“Eberi 5–Eberi 11. Reirei ao Berita aika Tabu 30-36: ‘Ko Weteaki bwa Ko Na Tataekina Au Euangkerio’” Nakomai, Iriirai—Ibukiia Aomata n Tatabemaniia ao Utu: Reirei ao Berita aika Tabu 2021 (2020)
“Eberi 5–Eberi 11. Reirei ao Berita aika Tabu 30–36,” Nakomai, Iriirai—Ibukiia Aomata n Tatabemaniia ao Utu: 2021
Eberi 5–Eberi 11
Reirei ao Berita aika Tabu 30–36
“Ko Weteaki bwa Ko Na Tataekina Au Euangkerio”
Inanon booki aika tabu ti kona ni kunei kamataata ni koaua ni kaineti ma bwaai ake ti rinanoi. Butiia te Uea bwa e na buokiko ni kunea te rongorongo ae e onoti ibukim inanon Reirei ao Berita aika Tabu 30–36.
Korei Am Namakin
Parley P. Pratt e a tibwa kaina te Ekaretia tao ai tibwa teuana namakaina ngke e wetekaki nako “nanon te rereua” n tataekina te euangkerio (Reirei ao Berita aika Tabu 32:2). Thomas B. Marsh e a tibwa kaina e kee riki ana tai nakon anne ngke e tuangaki, “E a roko auan am mition” (Reirei ao Berita aika Tabu 31:3). Orson Pratt, Edward Partridge, ao tabeman riki a bon tibwa babetitoaki ngke e roko weteaia nakon te mition. Ma tao n te tai aei e bon rang n riai—n tain bwakan baan kai n 1830, akea temanna ae e a tia ni kaina te Ekaretia n ae riaon onoua namakaina. Ma bon iai te bwai ae reiakinaki n te baten aei ibukira n te tai aei: ngkana ko mataata teutana ni butimwaea te euangkerio ae kaokaki ao ni bwabetitoaki, e tau am atatai n tibwaia ma tabeman. Eng ti aki toki n tangiria ni kan karikirakea ara atatai n te euangkerio, ma te Atua e aki kona n tataninga ni weteia “naake aki reirei” bwa ana taekina Ana euangkerio (Reirei ao Berita aika Tabu 35:13). Ni koauana, E kaoira ni kabane, “Kaurea wiim n taekina au euangkerio” (Reirei ao Berita aika Tabu 30:5). Ao ti karaoa anne n ae e tamaroa tiaki man wanawanara ao taneiai ma “man mwaakan [te] Tamnei” (Reirei ao Berita aika Tabu 35:13).
Taraa naba “The Faith and Fall of Thomas Marsh,” “Ezra Thayer: From Skeptic to Believer,” “Orson Pratt’s Call to Serve,” Revelations in Context, 54–69.
Iango ibukin Am Kamatebwai I Bon Iroum ni Koroboki Aika Tabu
Reirei ao Berita aika Tabu 30–36
I weteaki bwa N a tataekina Ana euangkerio Iesu Kristo.
E ngae ngkana ko weteaki ke ko aki bwa te mitinare, e tangiriko te Uea bwa ko na tibwa Ana euangkerio, ao angiin Ana taeka nakoia mitinare rimoa n boong aikai ai bon nakoim naba. Ngkai ko kamatebwaia Reirei ao Berita aika Tabu 30–36, korei mwiin baike ko reiakin iaon te wewete n tibwaan te euangkeroo. Ko kona ni korei bwaai ake e tua te Uea nakoia Ana mitinare (te katooto, taraa Reirei ao Berita aika Tabu 30:8) ao teuana riki ae ko korei ibukin bwaai ake e beritanii te Uea (te katooto, taraa Reirei ao Berita aika Tabu 30:11).
E na kanga kiibu aikai ni kaunga nanon temanna ae ko ataia ae e beku ke e a katauraoi nakon te beku n ukoriia tabeman ke e beku n te mition n te Ekaretia? Tera ae ko kunea bwa e kaunga nanom ni kan tibwa te euangkerio?
Taraa naba Reirei ao Berita aika Tabu 35:13–15; Russell M. Nelson ao Wendy W. Nelson, “Hope of Israel” (worldwide devotional for youth, June 3, 2018), HopeofIsrael.ChurchofJesusChrist.org; Silvia H. Allred, “Go Ye Therefore,” Ensign ke Riaona, Nobembwa 2008, 10–12.
Ngaira ni kabane mitinare ibukin Ana Ekaretia Iesu Kristo.
Reirei ao Berita aika Tabu 31:1–2, 5–6, 9, 13
E kona te Uea ni buokai n au reitaki ma au utu.
Utu n 1830 tabun a korakai ma aekaki ni kaangaanga ae a kaitara naba iai utu ni boong aikai. Tera te kairi ao te berita are e anga te Uea nakon Thomas B. Marsh ibukiia ana utu? E na kanga Ana taeka ni buokiko inanon reitakim ma am utu?
Ibukin te rongorongo riki iaon Thomas B. Marsh, taraa Saints, 1:79–80, 119–20.
Reirei ao Berita aika Tabu 32; 35
Te mition nakoia Reimwanaite e aki koro nanona?
Ngke Oliver Cowdery, Peter Whitmer Jr., Parley P. Pratt, ao Ziba Peterson a nako ni kabwarabwara nakoia Inria n Amerika i maeaon Missouri, a kakoauaa bwa a kakoroa nanon te taetae ni burabeti n Ana Boki Moomon ibukiia Reimwanaite ae a na karekea te euangkerio n boong aikai (taraa, ibukin te katooto, 1 Nibwaai 13:34–41; Enoti 1:11–18). Ma e ngae n anne ni banen aia mition, e ngae ngke e rangi n nakoraoi reitakiia ma kurubu tabeua, a bon aki bwabetitoa te Inria n Amerika temanna. Ma a atia ni bwabetitoia ae e raka iaon tebubua te aomata i rarikin Kirtland, Ohio, n te tabo are a motirawa iai iaoni kawaia nako Missouri. Ibuakoia ake a rairaki bon naake a na riki bwa taan kairiiri n te Ekaretia rimwi aika a kinaaki, ni ikotaki ma Sidney Rigdon, ao Kirtland e riki rimwi bwa te tabo ni ikotaki ibukin te Ekaretia. Tera ae ko reiakina man te taneiai aei bwa e kanga te Uea ni kakoroa nanon Ana mwakuri?
Taraa naba “A Mission to the Lamanites,” Revelations in Context, 45-49.
Reirei ao Berita aika Tabu 33:12–18
Ngkana I katea maiu iaon Ana euangkerio te Tia Kamaiu, N a bon aki bwaka.
Reirei ao Berita aika Tabu 33 e bon karekeaki nakoia Northrop Sweet ao Ezra Thayer, mwaane uoman aika a tibwa rairaki. E kitana te Ekaretia Northrop tabeua te tai imwin karekean te kaotioti aei. E nanomatoa ni beku Ezra tabeua te tai, ma e a manga bon bwaka naba. Aio te tai ae e raoiroi ni taraia bwa matoara arom ni kateaki “iaon [te] bwaa” (kibu 13) n te euangkerio. Tera koaua inanon te kiibu aikai ae a na kona ni buokiko n tiku n onimaki nakon te Tia Kamaiu?
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Reirei ao Berita aika Tabu 30:2.E uara arora n ara utu ni katurua ara taratara iaon ana bwai te Atua nakon ae “bwain te aonaaba”?
-
Reirei ao Berita aika Tabu 31.Ngkai ko wareka ana berita te Uea nakon Thomas B. Marsh ibukiia ana utu, ko kona ni marooro iaon kakabwaia ake a roko nakon am utu ibukin te mwakuri ni mitinare. Ko kona naba n anenea te anene ae e kaineti nakon aio, n aron “N na Nako n are Ko bon tuangai,” (Anene n Taromauri, nambwa 42). E kanga n tia ni kakabwaiaaki am utu man tibwaan te euangkerio ma tabeman?
-
Reirei ao Berita aika Tabu 33:7–10.Tera ae e kabongana te Uea ni katamneia te bwai are e kabwarabwara ni kiibu aikai n tibwauaan te euangkerio? Baikara riki bwaai ke onean mwin bwaai aika a kona n nooraki are a kona ni iangoi am utu? Tao bwaai aika a nooraki aikai a na kona ni buoka am utu n iangoi tabeua kawai n aron tibwaan te euangkerio. Te marooro aio e kona ni kairi nakon te babaire n tibwauan te euangkerio. Iangoia ni karaoa katotongana n te kaotioti aron bwai ae a na riki.
-
Reirei ao Berita aika Tabu 34:10.Rinea te kibu n taeka man kibu 10, ao kaoiia kain te utu bwa ana wirikiriki n taekina. Kain te utu tabeman a na kataia ni keetina te kibu n taeka. Ngkane tuangiia kain te utu bwa ana taekina te kibu n taeka ni kabaibati. E kanga ni buokiira te bwai ae e karaoaki aio n oota bwa e aera te Uea e tuangiira “tabekarake bwanaam”?
Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Te anene ae rineaki: “I Hope They Call Me on a Mission,” Aia Boki n Anene Ataei, 169.
Bwanaa aika a manga kaokaki
Taan Rairaki ake Rimoa
Imwain katean te Ekaretia, e taekina te Uea, “E a mainaina n tawa ngkai te nne n aroka nakon te taiaki” (Reirei ao Berita aika Tabu 4:4). Te rongorongo aio e bon koaua bwa inanon namakaina ake imwiina, ibukina a mwaiti taan kakae ake a kairaki iroun Tamnein te Atua ni kunea Ana Ekaretia Iesu Kristo ae e kaokaki.
Angiia taan rairaki rimoa aikai a riki bwa taan kakairi ni kawenean aan te Ekaretia ae e kaokaki, ao aia karaki ibukin rairakiia a rangi ni kakawaki nakoira n taai aikai. Te onimaki are a kaotia bon ti te arona ma te onimaki are ti kainanoia n rairaki nakon Ana euangkerio Iesu Kristo.
Abigail Calkins Leonard
Ngke ai tenibwi tabun ana ririki Abigail Calkins Leonard, e namakina i nanona bwa e na kabwaraki ana bure. E aki toki ni wareka te Baibara, ao aomata man Aro ni Kiritian a kakawara mweengana, ma e mino nanona ibukin kakaokoroia ekaretia teuana ma teuana. “N te ingabong teuana,” e taku, “I a ana au Baibara ao n nako n te buakonikai, ao I a katorobubua.” E tataro ma nanona nakon te Uea. “N te tai naba anne e a kaoti te mii nakoiu,” e taku, “ao ekaretia aika a kakaokoro a buti teuana imwin teuana i rarikiu, ao e wewete te bwana nakoiu, n taku: ‘A kateaki ibukin te kaubwai.’ Ao man te tabo ae e raroa, I kona n noora te oota ae korakora, ao te bwanaa mai ieta e kangai: ‘N a kateirakea te botanaomata, ae N a kakatonga ni bwainna ao ni kakabwaiaa.’” Tabeua te tai imwiina, Abigail e ongo taekan Ana Boki Moomon. E ngae ngke e tuai karekea te kaobi teuana, e ukoria ni “kan ataa koauan te boki aei man ana bwai n tangira ao mwaakan te Tamnei ae Raoiroi” ao e “waekoa n reke namakinana irouna.” Ngke e a reke ana tai ni wareka Ana Boki Moomon, e a bon “tauraoi ni butimwaia.” Ngaia ao kainabana, Lyman, a babetitoaki n 1831.1
Thomas B. Marsh
Ngke te kairake ni ikawai Thomas B. Marsh, e kamatebwaia te Baibara ao E kaina te ekaretia ni Kiritian. Ma e aki rauaki nanona, n tokina e a katoka irirakin taian ekaretia ni kabane. “I karekea teutana irou tamnein te taetae ni burabeti,” e taku, “ao I tuanga [te tia kairiiri n te aro] bwa I kantaningaa te ekaretia ae boou bwa e na rikirake, are e na iai te koaua ae e itiaki iai.” E aki maan imwiin aio, Thomas e reke ana kariiri te tamnei bwa e na kitana mweengana i Boston, Massachusetts, ao ni mwananga nako maeao. Imwiin kabanean tenua namakaina i New York maeao n akean karekean te bwai are e kakaea, e a moana okiran mweengana. Iaon kawaina, temanna te aine ae e titirakina Thomas ngkana e a tia n ongo rongorongon “te Boki ae Koora are e kuneaki iroun te kairake ae arana Iotebwa Timiti.” E katikaki nanona n te iango aei, e waekoa Thomas ni mwananga nako Palmyra ao ni kaitibo ma Martin Harris n titoan te tabo ni bwereti, n te tai are e moan otinako 16 baan Ana Boki Moomon ni bweretiaki. E kariaiakaki Thomas bwa e na anai 16 baan kaobi akanne, ao e uoti nakon mweengana nakon kainabana, Elizabeth. “E bon rangi ni kukurei” ma te boki, e uringa, “e kakoaua bwa bon ana mwakuri te Atua.” Thomas ao Elizabeth a mwaing rimwi nako New York ma natiia ao a bwabetitoaki.2 (Ibukin te rongorongo riki iaon Thomas B. Marsh, taraa Reirei ao Berita aika Tabu 31,.)
Parley ao Thankful Pratt
N aron Thomas Marsh, Parley ao Thankful Pratt a kaeka nakon anaakin nanoia n te tamnei ni kitana aia onaroka ae moan te bubura i Ohio ma te kantaninga bwa ana tataekina te euangkerio n aron mataataia iai man te Baibara. Nge e tuanga tarina Parley, “Te tamnei iaon bwaai aikai e roota au iango n te aro ae e rangi ni korakora ngaia are I aaki kona ni motirawa.”3 Ngke a aroko i New York mainiku, e karekea te namakin Parley bwa e na tiku teutana ikekei. Thankful, a tia ni iangoia, bwa e na reitanako kawaina n akea ngaia. “Iai te mwakuri ae n a karaoia n te tabo aei,” e tuanga Parley, “ao bwa te mwakuri tera, ke ana maanra karaoakina, I aki ataia; ma N a bon nakoati ngkana e tia karaoana.”4 Bon te tabo anne are e moan ongo iai Parley aron Ana Boki Moomon. “I namakinna bwa iai bwakan nanou n te boki,” e taku.5 E a tangira ana kaobi teuana ao e warekia inanon te tairiki anne. Ngke e a ngaina, e a ataia ae e koaua te boki, rangi n nano iai “riki nakon kaubwain nikabane te aonaaba.”6 Inanon tabeua te bong e a bwabetitoaki Parley. E a oki rikiaaki nakon Thankful, are e a manga bwabetitoaki naba. (Ibukin te rongorongo riki iaon Parley P. Pratt, taraa Reirei ao Berita aika Tabu 32.)
Korobanna iaon Parley P. Pratt iroun Jeffrey Hein
Sidney ao Phebe Rigdon
Iaon kawaina mai New York nakon te mition i Missouri, Parley Pratt ao raona ni beku a motirawa i Mentor, Ohio, ni mweengaia Sidney ao Phebe Rigdon—raoraon Parley rimoa ae e kinaiia inanon aia tai i Ohio. Sidney bon te minita n te aro ni Kiritian, ao Parley bon kain ngkoa ana nanai ao e taraia bwa temana ae e kakairi irouna n te maiu n tamnei. E unga nanon Parley n tuanga raoraona ibukin Ana Boki Moomon ao Kaokakin Ana euangkerio Iesu Kristo. Sidney e a bon kaman ukeuke ibukin kaokan te Ekaretia ae e koaua are e kunea ni kabwarabwaraaki n te Nutetemanti, e ngae ngke iai nanououana ibukin Ana Boki Moomon n te moan tai. “Ma n a wareka am boki,” e taku nakon raoraona ae Parley, “ao n a kataia ni ukoria nako bwa bon te kaotioti mai iroun te Atua ke tiaki.”7 Imwiin uoua te wiiki ni kamatebwai ao n tataro, ngaia ao Phebe a kakoaua bwa e bon koaua te boki. Ma e ataia naba Sidney bwa kainakin te Ekaretia bon te anga nano ae e korakora ibukiia ana utu. E na bon kabuaa ana mwakuri bwa te minita, ni ikotaki naba ma kinaakina ae rietata n te komiuniti. Ngke ngaia ao Phebe a maroroakina te bwai ae e na riki aei, e taekinna Phebe, “I a tia ni wareki mwiina ae a na reke, ao … bon nanou bwa n a karaoa nanon te Atua, n te maiu ke n te mate.”8
Nako inanon te Rereua, iroun Robert T. Barrett