“Maati 15–21. Reirei ao Berita aika Tabu 27–28: ‘Bwa a Riai ni Karaoaki Bwaai ni Kabane n Aroia’” Nakomai, Iriirai—Ibukiia Aomata n Tatabemaniia ao Utu: Reirei ao Berita aika Tabu 2021 (2020)
“Maati 15–21. Reirei ao Berita aika Tabu 27–28,” Nakomai, Iriirai—Ibukiia Aomata n Tatabemaniia ao Utu: 2021
Maati 15–21
Reirei ao Berita aika Tabu 27–28
“Bwa a Riai ni Karaoaki Bwaai ni Kabane n Aroia”
E taku Unimwaane D. Todd Christofferson bwa ngkai ko kamatebwaia koroboki aika tabu ao korei am namakin, “ko na anganaki nen ana taeka te Uea inanom, ao E na taetae nakoim” (“When Thou Art Converted,” Ensign ke Riaona, Meei 2004, 11).
Korei Am Namakin
Te kaotioti bon te bwai ae e rangi ni boou ibukiia aika Itiaki ngkai Kaokan te Ekaretia e reitinako n rikii ni kaotaki. Kain te Ekaretia ake rimoa a ataia ae te Burabeti Iotebwa Timiti e kona ni karekea te kaotioti ibukin te Ekaretia, ma e kona n reke nakoia tabeman? Titiraki n aekakin aio e rangi ni kakawaki ngke Hiram Page, temanna mai ibuakoia taan Kakoaua ake Waniman ibukin te bwaatua koora, e kakoaua bwa e a tia ni karekea te kaotioti ibukin te Ekaretia. A mwaiti aika Itiaki ake a rangi n kakaonimaki ae a kakoauai kaotioti aikai bwa bon mai iroun te Atua. E kaeka te Uea n reirei bwa inanon Ana Ekaretia “a riai ni karaoaki bwaai ni kabane n aroia” (Reirei ao Berita aika Tabu 28:13), ae nanona bwa ti temanna ae “rineaki ni karekei tua ao kaotioti” ibukin te Ekaretia ae e bwanin (Reirei ao Berita aika Tabu 28:2). Ma a bon kona, tabeman ni karekei oin aia kaotioti ibukin aia beku inanon Ana mwakuri te Uea. Ni koauana, ana taeka te Uea nakon Oliver Cowdery bon te kauring nakoira ni kabane: “Ao ko na anganaki … bwa tera ae ko na karaoia” (Reirei ao Berita aika Tabu 28;15).
Taraa naba “All Things Must Be Done in Order,” Revelations in Context, 50–53.
Iango ibukin Am Kamatebwai I Bon Iroum ni Koroboki Aika Tabu
Reirei ao Berita aika Tabu 27:1–4
I riai n anaa te toa ma te kantaninga ae ti teuana nakon mimitongin te Atua.
A babetitoaki Sally Knight ao Emma Smith n Tuun 1830, ma e kamangaoaki kamatoakiia irouia taan kamangao. Uoua te namakiaina imwiina, Sally ao kainabana, Newel, a kawara Emma ao Iotebwa, ao e motikaki bwa te kamatoa e na karaoaki ngkai ao nakaane a na kona n anaa te toa ni kabane. Inanon kawaina n nako ni karekea te wain ibukin te toa, e kateaki Iotebwa iroun te anera. Tera ae e tuanga te anera ibukin te toa? (taraa Reirei ao Berita aika Tabu 27:1–4).
Tera ae a reireiniko kiibu aikai bwa e kanga arom ae e tangiriko iai te tia Kamaiu n iangoa taekan te toa? Tera ae ko namakinna ae ko kaungaaki iai bwa ko na karaoia ibukin te bwai ae ko reiakinna?
Te toa bon kauringaakira n Ana Mwakuri ni Kamaiu te Tia Kamaiu.
Reirei ao Berita aika Tabu 27:15–18
Ana bwai ni buaka te Atua e na buokai n tei ni kaitaraa te buakaka.
E taku Beretitenti M. Russell Ballard: “Bon akea te bwai ae e korakora ao n rine ae ti kona ni karaoia n katauraoira ni maeun tamneira. Koauan mwaakan te maiu n tamnei a reke inanon mwakuri aika a uarereke aika a bootaki n ikotaki n riki ni kamatoatoa te oo ni maiu n tamnei are e totoko ao ni kamanoko man baika a bubuaka ni kabane” (“Be Strong in the Lord,” Ensign, Turai 2004, 8).
Ngkai ko kamatebwaia Reirei ao Berita aika Tabu 27:15–18, ko kona ni karaoa te tiata n aron teuana ae i nano. Tera ae ko karaoia ni katokai iaom teuana imwin teuana Ana bwai ni buaka te Atua?
|
Mwakoron nako te bwaai ni buaka |
Iteran te rabwata ae kamanoaki |
Tera iteran te rabwata akanne ae a tei ibukina |
|---|---|---|
|
Otangan bwabwaami te raoiroi |
Te Nano |
Baika ti tangiri ao maten nanora |
|
Te bwara te biti ni kamaiu |
Atuura ke ara iango |
Taraa naba I‑Ebeto 6:11–18; 2 Nibwaai 1:23.
Te burabeti ae maiu bon Ana tia taetae te Atua nakon Ana Ekaretia.
Iangoia bwa tera ae e na riki ngke arona bwa temanna n tatabemaniia a kona ni karekea te tua ao te kaotioti ibukin te Ekaretia ni kabane. Ngke e bukina Hiram Page bwa e karekei kaotioti, e reke te mangaongao irouia membwa n te Ekaretia. N Reirei ao Berita aika Tabu 28, te Uea e kaota aron te waaki ibukin te kaotioti inanon Ana Ekaretia. Tera ae ko reiakinna man te mwakoro aei n aron tibwangan te Beretitenti n te Ekaretia ae e onoti? Tera ae ko reiakina man ana taeka te Uea nakon Oliver Cowdery ni kibu 3? Tera ae ko reiakinna man te mwakoro aio bwa E na kanga te Atua ni kairiko?
Taraa naba Dallin H. Oaks, “Two Lines of Communication,” Ensign ke Riaona, Nobembwa 2010, 83–86.
Reirei ao Berita aika Tabu 28:8–9
E aera ana mition Oliver Cowdery nakoia Reimwanaite e rang kakawaki?
Teuana te kantaninga n Ana Boki Moomon bwa “aonga taian Reimwanaite ni karekea ataakin taekan tamaia, ao n atai ana berita te Uea”.(Reirei ao Berita aika Tabu 3:20). Aio are bon titabo ma te berita are e karaoia te Uea nakoia burabeti n Ana Boki Moomon (ibukin te katooto, taraa, 1 Nibwaai 13:34–41; Enoti 1:11–18; Ereman 15:12–13). Membwa n te Ekaretia rimoa a taraiia taian Inria n Amerika bwa te riki mai irouia aomata n Ana Boki Moomon. (Ana reke raoi te Ekaretia n te tai aei bwa Reimwanaite “bon ngaiia te korakina mai buakoia aia bakatibu Inria ake i Amerika” [kabwarabwara nakon Ana Boki Moomon].)
Ni wareka riki ae mwaiti ibukin ana mition Oliver nakoia Inria n Amerika ake a kaan, taraa “A Mission to the Lamanites” (Revelations in Context, 45–49). E kanga te mition aio n reireiniko ibukin te Uea ao Ana mwakuri?
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Reirei ao Berita aika Tabu 27:1–2.Ti na kanga n uringa raoi Ana Mwakuri ni Kamaiu te Tia Kamaiu ibukira ngkana ti kana te toa?
-
Reirei ao Berita aika Tabu 27:5–14.Tera ae ti reiakinna i aoia burabeti man kiibu aikai? Ko kona n ukorii riki rongorongoia inanon te Kairi nakon Koroboki aika Tabu (scriptures.ChurchofJesusChrist.org). Baikara kakabwaia ake a tia n tauraoi nakoira ibukin kiing ake iai irouia? Ibukin rongorongon riki tabeua kiing aikai taraa Mataio 16:16–19; Reirei ao Berita aika Tabu 110:11–16.
-
Reirei ao Berita aika Tabu 27:15–18.Tao a na kukurei kain am utu ni karaoa te kaotioti ae aongkoa a buaka ma ni irianaki ma kunikai ake a tei ibukin ana bwai ni buaka te Atua, n aron te bwara, te aa ni karinano, te kunikai ni kuka, ao te kau. A na kangaa ni kamanoira bwaai ni buaka aikai n tain te buaka? Maroroakin tabeua kakairi aika bubuaka ake a kaitarai am utu ao te bwai are ko kona ni karaoia ni katokai iaom bwaai ni buaka n tamnei. Iangoa kaotakin te witeo “Put on the Whole Armor of God” (ChurchofJesuChrist.org).
-
Reirei ao Berita aika Tabu 28:2–7.Tera ae ti reiakinna man kiibu aikai ibukin wetean te burabeti? Tao kain te utu a na kona n rinanoi rongorongo ake mai imwaina mai irouia ara burabeti aika a maiu ao n tibwaia bwa e kanga ana reirei ni buokiira n iriira Iesu Kristo.
-
Reirei ao Berita aika Tabu 28:11.Ngkana ti tangiria n angan temanna arona ni kaetaki, e aera ngkai e kakawaki bwa ti na karaoia “tii imarenam ma ngaia”?
Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Te anene ae rineaki: “Come, Listen to a Prophet’s Voice,” Anene n Taromauri, nambwa 21.
Kanakoraoan te Kamatebwai I bon Iroum
Kamatebwaia aia taeka burabeti ao abotoro ni boong aika kaitira. Warekia bwa tera aia reirei burabeti ao abotoro ake a tia n reireia n taekan kanoan te reirei are ko a tia ni kunea inanon koroboki aika tabu. Taraa atuun rongorongo n te maungatabu ni kabuta n te intekiti iaon conference.ChurchofJesusChrist.org ke iaon the Gospel Library app.