“Meei 10–16. Reirei ao Berita aika Tabu 49–50: ‘Bwa Ane Mai Iroun Te Atua E Bon Oota,’” Nakomai, Iriirai—Ibukiia Aomata n Tatabemaniia ao Utu: Reirei ao Berita aika Tabu 2021 (2020)
“Meei 10–16. Reirei ao Berita aika Tabu 49–50,” Nakomai, Iriirai—Ibukiia Aomata n Tatabemaniia ao Utu: 2021
Meei 10–16
Reirei ao Berita aika Tabu 49–50
“Bwa Ane Mai Iroun Te Atua E Bon Oota”
“Ane e karekea te oota, ao n reitinako i nanon te Atua, e na karekea riki te oota; ao te oota anne e rikirake ootana ma n oota riki ni karokoa te bong ae kororaoi.” (Reirei ao Berita aika Tabu 50:24). Iangoia bwa ko kanga ni karekea te oota man teimatoam inanon te Atua.
Korei Am Namakin
Te Tia Kamaiu bon ara “tia kawakin tiibu ae raoiroi” (Reirei ao Berita aika Tabu 50:44). E ataia bwa n tabetai a bua taian tiibu ao bwa e bati te kaangaanga n te rereua. Ngaia are E kairiira ma te tangira nakon te kamanoaki n Ana reirei, ni kararoai kaangaanga n aron “tamnei aika a buakaka, ake a tia n nako aon te aonaaba, ni mwamwana te aonaaba.” (Reirei ao Berita aika Tabu 50:2). Irii Rakina n angiin te tai e kairiira bwa ti na kanakoi iango ma katei aika kaairua. Aio e kaeineti nakon Leman Copley ao tabeman ake i Ohio ake a butimwaea te euangkerio ae kaokaki ma a teimatoa n taui koaua ake ake a kaairua. N Reirei ao Berita aika Tabu 49, te Uea e kaoti koaua ake a tiriburei ana koaua Leman ake mai mwaina iaon reirei n aron te mare ao Kauaokin te Tia Kamaiu. Ngke naake a rairaki i Ohio a “karekei … tamnei are [a] aki kona n oota iai,” e reireinia te Uea aron kinaakin kaotin te Tamnei aika koaua (Reirei ao Berita aika Tabu 50:15). Te Kawakin Tiibu ae Raoiroi e taotaonannano;E ataia bwa kaain te aro aikai a—titebo ma ngaira ni bane—“ataei aika a uarereke” ake a “riai n rikirake n te akoi ao n ataakin te koaua” (Reirei ao Berita aika Tabu 50:40).
Iango ibukin te Kamatebwai i bon Iroum ni Koroboki aika a Tabu
Reirei ao Berita aika Tabu 49:5–23
Koauan te euangkerio a kona ni buokai ni kinai reirei aika kaairua.
Imwain kaainakin te aro, Leman Copley e a tia ni kaaina te kurubu n aro ae kinaaki bwa the United Society of Believers in Christ’s Second Appearing, e kinaaki naba bwa te Shakers (taraa “Leman Copley and the Shakers,” Revelations in Context, 117–21). Imwiin maroorona ma Leman, Iotebwa Timiti e uokora te kamataata mairoun te Uea iaon tabeua reirein te aro ae te Shakers, ao e kaeka te Uea ma te kaotioti are n mwakoro 49.
Ko kona ni kunei tabeua ana koaua te aro n Shakers are mwaneweaki n atuun mwakoro 49. Iangoa mwakenan ao nooran koaua ake n kibu 5–23 ake e kaeti koaua akanne. Iangoi riki tabeua reirei ao katei aika kaairua n te aonaaba aio. Tera koauan te euangkerio ae kona n kamanoko mai iai?
Reirei ao Berita aika Tabu 49:15–17
Te mare imarenan te mwaane ao te aine e kakaawaki nakon ana kainibaire te Atua.
Tera koaua iaon te mare ae ko reiakinna man Reirei ao Berita aika Tabu 49:15–17? Bukin tera te mare imarenan te mwaane ao te aine e kakawaki nakon ana kainibaire te Atua? Unimwaane David A. Bednar e anga uoua bukina: “Bukina 1: Karikaia tamnei mwaane ao aine a kabwanina ao a kakororaoia i bon irouia, ao ngaia are mwaane ao aine a kantaningaki bwa a na uaia n rikirake nakon te karietataaki. … Bukina 2: , Man te baire mai karawa, te mwaane ao te aine a riai ibukin uotakiia ataei nakon te maiu n rabwata ao n katauraoa te tabo ae tamaroa ibukin tobwakia ao ribanakia ataei” (“Marriage Is Essential to His Eternal Plan,” Ensign, Tuun 2006, 83–84).
Taraa naba Karikani Bwaai 2:20–24; 1 I-Korinto 11:11; “Te Utu: Te Katanoata nakon te Aonaba,” Ensign ke Riaona, Meei 2017, 145.
Te mare imarenan te mwaane ao te aine e katabuaki iroun te Atua.
Ana reirei te Uea a kona n kamanoai man ara kewe Tatan.
Nake a rairaki aika boou ake i Ohio a rangi ni ingainga ni karekei korakoran te tamnei are beritanaki n koroboki aika tabu, ma Tatan e rangi ni ingainga naba ni keweia. A titiraki, Ngkana temanna e takarua ke e tong, anne ngkanne korakoran te Tamnei?
Katamneia bwa ko tuangaki bwa ko na buokiia naka a tibwa rairaki aikai n oota bwa a na kanga n kinaa korakoran te Tamnei ae Raoiroi aika koaua ao n totokoa te mwaamwanaki n ana katooto Tatan. Tera reirei aika ko kunei n Reirei ao Berita aika Tabu 50 aika ko kona n tibwauai? (taraa riki kibu 22–25, 29–34, 40–46).
Taraa naba 2 Timoteo 3:13–17.
Reirei ao Berita aika Tabu 50:13–24
Taan reirei ao taan reiakinaki a uaia n reireiaki iroun te Tamnei.
Teuana te kawai n kamatebwaian Reirei ao Berita aika Tabu 50:13–24 boni korean tamnein te tia reirei ao te tia reiakinaki ao, irarikia, korei taeka ao mwakoro n taeka man kiibu aikai ake a reireiniko taekan reiakinan ao te anga reirei n te euangkerio. . Nningai taai ake a riki nakoim ae reireiniko kakaawakin te Tamnei n te reirei ao te anga reirei? Iangoi baikai ko na ni karaoi n katamaroa am waaki bwa te tia kamatebwai ao te tia reirei.
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Reirei ao Berita aika Tabu 49:2.Tera ae nanonaki n “iai te nano n kan ataa iteran te koaua, ma tiaki ni kabane”? Tao ko kona n kaota ti teutana mwakoron te tamnei ao angania kaain te utu bwa a na keetinna bwa tera. Tera ae riki ngkana ti butimwaea ti iteran te koaua? (taraa 2 Nibwaai 28:29). E kanga n riki bwaninin te euangkerio bwa te kakabwaia nakoira?
-
Reirei ao Berita aika Tabu 49:26–28.Ti kanga ni kakabwaiaki man ana berita te Uea are “N na ri moami ao n riki bwa te tia tararuaa akumi; ao N na bon mena i buakomi”? A kona kaain te utu n tibwauai karakinaia ike a namakina iai te Uea bwa e “ri [moaia]” ke n namakinna bwa E mena “ i [buakoia] .”
-
Reirei ao Berita aika Tabu 50:23–25.Kam kona ni bootaki n te ruu ae roo ni wareka Reirei ao Berita aika Tabu 50:23–25 ao karokoa te oota teutana imwin teutana man kauran taura nenea ke kauran taura teuana imwin teuana. Ko kona naba n wareki kiibu aikai ngkana kam matakuakina otin taai n te ingabong. Tera ae ti kona ni karaoia ni karika ootara n te euangkerio bwa e na rikirake? Ngkana kaain te utu e reiakina te bwai ae boou n te euangkerio inanon te wiki, kaungaia bwa a na tibwauaia ma aia utu n koreana n te beba ao kanimwana nakon te taura ke taura riki tabeua n te auti.
-
Reirei ao Berita aika Tabu 50:40–46.Imwiin warekan Reirei ao Berita aika Tabu 50:40–46, ko kona n kaota tamnein te Tia Kamaiu are e raona te reirei aei ao kawenei titiraki n aron aikai: Ko na kanga n ataia bwa te Tia Kamaiu e tangiria tiibu? N te aro raa ae riki iai te Tia Kamaiu bwa ara tia kawakin tiibu? Tera mwakoro n taeka man kiibu aikai ake a kaota te iango are te Tia Kamaiu bon te tia kawakin tiibu ao ngaira bon Ana tiibu?
Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Te anene ae tamaroa: “Shine On,” Aia Boki n Anene Ataei, 144.
Kanakoraoan Ara Anga Reirei
Rooti bwaai nako. Taai n anga reirei aika tamaroa, riki n te mweenga, n angiin te tai a bon kaoti naba ao a karina: te tai n amwarake n te utu e kona n karekea te marooro iaon kamatebwaian ana taeka te Atua, ao te angibuaka ae iriana te karau e kona n kaota koauan te ran ae maiu. Ngkana ko tauraoi n te tamnei, e kona te Uea n anganiniko “n te tai raoi anne, te bwai are kam na taekinna” (Reirei ao Berita aika Tabu 100:6).
Gentle Shepherd, iroun Kim Yongsung