“Meei 24–30. Reirei ao Berita aika Tabu 58–59: ‘Ingainga ni Kan Karaoa te Waki ae e Raoiroi,’” Nakomai, Iriirai—Ibukiia Aomata n Tatabemaniia ao Utu: Reirei ao Berita aika Tabu 2021 (2020)
“Meei 24–30. Reirei ao Berita aika Tabu 58–59,” Nakomai, Iriirai—Ibukiia Aomata n Tatabemaniia ao Utu: 2021
Independence, Missouri, iroun Al Rounds
Meei 24–30
Reirei ao Berita aika Tabu 58–59
“Ingainga ni Kan Karaoa te Waaki ae e Raoiroi”
E reirei Beretitenti Dallin H. Oaks, “Koroboki aika tabu a na kaekai ni kabane ara titiraki ibukina bwa man warekaia ti kaoa man kakororaoira nakon ana kairiri te Tamnei ae Raoiroi, are e na kairira nakon koaua nako ” (inanon David A. Edwards, “Iai Ikanne kaekan au Titiraki?” New Era, Meei 2016, 42).
Korei Am Namakin
Ngke unimwaanen te Ekaretia a moan noora iai nnen kaawan Tion—Independence, Missouri—e kaokoro ma are a kantaningaia. Tabeman a taku bwa a na noora te kaawa ae rikirake, ae mwamwakuri are mwaiti iai kaain te aro. Ma a kunea te tabo ae aki bati kaina, ao akea iai te rikirake are a taneiai inanona ao e maekanaki irouia te koraki ake akea aia katei ao tiaki kaain te aro. Te bwai ae riki bwa te Uea e aki ti tuangiia bwa a na nako nakon Tion—E tangiria bwa a na karikirakea .
Ngkana baike ti kantaningai aki boraoi ma baike a riki, ti kona n uringa ana taeka te Uea nakoia kaain te aro n 1831: “Kam aki kona n nooria ni matami, n te tai aio, ana baire Atuami … ao te mimitong are e na rimwiin karawawata aika a mwaiti” (Reirei ao Berita aika Tabu 58:3). E ang, e onrake te maiu n te kaangaanga, ao te buakaka , ma ti kona n “kakoroa bukin te raoiroi ae e mwaiti; bwa e mena te mwaaka [iroura]” (kiibu 27–28).
Taraa naba Aika Itiaki, 1:127–33.
Iango ibukin te Kamatebwai i bon Iroum ni Koroboki aika a Tabu
Reirei ao Berita aika Tabu 58:1–5, 26–33, 44; 59:23
A roko kakabwaia ni kaeineti ma ana tai te Atua ao ara botumwaaka.
Aomata aika Itiaki a kawenea aan Tion i Jackson County, Missouri, ike a rinanon kaangaanga aika bati. Iai aia kantaninga bwa inanon aia tai ni maiu ao e na rikirake te aono aei nakon te tabo are a na kona iai ni ikotaki Aomata aika Itiaki. Ma, Kaain te aro a kakionakoaki mai Jackson County inanon tabeua te ririki, ao te Uea e kaotia bwa Ana aomata a na “tataninga i nanon te tai ae uarereke ibukin kaboakin Tion” (Reirei ao Berita aika Tabu 105:9).
Ngkai ko kamatebwai mwakoro n taeka aikai, tarai oin aki rokon kakabwaia n taai tabetai. Titiraki aika i nano a kona ni buokiko n iango.
Reirei ao Berita aika Tabu 58:1–5; 59:23. Tera reirei ni kibu aikai ake a kakorakora am kona ni uota te kaangaanga ma te tataonakinnano? Tera kakabwaia ake ko karekei imwin te kaangaanga? Ngkoe iroum bukin tera tabeua kakabwaia a roko imwin te kaangaanga?
Reirei ao Berita aika Tabu 58:26–33. Tera oin te “ingainga ni kan karaoa te waaki ae raoiroi” ni kakoroan nanon ana berita te Atua? Tera oin raoi te ongotaeka?
Reirei ao Berita aika Tabu 58:44. Tera te reitaki imarenan “te tataro n onimaki” ao nanon te Uea ibukira?
Reirei ao Berita aika Tabu 59, atuun te mwakoro
Antai Polly Knight?
Polly Knight ao kainnabana, Joseph Knight Sr., bon tabeman mairouia nake a moan kakoaua te wewete ni burabeti nakon Iotebwa Timiti. Polly ao Joseph a anga te boutoka ae kakaawaki nakon te Burabeti n mwakurian rairan Ana Boki Moomon. Te utu ae te Knight a kitana Colesville, Nu Ioki, ni bootaki ma kaain te aro i Ohio ao imwin anne a tuangaki bwa a na mwaing nako Jackson County, Missouri. N aia tai ni mwananga, E kekerikaki marurungin Polly, ma e nanomatoa ni kan noora Tion imwain matena. Tabeua te bong imwin rokona i Missouri ngke e a motirawa (taraa Saints, 1:127–28, 132–33). Reirei ao Berita aika Tabu 59 e reke n te bong are e motirawa iai, ao kibu 1 ao 2 kanga e bon kaeineti raoi nakoina.
Reirei ao Berita aika Tabu 59:9–19
Tabuan te bong ae te Tabati e uoti kakabwaia n rabwata ao n tamnei.
Imwin ana berita bwa e na kakabwaiaia kaain te aro i Tion “ao tua aika tiaki ti tabeua,” te Uea e anga ana kamataata ae onoti n teuana te tua: te tua n karinea Ana “bong ae e tabu” (Reirei ao Berita aika Tabu 59:4, 9). Ngkai ko kamatebwaia Reirei ao Berita aika 59:9–19, iangoa bukina ngkai e rangi ni kakaawaki karinean te Tabati nakoia kain te aro aikai ngkai a ukora katean Tion.
Ko kona naba n iangoi titiraki aekan aikai: I kabongana te bong ae te Tabati n te kawai are e kataua te Uea? E na kanga kawakinan te bong ae te Tabati ni buokai n “kawakinai raoi man barekan te aonaba”? (kibu 9). Tera ae I kona n karaoia n anga au “nebo nakon Teuare Moan te Rietaata”? (kibu 10).
Imwin warekan kibu aikai, tera ae ko kaungaki bwa ko na karaoia ni kawakina riki te bong ae te Tabati? Karikani Bwaai 2:2–3; Te Otinako 20:8–11; 31:13, 16; Te Tua Kaua 5:12–15; Itaia 58:13–14; Mareko 2:27; Ioane 20:1–19; Makuri 20:7.
Ko na rangi ni buokaki naba man teuana ibuakon ara witeo ke bwaai ni ibuobuoki iaon te Tabati ae kuneaki n sabbath.ChurchofJesusChrist.org.
Taraa naba Russell M. Nelson, “Te Tabati Bon te Kakukurei,” Ensign ke Riaona, Meei 2015, 129–32; Bible Dictionary, “Sabbath.”
Anaakin te toa bon mwakoron tabuan te Bong ae te Tabati.
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Reirei ao Berita aika Tabu 58:26–29.Tao a kona kaain te utu ni korei ni karinani bwaai tabeua aika a “ingainga ni kan” karaoi. Baikanne a bwaka iaan “waaki [nako] aika raoiroi”? Bukin tera e tangirira te Uea bwa ti na “karaoi bwaai aika a mwaiti n oin [nanora]”? Tuangiia kaain te utu n tatabemaniia bwa a na iangoi baika a kona ni karaoi n te wiki aei n “kakoroa bukin te raoiroi ae mwaiti.” Imwina a kona n ribootina baike a karaoi.
-
Reirei ao Berita aika Tabu 58:42–43.Tera ae a namakinna kaain te utu ngkai a wareki kiibu aikai? A na kanga kiibu aikai ni buoka temanna ae kainnanoa te rairannano?
-
Reirei ao Berita aika Tabu 59:3–19.Tera ae kona n nanonaki n “baunaki … ma tuua”? (kibu 4). Ngkai ko wareki tuua n kiibu 5–19, maroroakini kakabwaia ake ko a tia ni karekei man te ongotaeka nakon tuua nako aikai.
Ko kona naba n nooria bwa a kabonganaki taeka n aron “kimwareirei,” “kakimwareirei,” “kakukurei,” ao “kukurei” ni kabwarabwara te tua ni karinea te bong ae te Tabati. Ko na kanga ni karaka riki kakukurein am Tabati? Tao e kona am utu ni karaoa te takakaro ae te ikatoatoa ma kaati ake a kaoti baike ko kona ni karaoi ni tabua te bong ae te Tabati.
-
Reirei ao Berita aika Tabu 59:18–21.Tera ae ti kona ni karaoia n “kakoauai … Ana mwakuri [te Atua] ni bwaai ni kabane”? (kibu 21). Iangoa te nakonako ke matakuakin tamnei, n tarai baika a “kakukureia te mata … ao te nano naba” (kibu 18). Ko kona rawei ke n korei tamnein baike ko noori ao imwina marorooakina arom ni kaota am kakaitau ibukin bwaai aikai. Ti kanga n tia n nora bain te Atua inanon maiura?
Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Anene ae rineaki: “Choose the Right,” Hymns, nambwa. 239.
Kanakoraoan Ara Anga Reirei
TIbwauai kiibu. Angania kaain te utu te tai bwa a na tibwauai kibu n koroboki aika tabu ake a kunei n aia kamatebwai ake a rootaki iai.
Kamataatan te tamnei iroun Marti Major