Maati 15–21

Reirei ao Berita aika Tabu 27-28

“Bwa a Riai ni Karaoaki Bwaai ni Kabane n Aroia”

Te koaua e taekinaki inanon Reirei ao Berita aika Tabu 27–28 e kona ni kakorakora aia koaua ataei ake ko reireiniia. Ngkai ko iangoa kainnanoia ataei, tera koaua ae ko kukurei ni kabanea nanom iaona inanon te kiraati?

Korei Am Namakin

Kaungaa te Tibwatibwa

Kaota tamnein te Burabeti Iotebwa Timiti ao tamanein te burabeti ae ngkai. Kaoiia ataei bwa a na araniia aomata n taian tamnei ao tibwai bwaai ake e karaoi te burabeti.

Reirei te Reirei: Ataei aika a Uarereke

Reirei ao Berita aika Tabu 27:1–2

Te Toa e Buokai ni Iangoa Iesu Kristo.

Ataei aika uarereke a kona n reiakina bonganan te toa ao ni kakaei kawai ni uringa te Tia Kamaiu inanon te otenanti ae tabu aio.

Waaki ni Kakukurei aika a Kona ni Karaoaki

• Kaota tamnein Iesu n anga te toa nakoia Ana Abotoro (taraa Bokin Tamnein te Euangkerio, nambwa. 54). Tera ae e na riki n aekan ae ko kana te toa ma te Tia Kamaiu? (taraa Reirei ao Berita aika Tabu 27:5). Wareka Reirei ao Berita aika Tabu 27:2, ni moanaki ma “te ururing nakon te Tama,” ao n titirakiniia ataei ni kakauongo ibukin te bwai are tangiriira te Tia Kamaiu ni ururingnga ngkana ti kana te toa.

• Kaotia nakoia ataei tabeua te kariki ao te ran ao tamnein te Tia kamaiu. Anganiia ataei bwa a na taua te tamnei ngke ko tabe n reireiniia bwa te toa e buokiira ni uringa Iesu Kristo.

• Buokiia ataei n iangoi bwaai are a na kona ni karaoi ni uringa Iesu n taian te toa. Tera ae a na karaoia aia utu ni buokiia n tatabemaniia bwa a na karinerine? Kaoiia ataei bwa a na korea te tamnei are a na kona n taraia n taian te toa ao ni buokiia ni uringa te Tia Kamaiu.

Reirei ao Berita aika Tabu 27:15-18

Ana otanga te Atua e kamanoai.

Iangoi kawai ake ko kona iai ni buokiia ataei n nooria bwa kawakinan tuua bon aekakin karinan ana otanga te Atua.

Waaki ni Kakukurei aika a Kona ni Karaoaki

• Kaota tamnein te otanga (taraa te kamataata n te wiiki aei inanon Nakomai, Irirai—Ibukiia Aomata n Tatabemaniia ao Utu). Ngkai ko wareka Reirei ao Berita aika Tabu 27: 15-18, buokiia ataei ni kakaei mwakorokoro n otanga iaon te tamnei. Tuangiia ataei bwa Ana otanga te Atua e a tia ni buokiko ni “kaitara te bong ae buakaka”(te kibu 15).

• Te kamataata ibukiia kaain Ebeto inanon Nakomai, Iriirai—Ibukin te Moanrinan: te Nu Tetemanti 2019 iai n ana iteraniba ni kakukurei ibukin ana otanga te Atua. Korokorei mwakorokoron otanga, ao tuangiia ataei bwa a na katokai iaon nambwa ake ko wareki Reirei ao Berita aika Tabu 27:15–18. Buokiia ataei bwa a na atai bwaai aika kona ni karaoi ni karina ana otanga te Atua, n aron te tataro, rinean te eti, buokaia tabeman, ao tabeua riki.

  

  I kona ni katoka ana otanga te Atua.

Reirei ao Berita aika Tabu 28:2, 6–7

Te burabeti e kaira te Ekaretia.

A ataia ataei ake ko reireinia bwa bukin tera iai iroura burabeti? Kabongana Reirei ao Berita aika Tabu 28 ni buokiia n ataia bwa te burabeti bon tii temanna ae kona ni kaira te Ekaretia.

Waaki ni Kakukurei aika a Kona ni Karaoaki

• Warekia ao taekinna n oin am taeka rongorongon Hiram Page (taraa “Mwakoro 14: Te Burabeti ao Kaotioti ibukin te Ekaretia,” Karaki man Reirei ao Berita aika Tabu, 56-57). Tibwaa am koaua bwa Tamara are i Karawa ao Iesu Kristo e rinea Iotebwa ni kaira te Ekaretia n ana bong (taraa Reirei ao Berita aika Tabu 28:2). Tibwa am koaua bwa te burabeti ae ngkai e weteaki ni buoka te Uea ni kaira Ana Ekaretia inanon ara bong.

• Tuangiia ataei bwa a na takakaro “ira te tia kairiri”—temanna te ataei e kona n tei i matan te ruu, ao nikiraia ataei a kona ni katotonga are e karaoia teuanne ke neienne. E kona aio ni kaira te maroro n arona bwa bukin tera bwa ti irira te burabeti. Ko kona ni kaota tamnein Iesu Kristo ao ni karawawata are ti irira te burabeti ibukina bwa e iriira te Tia Kamaiu ao e taekin Ana taeka te Tia kamaiu.

Reirei te Reirei: Ataei aika a Ikawai

Reirei ao Berita aika Tabu 27:1–2

Te Toa e buokai ni uringa Iesu Kristo.

E na kangaa n reiakinaki aron reirei inanon Reirei ao Berita aika Tabu 27:1–2 buokiia ataei aika ko reireiia ni karekea riki te namakin ae kororaoi ni kanakin te toa?

Waaki ni Kakukurei aika a Kona ni Karaoaki

• Kaoiia ataei bwa a na korei bwaai are a taku bwa e na tangiriia te Tia Kamaiu n ataa taekan te Toa. Ngkana a kainnanoaki, a kona ni wareka “te toa” inanon Kairi nakon Booki aika tabu (scriptures.ChurchofJesusChrist.org). A na tibwai tabeua bwaai ake a korei, ao n butiia bwa a reitia ma bwaai ake a korei ni karinani imwiin warekan Reirei ao Berita aika Tabu 27:1–2. A na kangaa bwaai ake a korei ni karinani n roota aron kanakin te toa ni katoa Taabati?

• Buokiia ataei ni iangoaia bwa tera ae nanonaki ni kana te toa “ma te mata teuana nakon mimitongin te [Atua]” (kibu 2). Maroroakin titiraki n aron aikai; Baikara tabeua katikitiki ake a katikaki iai matara ma ara iango ni kabanea nanora iaona n tain te toa? Tera ae ti kona ni karaoia ni kamatoa ara iango iaon te Tia Kamaiu ngkana ti kana te toa? E kanga ni buokiira n Rimwiina ni katoa bong?

Reirei ao Berita aika Tabu 27:15-18

Ana otanga te Atua e buokai ni kaitara te buakaka.

Ataei ake ko reireiniia a na kaitarai kairarang aika buakaka rinanon maiuia. Tamara are i Karawa e tangiria ni kan buokiia ni kaitaraa te buakaka. Ko na kanga ni kaungaiia ni karina ana otanga te Atua?

Waaki ni Kakukurei aika a Kona ni Karaoaki

• Kaoiia ataei bwa a na wareka Reirei ao Berita aika Tabu 27:15–18 ao ni korotamneia mwakoron te otanga are e kaotaki (ngkana e kainnanoaki, a kona n kaota te tamnei inanon te kamataata n te wiiki aio inanon Nakomai, Irirai—Ibukiia Aomata n Tatabemaniia ao Utu). Tera ae karaoi taeka ni kabwarabwarai mwakorokoron te otanga n tatabeua n reireiniira aron are ti tangiria ni buakana te buakaka ae katobibira (n aron te katooto, te raoiroi, te onimaki, te kamaiuaki, ao tabeua riki)?

• Kaoiia ataei bwa a na iangoi bwaai aika akona ni karaoi n totokoi kariiri ni katobibia. Tuangiia bwa a na kabobonga te taeka “Ti karini ana otanga te Atua ni katoa bong man …” ma aia iango. Buokiia n noria bwa a kanga aia konabwai n nakomai nakon Kristo ni buokiia ni karin ana otanga te Atua iaoia.

Reirei ao Berita aika Tabu 28:1–7, 15

Tamau are i Karawa e kairai rinanon te Tamnei are Raoiroi.

Reirei ao Berita aika Tabu 28:1–7, 15 e kona ni buokiia ataei ake ko reireiniia n ataia bwa aomata n tatabemaniia a kona ni kairaki iroun te Tamnei are Raoiroi, ma te kaotioti ibukin te Ekaretia e na bon anganako inanon te burabeti.

Waaki ni Kakukurei aika a Kona ni Karaoaki

• Karakina rongorongon Hiram Page are e karekea te kaotioti ibukin te Ekaretia (taraa “Mwakoro 14: Te Burabeti ao Kaotioti ibukin te Ekaretia,” Karaki man Reirei ao Berita aika Tabu, 56-57). Ti na kanga ni kaeka nakon ana tangitang Hiram Page? Bootaki wareka Reirei ao Berita aika Tabu 28:1–7, 15 ibukin iango tabeua.

• Buokiia ataei ni kakaei booki aika tabu aikai ni korei kawai are e kona te Tamnei are Raoiroi ni kairiia: Reirei ao berita aika Tabu 28:1, 4, 15; Ioane 14:26; Moronaai 8:26; 10:4–5. Kamwakuria ni bootaki ni kaka uoman ngkana e buobuoki. Bukin tera bwa e rangi ni kakawaki ana bwaintituaraoi te Tamnei are Raoiroi? Tibwauaia bwa e kanga te Tamnei are Raoiroi ni kairiko.

Kaungaa te Kamatebwai n te Mweenga

Kaoiia ataei ni butiia aia karo ngkana a kona n reirei n te tairiki n te mweenga iaon te bwai teuana are a reirei n te kiraati.

Kanakoraoan Ara Anga reirei

Kabongana te katangitang. Kuna n te Moanrinan ao anene n taromauri e kona ni buokiia atei n aia ririki nako ni kaotaia ao ni katabangaka koauan te euangkerio n te kawai ae e na ururingaki. A kona naba ni kawakiniia ataei n tataningamarau ni katabeaki n te reirei.