“Eberi 12–18. Reirei ao Berita aika Tabu 37–40: ‘Ao Ngkana Kam Aki Katiteuanaaki Tiaki Au Bwai Ngkami,’” Nakomai, Iriirai—Ibukiia Aomata n Tatabemaniia ao Utu: Reirei ao Berita aika Tabu 2021 (2020)
“Eberi 12–18. Reirei ao Berita aika Tabu 37–40,” Nakomai, Iriirai—Ibukiia Aomata n Tatabemaniia ao Utu: 2021
Aomata aika Itiaki a Mwaing nako Kirtland, iroun Sam Lawlor
Eberi 12–18
Reirei ao Berita aika Tabu 37–40
“Ao Ngkana Kam Aki Katiteuanaaki Tiaki Au Bwai Ngkami”
Tauan mwiin am namakin n am tai ni kamatebwai bon teuana te kawai ae ko kona ni ongeaba nakon ana kairiiri te Atua ni “kawakina te wanawana inanomi” (Reirei ao Berita aika Tabu 38:30).
Korei Am Namakin
Nakoia Aomata aika Itiaki rimoa, te Ekaretia bon ti te tabo n ongora taian kabwarabwara n te Tabati. Rinanon nako Ana kaotioti nakon Iotebwa Timiti, te Uea e kamaatata te Ekaretia n taeka n ai aron te bwai ae riki, abanuea, Tion, ao, n angiin te tai, te mwakuri. Anne are tao bon ngaia are e ana nanoia taian membwa rimoa nakon te Ekaretia. Ngkai a rangi n tangirii reirei aika a kaokaki n te Ekaretia, a mwaiti naba ake a tangiri bwaai ake ana katabui maiuia nako iai. E ngae n anne, ana tua te Uea n 1830 nakoia Aomata aika Itiaki bwa ana bootaki i Ohio e bon aki bebete irakina irouia tabeman. Irouia aomata n aron Phebe Carter, e nanonaki ae ana katukui mweengaia aika tamaroa ibukin te tabo i aontia are aki ata tabuaiakana (taraa “Voices of the Restoration” n tokin te kamaatata aio). N te bong aei ti kona n nooria raoi bwa tera ae a kona n nooria Aomata aika Itiaki ni mataia n onimaki: te Uea e katauraoi kakabwaia aika korakora ibukiia i Ohio.
Kainanoan te ikotaki nako Ohio e a kaman tia n toki ngkai, ma Aomata aika Itiaki ni boong aikai a bon tabe naba ni boonano ibukin bwaai aika riki: aroia ni mwakuri ae ti te arona: “ni katea Tion” (Reirei ao Berita 39:13). N ai aroia Aomata aika Itiaki rimoa, ti katinanikua “raraomaeakinan bwain te aonaaba” (Reirei ao Berita aika Tabu 40:2) ibukina bwa ti kakoaua ana berita te Uea: “Ao ko na karekea … te kakabwaia ae korakora ae ko tuai n ataia” (Reirei ao Berita 39:10).
Taraa naba Saints, 1:109–11.
Iango ibukin Am Kamatebwai I Bon Iroum ni Koroboki Aika Tabu
Reirei ao Berita aika Tabu 37:1
Teraa ae e rairia Iotebwa Timiti n 1830?
N te kibu aei, te Uea e nanona te mwakuri are e karaoia Iotebwa Timiti iaon rairan te Baibara man ana mwakuri te Tamnei, are e ataaki ngai bwa te “rairairi.” Ngke e karekea te kaotioti Iotebwa are e koreaki n mwakoro 37, e a tia ni bwanin tabeua mwakoro n te boki ae Karikan Bwaai ao e a tibwa reiakina rongorongon Enoka ma ana kawa ae Tion (taraa Karikan Bwaai 5:18–24; Mote 7). Tabeua reirei ae te Uea e reiakina Enoka bon titebo ma ake E kaoti n te kaotioti n mwakoro 38.
Taraa naba Atuun Reirei n Rongorongon te Ekaretia, “Ana Rairairi Iotebwa Timiti i aon te Baibara,” ChurchofJesusChrist.org/study/topics.
Iotebwa Timiti e mwakuri ma Sidney Rigdon iaon rairan te Baibara man ana mwakuri te Tamnei. Kamataata n te tamnei iroun Annie Henrie Nader
E ikotiira te Atua bwa E na kakabwaiaira.
E motika Ana moti te Uea n te bane nako Ohio ngke e kangai, “Nooria, aio te wanawana” (Reirei ao Berita aika Tabu 37:4). Ma tiaki nikabane ae a nooria bwa te wanawana inanona n te tai naba arei. Ni mwakoro 38, e kaota Wanawana te Uea ni kabwarabwara raoi. Tera ae ko reiakinna man kiibu 11–33 ibukin te kakabwaia n te ikotaki? Membwa n te Ekaretia aikoa tuangaki bwa ana bootia ni mwaing nakon te tabo teuana, n te anga raa ae ti ikotaki n taai aikai? A kanga kakabwaia aikai ni kaineti nakoira? (taraa Russell M. Nelson, “The Gathering of Scattered Israel,” Ensign ke Riaona, Nobembwa 2006, 79–81).
Ngkai ko wareware ni kabanea te mwakoro aei, tarai kibu n taeka ake tao a buokiia aika Itiaki ni karekei aia koaua ake a kainanoi n ongeaba n Ana tua te Atua ni ikotaki i Ohio. Iangoi naba tuua ake E a tia n anganiko ao te onimaki are ko kainanoia n ongeaba nakon tuua akanne. Titiraki tabeua aika a na kona ni kaira am kamatebwai:
-
Tera ae ko kunea ni kiibu 1–4 are e anganiko te koaua raoi iroun te Uea ao Ana tua?
-
E na kanga kibu 39 ni buokiko n ongotaeka nakon Ana tua te Atua e ngae ngke a kainanoa te anga nano?
Tera riki ae ko kunea?
Reirei Ao Berita Aika Tabu 38:11–13, 22–32, 41–42
Ngkana I tauraoi ao na aki maaku.
Aomata aika Itiaki a atia ni rinanoni bainikirinaki aika mwaiti, ao te Uea e ataia ae a mwaiti riki aika a na roko (taraa Reirei ao Berita aika Tabu 38:11–13, 28–29). Ni buokiia bwa ana aki maaku, E kaota te reirei ae kakawaki: “Ma ngkana ko tauraoi ao ko na aki maaku” (Reirei ao Berita 38:30). Anaa tabeua te miniti ni iangoi kakaewenako ake ko a tabe ni mwakuriia ngkaii. Ngkanne ngkai ko kamatebwaia mwakoro 38, kakauongo nakon ana wirikiriki te Tamnei iaon kawai ake ko kona ni katauraoi ibukin te kakaewenako bwa ko aonga n aki maaku.
Taraa naba Ronald A. Rasband, “Be Not Troubled,” Ensign ke Riaona, Nobembwa 2018, 18–21.
Reirei ao Berita aika Tabu 39–40
Raraomaeakinan bwain te aonaaba ana aki katikai nako man kawakinan Ana taeka te Atua.
Wareki mwakoro 39–40, ni ikotaki ma kabwarabwaran rongorongon te aba n atuun te mwakoro, ao iangoi kawai are e rinanoi James Covel ake ana kaeti nakoim. Te katooto, iangoi taai ngke “nanom … e eti imatan te [Uea]” (Reirei ao Berita aika Tabu 40:1). Ko kanga ni kakabwaiaaki man am kakaonimaki? Iangoia naba bwa baikara “raraomaeakinan bwain te aonaaba” ae ko kaitarai (Reirei ao Berita aika Tabu 39:9; 40:2). Tera ae ko kunei inanon mwakoro aikai ae kaungako bwa ko na aki toki ni bwabwaina te ongotaeka?
Taraa naba Mataio 13:3–23.
Iango ibukin Kamatebwai ni Koroboki aika Tabu n te Utu ao n te Bootaki n te Tairiki
-
Reirei ao Berita aika Tabu 37:3.Ni buoka am utu ni mataata n aia anganano aika Itiaki ake a karaoi ni ikotaki nako Ohio, ko kona n taraa te mwabe ae e kaairaki iaon te kamataata aio.
-
Reirei ao Berita aika Tabu 38:22.Ti na kanga ni karika Iesu Kristo bwa ngaia te “tia anga te tua” n ara utu? E na kanga irakin Ana tua bwa e na karikiira bwa “aomata aika inaomata”?
-
Reirei ao Berita aika a Tabu 45:4–5.N reireiniia ataei teraa nanon “katiteuanaki,” ko kona ni buokiia ni warekiia kain ami utu ao maroroakina bwa e aera ngkai a kakawaki aomata n tatabemaniia n ami utu. Katuruturua bwa ngaira ni kabane bon teuana te utu. Ko kona ni buokiia am ataei ni korea te ware ae e bubura 1 iaon te boutita ao katamaroa n aara ao korotamnei ke tamneia kain te utu n tatabemaniia. Ko kona naba ni koreia iaon te boutita bwai ake ko iangoi ni karaoi n riki ni katiteuanaki n te utu. Ko kona naba ni matakuakina te witeo “Love in Our Hearts” (ChurchofJesusChrist.org) ke wareka Mote 7:18.
-
Reirei ao Berita aika a Tabu 38:29–30.Ko kona ni maroroakina te bwai ae e a tibwa tia n rinanona am utu ke ana taneiai temanna are e kainanoa te katauraoi. E kanga aron am katauraoi n roota aron te bwai are ko rinanona? Tera ae e tangiriira te Uea bwa ti na katauraoi ibukina? E kanga aron tauraoira ni buokiira bwa ti na aki maaku? Tera ae ti kona ni karaoia bwa ti na tauraoi?
-
Reirei ao Berita aika Tabu 40.Teraa nanon te kibu n taeka “raraomaeakinan bwain te aonaaba” (kibu 2) i roura? Iai tabeua raraomaeakinan bwain te aonaaba ae a tukiira man karekean Ana taeka te Atua “ma te kimwareirei”? Ti na kanga n tokanikai iaoia?
Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Te anene ae rineaki: “Jesus Said Love Everyone,” Aia Boki n Anene Ataei, 61.
Bwanaa aika a manga kaokaki
Te ikotaki nako Ohio
Kawan Kirtland, iroun Al Rounds
Mai ibuakoia Aomta aika Itiaki ake a ikotako nako Ohio n te 1830 bon Phebe Carter. E kaina te Ekaretia i meang mainikun United States inanon ana kauabui tabun n ririki, e ngae ngke aki kaina ana karo. E korea rimwi ana rinerine ngke e mwaing nako Ohio ni botaki ma aika Itiaki:
“A mimi raraou n te bwai are I karaoia, n arou naba, ma iai te bwai inanou ae e kaungaai ni waaki nako. Rawawatan nanon tinau ngke I kitana mweengara e bon kaan ae I a aki kona; ma ngke tao arona bwa tiaki te tamnei are i nanou tao na bon konaaki n te kabanea. E tuangai tinau bwa e raoiroi riki ngke e norai n taunaki nakon ae n a nako ti ngai nakon te aonaba ae aki tatangira.
“‘[Phebe],’ e taku, n rangi n nanona, ‘ko kona n okirai ngkana ko kunea bwa e kewe te Aro ni Moomon?’
“I kaeka, ‘eng, tinau; N a karaoia.’ … Au kaeka e katoka raraomana; ma e karekea nakoira te nanokawaki ae korakora n raurenakora. Ngke e a roko te tai are nang nako iai e a rootai ae I aki kona ni manga kaboo; ngaia are I a korea au kabo nakoia ni kabane, ao ni katukua iaon au taibora, I biri rikaaki n te kaintamarake ao ni kiba n rin inanon te kaa are e kokokaki. Ngaia are I a kitana mweengau ae tangiraki are I rikirake iai ni katiteuana maiu ma Ana Aomata aika Itiaki te Atua.”1
Inanon teuana te taeka ni karaure, e koreia Phebe:
“Karo aika Tangiraki—Ngkai n ang kitana aia auti au karo inanon tabeua te tai … I aki ataia bwa maanra—ma n a aki nako n aki kaota nanou ni kakaitau ibukin te akoi are I karekea ma ngke I uarereke ni karokoa te tai aei—ma te bwai ae e Katauaki Ibukiu e a bon tia ni baireaki ae tao ngaia ngkai n aron ae e a riki. Ti a katikui nikabane bwaai inanon bain te tia Katoronibwai ao ti na karabwarabwa ngkai ti a tia ni kariaiakaki ni maeka nikabane n te tai ae e maan ao n te aro ae e kakukurei, ni kakoauaa bwa bwaai nikabane a na bane n nakoraoi ngkana ti tangira te Atua n akea tiana. Ti na ataia bwa ti kona n tataro nakon temanna te Atua ae e kona n ongo te tataro ae e nanonaki raoi irouia aomata ni kabane ao n anganiira are e tamaroa ibukira. …
“Tinau, I kakoauaa bwa bon nanon te Atua ibukiu bwa n a nako maeao ao I a kaman namakina aei inanon te tai ae e maan. Ngkai e a riai ibukiu bwa nang nako … , I kakoauaa bwa bon tamnein te Uea ae e karaoa aei ae e bon riai ni bwaai ni kabane. O tai raraoma ibukin natimi; e na karaua nanou te Uea. I kakoauaa bwa e na kawakinai te Uea ao n anganai ae e tamaroa ibukiu. … I nako ibukina bwa e wewete te Matita—e a tia ni karaoa au beku ae mataata.”2
