Maati 8–14

Reirei ao Berita aika Tabu 23–26

“Kakorakora te Ekaretia”

Ngkai ko wareka Reirei ao Berita aika Tabu 23–26, iangoa raoi te namakin are ko karekea mai iroun te Tamnei ae Raoiroi. Ko na kanga ni kamanenai reirei man kaotioti aikai ni kakorakoraa rikim bwa ana reirei ao te Ekaretia naba?

Korei Am Namakin

Imwiin katean te Ekaretia, a kaitaraaki aika Itiaki ma kakaewenako aika boou—ni kabuta nako te euangkerio ao ni kakorakoraia naake a atia ni ikotaki ma te Ekaretia, ngke e bon teimatoate tai ni bwainikirinaki ae e moana n reitinako ni korakora. Emma Timiti e noora koauan te kakaitara ngkai e rinanona i bon irouna. N Tuun 1830, Emma ao kain ana utu Knight a tangiria ni kan babetitoaki. Ma taan kairiribai nakon te Ekaretia a kataia ni kakiriwea te taneiai ae e na rangi n tabu aei. Te moan a urua oon te ran are ea tia ni kateaki bwa e na karika iabutin te ran ae e tau ibukin te babetito. E ngae ngke e a tia ni manga karaoaki oon te ran, taan kakaitara a bootaki ni tatakaruai taeka ni kakamaku ao ni kaenaenaia tekoraki ake a babetitoaki. Ngkanne, ngke inanon te tai are e a tauraoi Iotebwa ni kamatoaia membwa aika a boou, e a katikaki ibukin aki karauan te rau n te komiuniti man tataekinan Ana Boki Moomon. E tara n ae e na aki koro nanon moanakin Ana Ekaretia te Uea ae e a tibwa kaokaki. Ma inanon te aki koaua raoi ao te kamangaongao, te Uea e katauraoa ana taeka aika a kakawaki n reirei ao ni kaunganano, are e onea mwiin “Bwanaau nakoimi ni kabane” (Reirei ao Berita aika Tabu 25:16).

Taraa naba Saints, 1:89–90, 94–97.

Iango ibukin te Kamatebwai i bon Iroum ni Koroboki aika Tabu

Reirei ao Berita aika Tabu 23–26

I kona ni buoka kakorakoran Ana Ekareia te Uea.

N taai aikai, n ae e kaniia 200 te ririki imwiin katean te Ekaretia ae e kaokaki, kainanoakin “kakorakoran te ekaretia” e reitinako (Reirei ao Berita aika Tabu 23:3–5). Ao te mwakuri aei tiaki tii ibukin Iotebwa Timiti, Oliver Cowdery, ke ara tia kairiiri n te Ekaretia—bon i bukira ni kabane. Rinanon am kamatebwai iaon Reirei ao Berita aika Tabu 23–26, iangoa te reirei are e anga te Uea nakoia membwa n te Ekaretia rimoa ni buokiia ni kakorakora te Ekaretia. Tera ae ko namakinna bwa e tangiria te Uea bwa ko na karaoia ni ira buakon te mwakuri aei?

Reirei ao Berita aika Tabu 24

E kona te Tia Kamaiu n tabekai “rake man [oin] karawawatakiu.”

Kairakin te Ekaretia n tain te bwainikirinaki ae korakora tao bon te bwai ae moan te rawawata uotakina iroun Iotebwa Timiti. Kakaea ana taeka ni kaunganano te Uea nakoina inanon Reirei ao Berita aika Tabu 24.

Tera ae ko tuangaki ni kiibu aikai bwa e kanga te Tia Kamaiu n tabekiko rake man karawawatakim?

Reirei ao Berita aika Tabu 24:1–3 

Reirei ao Berita aika Tabu 24:8 

Reirei ao Berita aika Tabu 121:7–8 

Itaia 40:28–31 

Motiaea 24:14–15 

E kanga n tia n tabekiko rake Iesu Kristo man rawawatam? Tera ae ko kona ni karaoia n reitinako n ukora Ana ibuobuoki ianon taai ni karawawata?

E Kamarurungiia Aika Mwaiti man Aoraki aika a Kaokoro, iroun J. Kirk Richards

Reirei ao Berita aika Tabu 25

Emma Timiti bon “te aine ae rineaki.”

Emma Hale ngke e mareaki ma Iotebwa Timiti, e a kaman ataia ae e na rinanon taian anga nano. E a tia ni kaitara nanon ana karo ao e anganako aron maeuna ae e maeuraoi nakon te maiu ae e aki ataia bwa a na aekakira. Tao e a kaman tia ni iangoia bwa tera ae e kainanoia te Uea mai irouna n te mwakuri n te Ekaretia ae Kaokaki. Kakaea kaekan te titiraki are e katauraoia te Uea n Reirei ao Berita aika Tabu 25. Noora ana taeka te Uea ni kibu 16—ko kunei tabeua bwaai n te mwakoro aio ae ko namakinna bwa “Bwanana [nakoim]”?

Taraa naba “An Elect Lady” (video, ChurchofJesusChrist.org); “Thou Art an Elect Lady,” Revelations in Context, 33–39; Joy D. Jones, “An Especially Noble Calling,” Ensign ke Riaona, Meei 2020, 15–18.

Reirei ao Berita aika Tabu 26:2

Tera te boutoka ae tabangaki?

Ngkana membwa a karekei wewete ke te otenanti n te nakoanibong inanon te Ekaretia, iai ara tai ni kaotia raoi ni kamatoaia man katean baira bwa kaotan ara boutoka. Te reirei ni kaotan te boutoka ao nanom ni kakoaua imataia aomata e aranaki bwa te boutoka ae tabangaki. E reirei Beretitenti Gordon B. Hinckley, “Te waaki ibukin te kamatoa e bon riaon riki te mwakuri ae taneiai te aba ni kakaraoaki ni katean te bai. Bon te nano ni kamatoa n karaoa nanon, ni boutoka, ni buokiia naake a atia ni rineaki” (“This Work Is Concerned with People,” Ensign, Meei 1995, 51).

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Reirei ao Berita aika Tabu 23:6.E aera te Uea e tangiriira bwa ti na tataro “n [ara] utu, ao i buakoia [raraora], ao n n taabo nako”? Tera te anene ae “Love Is Spoken Here” (Aia Boki n Anene Ataei, 190)—ke te anene riki teuana iaon te tataro—ae e reiakiniira iaon mwaakan te tataro?

Taraa naba 2 Nibwaai 32:8–9; 3 Nibwaai 18:18–23.

Reirei ao Berita aika Tabu 24:8.Tao e na ibuobuoki nakoia am utu ni maroroakinna bwa tera nanon “bwaina te taotaonakinano n tenaan karawawata”? Ngkana iai am ataei aika a uarereke, e na rangi ni kaunga ngkana ko a manga karaoa aron te kakatai are e kabwarabwara Beretitenti Dieter F. Uchtdorf n “Continue in Patience” (Ensign ke Riaona, Meei 2010, 56; taraa naba te witeo iaon ChurchofJesusChrist.org). Teraa ae e reireiniira Reirei ao Berita aika Tabu 24:8 iaon te taotaonakinano? E kanga ni buokiira te Uea n riki n rang taotaonakinano inanon karawawatakira?

Reirei ao Berita aika Tabu 25:11–12.Tao ko kona n anenea te anene n taromauri ke te kuna ae mamaten nanon temanna kain te utu ao maroroakina bwa e aera ngkai teuanne ke neienne bon ana “anene man te nano.” A kanga anene aikai n riki bwa “te tataro nakon [te Atua]”?

Reirei ao Berita aika Tabu 26:2.E na rangi n ibuobuoki ngkana ko taraa “Boutoka ae Tabangaki” inanon Bwaai ni Kairi nakon Koroboki aika Tabu (scriptures.ChurchofJesusChrist.org). Ti kanga ni kaota ara boutoka nakoia ara taan kairiiri?

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae e na raoiroi: “Lift Up Your Voice and Sing,” Aia Boki n Anene Ataei, 252 (taraa “Iango ni Katamaroa n Am Kamatebwai n te Utu ni Koroboki aika Tabu”).

Bwanaa aika a Manga Kaokaki

Emma Hale Timiti

Ana taeka te Uea nakon Emma Timiti are e koreaki n Reirei ao Berita aika Tabu 25 e kaota aron Ana namakin nakoina ao te anganano are e kona ni karaoia nakon Ana mwakuri. Ma teraa raoi aron Emma? Tera ae ti ataia n aron kateina, irekerekena, korakorana? Teuana te kawaki ae ti na ataa iai te “aine ae rineaki” aei (Reirei ao Berita aika Tabu 25;3) bon man warekan aia taeka aomata ake a bon kinaa raoi.

Emma Timiti, iroun Lee Greene Richards

Iotebwa Timiti Jr., kainabana

“Ma te kukurei ae e aki kona n taekinaki, are ae e uota te kimwareirei ae kaona nanou, ngke I taua baina, n te tairiki anne, raou ae tangiraki Emma—neiere kainabau, are bon kainabau inanon au bong n ataei; ao bon te aomata are e rang tangiria nanou. A mwaiti namakin n au iango ngkana I iango inanon tebeua te tai mwaitin taneiai ake ti a tia ni weteaki bwa ti na rinanoi. Te korakai ao taian kamwane, te nanokawaki, ao te karawawataki, ao te kimwareirei ao te karaunano ake a tia n riki n rinanon maiura ao a tia ni kakabwaia maiura. O! I uringii bwaai ni kabane ake a raoiroi ao bwaai ni kabane ake a bubuaka n te tai aei, Ma ae e bon tiku naba, n aki tabe ma te kanganga, n aki bwarananona, ni matoa, ao n aki nanotiotio, n aki bibitaki, Emma ae e nanoanga.”¹

Lucy Mack Smith, ai tinana

“E bon kairake ngkekei, ao, bon kateina bwa e tangiria n rikirake, e kabanea nanonaibukin ana mwakuri te Uea, ao ni kabane ana motinnano nakon ti te ekaretia ao ibukin te koaua. Engae ngke bwa tera ae karaoia, e karaoia ma nanona ao e aki titiraki nakon titiraki aika e iangoia i bon irouna ‘Ao e na reke riki ae rawata nakoiu nakoia ake tabeman?’ Ngkana a kanakoaki elders bwa ana taekina te euangkerio, bon ngaia te moan aomata ae e anga baina ni buokiia ma aia kunikai ibukin mwanangaia, n aki tabe bwa tera kataakina are e mena inanona.”²

“I tuai man noora te aine inanon maiu, ae e kona n tokanikai iaon aekakin taian korakai ao karawawata, n te namakaina teuana ma teuana, ao man te ririki teuana ma teuana, ma te ninikoria ae e aki rarairaki, nanomatoa ao te taotaonakinano, are e aki toki ni karaoia; ma I atai bwaai are e na rinanoi; are e a tia n rinanoi n akea ataakiia, ao n tokanikai iaon te bwainikirinaki, ao n tokanikai iaon uniia mwaane ao te riaboro, ni karokoa are e a rinanon taian kanganga ake [ana kona] ni kamauania mwaitia aine tabeman.”³

Iotebwa Timiti Sr., ai tamana

Ana kakabwaia n tamanuea, are e anganaki iroun Iotebwa Timiti Sr., are e beku bwa te tamanuea n te Ekaretia:

“Emma, are ai natiu, ko kakabwaiaaki iroun te Uea, ibukin am kakaonimaki ao koaua: ko na kakabwaiaki ma kainabam, ao ni kimwareirei n te mimitong are e na roko iaona: E a tia ni karawawataki tamneim ibukin buakakaia mwaane are a ukoukora kamaunaan kaainabam, ao nanom ni kabane e a tia n nako ibukina n te tataro ibukin kainaomataana: kukurei, bwa te Uea ae Atuam e a tia n ongo am bubuti.

“Ko a atia n nanokawaki ibukin matoatoan nanoia kain ana utu tamam, ao ko a maan n tataninga ibukin kamaiuaia. Te Uea e na karinea tangim, ao man ana motikitaeka e na karikiia tabeman bwa ana noora nanobabaia ao ana rairi nanoia man aia bure; ma e na riki man te karawawataaki are ana kamaiuaki iai. Ko na norii bong aika mwaiti; eng, e na kawakiniko te Uea nikarokoa e rau nanom, bwa ko na noora am tia Kamaiu. E na kimwareirei nanom n ana mwakuri ae e korakora te Uea, ao akea ae e kona n anaa te kimwareirei anne mai iroum.

“Ko na aki toki n uringa korakoran ruon te Atua ni kamangoria ni kariaia bwa ko na raona natiu ngkana e roko te anera n angana aia rekooti Nibwaaite nako nanon baina. Ko a tia n rinanon kananokawaki aika mwaiti ibukin bwa te Uea e a tia n anaa mai iroum teniman natim: ao aio bon tiaki am bure, bwa e ataa nanom ae e itiaki n karikirakea am utu, bwa e aonga ni kakabwaiaaki aran natiu. Ao ngkai, noria, I taku nakoim, bwa e kangai te Uea, ngkana ko kakoauaa, ao ko na kakabwaiaaki n te bwai aio ao ko na manga karekeia riki tabeman ataei, nakon kimwareirein ao karauan nanom, ao nakon kimwareireia raraom.

“Ko na kakabwaiaaki ma te atatai, ao ni karekea te korakora n reireiniia tabeman aine. Reireia am utu te etieti, ao ake a uarereke aroia ni maiu, ao anera aika tabu a na kawakiniko: ao ko na kamaiuaki n abanuean te Atua; e na bon riki aio. Amen.”⁴

Emma Timiti ma natina. Te tai ni Ngare, iroun Liz Lemon Swindle

Bwaai aika a na taraaki

1. Journal, December 1841–December 1842, 164, josephsmithpapers.org; punctuation standardized.

2. Lucy Mack Smith, History, 1844–1845, book 13, pages 7–8, josephsmithpapers.org; language modernized.

3. Lucy Mack Smith, History, 1845, 190, josephsmithpapers.org; capitalization and spelling modernized.

4. “Blessing from Joseph Smith Sr., 9 December 1834,” Patriarchal Blessing Book 1, 4–5, josephsmithpapers.org; paragraphing altered and spelling standardized.

Kunan Emma, iroun Liz Lemon Swindle