A na Katorobubua Bubua Ni Wae Ni Bane, iroun J. Kirk Richards

Maati 22–28

Reirei ao Berita aika Tabu 29

Iesu Kristo E Na Ikoikotiia Ana Aomata

Teuana oin kamatebwaian koroboki aika tabu bon reiakinan te reirei, taekana teuana koauan te euangkerio e bon riai ibukin kamaiuara. Ngkai ko wareka Reirei ao Berita aika Tabu 29 n te wiki aei, kakaai reirei ibukin te atatai are e nano nakoim.

Korei Am Namakin

E ngae ngke Ana Ekaretia Iesu Kristo e a tia barongaaki inanon 1930, a mwaiti koauan te euangkerio ake a bon riai ni kaotaki, ao tabeman ngkoa membwa n te Ekaretia iai aia titiraki. A tia ni wareki taeka ni burabeti inanon Ana Boki Moomon n taekan ikotakiia Iteraera ao katean Tion (taraa 3 Nibwaai 21). E na kanga n riki anne? Te kaotioti are e taku Hiram Page bwa e karekei e kamatoa taekan te bwai anne, are e karikirakea aia kan atatai membwa (tara Reirei ao Berita aika Tabu 28). Ara aomata a miimi n taekan Bwakan Atam ao Ewa ao te mate n tamnei. Te Uea e butimwaei titiraki aikai inanon 1830: “N aron tera are kam na bubuti n te onimaki,” E tuangiia Aomata aika Itiaki, “ni katiteuanaaki n te tataro ni kaineti nakon au tua, kam na bon karekei” (Reirei ao Berita aika Tabu 29:6). Ao E butimwai ara titiraki n te bong aei; E bon tataningaira bwa ti na titirakina n te tataro. Ni koauana, ngkai te reirei aika a bongana n te kaotioti inanona Reirei ao Berita aika Tabu 29 e kaotia, n tabetai E kaekai man kanakoi koaua ao atatai n ae e riaon titiraki ake ti titiraki iai n te moan tai.

Iango ibukin Am Kamatebwai I Bon Iroum ni Koroboki Aika Tabu

Reirei ao Berita aika Tabu 29

Tamara are i Karawa e katauraoa te babaire ae nakoraoi ibukin karietaatakira.

Reirei ao Berita aika Tabu 29 e reireii koaua aika mwait n taekan ana babaire te Atua ibukiia Natina. Ngkana ko wareware, tarai koaua ake ko reiakin n taekan tatabeua mwakoro aikai man te babaire:

• Te Maiu imwain te Maiu aei (taraa kiibu 36–37)

• Kariki Bwai (taraa kiibu 31–33)

• Bwakan Atam ao Ewa (taraa kiibu 40–41)

• Te Maiu ae Mamate (tarai kiibu 39, 42–45)

• Ana Mwakuri ni Kamaiu Iesu Kristo (tarai kiibu 1, 42–43, 46–50)

• Te Mangauti (tarai kiibu 13,26)

• Kabanea ni Motikitaeka (tarai kiibu 12–13, 27–30)

Tera te ataibwai ae boou ae ko karekea? E kanga aron maium ni kaokoro ngkana ko aki atai taekan koaua aikai?

Ko kona ni kamatebwaia riki taekan ana babaire Tamara are i Karawa n “Te Babaire ni Kamaiu” (Tataekina Au Euangkerio: Te Kairi nakon Aia Mwakuri n Ibuobuoki Mitinare, rev. ed. [2018], ChurchofJesusChrist.org/manual/missionary).

Reirei ao Berita aika Tabu 29:1–8

Iesu Kristo e na ikotiia Ana aomata imwain Rokona n te Kauaoki.

Iesu Kristo e taekina ikotakiia Ana aomata “n aron te moa aine ngke e ikotiia natina iaan baina” (Reirei ao Berita aika Tabu 29:2). Tera ae e reireiniko te tamnei aei n namakina taekan ana tangira Iesu n ikotiko? Ngkana ko wareka Reirei ao Berita aika Tabu 29:1–8, tarai taekan te atatai bwa bukin tera ti na ikoikoti, antai are a na ikotaki, ao ti na kanga ni buoka ikotaia ake a “rineaki” (kibu 7).

Inanon ara bong, te ikotaki nako Tion e nanonaki n te katiteuanaaki inanon ana titeiki Tion ni katobibia te aonaaba. E kanga te ikoikotaki n aroia Aomata aika Itiaki ni buokiira “riki n tauraoi ni bwaai ni kabane” ibukin te karawawataaki are e na roko imwain te Tia Kamaiu n te Kauaoki? (kibu 8; taraa naba kiibu 14–28).

Taraa naba Taekan te Onimaki 1:10; Russell M. Nelson ao Wendy W. Nelson, “Te Kantaninga ibukin Iteraera” (aia taromauri te roronrikirake ae taabangaki n te aonnaba, June 3, 2018, ChurchofJesusChrist.org).

Iraua te Tai, iroun Liz Lemon Swindle

Reirei ao Berita aika Tabu 29:31–35

“Bwaai ni kabane irou bon bwain te tamnei.”

N te iango tera are ni kabane tuua a tamnei? Tera ae ataaki bwa ni kabane tuua a tamnei n reireiniko taekan oin bukin taian tua? Ko na riai n koroi tabeua tuua ao iangoi reirei n tamnei ake a irekereke nakon teuana ma teuana.

Tera ae riai ni bitaki ngkana ko kakae ibukin nanona n tamnei ke oin bukina inanon am mwkauri ni katoabong, riki nakon ake a taraa ni maiu n rabwata ke ake kanga ko aki kan karaoi?

Taraa naba I-Rom 8:6; 1 Nibwaai 15:30–32.

Reirei ao Berita aika Tabu 29:36–50

Iesu Kristo e kamaiura man te Bwaka.

Te kaotioti aei e kaukaki bon iroun te Uea ae E kabwarabwaraa ae boni Ngaia ara Tia Kabooi Maiura, are e a tia “anga maiuna ibukin [ara] bure” (kiibu 1). Te kaotioti e waaki nako ni kabwarabwarai tabeua nanona are ti kainanoa te Tia Kabooi Maiura. Iangoia bwa ko na kanga ni kabonganai kiibu 36–50 ni kabwarabwara bwa bukin tera ti kainanoa kaboan maiura rinanon te Tia Kamaiu Iesu Kristo. Inanon mwaitin te katei n onimaki, te Bwaka e bon taraaki bwa te bwai ae moan te kananokawaki; tera ae ko kona ni kunea inanon kiibu aikai are e reireiia taekan koauan te Bwaka? (Taraa naba 1 I-Korinto 15:22; 2 Nibwaai 2:6–8, 15–29; Motiaea 3:1–19; Mote 5:9–12.)

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Reirei ao Berita aika Tabu 29.Ko kona ni kabonganai tamnei man tokin te kamataata aei n airi ma Reirei ao Berita aika Tabu 29 n reireiniia am utu taekan te babaire ni kamaiu. N aron te katooto, kaain am utu a kona reiakina taekan mwakoro aika kaokoro man te babaire man wareka ao marooroakina taian kiibu ake a taekinaki. A kona ni kunei reitan koaua inanon Taobiki n te Euangkerio (topics.ChurchofJesusChrist.org) ke Kairii nakon Koroboki aika Tabu (scriptures.ChurchofJesusChrist.org). Koroia bwa tera ko reiakinna. Bukin tera ti kakaitau n ataakin taekan te babaire ni kamaiu? E na kanga ataakin taekana ni kakairi nakoira ni katoa bong inanon maiura?

Reirei ao Berita aika Tabu 29:2, 7–8.Tera ae nanonaki n riki n ikotaki iroun te Tia Kamaiu? Ti na kangaa ni Buokiia n ikotiia ake a rineaki?

Reirei ao Berita aika Tabu 29:3–5.Tera ae ti reiakinna n taekan te Tia Kamaiu inanon kiibu aikai are e buokiira “tabekarake nano[ra] ao bwaina te kukurei”? (kiibu 5). Te witeo “Ti Kona ni Kunea te Kukurei” (ChurchofJesusChrist.org) e kona ni buokiko ni maroroakinna bwa ko na kanga n ataa taekan te babaire ni kamaiu n tia n anganiia am utu te kukurei.

Reirei ao Berita aika Tabu 29:34–35.Warekan kiibu aikai e kona n anganiia am utu te tai ni marooroakina taekan nanoia n tamnei itinanikun tabeua tuua ke aia reirei burabeti are ko kataia n tou mwiia. Ibukin te katooto, bukin tera te Uea e tangiriira ni wareki koroboki aika tabu n ara utu? Tera baika a raraoi aika a reke ni maiura n tamnei are ti a tia noori man kawakinan tuua?

Ibukin iango aika a mwaiti ibukiin rereinakiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Anene aika rineaki: “Israel, Israel, God Is Calling,” Anene n Taromauri, no. 7.

Kanakoraoan Ara Anga reirei

Kakaea Iesu Kristo. Koroboki aika Tabu e reireiniira bwa ni kabane ana karikibwai te Atua a kakoaua Iesu Kristo (taraa Mote 6:62–63), ngaia are kakae Ibukina ngkai ko wareki koroboki aika tabu. Iangoia n tarai ke ni mwaaken kiibu ake a reireia Taekana.