“Eberi 5–11. Reirei ao Berita aika Tabu 30–36: ‘Ko Weteaki bwa Ko na Tataekina Au Euangkerio,’” Nakomai, Iriirai—Ibukin te Moanrinan: Reirei ao Berita aika Tabu 2021 (2020)
“Eberi 5–11. Reirei ao Berita aika Tabu 30–36,” Nakomai, Iriirai—Ibukin te Moanrinan: 2021
Eberi 5–11
Reirei ao Berita aika Tabu 30–36
“Ko Weteaki bwa Ko na Tataekina Au Euangkerio”
Ngkai ko tataromwaaka ni kamatebwaia Reirei ao Berita aika Tabu 30–36 ma ataei n am kiraati n am iango, te Tamnei e na anganiko iango bwa ko na kanga n reireiniia. Kakaei rakan riki iango inanon te kamataata aei.
Korei Am Namakin
Kaunga te Tibwatibwa
Taua ieta tamneia mitinare, ao tuangiia ataei bwa a na tibwauaia bwa tera aia atatai ibukin te mwakuri ni mitinare.
Reirei te Reirei: Ataei aika a Uarereke
Reirei ao Berita aika Tabu 33:2–3, 6–10
I kona n tibwaua ana euangkerio Iesu Kristo.
Ataei aika a uarereke a kona naba n tibwaua aia kakoaua ibukin ana euangkerio Iesu Kristo. Ko na kanga ni kabonganai kiibu aikai ni buoka kaungaakin nanoia bwa a na karaoia?
Waaki ni Kakukurei aika a Kona ni Karaoaki
-
Kaoiia ataei bwa a na kataia n atonga te kibuntaeka n aron “E tangiriko te Atua” ni kainii wiia. Kaotia nakoia bwa ti aki kona n reireiniia aomata taekan te euangkerio ngkana ti aki kaurei wiira. Wareka Reirei ao Berita aika Tabu 33:8–10, ao kaoiia ataei bwa a na kauki wiia ni katoa te tai are a ongo te kibuntaeka “kaurei wiimi.” Bukin tera ngkai e tangirira Tamara are i Karawa bwa ti na kaurei wiira ao n tibwaua te euangkerio ma tabeman?
-
Wirikirikiia te bwai teuana n aki karongoa nakoia ataei, n aron “Iotebwa Timiti bon ana Burabeti te Atua,” ao n tuangiia bwa a na kaokioka te bwai are ko taekinna. Ngkanne atonga te kibuntaeka naba anne ni kabaibati bwanaam. Wareka Reirei ao Berita aika Tabu 33:2. Buokiia ataei ni kamatataia bwa n “ tabekaa[rake] [bwanaara]” nanona te aki maaku n tuangiia aomata taekan Iesu Kristo, ana Boki Moomon, ao koauan te euangkerio tabeua.
-
Katei taoree aika a karaoaki man taian beeba ke tamneia aomata ni katobibia nanon te ruu. Kaoiia ataei bwa a na kakaeia aomata ao ni ikotiia imoan te ruu. Wareka Reirei ao Berita aika Tabu 33:6, ao kabwarabwara tera nanon ae te Uea e na “ikotiia naake [E] a tia n rineia.” Kakoaua bwa ti kona ni ikotiia aomata nakon te Uea ngkai ti tibwaua ana euangkerio.
-
Anenea te kuna ibukin tibwauan te euangkerio, n aron “I Want to Be a Missionary Now” (Aia Boki n Anene Ataei, 168). Buokiia ataei n iangoi kawai ae a kona iai ni buokiia aomata tabeman n reiakina taekan Iesu Kristo.
Reirei ao Berita aika Tabu 33:12–17
I kona ni katea maiu iaon ana euangkerio Iesu Kristo.
Ana reirei te Uea are e angan Ezra Thayer ao Northrop Sweet e kona ni buokiia ataei ake ko reireiniia ni katea maiuia iaon ana euangkerio Iesu Kristo.
Waaki ni Kakukurei aika a Kona ni Karaoaki
-
Kaota tamnein aan te kateitei nakoia ataei, ao tuangiia bwa a na kabwarabwaraa. Bukin tera ngkai te kateitei e kainnanoa aana ae e korakora, ma ni matoatoa? Wareware ma ataei n Reirei ao Berita aika Tabu 33:12–13, ao kabwarabwara bwa te Uea e tangiriira bwa ti na katea maiura iaon Ana euangkerio. Buokiia ataei bwa a na iangoi tabeua kawai are a kona ni katea maiuia iai iaon ana euangkerio Iesu Kristo.
-
Anganiia ataei tabeua bwaai ni kakairi are a kona ni kabongana ni katea iai te taua, n aron taian mwakorokoro ni kai ke mwangko buraetitiki. Arani bwai ni kakairi akanne n tatabeua ma te tamnei are e tei ibukin bwaai ake e taekin te Uea n Reirei ao Berita aika Tabu 33:14–17. Kaoiia ataei bwa a na katea te taua ngkai ko marooro ma ngaiia taekan bwaai aikai bwa a na kanga ni buokiira ni katea maiura iaon ana euangkerio Iesu Kristo.
Reirei te Reirei: Ataei aika a Ikawai Riki
Reirei ao Berita aika Tabu 30:1–2
I riai ni katurua riki au iango iaon ana bwai te Atua nakon bwain te aonaaba.
Ana reirei te Uea nakon David Whitmer ni te mwakoro 30 e kona ni buokiia ataei ake ko reireiniia n teimatoa ni kakaonimaki n ana euangkerio Iesu Kristo.
Waaki ni Kakukurei aika a Kona ni Karaoaki
-
Wareka Reirei ao Berita aika Tabu 30:1 n ikotaki, ao tuangiia ataei bwa a na kakimototoa, n oin aia taeka, ana reirei te Uea are e angan David Whitmer. Ni kawai raa ae n tabetai ti na bae ni “maakuia aomata,” ke n raraoma bwa tera aia iango tabeman, riki ni karaoan ae ti ataia bwa ti riai ni karaoia?
-
Tuangiia ataei bwa a na kataia ni karaoi bwaai aika uoua n te tai ae ti teuana, n aron kamatenanoan taekan te onimaki inanon te tai are ko korei araia ni kabane ataei n te kiraati. Titirakiniia bukin tera ngkai e kaangaanga katuruan ara iango iaon te moan mwakuri. Tera tabeua “bwain te aonaaba” (Reirei ao Berita aika Tabu 30:2) are e kona ni katabetabeira man ururingakin Iesu Kristo ao Ana euangkerio? Ti na kanga ni kateimatoa ni katurui ara iango Iaona nakon bwaai aika a karako kakawakiia?
Reirei ao Berita aika Tabu 30–34
I kona n tibwaua ana euangkerio Iesu Kristo.
Angiina ataei inanon te Ekaretia a ingainga nanoia ni kan karaoa aia mwakuri ni mitinare ae bwanin taina ke aia mwakuri n ibuobuoki ni mitinare. Aia taneiai mitinare ake a maroroakinaki ni mwakoro 30–34 e kona ni buoka aroia ni katauraoi.
Waaki ni Kakukurei aika a Kona ni Karaoaki
-
Kaoa kaain te uoote bwa e na reiakina rongorongon temanna te mitinare are e weteaki n Reirei ao Berita aika Tabu 30–34 ao n tibwauaia ma ataei baike a reiakin (taraa “Voices of the Restoration: Early Convert Testimonies” inanon Nakomai, Iriirai—Ibukiia Aomata n Tatabemaniia ao Utu ke “The Faith and Fall of Thomas Marsh,” “Ezra Thayer: From Skeptic to Believer,” “Orson Pratt’s Call to Serve, ” Taian Kaotioti inanon te Rongorongo, 54–69).
-
Korea tamnein te wii ae bubura iaon te burakibooti, ao buokiia ataei bwa a na kakaea n Reirei ao Berita aika Tabu 33:8–10 ana berita te Uea nakoira ngkana ti kaurei wiira n tibwaua te euangkerio. Anganiia ataei bwa a na korei berita aikai iaon te burakibooti, ao buokiia ni kamataataia bwa tera ae nanonaki ni berita aikai. Tuangiia ataei n tatabemaniia bwa a na korea inanon wiia ana koaua te euangkerio are a kona n tibwauaia ma tabeman.
-
Korea tamnein te buu, ao marooroakinna bwa tera ae nanonaki n tibwauakin te euangkerio “n ai aron tangin te buu.” Ti na kanga n “tabeka rake” bwanaara? (Reirei ao Berita aika Tabu 33:2; 34:6).
-
Tuangiia ataei bwa a na tibwauaia bwa e kanga aroia ni katauraoi ibukin karaoan aia mwakuri ni mitinare n taai aika a na roko. Ngkana iai temanna ae a kinaa (tao bon kaain aia utu) are e karaoa te beku, kaoia bwa e na karakina rongorongon bwaai ake a rinanona teuanne ke neienne. Ke kaoiia mitinare, te aomata are e a tia ni mitinare, ke temanna are e kakatauraoi ibukin te mwakuri ni mitinare bwa e na tibwaua ingaingan nanon teuanne ke neienne ibukin te mwakuri ni mitinare. Tibwauai tabeua bwaai ake ko rinanona n tibwauakin te euangkerio, n raonaki ma bwaai ake ko rinanona ni maium ni katoa bong.
Tamneiataeinimwane a takakaroI kona n tibwaua te euangkerio ma raoraou.
Reirei ao Berita aika Tabu 33:12–17
I kona ni katea maiu iaon ana euangkerio Iesu Kristo.
Ngkana a kona n reireinaki ataei ni moantaain aia ririki bwa a na kanga ni katea maiuia iaon ana euangkerio Iesu Kristo, a na bon teimatoa ni kakaonimaki Nakoina. Te reirei are e kanakoaki ni kiibu aikai a kona ni buokiia.
Waaki ni Kakukurei aika a Kona ni Karaoaki
-
Uoti nakon te kiraati bwaai aika a kakaokoro aika a matoatoa, bwaai n takakaro aika taian man aika a kanoaaki nanoia, te ongong, te tano ae karaoaki man te timanti, ao te atiibu. Anganiia ataei bwa a na taua teuana imwiin teuana. Tuangiia bwa a na noora Reirei ao Berita aika Tabu 33:12–13 ni kakaea bukina bwa e kanga te Uea ni kabwarabwara ana euangkerio. Bukin tera te “atiibu” te taeka ae raoiroi ibukin kabwarabwaraan te euangkerio? Ti na kanga ni katea maiura iaon atiibun te euangkerio?
-
Buokiia ataei bwa a na wareka Reirei ao Berita aika Tabu 33:12–17 ao kakaei bwaai ake ti kona ni karaoi ni katei maiura iaon ana euangkerio Iesu Kristo. Kaoiia ataei bwa a na korea tamnein te bwai ae a kunea, ao tuangiia bwa a na keetinna i bon irouia bwa tera aia tamnei are a koreia.
Kaungaa te Kamatebwai n te Mweenga
Kaoiia ataei bwa ngkoa are mitinare ngaiia n tibwauaia ma aia utu bwaai ake a reiakin n te Moanrinan n te bong aei.
Kanakoraoan Ara Anga reirei
Kaota am koaua bwa iai kakabwaia aika a taekinaki n te berita. Ngkana ko kaoiia ataei bwa a na maiuakina reirein te euangkerio, tibwauai berita ake e karaoi te Atua nakoia naake a maiuakina te reirei anne. N aron te katooto, ko kona ni kaota am koaua iaon kakabwaia ake e anga te Uea nakoia naake a kaurei wiia ao n tibwaua te euangkerio.