti karaoi inanon tain te toa. Ni buokiia ataei n ataia bwa iai bwaai are a kona ni karaoia ni katoa bong ni “uringa n taainako” Iesu Kristo, kaoa temanna te ataei ni karaoa te bwai teuana are e kona teuanne ke neienne ni karaoia ni uringa te Tia Kamaiu. Tuangiia tabeman ni katautaua bwa tera ae e na karaoaki. Ni kaineti nakon te kibu 77, ti na kanga ni kakabwaiaki ngkai ti aki toki ni ururinga te Tia Kamaiu?

• Buokiia ataei ni kabotaua Reirei ao Berita aika Tabu 20:37 ma te kibu 77 ni kakaea te kibuntaeka are kaokiokaki ni kauoua. Kaotia nakoia ataei te bwai are iai arana iaona (n aron aran te kanikina ke aran te aomata). Tera ae e tuangira te ara ibukin taekan te bwai? Bootaki wareka Reirei ao Berita aika Tabu 20:37 ni kakaea bwa antai arana ae ti katoka iaora ngke ti bwabetitoaki. Tera ae e nanonaki n ae ti na katoka Aran Iesu Kristo iaora? Ti kanga ni iangoia ao ni mwakuri ibukina bwa iai iroura te ara aei?

Reirei ao Berita aika Tabu 21:4–6

I kakabwaiaaki ngkana I iriira te burabeti.

Ko na kanga ni buokiia ataei ni karekei kakabwaia aika a taekinaki n te berita ni kiibu aikai nakoia ake a iriira te burabeti?

Waaki ni Kakukurei aika a Kona ni Karaoaki

• Koreia iaon te burakibooti Tuua ao Kakabwaia. Kaoiia ataei bwa a na wareka Reirei ao Berita aika Tabu 21:4-6, n kakaei tuua ake E anga te Uea ao kakabwaia aika E beritani. Kaoiia bwa a na koroi iaon te burakibooti baike a kunei.

• Kaota tamnein te burabeti ae ngkai, ao kaoiia ataei bwa a na tibwa te bwai are a tia n reiakinna ke n ongo mairouna n te tai ae nako. Bootaki ni wareka Reirei ao Berita aika Tabu 21:5. Kaoiia ataei bwa a na koroboki ke ni korotamneia te bwai teuana ae a kona ni karaoia n iriira te burabeti. Tibwa am koaua bwa ngkana ti irira te burabeti, ti iriira te Tia Kamaiu.

Kaungaa te Kamatebwai n te Mweenga

Kaoiia ataei ni koroi ni karinani bukina ngkai a kakaitau ibukin Ana Ekaretia Iesu Kristo ae kaokaki. Kaungaia bwa a na tibwauai bwaai ake a korei ni karinani ma kaain aia utu ke raoraoia.

Kanakoraoan Ara Anga reirei

Kamanenai karaki n anga reirei. Taian karaki e buokiia ataei n noora aron te euangkerio ni mwakuri nakon te maiu ni katoa bong. … Ngkana ko reireinia ataei aika a uarereke, karaoi kawai are e karekerekeia n te karaki; te katooto, a kona n taui tamnei, kaoki taeka, ke karaoa tabeia” (Reirei n Ana kawai te Tia Kamaiu,25).