Katotongan Kristo n te boua ae kaaraki

Maati 29–Eberi 4

Itita

“Ngai Are E Maiu, Ngai Are E Tiringaki”

Ngkai ko katauraoi ni kauringa Mangautin te tia Kamaiu ni Ititan te Tabati, iangoia bwa a kanga kaotioti aika ngkai ni karikirakea am onimaki bwa Iesu Kristo bon ti Ana Riki Temana te Atua ao te tia Kamaiua te aonaaba.

Korei Am Namakin

Eberi 3, 1836 bon Tabatin te Itita. Imwiin buokan kabutan te toa nakoia aika Itiaki ake a bootaki n te Tembora ae e a tibwa katabuaki i Kirtland, Iotebwa Timiti ao Oliver Cowdery a nakon te tabo ae rau i tinanikun te roki n te tembora ao ni kabwaraka atuia n tataro ni karaurau. Ngkanne, n te bong ae tabu aei ngke a bane Kiritian n taabo nako ni kauringa Mangautin Iesu Kristo, te tia Kamaiu ae bon Ngaia e kaoti inanon Ana tembora, n taekina, “Ngai are e maiu, Ngai are e tiringaki” (Reirei ao Berita aika Tabu 110:4.).

Tera nanona ae e taekinaki bwa Iesu Kristo bon “Ngaia ae maiu”? E aki tii nanonaki ae E uti man te rua ni mate n te katenua ni bong ao e kaoti nakoia Ana reirei ake i Kariraia. E nanonaki bwa E maiu ngkai. E tataetae rinanoia Ana burabeti n te bong aei. E kaira Ana Ekaretia n te bong aei. E kamaoi tamnei aika a ikoaki ao naano aika uruaki n te bong aei. Ngaia are ti kona ni kaokioka ana kakoaua ae e korakora Iotebwa Timiti: “Ao ngkai, imwin taian koaua aika bati aika tia ni kaotaki ibukina, aio te koaua … te kabanea, ae ti anga ibukina: Bwa e maiu!” (Reirei ao Berita aika Tabu 76:22). Ti kona n ongo Banaana inanon kaotioti aikai. Ti kona ni kakoauaa Baina inanon maiura. Ao ti kona n tatabemaniira n namakina “te kakukurei n te taeka ae taekinaki aei: ‘I ataia E maiu Iesu!’” (Anene n Taromauri, nambwa 136).

te aikaon ibukin am kamatebwai i bon iroum

Iango ibukin Am Kamatebwai I Bon Iroum ni Koroboki Aika Tabu

Reirei ao Berita aika Tabu 29:5; 38:7; 62:1; 76:11–14, 20–24; 110:1–10

Iesu Kristo E maiu.

E mwaiti ana tai te Burabeti Iotebwa Timiti n noora te Tia Kamaiu are e a mangauti, ao uoua taneiai akanne a koreaki n Reirei ao Berita aika Tabu. Ngkai ko wareka mwakoro 76:11–14, 20–24; 110:1–10, teraa ae taraa n rangi ni kakawaki n ana kakoaua Iotebwa Timiti? Bukin tera e kakawaki ana kakoaua iroum?

Inanon Reirei ao Berita aika Tabu, te Tia Kamaiu e kaota kakoauaan Ana mition ao arona n Atua. Tera ae ko reiakinna iaon taekan te Kristo ae maiu man Ana taeka n Reirei ao Berita aika Tabu 29:5; 38:7; 62:1? Ko kona ni iangoa rawean taeka ae aekakin aikai ake ko kunei n am tai ni kamatebwaia Reirei ao Berita aika Tabu.

Taraa naba Iotebwa Timiti—Rongorongo 1:17.

Reirei ao Berita aika Tabu 29:26–27; 42:45–46; 63:49; 88:14–17, 27–31; 93:33–34

Ibukin Mangautin Iesu Kristo, N na manga bon mangauti.

Iotebwa Timiti e ataa te namakin n nanokawaki ibukin maten temanna ae tangiraki. Tarina aika uoman, Alvin ao Don Carlos, a mate ngke ataeinimwaane. Iotebwa ao Emma a tauniia onoman natiia, a bane ni uarereke iaan uoua te ririki. Man te kaotioti are e karekea, e karekea ana noonori ae akea tokina Iotebwa iaon te mate ao Ana babaire ae akea tokina te Atua. Iangoa te koaua are e kaokaki n Reirei ao Berita aika Tabu 29:26–27; 42:45–46; 63:49; 88:14–17, 27–31; 93:33–34. A kanga kaotioti aikai n roota te kawai are ko taraa iai te mate? A kanga n roota te kawai ni maiuakina maium?

Taraa naba 1 I‑Korinto 15; M. Russell Ballard, “The Vision of the Redemption of the Dead,” Ensign ke Riaona, Nobembwa 2018, 71–74; Teachings of Presidents of the Church: Joseph Smith (2007), 174–76.

Reirei ao Berita aika Tabu 18:10–13; 19:16–19; 45:3–5; 76:69–70

Iesu Kristo e kakoroa nanon te “mwakuri ni kamaiu ae tamaroa.”

Teuana te kawai ni katurua ara taratara iaon te Tia Kamaiu n tain te Itita bon kamatebwaian te kaotioti n Reirei ao Berita aika Tabu ake a reiakina aron Ana mwakuri ni kamaiu. Tabeua mai ibuakon aikai a kona ni kuneaki n Reirei ao Berita aika Tabu 18:10–13; 19:16–19; 45:3–5; 76:69–70. Tao ko na kona ni karinanii koaua iaon Ana Mwakuri ni Kamaiu te Tia Kamaiu ake ko kunei ni kiibu aikai. Ni karikirakea am kamatebwai, ko kona ni kairii nakon are ko karinanii man ukeran kiibu tabeua ake a karinanaki iaan “Karaoa te Mwakuri ni Kamaiu, Mwakuri ni Kamaiu” (Bwai ni Kairi nakon Koroboki aika Tabu, scriptures.ChurchofJesusChrist.org).

Aikai tabeua titiraki ake a na kona ni kaira am kamatebwai:

• E aera Iesu Kristo e rineia bwa E na korakai?

• Tera ae I riai ni karaoia ni karekea te kakabwaia man Ana anga karea?

• N na kanga n ataia bwa mwaakan Ana Mwakuri ni Kamaiu iai uana nakon maiu?

E tataro Iesu

Uean te Tataro iroun Yongsung Kim

te aikaon ibukin te kamatebwai n te utu

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Maungatabu ni Kabuta.Ibukina bwa te maungatabu ni kabuta e bwakara raoi Tabatin te Itita n te ririki aei, ko na bae n taraia bwa a na kanga rongorongo man te maungatabu (n raonaki ma te katangitang) ni kona ni karikirakea aia koaua am utu iroun Iesu Kristo. Te katooto, ataei aika a uarereke a kona ni korea tamnein te Tia Kamaiu, ke n taua ieta Tamneina, ngkana a ongo te rongorongo ke te anene ibukin Iesu Kristo. Tabeman kain te utu a kona ni karinanii koaua ake a ongo iaon te Tia Kamaiu. Imwiina, kain te utu a kona n tibwa aia korotamnei ke baike a karinanii ao aia koaua iaon Iesu Kristo.

Reirei ao Berita aika Tabu 88:14–17; 138:17, 50.Ana kona kain am utu n tangiria ni iangoa te karaki ni katooto ke te bwai ae e onea mwin te reirei ni kabwarabwara bwa tera ae nanonaki n te mate ao te mangauti—teuana are e kaota aron te rabwata ao te tamnei ni maenako ao ni manga bootaki, tao n aron te bai ao nangoan te bai. A kanga kiibu aikai ni kakorakora ara kakaitau ibukin te bwai are e karaoia te Tia Kamaiu ibukira?

“Te Kristo Ae Maiu: Aia Koaua Abotoro.”Ni kaungaa te marooro iaon aia kakoaua burabeti aika ngkai i aon te Tia Kamaiu, ko kona ni katanakoia kain te utu bwa ana wareka te mwakoro man “Te Kristo Ae Maiu: Aia Koaua Abotoro” (Ensign ke Riaona, Meei 2017, inanon te moan iteraniba) ao tibwa tera ae a reiakina iaon Iesu Kristo. Ko konaa naba ni kaota te witeo “Apostle Testimony Montage” (ChurchofJesusChrist.org). Baikara koaua ake ti kunei ae a anganira te unganano?

“I Ataia Ae E Maiu Iesu.”Ni buokiia am utu ni iangoi anga aika mwaiti are e a tia ni kakabwaiaira iai te Tia Kamaiu are mangauti, kam kona ni bane n anenea “I Ataia E Maiu Iesu” (Anene n Taromauri, nambwa 34) ao reita te koaua ae e reiakinaki n te anene aei ma ake a taekinaki n kiibu aikai: Reirei ao Berita aika Tabu 6:34; 45:3–5; 84:77; 98:18; 138:23. Ana bae n tangiria kain am utu ni korei tabeua kibun te anene n taromauri are e kaota iai bwa a kanga n ataia ae e maiu aia Tia Kamaiu.

Ibukin te witeo iaon te Itita ao tabeua riki bwaai ni ibuobuoki, taraa Easter.ComeUntoChrist.org.

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae tamaroa: “Iesu e a Tia n Uti,” Aia Boki n Anene Ataei, 70.

Kanakoraoan Ara Anga Reirei

Kakaai anga n anga reirei man bwai aika kabonganaaki ni katoa bong. Iangoia bwa a kanga baike a kakaraoi kain am utu ni kairi nako te marooro ae e uaana ibukin taian koaua n te ekaretia (taraa Reirei n Ana Kawai te Tia Kamaiu, 4). Te katooto te karau ae e ngonako e kona n reke bwa te tai n taekina bwa e kanga te Atua n anga n akea totokoan kakabwaia nako aoia Natina.

E kaoti Iesu nakon Iotebwa Timiti ao Oliver Cowdery

Kaotin Iesu Kristo nakon te Burabeti Iotebwa Timiti ao Oliver Cowdery, iroun Walter Rane