te kairake i tinanikun te tembora

Eberi 26–Meei 2

Reirei ao Berita aika Tabu 45

“Berita … A na Bon Koro Bukiia”

Ngkai ngkoe te tia reirei, am katauraoi ae moan te kakaawaki bon te tamnei. Waaki ni kamatebwaia Reirei ao Berita aika Tabu 45 ao tataro ibukin ana kairi te Tamnei ae Raoiroi. Te kairi aei e na anganiko iangoi ake a kona n ibuobuoki nakoim. Ko kona naba ni kunei iango inanon kairi n te wiiki ae n Nakomai, Iriirai—Ibukiia Aomata n Tatabemaniia ao Utu ke n te Riaona ke Rao.

Korei Am Namakin

te aikaon ibukin te tibwatibwa

Kaunga te Tibwatibwa

Tuangiia ataei ngkana a tangiria ni kan tibwa te bwai are a tia n reiakinna man koroboki aika a tabu n te wiiki aei. Rinea temanna ae e na tibwatibwa, ao tuangiia ataei ake tabeman bwa a na katei baia ngkana titebo are a reiakinna.

te aikaon ibukin te anga reirei

Reirei te Reirei: Ataei aika a Uarereke

Reirei ao Berita aika Tabu 45:32

I kona n “tei n taabo aika a tabu.”

N Reirei ao Berita aika Tabu 45:32, te Uea e reirei bwa Ana reirei a na kunea te kamanoaki n kabanean bong man te Tei n taabo aika a tabu—taabo aika a onoti iroun te Uea. Kona kanga ni buokiia ataei ni kinai taabo aika tabu inanon maiuia?

Waaki ni Kakukurei aika a Kona ni Karaoaki

• Katokai tamnein te mweenga, kateitei n te ekaretia, ao te tembora n taabo aika a kakaokoro rinanon nako te ruu. Anga kanikina ni kabwarabwaraan tabo aikai, ao kaoiia ataei bwa a na tei ni kaaniia te tamnei are ko kabwarabwaraa. Wareka te moan rain man Reirei ao Berita aika Tabu 45:32. Kakoaua bwa ti kakabwaiaki ngkana ti kabanea ara tai n taabo aika tabu n aron mweengara, ana kateitei te ekaretia, ao tembora. Tuangiia ataei bwa a na taetae iaon ae e kanga aron aia namakinna ngkana a mena n taabo aika tabu n aron aikai.

• Kaoiia ataei bwa a na katiai iteraniba ni waaki ni kakukurei ibukin te wiiki aei. Buokiia korea “I kona ni buoka mweengau bwa te tabo ae tabu” ao “Reirei ao Berita aika Tabu 45:32” iaon aia korotamnei. Tera ae a kona ni karaoia ni buoka mweengaia bwa te tabo ae tabu?

• Ni buokiia ataei n iangoia bwa tera ae nanonaki n “aki kamwaingaki,” tuangiia bwa a na tei n aki kammwakuri ibukin teuana te miniti. Wareka te moan rain man Reirei ao Berita aika Tabu 45:32. Buokiia ataei n ataia bwa n te “tei n taabo aika a tabu, ao … n aki kamwaingaki” nanona n rinea te eti n tainako, n aki tabe ma te bwai ae e riki. Kaoiia bwa a na “aki kamwaingaki” nako man iango ao mwakuri aika raraoi.

Reirei ao Berita aika Tabu 45:44–45

Iesu Kristo e na manga roko.

Ngke aomata aika Itiaki i Kirtland, Ohio, a ongo te kaotioti are e reke n Reirei ao Berita aika Tabu 45, are e taekina kabanean boong ao Manga Okin te Tia Kamaiu, a butimwaia ma te kimwareirei. Iangoia bwa kona kanga ni buokiia ataei n tauraoi ma te kimwareirei ibukin Kauoaokina.

Waaki ni Kakukurei aika a Kona ni Karaoaki

• Buokiia ataei n iangoia bwa a na kanga aia namakin ngkana a ataia bwa iai temanna ae onoti ae e na roko ni kawariia, n aron tibuia ke raraoia. A na kanga ni katauraoi ibukin te roko? Kaota tamnein te Tia Kamaiu, ao wareki mwakoro ke ni kabane n Reirei ao Berita aika Tabu 45:44–45. Tuangiia ataei bwa tera am namakin iaon Manga okin te Tia Kamaiu, ao anganiia bwa a na tibwa aia namakin.

• Kaota tamnein Kauaokin te Tia Kamaiu (taraa kabwarabwara n te wiiki aei inanon te boki ae Nakomai, Iriirai ibukiia Aomata n Tatabemaniia ao Utu), ao tuangiia ataei bwa ana tibwaua aia namakin ngkai a noora te tamnei. Tibwaua am koaua bwa Iesu Kristo e na manga roko.

• Anenea te kuna iaon Manga Okin te Tia Kamaiu, n aron“When He Comes Again” (Aia Boki n Anene Ataei, 82-83). Kabongana te kuna ni maroroakin kawai are ti kona iai ni katauraoi ibukin manga okin Iesu, n aron karaoan ana kantaniinga te Atua ao kaotaakin ara taura ibukiia tabeman.

te aikaon ibukin te anga reirei

Reirei te Reirei: Ataei aika a Ikawai Riki

Reirei ao Berita aika Tabu 45:3–5

Iesu Kristo bon ngaia te tia Tei Ibukira nakon te Tama.

Kona kanga ni buokiia ataei ni kakorakora aia onimaki bwa Iesu Kristo bon te Tei Ibukiia? Ko na kanga n tia n reiakina aei ibon iroum?

Waaki ni Kakukurei aika a Kona ni Karaoaki

• Korei tabeua taeka ao kibu ake a kuneaki Reirei ao Berita aika Tabu 45:3–5 iaon mwakoro ni beeba aika kaokoro. Anganiia ataei aia tai ni kamatebwai kiibu aikai man koroboki aika tabu, ao imwiina kaoia bwa a na kaini aia boki aika tabu ao a na korea te taeka iaon taian beeba ni karinaniia are a na oti iai inanon te kibu. Ni kaeineti ma kiibu aikai, tera ae taekinna te Tia Kamaiu bwa e na bubuti ibukira nakon Tamara are i Karawa?

• Buokiia ataei ni kabwarabwara te taeka ae advocate, tao a kona n taraia n te rikitinare. Tera ae e karaoia te Tia Kamaiu bwa e na kona ni Karikia bwa te Tia Tei Ibukiia? Tibwa am namakin n te bwai are e a tia ni karaoia Iesu Kristo ibukira, ao anganiia ataei bwa a na tibwa naba aia namakin.

Reirei ao Berita aika Tabu 45:9

Ana euangkerio Iesu Kristo bon te oota nakon te aonaaba.

Buokiia ataei ake ko reireiniia n iangoi kawai ake a katauraoa iai te aonaaba te euangkerio ibukin Manga Kauaokin te Tia Kamaiu.

Waaki ni Kakukurei aika a Kona ni Karaoaki

• Kaota tamnein te oota ao te buraeki, ke korei bwaai aikai iaon te burakibooti. Kaoia ataei bwa a na wareka Reirei ao Berita aika Tabu 45:9 ao n iangoi kawai are e bootau iai te euangkerio ma te oota, te kainibaire (ke buraeki), ao te tia uarongorongo. Ko na bae ni kabwarabwara bwa n taai akekei, te kainibaire bon te baena ke te buraeki are e uotaki n tain te buaka. E buokiia tautia n ataia bwa e ngaa ae a na ikotaki iai ao tera ae a na karaoia.

  Kaben Moronaai E Taua te Buraeki ni Inaomata

  Te Buraeki Ibukin te Inaomata, iroun Larry Conrad Winborg

• Buokiia ataei ni kamatenanoi mwakoro ni kabane n te kibu 9 man koreia iaon te burakibooti ao ni kamaunai tabeua taeka ni katoa tai.

Reirei ao Berita aika Tabu 45:37–38

Iesu Kristo e na manga roko.

E kona ni kakamaaku irouia ataei warekan taekan te buaka, buakaka, ao te urubwai ake a taekinaki n taetae ni burabeti ake ana riki imwain Manga Kauoakin te Tia Kamaiu. Kona kanga ni buokiia n ingainga ma te kukurei nakon te bong are e a tia n taekinaki n te berita?

Waaki ni Kakukurei aika a Kona ni Karaoaki

• Titirakiniia ataei bwa a na kanga n ataia ae e a uakaan n roko te tai ae boou. Tera kanikina aika a na noori? Kabwarabwara bwa ai bon tii te arona are ngkai iai kanikina n rokon te tai ae boou, iai naba kanikina n te Kauaoki. Ikotaki wareka Reirei ao Berita aika Tabu 45:37–38. Tera ae e taekinna Iesu bwa aekakira taraan kanikina ake a na oti ni Manga Kauaokina? Ni buokiia ataei ni kunei kanikina aikai ake ti riai n taratara ibukina, katabeia ataei n tatabemaniia (ke kurubuniia ataei) bwa a na wareki tabeua kiibu man Reirei ao Berita aika Tabu 45 ake a kabwarabwarai kanikina aikai. Kiibu 26–27, 31–33, 40–42 a kona ni kabonganaaki, ibukin te katooto. Anganiia ataei bwa ana tibwai aia kukune. Tera man kanikina aikai ake a tia ni koro bukiia n te bong aei?

• Iaon te mwakoro ni beeba ae kaokoro, korei tabeua berita ni kaeineti ma bwaai aika ana riki n taai aika a na roko are ko kunea n am kamatebwai ni mwakoro 45. Tabeua katooto iaon berita aikai a kona n reke n kibu 44–45, 51–52, 55, 58–59, 66–71. Korei ni karinanii iaon te burakibooti kiibu ake a kuneaki iai berita. Anganiia ataei te beeba, ao tuangiia bwa a na kabongana aia boki aika tabu ni katitebooii kiibu iaon te burakibooti nakon taian berita. Maroroakin berita aikai ake a nanonaki, ao kaoiia ataei bwa a na tibwaia bwa berita raa ae buokiia n namakina te ingainga n taekan Manga Kauaokin te Tia Kamaiu.

te aikaon ibukin te kamatebwai

Kaungaa te Kamatebwai n te Mweenga

Kaoiia ataei bwa a na iangoa teuana te bwai ae a reiakinna n tain te kiraati are a kan tibwaia ma aia utu. Titirakiniia tabeman mai ibuakoia bwa a na tibwaia ma te kiraati bwa tera te bwai are a tangiria n tibwaia ni mweengaia.

Kanakoraoan Ara Anga Reirei

Buokiia ataei bwa a na kina te Tamnei. Ngkai ko reireiniia ataei, tuangiia ningai ae ko namakina iai te Tamnei ae Raoiroi. Maroroakinna ko kanga n ata Rokona. Te katooto, ko kona n namakina te rau ke te kimwareirei ngkai ko anenei kuuna ibukin te Tia Kamaiu. Kamatataan namakin aikai a na buokiia ataei n ataia ngkana a namakina te Tamnei.

iteraniba ni waaki ni kakukurei: I kona n tei n taabo aika a tabu