Te Bootaki ni Kaembwa, iroun Worthington Whittredge

Meei 3–9

Reirei ao Berita aika Tabu 46–48

Ukorii Bwaai n Tituaraoi aika Moan te Raraoi”

Ngkai ko wareka Reirei ao Berita aika Tabu 46–48, korei namakin ake ko karekei. Ngkanne ko kona n titiraki, n aron are e taku Unimwaane Richard G. Scott, “Iai riki te bwai ae I riai n ataia?” (“To Acquire Spiritual Guidance” Ensign ke Riaona, Nob. 2009, 8).

Korei Am Namakin

Ngke Parley P. Pratt, Oliver Cowdery, Ziba Peterson, ao Peter Whitmer Jr. a kitana Kirtland ao n mwaing nakon tabo n mwakuri ake tabeua, a katikuia nake a rairaki ae tebubua mwaitia ake e korakora aia onimaki ma e memere aia taneiai ke aia atatai. Bon akea aeniboki ni kairi, akea aia bowi n kataneiai taan kairiri, akea manga kaotan te maungatabu—ni koauana, e aki naba rangi ni bati mwaitin ana Boki Moomon ake a kabutaki. Angina irouia taan kakoaua aikai a katikaki nakon te euangkerio ae kaokaki n te berita ni karekean ana bwaintituaraoi te Tamnei, riki akea a bon atai man aia kamatebwai man te Nu Tetemanti (taraa, ibukin te katooto, 1 I-Korinto 12:1–11). Imwin anne, tabeua anua n taromauri—n ikotaki ma te bwaka nako aontano ke te katiti n aron te naeta—a bon karaoaki inanon bootakin te Ekaretia. E mwaiti ae kunea bwa e matoa kinakin bwaintituaraoi ake mairoun te Tamnei ao ake tiaki. Nooran te mangaongao aio, E tataro Iotebwa ibukin te ibuobuoki. Ana kaeka te Uea e kakawaki naba ni bong aikai, ngkana aomata a kakewea man katibanokoi ana bwaintituaraoi te Tamnei. E kaotia te Uea bwa kaotin mwaaka aika tabu a koaua ao ni kamatataaki bwa—bwaintituaraoi mairoun Tamara are i Karawa ae tatangira, “e anga ibukin kabwaiaia naake a [Tangiria] ao a kawakini [Ana] tua ni kabane” (Reirei ao Berita aika Tabu 46:9).

Iango ibukin te Kamatebwai i bon Iroum ni Koroboki aika a Tabu

Reirei ao Berita aika Tabu 46:1–6

Nake a ukori baikai a butimwaeki n nebonebo n ana Ekaretia te Uea.

Bootakin nako Ana Ekaretia Ibukiia Aika Itiaki ni Boong aika Kaitira e riai n riki bwa teuana te bootaki ae bubutimwaei man kaunganano n te aonaaba. Tera arora ae reireia te uea nakoira n Reirei ao Berita aika Tabu 46:1–6 ni butimwaeia nake a kan kaea ara taromauri? A namakina te butimwaeaki raoraom ao kaain am kaawa n ami bootaki n taromauri? Tera baika kam karaoi ni karika bootakin te Ekaretia bwa tabo aika a kan okioki aomata nako iai? Iangoia bwa e kanga am waaki n ira te Tamnei ae Raoiroi n Bootakin te Ekaretia n roota am taromauri.

Taraa naba 3 Nibwaai 18:22–23; Moronaai 6:5–9; “Karaki,” witeo, ComeUntoChrist.org; “Religious Enthusiasm among Early Ohio Converts,” Revelations in Context, 105–11.

Reirei ao Berita aika Tabu 46:7–33

E a tia te Atua n anga ana bwaintituaraoi te tamnei ni kakabwaiaia Natina.

Kaain te aro ake rimoa a kakouai ana bwaintituaraoi te tamnei ma a kainnanoa te kamataata iaon bonganaia. Ngkai ko kamatebwai ana bwai n tituaraoi te Tamnei man Reirei ao Berita aika Tabu 46:7–33, iangoia bwa bukin tera e kakawaki ae ko na“ [uringa] n taainako bukin anganakimi” (kibu 8). Iangoia bwa a kanga kibu aikai n irekereke ma te rongorongo aio mairoun Unimwaane Robert D. Hales. “Bwaintituaraoi a anganaki nake a kakaonimaki nakon Kristo. A na buokiira n atai ao n reirei koauan te euangkerio. A na buokiira n kakabwaiaia tabeman. A na kairiira n oki nakon Tamara are i Karawa” (“Ana Bwai n Tituaraoi te Tamnei,” Ensign, Beb. 2002, 16). Tera riki ae ko reiakinna man kibu aikai iaon te bwaai n tituaraoi n tamnei? A na kanga kibu aikai ni buokiko n ”aki mwaamwanaaki? (kibu 8).

Iangoia bwa tera bwai n tituaraoi n tamnei aika iai iroum—ao ko na kanga ni kabonganai n “kakabwaiaia natin te Atua” (kibu 26). Ngkana iai ana kakabwaia te tamanuea iroum, e kona ni kaoti bwaai n tituaraoi ake ko a tia n anganaki.

Taraa naba Gospel Topics, “Spiritual Gifts,” topics.ChurchofJesusChrist.org.

Reirei ao Berita aika Tabu 47

Te Uea e tangira Ana Ekaretia bwa e na korea rongorongona.

Nakoan John Whitmer ae korean rongorongon te Ekaretia e reitanako te katei mangkoa irouiia taan koroboki ibuakoia ana aomata te Atua (taraa 2 Nibwaai 29:11–12; Mote 6:5; Aberaam 1:28, 31). Ni koauana, te nakoa ae te Tia Korea Rongorongon te Ekaretia ao te Tia Rawerawe bon iai naba ngkai. Ngkoe iroum bukin tera e rangi ni kakawaki korean te rongorongo iroun te Uea? Iangoa aei ngkai ko wareka Ana kaetieti nakon John Whitmer ibukin te tabe aio n mwakoro 47. Iangoia naba bwa tera baika ko rinanona aika ko riai n korei. Te katooto, tera ae e a tia n reireiniko te Uea ae ko kan kawakinna?

Ngkai ko iangoi titiraki aikai, iangoa te reirei aio mairoun Unimwaane Marlin K. Jensen man te Itingaun, are e beku bwa te Tia Taua mwiin Rongorongon te Ekaretia ao te Rawerawe man 2005 nakon 2012:

“Ti korei rongorongo ni kakauringiira. … Nanora bon te buokiia kaain te Ekaretia n uringi baika a korakora ake e a tia ni karaoi te Atua ibukiia Natina. … Reirei man taai aika nako a buokira n tokanikai n taai aikai ao e anganira te kantaninga ibukin taai aika a na roko” (“E Na Iai te Rongorongo ae e na Kawakinaki Iroumi,” Ensign, Rit. 2007, 28, 33).

N reiakina riki rongorongon te mwakuri are kakaraoaki iaan ana kairiri te Tia Korei Rongorongon te Ekaretia, kawara history.ChurchofJesusChrist.org.

John Whitmer e weteaki bwa e na korea rongorongon te Ekaretia.

Iango ibukin Kamatebwai ni Koroboki aika Tabu n te Utu ao te Bootaki n Utu n te Tairiki

Reirei ao Berita aika tabu 46:2–6.Tera ae ti kona ni karaoia n te utu n taraia bwa naake tabeman a namakina te butimwaeaki n ara bootaki n te Ekaretia? (taraa naba 3 Nibwaai 18:22–23). Te tamnei are e iri ma te kabwarabwara aio e kona n reita te marooro.

Reirei ao Berita aika Tabu 46:7–26.Tera bwaintituaraoi n te tamnei ae ti nooria iroura n tatabemaniira? A kanga bwaintituaraoi aikai ni kakabwaia ara utu?

Reirei ao Berita aika Tabu 47.Ko na kanga ni kaungaiia am utu bwa a na korei oin rongorongoia rinanon te wiiki? Ko kona naba n tibwaua tabeua rongorongo man oin am boki ke n tibwaua karakinan te bakatibu (taraa FamilySearch.org). Tabeua utu a katannakoa tabeua te miniti ni katoa wiki ibukia ngaiia ni kabane ba a na koroboki n aia boki. Ko kona n anga tabeua iango ibukin te koroboki, n aron “Tera ae riki n te wiiki aei ae ko tangiria bwa a na ataia tibum?” ke “Ko kanga n noora bain te Uea ni maium n te wiiki aei?” Ataei aika a uarereke a kona n korei tamnein baike a rinanona, ke ko kona n rawea aia karaki. Tera kakabwaia aika a reke man kawakinan “te rongorongo ae teimatoa ”? (kibu 1).

Reirei ao Berita aika Tabu 48.Kaain te aro ake i Ohio a tuangaki bwa a na tibwauai abaia ma nake a mwaing nako Ohio mai United States Mainiku. Tera riki ae ti kona n tibwauai n tobwai kainnanoia tabeman?

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Anene ae rineaki: “Have I Done Any Good?” (Hymns, nambwa. 223).

Kanakoraoan Ara Anga Reirei

Kabonganai karaki ao katooto. Te Tia Kamaiu n angin te tai e kabonganai karaki ao kaikonaki n reirei reirein te euangkerio. Iangoi katooto ao karaki man oin maium ae kona ni katamneia reirein te euangkerio ibukiia am utu (taraa Reirei n Ana Kawai te Tia Kamaiu, 22).

Tamara are i Karawa e angania natina bwaai n tituraoi n te tamnei ni kakabwai maiuia ake tabeman.