“Meei 17–23. Reirei ao Berita aika Tabu 51–57: ‘Te Tia Tararua ae e Kakaonimaki, n Raoiroi, ao e Wanawana,’” Nakomai, Iriirai—Ibukiia Aomata n Tatabemaniia ao Utu: Reirei ao Berita aika Tabu 2021 (2020)
“Meei 17–23. Reirei ao Berita aika Tabu 51–57,” Nakomai, Iriirai—Ibukiia Aomata n Tatabemaniia ao Utu: 2021
Moan Nimanomano, iroun James Taylor Harwood
Meei 17–23
Reirei ao Berita aika Tabu 51–57
“Te Tia Tararua ae Wanawana, E Kakaonimaki, ao E Raoiroi”
Kamatebwaian koroboki aika tabu e buokiko n kinaa bwanaan te Uea, ibukina bwa a roko koroboki aika tabu mai Irouna rinanon Tamneina (taraa Reirei ao Berita aika Tabu 18:34–36).
Korei Am Namakin
Irouia kaain te Ekaretia n te 1830 tabun, bootakiia Aika Itiaki ao katean te kaawa ae Tion bon te mwakuri n te maiu n tamnei ao n rabwata, ao e bati iai kaangaanga aika a matoatoa aroia: E kainnanoaki temanna bwa e na kabooa man tibwatibwa te aba ike a na maeka iai Aomata aika Itiaki. E kainnanoaki temanna bwa e na boretii booki ao baike a na boretiaki. Ao e kainnanoaki temanna bwa e na katea te titooa ni katauraoi amwarake ibukin kaain Tion. N te kaotioti are koreaki n Reirei ao Berita aika Tabu 51–57, te Uea e rineia ao e tuangiia aomata bwa a na tabeni mwakuri aikai, ao E katebenakoa, Independence, Missouri, bwaa “te nuuka n tabo” i Tion (Reirei ao Berita aika Tabu 57:3).
Ma e ngae ngke iai rabakau n kabooan te aba, te booreti, ao katean te titooa ibukin katean Tion, kaotioti aikai a reirei naba bwa te Uea e tangiriia Ana Aomata aika Itiaki bwa a na korakora n tamneiia n tau n aranaki bwa ana botanaomata Tion. E weteira ngaira n tatabemaniira n riki bwa “te tia tararua ae wanawana, e kakaonimaki, ao e raoiroi,” are iai irouna te tamnei ae raraoma, “[tei] ni matoatoa” n nakoara are ti rineaki nako iai (taraa Reirei ao Berita aika Tabu 51:19; 52:15; 54:2). Ngkana ti karaoa anne—bwa tao tera nako rabakaura—te Uea e kona n kabonganaira ni katea Tion, ao E “na bareka katean te kaawa n taina” (Reirei ao Berita aika Tabu 52:43).
Iango ibukin te Kamatebwai i bon Iroum ni Koroboki aika Tabu
E tangirai te Uea bwa N na riki bwa te tia mwakuri ae kakaonimaki, motiraoi, man wanawana.
Ngke arona bwa ngkoe kaain te Ekaretia n 1831, ko na bon bae naba ni kaoaki bwa ko na kawakina tuan te angabwai man am anga am bwai nakon te Ekaretia rinanon te Bitiobi. E na manga kaoka nakoim, n angin te tai, baike ko anga, n tabetai iai rakana. Ma ai tiaki am bwai—ma e mena iaan am tararua.
Ni bong aikai e kaokoro aron te waaki, ma tuan te anganano ao te tararua a teimatoa n kakaawaki nakon ana mwakuri te Uea. Iangoi taeka aikai mairoun Unimwaane Quentin L. Cook: “Ti maeka n taai ni kaangaanga ike e mwaiti ae kakoaua bwa akea tabera nakon te Atua ao bwa akea oin tabera ke ara tararua i bon ibukira ma tabeman . E mwaiti n te aonaaba are e tabeakina oin nanona … [ao] n aki kakoaua ae bon ngaia taan buokiia tariia. Ma, n te Ekaretia, ti kakoaua bwa te tararua bon te onimakinaki ae tabu” (“Stewardship—a Sacred Trust,” Ensign ke Riaona, Nob. 2009, 91).
Ngkai ko wareka mwakoro 51, iangoi baike e a tia n onimakiniko iai te Atua. Tera nanon taeka aika “te tia tararua” (kibu 19) ao “katabuaki” (te kibu 5), ao tera ae e kaotia n baike e kataningai te Atua mai iroum? Tera reirei aika ko kunei n mwakoro 51 ao n ana taeka Unimwaane Cook are e reireiniko nanon te riki n tia tararua? (taraa riki kiibu 9, 15–20).
Taraa naba Mataio 25:14–30; “The Law of Consecration,” witeo, ChurchofJesusChrist.org.
Reirei ao Berita aika Tabu 52:14–19
Te Atua e anga te baaten ibukin totokoan te mwamwaanaki.
Ngkai e mwaiti aomata ake a taku bwa iai irouia kaotioti aika tabu, Aomata aika Itiaki ake ngkoa a tabeianga bwa mwina a na mwamwaanaki. A na kanga n ataia bwa antai ae “butimwaeaki iroun te [Atua]”? (kibu 15). N Reirei ao Berita aika Tabu 52:14–19, te Uea e anga te baaten n ibuobouoki. Ko na kanga n kabongana te baaten aio n noori rongorongo aika kewe n te aonaba? Ko kona naba n kabongana te baaten aio n taraa oin maium: iangoa kabonganaan kibu n taeka man kiibu aikai ni korei titiraki n aron ae “Ngkana I taetae, e raoraoma tamneiu?”
I kona n rairaki nakon te Uea ngkana I maraki man aia rinerine tabeman.
Bwa mwakoron te bootaki i Ohio, tabeman Aomata aika Itiaki ake a kairaki iroun Newel Knight a roko mai Colesville, New York, ao a kainnanoa aia tabo n maeka. Leman Copley bon iai ana onaroka ae bubura irarikin Kirtland, ao e berita bwa e na kariaia Aomata aika Itiaki bwa a na maeka n abana. Ma, bon imwin are a moana maekaia ikekei, E memere ana onimaki Copley, e urua ana berita, ao e kanakoia Aomata aika Itiaki man ana tabo (taraa Aika Itiaki, 1:125–28).
N aron are koreaki ni mwakoro 54, te Uea e tuanga Newel Knight bwa Aomata aika Itiaki a na mwakuriia aron aia kaangaanga. Tera ae ko kunea n te kaotioti aei are kona ni buokiko ngkana ko rootaki man uruan ana berita temanna ke ana rinerine aika aki raraoi?
Te tabo are mena iai te onaroka are e tia n anga Leman Copley nakon te Ekaretia.
Reirei ao Berita aika Tabu 56:14–20
A kabwaia akana a itiaki nanoia.
Ni kiibu aikai, te Uea e taetae nakoia kaubwai ao ake aki kaubwai naba; e na kakaongora kabotauan Ana reirei nakoia kurubu aika uoua aikai. Tera ae iai ni kiibu aikai are kona n uaana nakoim? E na kanga tangiran te kaubwai n “kabareka” tamneim? (kibu 16). Ngkoe iroum tera nanon “itiaki nanoia” (kibu 18) ni kaeineti ma kaubwain te aonaaba?
Taraa naba Iakobwa 2:17–21.
Iango ibukin Kamatebwai ni Koroboki aika Tabu n te Utu ao te Bootaki n Utu te Tairiki
-
Reirei ao Berita aika Tabu 51:9.Kam kona ni karaoa ami tatakaro are e na kukurei aia ami utu ao imwina marooroakinna bwa e kanga te takakaro anne ni kaokoro ngke iai ae babakanikawai. Bukin tera e kakaawaki “maiuakinan te kokoaua” i bon imarenara? E kanga te kokoaua ni buokira bwa ti na “katiteuanaaki”?
-
Reirei ao Berita aika Tabu 52:14–19.Ngkai kam marorooakina te baaten are kabwarabwaraaki n kiibu aikai, am utu a na rang kukurei n tarai baaten ake ko kabonganai—baaten n aron ituakin te kunnikai ke karaoan te bwai teuana. Kam kona n bootaki ni mwakuri ni karika te bwai man te baaten n ami tai n marooroakina ana baaten te uea are anga ibukin totokoan te mwamwaanaki.
-
Reirei ao Berita aika Tabu 53:1.Iangoa tibwauan am namakin ma am utu ngke ngkoe, n aron Gilber, e butiia te Uea n “kaeineti ma nakoam.”
-
Reirei ao Berita aika Tabu 54:2; 57:6–7.Tera ae nanonaki n “tei n matoatoa” (Reirei ao Berita aika Tabu 54:2) ni baike e tua nakoira te Atua? Ko kona n kaoiia kaain te utu bwa a na teirake man taekina te bwai ae e a tia te Atua n tua nakoia.
-
Reirei ao Berita aika Tabu 55.E kanga te Uea n kabongana rabakaun William Phelps n koroboki ao n booreti? (ibukin te katooto, taraa te author index n te boki n anene n anene ake e korei). Tao a kona kaain te utu n marorooakin tarena ao konabwai ake a noori i bon imarenaia. A na kanga ara tarena n ibuobuoki nakon ana mwakuri te Atua?
Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Te anene ae tamaroa: “‘Give,’ Said the Little Stream,” Aia Boki n Anene Ataei, 236.
Kanakoraoan Am Kamatebwai
Kawakina te tienoo n kamatebwai. E kona n ibuobuoki nakoim kabonganan te tienoo ke te boki ibukin korean nonori, iango, titiraki ke namakin ake a roko n am tai n kamatebwai.
Bitiobi Partridge E Butimwaea te Anganano, iroun Albin Veselka