Eberi 19–25

Reirei ao Berita aika Tabu 41-44

“Au Tua Ni Kaira Au Ekaretia”

N am tai ni katauraoi n te wiiki aio, kakauongo nakon te namakin mairoun te Tamnei. Tera ae ko namakina bwa ataei a kainnanoa te reirei man Reirei ao Berita aika Tabu 41–44?

Korei Am Namakin

Kaungaa te Tibwatibwa

Kakiba te booro nakon te ataei, ao tuanga te ataei bwa e na taekina teuana te tua are e ataia teuanne ke neienne. Kabuta te booro ni katoaia ni kabane ni karokoa are e bane n reke aia tai n tibwatibwa.

Reirei te Reirei: Ataei aika a Uarereke

Reirei ao Berita aika Tabu 42:2

I kona n ongeaba n ana tua te Atua.

Ngke e a rikirake te Ekaretia ao membwa a ikotaki i Kirtland, Ohio, te Uea e kaotia nakon te Burabeti Iotebwa Timiti te bwai are E aranna bwa Ana “tua” ao n tuangiia Aika itiaki n “ongora ao ni kakauongo raoi ao n ongeaba” nako iai. Ko na kanga ni buokiia ataei n ataia bwa ti kakabwaiaki ngkana ti ongeaba?

Waaki ni Kakukurei aika a Kona ni Karaoaki

• Wareka Reirei ao Berita aika Tabu 42:2, ni katuruturua te taeka “ongeaba.” Anganiia ataei tabeua iango ike te ataei e na rineia n ongeaba ke n aki ongeaba n te tua ke te kaetieti. Tuangiia ataei bwa a na kakauongo raoi ao ni moangare ngkana te aomata n te karaki e ongeaba ao n aki kukurei ngkana e aki ongeaba te aomata. Tibwai kakabwaia aika ko a tia ni karekei ngkana ko a tia n ongeaba nakon Ana tua te Atua.

• Karaoa te takakaro are ataei a na ira nanon te tua. N ai aron aei, ko kona n tuangiia bwa a riai ni katei baiia ao ni weteaki ni kaekai titiraki. Ao ngkanne a na kataneiai n ongeaba man titirakinaia taian titiraki ao weteia ake a katei baiia. Baikara tuua aika E a tia te Atua n anganiira?

• Kabobonga te iteranibaa ibukin waaki ni kakukurei ma ataei, ke anenea te anene ibukin te ongeaba nakon Ana tua te Atua, n aron ae “I Love to See the Temple” (Aia Boki n Anene Ataei,148). Tuangiia ataei bwa e na kanga te ongeaba n Ana tua te Atua ni karokoa te kukurei.

  

  Ti reiakin Ana tua te Atua n te Moanrinan.

Reirei ao Berita aika Tabu 42:38

I beku ibukin Iesu Kristo ngkana I beku ibukiia tabeman.

E tangiriia Aika Itiaki te Uea bwa a na tabeakiniia aika kainnano ao ni kananoanga. Buokiia ataei n ataia bwa ngkana a beku ibukiia aomata aika kainnano, a beku naba ibukin te Tia Kamaiu.

Waaki ni Kakukurei aika a Kona ni Karaoaki

• Ngkana E mena Iesu Kristo n ara kiraati n te bong aei, tera ae ti na tuangnga? Ti na kangaa n tabeakinna? Kaota tamnein te Tia Kamaiu, ao kabwarabwaraa ana reirei Iesu are ngkana ti kaota te tangira nakoia tabeman, ti kaota naba te tangira Nakoina. Buokiia ataei ni kaokioka te kibu 38 ma ngkoe, tabeua taeka n teuana te tai.

• Buokiia ataei n iangoi kawai ake a kona iai ni beku ibukin Iesu man buokaia tabeman. A kona ni kunei iango man te witeo “Pass It On” (ChurchofJesusChrist.org) ke man tamnein te Tia Kamaiu ni buokiia tabeman, n aron Tamneina ni kamaiuia aoraki ke n akoi nakoia ataei (taraa Bokin Tamnein te Euangkerio, nambwa. 42, 47). Kakoaua bwa ngkana a beku ibukiia tabeman, a beku naba ibukin Iesu.

Reirei ao Berita aika Tabu 43:1–7

Te Uea E kaira Ana Ekaretia rinanon Ana burabeti.

Ko kona ni buokiia ataei ni kararoaia man mwamwanakiia rinanon maiuia man reireinakiia, ngkai a uarereke, Ana tamnei te Uea ibukin kairakin Ana Ekaretia rinanon te burabeti ae maiu.

Waaki ni Kakukurei aika a Kona ni Karaoaki

• Kaotii tamneia aomata aika a kakaokoro, n raonaki ma tamnein te burabeti ngkai. Kabaraka te tamnei, ao anganiia ataei bwa a na rairi taian tamnei teuana imwiin teuana ni karokoa a na kunea te burabeti. Kabwarabwaraa ana reirei te Uea bwa tii te burabeti ae “rineia ibukimi bwa e na karekei tuua ao kaotioti mairoun [te Uea]” ni kaira te Ekaretia (Reirei ao Berita aika Tabu 43:2).

• Bootaki anenea te anene ibukiia burabeti, n aron te kabanea ni kibu n “Follow the Prophet” (Aia Boki n Anene Ataei, 110–11). Tibwaa am koaua bwa te burabeti e kaira te Ekaretia.

Reirei te Reirei: Ataei aika a Ikawai

Reirei ao Berita aika Tabu 41:5

Te reirei bon temanna are karekei Ana tua te Atua ao n ongeaba iai.

A ataia ataei ake ko reireiniia bwa tera ae nanonaki n riki bwa te reirei ibukin Iesu Kristo? Reirei ao Berita aika Tabu 41:5 e kona ni buokiia n ataia bwa a na kanga n riki bwa ana reirei aika a tamaroa.

Waaki ni Kakukurei aika a Kona ni Karaoaki

• Korea Reirei ao Berita aika Tabu 41:5 iaon te mwakoro ni beeba, katuka te bwangabwanga are te taeka ae “reirei” e riai ni mena iai. Butiia ataei bwa a na kanoai bwangabwanga, n taraa Reirei ao Berita aika Tabu 41:5 ngkana a kainnanoa buokaia. Tera nanon te riki bwa ana reirei Iesu Kristo? Taekinna bwa ko kanga ni kekeiaki n riki bwa ana reirei Kristo ae tamaroa riki.

• Imwiin maroroakinan Reirei ao Berita aika Tabu 41:5, titirakiniia ataei bwa a na iangoi tuua ake ti karekei mairoun te Uea. Kaoiia bwa a na kairuoruo ni karaoia n te kaotioti te ongeaba n teuana man tuua ao nikiran te kiraati a na kataia ni iangoia bwa tera.

• Anganiia membwa n te kiraati te mwakoro ni beeba, ao tuangiia bwa a na koroboki iaona te kawai teuana ae a na kona n riki bwa ana reirei ae tamaroa riki. Kaoiia ataei n tatabemaniia bwa a na taekina are a koreia, ao ni kanimwi mwakorokoro ni karaoa te tiein ni beeba.

Reirei ao Berita aika Tabu 42:61, 68

Te Atua E anga te ataibwai nakoia ake a bubuti.

A titiraki ataei titiraki aika mwaiti ngkai a rikirake wanawanaia n te aonaaba ao n te euangkerio. Ko na kanga ni kabongana Reirei ao Berita aika Tabu 42:61, 68 ni buokiia bwa a na karakaa te ataibwai mairoun te Uea?

Waaki ni Kakukurei aika a Kona ni Karaoaki

• Tuangiia ataei bwa a na tibwauaia ma ngkoe te bwai teuana are buokiia n namakina te rau ae kororaoi ao te bwai teuana are buokiia n namakina te kukurei. Kaoiia bwa a na wareka Reirei ao Berita aika Tabu 42:61 ni kakaea te taeka “bwaai aika a rau ” ao te “kimwareirei” Buokiia ataei ni iangoi koaua ake e kaoti te Atua are a uota te rau ao te kukurei nakoia.

• Wareka Reirei ao Berita aika Tabu 42:61, 68 ma ataei, ni katuruturua ni kabwarabwara te mwakoro n taeka “kaotioti imwin te kaotioti, ataibwai iaon te ataibwai.” Kabwarabwara bwa te Atua E aki kaoti bwai n te tai ae tii teuana; irarikina, E anganiira teutana n te taina. Kaota te kamwaninga teutana imwiin teutana, ke kamanenaa te bwai teuana ae titebo ni buokiia ni kaotaia ataei n te reirei aei. Tibwa am namakin ngke ko karekea te kaotioti are e kakabwaiako.

Reirei ao Berita aika Tabu 43:1–7

Bon tii te burabeti ae kona ni karekea te kaotioti ibukin te Ekaretia.

Ngkai a rikirake ataei, a na taraa n tangiria aomata ake a kan kairiia nako. Ko na kanga ni buokiia ataei ni kakoaua ana kawai te Atua ni kairiia Natina rinanon Ana burabeti ae rineaki?

Waaki ni Kakukurei aika a Kona ni Karaoaki

• Kaoiia ataei bwa a na iangoia bwa e tei temanna n tain te kaoti koaua ao n tuanga te uoote bwa e a tia ni karekea te kaotioti ibukin te Ekaretia (n aron te katooto, bwa ti na aki manga nima te miriki ke ti na manga karaoa te bootaki n toa ni katoa kauabong irarikin are ni katoa Taabati). E taku bwa ti na kakauongo nakon are taku n onea mwiin te burabeti. Tera ae kairua n anne? Buokiia ataei bwa a na kakaea n Reirei ao Berita aika Tabu 43:1–7 bwa e kanga te Uea n anga tuua nakon Ana Ekaretia.

• Kaota tamnein te burabeti ae maiu, ao kaoiia ataei bwa a na tibwaua te reirei are e a tibwa tia n anga reirei iaona. Ngkana a tangira te ibuobuoki, kaota te tamnei n te witeo ke wareka te rongorongo man te maungatabu ni kabuta ae nako. Bukin tera bon te kakabwaia ngkai iai te burabeti ae maiu?

Kaungaa te Kamatebwai n te Mweenga

Kaoiia ataei bwa a na rinea te tua ke te kauring are a namakinna bwa a na tararuaia n ongeaba iai n te wiiki aei. Kaungaia bwa a na tibwaua aia kouru ma aia utu.

Kanakoraoan Ara Anga reirei

Reireiniia ataei bwa a na korea aia namakin. Ataei naba a kona n reiakina te katei n taui mwiin taian namakin n tamnei. A kona n taui mwiin namakin man mwakenakin booki aika tabu, korean tamnei, ao karaoan tauan mwiin te tienoro.