Eberi 26–Meei 2

Reirei ao Berita aika Tabu 45

“Berita … A na Bon Koro Bukiia”

E reirei Beretitenti Nelson: “Korei iango ake a roko n am iango. Korei am namakin ao n rimwiia ma mwakuri ake ko kairaki bwa ko na karaoi” (“Te Kaotioti ibukin te Ekaretia, Te Kaotioti ibukin Miura,” Ensign ke Riaona, Meei 2018, 95).

Korea Am Namakin

Ti maeka n taai ni kaangaanga, ao are e karika te aki rau. Ao ana reirei Iesu naba, ngke a ongo Irouna n taetae ni burabetii kaangaanga ake a na kaoti n ara tai a “bon tabeaianga” (Reirei ao Berita aika Tabu 45:34). Aomata aika Itiaki ngkoa i Kirtland, Ohio, a aki rau n taai n kaangaanga ike a maeka inanona. I buakon bwaai tabeua, e bati “rongorongo aika kewe … ao karaki aika burababa” ake a kamwinibaea ana rongorongo te euangkerio (Reirei ao Berita aika Tabu 45, atuun te mwakoro). Ma ana kaeka te Uea, ngkekei ao ngkai, bon “tai tabeaianga” (kibu 35). Eng, iai te buakaka, ma iai naba te kaotioti bwa te Atua e kabirimwaaka Ana mwakuri. Eng, iai kaangaanga ake a taekinaki bwa a na roko imwain te Kauaoki, ao ti riai n atai. Ma tiaki ti kauring ibukin kangaanga, iai naba kanikina bwa ana berita te Atua a na bon kakoroaki nanoia. Tao aio bukina ngkai e kaoti Reirei ao Berita aika Tabu 45—te kaotioti are kabwarabwarai raoi kainikina aika bati aikai—are karekeaki “nakon kimwareireia Aomata aika Itiaki” (atuun te mwakoro).

Iango ibukin te Kamatebwai i bon Iroum ni Koroboki aika Tabu

Reirei ao Berita aika Tabu 45:1–5

Iesu Kristo bon Te Tia Tei ibukira iroun te Tama.

Ko a tia n namakina ae ko kabwaka ke ko aki tau imatan te Atua? Ko kona n kareka raun nanom n Reire ao Berita aika Tabu 45:1–5. Tera ae a kaotia taeka aika “te tia tei” ao “bubuti”? E kanga te Tia Kamaiu n tei ibukim, ke n bubuti ibukim? Kakaawakira iroum ataakina bwa Iesu bon te Tia Tei Ibukira?

Taeka aikai mairoun Beretitenti Joseph Fielding Smith e kona n buokiko n iangoi kiibu aikai: “Iesu [bon] te tia tei ibukira, n bubuti ibukira bwa e na kabooira rinanon ana mwakuri ao ana beku n raoiakiniira, n uotira nakon te boraraoi ma te Atua” (in Conference Report, Okitobwa. 1953, 58).

Taraa naba 2 Nibwaai 2:8–9; Motiaea 15:7–9; Moronaai 7:27–28; Reirei ao Berita aika Tabu 29:5; 62:1.

Reirei ao Berita aika Tabu 45:9–10

Te euangkerio bon te buraeki nakoia aaba nako.

N taai ake rimoa, te buraeki bon kunnikai ke te buraeki are e uouotaki n tain te buaka. E ikotiia man katiteuanaia tautia ao e buokia n ataa aia tabo n bootaki ao baike a na karaoai. Te buraeki bon te katooto naba ke te tua ake a kona n katineaki iai bwaai ake tabeua. Ngkai ko wareka Reirei ao Berita aika Tabu 45:9–10, iangoia bwa a kanga berita aika tabu n te euangkerio n tia n riki bwa te buraeki ibukim. Tera kaokoron maium ngke arona bwa ko aki atai berita aika tabu aikai?

Taraa naba Itaia 5:26; 11:10–12; Reirei ao Berita aika Tabu 115:5–6.

Reirei ao Berita aika Tabu 45:11–75

Ana berita te uea a na bon kakoroaki nanoia.

Te buaka, buakaka, ao urubwai a na roko i mwaain te Kauaoki. Ma “tai tabeaianga,” e taku te Uea, “bwa, ngkana a koro bukin bwaai ni kabane aikai, kam na ataia bwa berita ake a tia ni karaoaki ma ngkami a na bon koro bukiia” (Reirei ao Berita aika Tabu 45:35).

Ngkai ko kamatebwaia Reirei ao Berita aika Tabu 45:11–75, taraia ba ko na aki ti tarai taai n kaangaanga ake a taetae ni burabetiiaki ma ana kakabwaia naba te Uea (n aron, berita ake n kiibu 54–59 n ana tautaeka te Tia Kamaiu n te mereniam). Ko kona n karaoa aei man koreaia ke n kanikinaea ke n mwaakeni kiibu. Tera ae ko kunea ae buokiko n “aki tabeaianga” ibukin kabanea n bong?

Reirei ao Berita aika Tabu 45:31–32, 56–57

“Teei n taabo aika tabu,” ao tai mwaing.

Teuana bukina ngkai te Tia Kamaiu ao Ana burabeti a reireinira taekan kanikinaean te Kauaoki bwa e na buokira ni katauraoi. Tera ae ko reiakinna n Reirei ao Berita aika Tabu 45:31–32, 56–57 iaon te katauraoi imwain Manga Okin te Uea? E na kona n ibuobuoki manga warekan te taetae ni kaikonaki ibukiia kibono ake tengaun, are kuneaki n Mataio 25:1–13. Te Tia Kamaiu e kabotaua te bwaa n te taetae n kaikonaki aei ma te koaua ao te Tamnei ae Raoiroi (taraa Reirei ao Berita aika Tabu 45:57). Tera nonori aika ko karekei man warekan te taetae n kaikonaki aei n arona aio?

Te Taetae n Kaikonaki ibukiia Kibono ake Tengaun, iroun Dan Burr

Reirei ao Berita aika Tabu 45:11–15, 66–71

Tion bon te tabo n kamanomano ibukiia ana Aomata te Atua.

Aomata aika Itiaki n ana tai Iotebwa Timiti a ingainga n katea Tion, Ierutarem ae boou, n aron kabwarabwaraana n Ana Boki Moomon (taraa Ita 13:2–9) ao inanon ana rairairi Iotebwa Timiti n te Baibara (taraa Mote 7:62–64). Tera ae ko reiakinna ibukin Tion—te kaawa ngkoa n ana tai Enoka ao te kaawa naba are ngkai—man Reirei ao Berita aika Tabu 45:11–15, 66–71?

Ni bong aikai te tua ni katean Tion e kaeineti ma katean abanuean te Atua n tabo ake ti maeka iai—ike a bootaki iai natin te Atua nakon kamanoan Ana “berita ae tabu ae akea tokina” (kibu 9). Tera ae ko kona n karaoia n buoka katean Tion n te tabo are ko mena iai?

Taraa naba Gospel Topics, “Zion,” topics.ChurchofJesusChrist.org.

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Reirei ao Berita aika Tabu 45:3–5.Tera ana mwakuri te tia tei ibukira? Kam kona n matakuakina te witeo ae “The Mediator” (ChurchofJesusChrist.org) ao marorooakinna bwa bukin tera e aranaki te Tia Kamaiu bwa te Tia Tei Ibukira.

Reirei ao Berita aika Tabu 45:9–10.Ngke arona bwa iai ana “man,” ke ana buraeki, n tei ibukin am motinnano nakon te euangkerio, e na kanga aron teina? E na kona n kaunga te bootaki ni karaoa ana buraeki te utu ao marorooakinna bwa ko na kanga n buokiia tabeman n iriira ana reirei te euangkerio.

Reirei ao Berita aika Tabu 45:32.A ngaa ara “tabo aika tabu”? Tera ae nanonaki n te “aki tabeaianga”? Ti na kanga n karaoa mwengara bwa te tabo ae tabu?

Reirei ao Berita aika Tabu 45:39–44.Ko na kanga n buokiia kaain te utu n oota bwa tera ae nanonaki n te katauraoi imwain Manga Okin te Tia Kamaiu? Tao ko kona n iangoa te botaki ae ko kakantaningaia ao tibwauai kawai ake ko “kakatauraoi” imwain te bong anne. Ke ko kona n bootaki n kuukana te kabuki ao tarai kanikina bwa e a mwai raoi ibukin te kanaki. Tera ae ti kakaraoia n kakatauraoi imwain Manga Okin te Tia Kamaiu?

Reirei ao Berita aika Tabu 45:55.Warekan 1 Nibwaai 22:26 ao Te Kaotioti 20:1–3 e kona n buoka am utu bwa a na oota bwa e na kanga Tatan “n kabaeaki” n tain te Mireniam. Ti na kanga n kabaea Tatan inanon maiura?

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae tamaroa: “When He Comes Again,” Aia Boki n Anene Ataei, 82–83; taraa naba “Iango ni Kanakoraoa Am Kamatebwai ni Utu ni Koroboki Aika Tabu.”

Kanakoraoan Am Kamatebwai

Kabonganai Ibuobuoki n te Kamatebwai. Tarai bwai aika a na taraaki i nano, te Topical Guide, te Bible Dictionary, ao Bwai ni Kairi nakon Koroboki aika Tabu n karekei nonori man koroboki aika tabu.

Rokon Kristo, iroun Jubal Aviles Saenz