Daviess County, Missouri

Tuun 14–20

Reirei ao Berita aika Tabu 64–66

“Te Uea e Kainanoa te Nano ao te Iango ae Tatauraoi”

E taku Beretitenti Henry B. Eyring: “I aki toki n nakon koroboki aika tabu ma titiraki aikai ‘Tera ae tangiria te Atua bwa na karaoia?’ ke ‘Tera ae tangirai bwa na namakinna?’ N tainako I kunei iango ma nonoori ake a tuai roroko irou mai mwaina” (“E Kanga te Atua n Taetae Nakoiu n Rinanon Koroboki Aika Tabu,” Beb. 6, 2019, blog.ChurchofJesusChrist.org).

Korea Am Namakin

N te kabuebue ae kamwengabuaka n Aokati 1831, tabeman unimwaane a mwananga n oki nako Kirtland imwin tarakaian te aba are Tion i Missouri n aron are kairaki iroun te Uea. Bon tiaki te mwananga ae kamwengaraoi. Naake a mwananga—Iotebwa Timiti, Oliver Cowdery, Sidney Rigdon, Ezra Booth, ao Tabeman—a bue man kainnano, ao te mwengabuaka e waekoa n oneaki nakon te itabaraara. E taraa n ae katean Tion, are kaawan te tangira, te inanoi, ao te rau, e na maan aron kateana.

Te kakukurei bwa, katean Tion—i Missouri n 1831 ke i nanora ao n ara uoote n bong aikai—e aki kainnanoia bwa ti na kororaoi. Ma, “ngkami kam riai n kabwarai buure,” e taku te Uea (Reirei ao Berita aika Tabu 64:10). E kainnanoa “te nano ma te iango ae tatauraoi” (kibu 34). Ao E kainnanoa te tataonakinnano ma te botumwaaka, bwa Tion e kateaki iaon aan “bwaai aika uarereke,” n katiaaki irouia naake a bon aki “kua ni karaoan ae raoiroi” (kibu 33).

Taraa naba Aika Itiaki, 1:133–34, 136–37.

Iango ibukin te Kamatebwai i bon Iroum ni Koroboki aika a Tabu

Reirei ao Berita aika Tabu 64:1–11

I kairoroaki bwa N na kabwarai aia bure aomata nako.

Ngkai ko wareka Reirei ao Berita aika Tabu 64:1–11, iangoa teuana te tai ngke te Uea e kabwarai am bure. Ko kona naba n iangoa temanna are ko riai n kabwarai ana bure. E kanga ana nanoanga te Tia Kamaiu n roota am namakin i bukim ao ibukiia tabeman? Bukin tera te Uea e tua nakoira bwa “ti na kabwarai aia bure aomata nako”? (kibu 10). Ngkana e matoatoa iroum te kabwara bure, taraia bwa tera ae a reirei taekan te kamataata aikai bwa e na kanga n ibuobuoki te Tia Kamaiu: Jeffrey R. Holland, “The Ministry of Reconciliation,” Ensign ke Riaona, Nob. 2018, 77–79; Kairi nakon Koroboki aika Tabu, “Kabwara Bure,” scriptures.ChurchofJesusChrist.org.

Reirei ao Berita aika Tabu 64:31–34

Te Atua e kainnanoa nanou ao au iango ae tatauraoi.

Ko a tia n namakina te “kua” n baike “a raoiroi” ake ko katai n karaoi? Kakaea ana rongorongo te uea nakoim n Reirei ao Berita aika Tabu 64:31–34. Tera nanon ae ko anga “nanom ma am iango ae tatauraoi” nakon te Atua? (kibu 34).

Reirei ao Berita aika Tabu 64:41–43

Tion e na riki bwa “te man ni kanikina nakoia aomata.”

Te man ni kanikina bon “te buraeki ke te kainibaire are a bootaki iai aomata n inanoi n aia kantaninga ke kateia” (Bwai ni Kairi nakon Koroboki aika Tabu, “Buraeki,” scriptures.ChurchofJesusChrist.org). E kanga n riki Tion—ke ana Ekaretia te Uea—bwa te buraeki nakoim? Tarai tabeua katooto aikai n bwaai ake a kateaki, n aron te buraeki, n kakabwaiaia aomata: Warekai Iteraera 21:6–9; Mataio 5:14–16; Aramwa 46:11–20. Tera ae a reireiniko kiibu aikai bwa ko na kanga n buoka te Ekaretia n riki bwa te buraeki n te tabo are ko maeka iai? Kakaai tabeua kawai are te Uea e kabwarabwara Tion n Reirei ao Berita aika Tabu 64:41–43.

Kaaben Moronaai E Taua te Ara n Inaomata, iroun Gary E. Smith

Reirei ao Berita aika Tabu 65

“Katauraoa kawain te Uea.”

Mataio e kabwarabwara Ioane te Tia Babetito bwa temanna are tangiroaea, “Katauraoa kawain te Uea” (Mataio 3:3; taraa naba Itaia 40:3). N Reirei ao Berita aika Tabu 65, te Uea e kabongana te aekaki n taetae aei n kabwarabwara Ana mwakuri n boong aika kaitira. Tera titebo ake ko noori imarenan are e karaoia Ioane te Tia Babetito (taraa Mataio 3:1–12) ao are e tangiria te Uea bwa ti na karaoia n boong aikai? Tera ae ko kunea n te kaotioti aei are e kaungako bwa ko na buoka kakoroan bukin taian taetae ni burabeti ake i nanona? Iangoi kawai are ko kona iai n “kaoti ana mwakuri [te Atua] aika raraoi i buakoia aomata” (kibu 4).

Reirei ao Berita aika Tabu 66

Te Uea e atai baike a mena i nanou.

Tabeua te tai imwin kaainan te Ekaretia, William E. McLellin e butiia Iotebwa TImiti bwa e na kaota ana kantaninga te Atua ibukina. E aki ataia Iotebwa, ma William iai nimaua oin ana titiraki ake e kantaningai bwa e na kaekai te Uea. Ti aki atai ana titiraki William, ma ti ataia bwa te kaotioti e kaeineti nakoina, ngkai Reirei ao Berita aika Tabu 66, e kaekai ni kabane ana titiraki William ao n nanoraoi iai n ae bwanin” (“William McLellin’s Five Questions,” Revelations in Context, 138).

Ngkai kam wareka mwakoro 66, iangoi baike e atai te Uea ibukin William McLellin ao tabeiaianga ao iango ake i nanona. E kanga te Uea n kaotia Bwa E kinako? Ngkana iai am kakabwaia mairoun te tamanuea, iangoa kamatebwaiana. Ngkai ko karaoa anne, tera ae e buokiko te Tamnei ae Raoiroi n oota n ana kantaninga te Atua ibukim?

Taraa naba Aika Itiaki, 1:138–40; Atuun Rerein te Euangkerio, “Patriarchal Blessings,” topics.ChurchofJesusChrist.org.

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Reirei ao Berita aika Tabu 64:8–10.Te reitaki n te utu e katauraoi taai aika maiti n reiakina te kabwara bure. Tao a kona kaain te utu n marorooakinna bwa e kanga te ikabwara bure n kakabwaiaa am utu. E kanga n tia n buoki ngkami te Tia Kamaiu n ikabwarabure i marenami? Ti kanga n “karawawataki” (kibu 8) ngkana ti aki kabwarai bureia tabeman?

Reirei ao Berita aika Tabu 64:33.Tera ae tangiria Tamara are i Karawa ibukin am utu bwa e na karaoia n kaota Ana “mwakuri ae korakora”? Tao te nako nakon te tembora, tibwauan te euangkerio ma kaain rarikim, ke te tokanikai iaon te itabararaa. Tao a kona kaain te utu n tatabemaniia n rikoi bwaai aika uarereke, n aron atibu ke bwatin ke mwakoron te bwai n katomatoma, ao n kabonganai n kaoti “bwaai aika uarereke” ake ti kona n karaoi n katoa bong n “[kawenea] aan” ana mwakuri ae korakora te Atua. N te utu, rinea teuana maibuakon bwaai aika uarereke aikai n mwakuriia n te wiiki aio.

Reirei ao Berita aika Tabu 66:3.Ko na kanga n reirei kakaawakin te rairanano? Ko kona n katauraoa teutana te amwarake n te raurau are e aki rang itiaki ao wareka ana taeka te Uea nakon William McLellin: “Ko a itiaki, ma tiaki ni kabane.” Ngkanne ko kona n kaitiaka raoi te raurau ao tibwaa te amwarake ao n marorooakinna bwa e kanga Iesu Kristo n karekea ara kona n itiaki n tamneira.

Reirei ao Berita aika Tabu 66:10.A na kanga am utu n ira ana reirei te Uea n “aki ukoukora te karawawataki,” ke te karawawataki n karaoan bwaai aika mwaiti? Kam kona n marorooakina karakinan Maria ao Mareta (taraa Ruka 10:38–42), ao marorooakinna bwa e na kanga am utu n kararoa man te karawawataki ni bwaai aika akea bongaia i karawa.

Ibukin iango riki iaon reireinakiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae tamaroa: “Help Me, Dear Father,” Aia Boki n Anene Ataei, 99.

Kanakoraoan Ara Anga reirei

Tatauraoi ao Kukurei ni Kaekai Titiraki. Tabeua taai n reirei aika tamaroa a moanaki man titiraki ma tabeaianga i nanoia kaain te utu. Kaotia nakoia kaain am utu rinanon am taeka ma am mwakuri bwa ko ingainga n ongora irouia. (Taraa Reirei n Ana Kawai te Tia Kamaiu, 16.)

E kabwaraaki ana bure, iroun Greg K. Olsen. Kabonganaaki man te kariaiakaki. www.GregOlsen.com