“Meei 31–Tuun 6. Reirei ao Berita aika Tabu 60–62: ‘Rabwata ni Kabane A Mena i Nanon Baiu,’” Nakomai, Iriirai—Ibukiia Aomata n Tatabemaniia ao Utu: Reirei ao Berita aika Tabu 2021 (2020)
“Meei 31–Tuun 6. Reirei ao Berita aika Tabu 60–62,” Nakomai, Iriirai—Ibukiia Aomata n Tatabemaniia ao Utu: 2021
Te Kaembwaea i Missouri, iroun Bryan Mark Taylor
Meei 31–Tuun 6
Reirei ao Berita aika Tabu 60–62
“Rabwata ni Kabane A Mena i Nanon Baiu”
Beretitenti Ezra Taft Benson e reirei bwa ngkana ti kamatebwai koroboki aika tabu, “a na rikirake ara koaua. Mwioko nako a na kakorakoraaki. Utu nako a na kamatoaaki. Te kaotioti ae onoti e na raanganako” (“Mwaakan te Taeka,” Ensign, Meei 1986, 81).
Korei Am Namakin
N Tuun 1831, Iotebwa Timiti e tewea ana maungatabu ma unimwaanen te Ekaretia i Kirtland. Ikekei, te Uea e borongaia tabeman unimwaane n kakauoman ao e kanakoia nako Jackson County, Missouri, ma te mwioko aei: “Tataekin iaon kawaia” (Reirei ao Berita aika Tabu 52:10). E mwaiti unimwaane ake a karaoa tibwangaia ma te botumwaaka, ma tabeman a bon aki. Ngaia are ngke e a roko te tai n oki rikaaki nako Kirtland, e taku te Uea, “Ma tabeman [unimwaane] I aki kukurei irouia, bwa a aki kaurei wiia, ma a karabai aia tarena are I a tia n anganiia, ibukin maakan te aomata” (Reirei ao Berita aika Tabu 60:2). E mwaiti iroura ae kona n namakina te nanoanga ibukiia unimwane aikai—e na iai namakinan te maaku n kaurei wiira ao n tibwaua te euangkerio. Tao ti tuukaki naba n “maakan te aomata.” Tao ti nanokokoraki n taura ke ara konabwai. Bwa tao tera nako bukina iroura, te Uea e “atai mamaran te aomata ao bwa e na kanga n [buokiira]” (Reirei ao Berita aika Tabu 62:1). N uamae i nanon kaotioti aikai nakoia mitinare ngkoa bon kaunganano ake a kona ni buokiira n tokanikai iaon maakura n tibwauan te euangkerio—ke tabeua maaku are ti na kaitaraa: “Ngai, te Uea, I tautaeka i eta i karawa.” “Iai au kona n karikiko bwa ko na tabu.” “Rabwata ni Kabane A Mena i Nanon Baiu.” Ao “kam na kukurei, ataei aika uarereke; bwa I memena i buakomi.” (Reirei ao Berita aika Tabu 60:4, 7; 61:6, 36.)
Iango ibukin te Kamatebwai i bon Iroum ni Koroboki aika a Tabu
Reirei ao Berita aika Tabu 60; 62
E kukurei te Uea ngkana I kaurea wiiu n tibwaua te euangkerio.
Ti a tia n bane n rinanon taai ake ti bon kona iai n tibwaua te euangkerio ma temanna, ma te bwai ae riki, ti bon aki. Ngkai kam wareka ana taeka te Uea nakoia mitinare ngkoa ake a aki “kaurei wiia,” iangoi taai are ko na tibwaua iai te euangkerio. E kanga n titebo am koaua n te euangkerio ma te “tarena,” ke te kaubwai mairoun te Atua? Tera baika ti kakaraoi are n tabetai ti “karaba iai [ara] tarena”? (Reirei ao Berita aika Tabu 60:2; taraa naba Mataio 25:14–30).
Te Uea e kaetiia mitinare aikai, ma E kataia naba n kaungai nanoia. Tera rongorongo aika kaunganano mai Irouna ake ko kunei n mwakoro 60 ao 62? A kanga rongorongo aikai ni karikirakea am nanomatoa n tibwauan te euangkerio? N bong rake aikai, kakaei taai n kaurea wiim ao n tibwaua are e a tia n onimakiniko iai te Atua.
Taraa naba Reirei ao Berita aika Tabu 33:8–10; 103:9–10; Dieter F. Uchtdorf, “Mwakuri ni Mitinare: Tibwa te Bwai Are i Nanom,” Ensign ke Riaona, Meei 2019, 15–18.
E tangirai te Atua bwa n na tibwaua te euangkerio ma tabeman.
Reirei ao Berita aika Tabu 61:5–6, 14–18
A kamaraiaaki ni kabane raan iroun te Uea?
Ana kauring te Uea n Reirei ao Berita aika Tabu 61 bon, ngaia, te kauring iaon kaangaanga ake a kona n kaitarai Ana aomata n mwanangaia nako Tion n te karaanga i Missouri, are e ataaki n te tai anne bwa e kakamaaku. Te kauring aio e aki nanonaki iai bwa e riai n totokoaki te mwamwananga i taari. Te Uea iai irouna “mwaaka ni kabane,” n ikotaki ma mwaaka iaon te ran (kibu 1).
Reirei ao Berita aika Tabu 61–62
Te Uea e rangi ni mwaaka ao e kona n kamanoai.
N kawaia n oki nako Kirtland, Iotebwa Timiti ao tabeman taan kariiri n te Ekaretia a rinanon te tai ae kamamate iaon te karaanga i Missouri (taraa Saints, 1:133–34). Te Uea e kabonganaa te tai aio n kauringiia man reireiniia Ana toro. Tera ae ko kunea n Reirei ao Berita aika Tabu 61 are kaungako bwa ko na katuka am onimaki iroun te Uea ngkai ko kaitarai kakaewenakoam? Te katooto, bukin tera e kakaawaki ataakina bwa te Atua bon “man akea tokina nakon akea tokina”? (te kibu 1).
Iai nonori n aron aei ni mwakoro 62. Tera ae e reireiniko te Uea n Arona ma Mwaakana n te kaotioti aio?
Iangoi taai aika a karikirakea te onimaki ake e a tia n riki nakoim ngke te Uea e buokiko n tokanikai iaon te kaangaanga n tamnei ao n rabwata.
E tangira te Uea bwa n na karaoi au rinerine “n aron nooran raoiroina [irou].”
N tabetai te Uea e anga te kaetieti ae onoti, ao bwaai tabeua E katikui iroura aron iangoana. Ko kaanga n noora te reirei aei n kamataataki n Reirei ao Berita aika Tabu 62? (taraa naba Reirei ao Berita aika Tabu 60:5; 61:22). Ko a tia noora te reirei aei n oin maium? Bukin tera e raoiroi ibukira karaoan tabeua rinerine n akean te kaetieti ae onoti mairoun te Atua?
Taraa naba Ita 2:18–25; Reirei ao Berita aika Tabu 58:27–28.
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Reirei ao Berita aika Tabu 60:2–3.Bukin tera tabeman mitinare ngkoa a maaku n tibwaua te euangkerio? Bukin tera ti maaku? Karaoa te kataneiai bwa a na kanga kaain te utu n tibwaua te euangkerio n taai aika a kakaokoro.
-
Reirei ao Berita aika Tabu 61:36–39.Tera bukina ae ti nooria n kiibu aikai bwa ti na “kukurei”? (taraa naba Ioane 16:33). Tao a kona am utu n korei rongororongon ma tamnein bwaai ake e uota te kimwareirei nakoia ao karin inanon te turumwa ae “kukurei”. (Tai mwaninga n rinea tamnein te Tia Kamaiu ao baike a kaota Ana tangira ibukira.) I nanon te wiiki ngkana kaain te utu a kainnanoa te kauring bwa bukin tera ti na kukurei, a kona n rinea teuana te beeba man te turumwa.
-
Reirei ao Berita aika Tabu 61:36.Ko na kanga n buokiia kaain te utu n uringnga bwa te Tia Kamaiu e bon “e mena i [buakora]”? Kam kona n bootaki ni motikia bwa iaa te tabo ae nakoraoi ibukin Tamneina inanon mweengami. Ti na kanga ni kaoa te Tia Kamaiu nakon nanon maiura?
-
Reirei ao Berita aika Tabu 62:3.Tao kam kona n karaoa te kaoti koaua n ami utu imwin warekan te kibu aio. Ni kabwarabwaraa bwa tera te koaua, kam kona n tibwaua mwakoron ana reirei Beretitenti M. Russell Ballard “Pure Testimony” (Ensign ke Riaona, Nobembwa. 2004, 40–43). Bukin tera e kakaawaki bwa ti korei ara koaua?
-
Reirei ao Berita aika Tabu 62:5, 8.Bukin tera te Uea e aki anga te tua ibukin iteran nako maiura? N kaeineti ma te kibu 8, tera arora ni karaoi rinerine?
Ibukin iango aika a mwaiti riki ibukin reireinakiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Te anene ae tamaroa: “Testimony,” Anene n Taromauri, nambwa. 137.
Kanakoraoan Am Kamatebwai
Kariaia te Tamnei bwa e na kairiko n am kamatebwai. Kariaia te Tamnei ae Raoiroi bwa e na kairiko. Tarai raoi Ana wirikiriki ngkai E kairiko nakon bwaai ake ko kainnanoi bwa ko na reiakin ni katoa bong, e ngae ngkana Ana wirikiriki e tuangko bwa ko na wareka ke n kamatebwaia te reirei ae kaokoro ma are ko tataneiai iai.
Te Tia Kawakin Tiibu ae Raoiroi iroun Del Parson