Spring Hill, Daviess County, Missouri, iroun Garth Robinson Oborn

Tuun 7–13

Reirei ao Berita aika Tabu 63

“Bwa Are E Roko mai I Eta E Bon Tabu”

E taku te Uea, “Kam na karekea te Tamnei rinanon te tataro” (Reirei ao Berita aika Tabu 63:64). Iangoa te tataro ibukin te Tamnei bwa e na kaira am kamatebwai.

Korei Am Namakin

Ana tabo kaawan Tion e a tia n rineaki. Taan kairiiri n te Ekaretia a tia n kawara te tabo anne man katabua bwa te tabo ni bootaki ibukiia Aika Itiaki. N rongorongon Iotebwa Timiti, “aban Tion e riki ngkai bwa te bwai ae te kabanea ni kakawaki n te maiu n rabwata n aia iango” (Reirei ao Berita aika Tabu 63, atuun te mwakoro). Ma taraan Tion a bon kakaokoro. E mwaiti Aika Itiaki ake a ingainga ni waakina te bootaki i Missouri. Ni kaitara aei, aomata n aron Ezra Booth a bon aki kukurei n te aba are Tion ao a kaota aia nonoori. Ni koauana, ngke e oki Iotebwa nako Kirtland mai Missouri, e kunea bwa te kauntaeka ao te bwaka a rinnako n te Ekaretia ngke akea ngaia. N te tai aei te kaotioti ae mena n Reirei ao Berita aika Tabu 63 e a karekeaki. Ikai are te uea e kaota kabooakin te aba ao kamwaingakiia Aika Itiaki nako Missouri. Ma ibuakon baika a kakaawaki bon te kauring bwa: “Ngai, te Uea, I taekinna ni bwanaau, ao a na ongeaba nako iai” (kibu 5). Bwanaana, Nanona, Ana tua—ake ni kabane a “[roko] mai eta”—a na aki taraaki n oin nanora ke ma te takakaro. E “bon tabu, ao n riai n taekinaki ma te karaurau” (kibu 64).

Iango ibukin te Kamatebwai i bon Iroum ni Koroboki aika a Tabu

Reirei ao Berita aika Tabu 63:1–6, 32–37

Unin te Uea e oti ni kaitaraia ake a buakaka ao taan kaitara.

Ngke e reke te kaotioti aio, Iotebwa Timiti e kaitarai kabuakaka aika mamatoa mairouia tabeman kaain te Ekaretia ake a teirake ni kaitara (taraa “Ezra Booth and Isaac Morley,” Revelations in Context, 130–36). Tera kauring ake e anga te uea n Reirei ao Berita aika Tabu 63:1–6, 32–37 ni kaineti ma “naake a buakaa ao taan kakaitara”? A kanga n riki kauring aikai bwa kaotan ana tangira te Atua?

Reirei ao Berita aika Tabu 63:7–12

Kanikana a roko man te onimaki ao nanon te Atua.

Kanikana ke kakai n ti ngaia a aki karekea te onimaki ae teimatoa. Ni moan 1831 Ezra Booth, te minita n te aro n Methodist i Kirtland, e motikia bwa e na bwabetioaki imwin nooran Iotebwa Timiti ngke e karaoa te kakai n kamaoan bain raoraon Booth ae Elsa Johnson.

Ma e ngae n anne, inanon tabeua te namwakaina, E bua ana onimaki Booth ao e a riribaa te Burabeti. E kanga n riki aei, ngkai e a bon tia n noora te kakai? Iangoa aei ngkai ko wareka Reirei ao Berita aika Tabu 63:7–12. Ko kona naba n iangoia bwa bukina tera tabeman aomata a karekei kanikina “ibukin kabwaiaia aomata nakon mimitongin [te Atua] ” (te kibu 12) ao tabeman a karekei “nakon … kabuakakaia” (kibu 11). Man baike ko a tia n wareki, tera ae tangiria te Uea bwa ti na iangoia man namakinna n kanikina aikai?

Taraa naba Mataio 16:1–4; Ioane 12:37; Moomon 9:10–21; Ita 12:12, 18.

Reirei ao Berita aika Tabu 63:13–23

Te Itiaki e nanonaki ni kawakinan au iango ao au mwakuri bwa a na itiaki.

Angiia aomata a kariaia bwa e kaairua te wenenibure. Ma n Reirei ao Berita aika Tabu 63:13–19, e kamataata te Tia Kamaiu bwa iango n kaibwabwaru naba iai mwiina ae korakora. “Bukin tera te kaibwabwaru bon te bure ae kamamate?” E titiraki Unimwaane Jeffrey R. Holland. “Eng, n raonaki ma korakorana n urua raoi te Tamnei iaon tamneira, I taku bwa bon te bure ibukina bwa e kabareka te reitaki ae te kabanea n rietaata man tabu are e anganiira te Atua ni maiura n rabwata—te tangira are iai iroun te mwaane ao te aine imarenaia ao nanoia taanga ni karekeia natiia nakon aia utu are baireaki bwa a na akea tokina” (“Place No More for the Enemy of My Soul,” Ensign ke Riaona, Meei 2010, 44).

Tera baika a na riki are e mwaneweia te Uea n Reirei ao Berita aika Tabu 63:13–19 are e na roko nakoia nake aki rairinanoia man iango ao mwakuri aika bareka? Tarai kakabwaia are e berita te Tia Kamaiu n kiibu 20 ao 23 nakoia nake a kakaonimaki. Tera kakabwaia aika a roko ni maium man te ongotaeka nakon tuan te Itiaki? E kanga te Tia Kamaiu ni buokiko n teimatoa man tiku n itiaki?

Taraa naba Reirei ao Berita aika Tabu 121:45; Linda S. Reeves, “Worthy of Our Promised Blessings,” Ensign ke Riaona, Nob. 2015, 9–11.

Ti kakabwaiaaki ngkai ti kaitiaki ara iango ma ara mwakuri.

Reirei ao Berita aika Tabu 63:24–46

Te uea e kaira aia waaki Aika Itiaki n te maiu n tamnei ao n rabwata.

Ngke e a tia te Uea ni kotea te tabo are e na kateaki iai Tion, Aika Itiaki i Ohio a teimatoa ni kainnanoa te kaetieti bwa nningai ae a na mwaing iai ao e na reke ia te mwane ibukin boon te aba. Ngkai ko wareka Reirei ao Berita aika Tabu 63:24–46, tarai kaetieti n tamnei ao n rabwata are e anga te uea ni kaeineti ma Tion. Tera katieti n tamnei ao n rabwata ae e anganiko te Uea?

Iango ibukin Kamatebwai ni Koroboki aika Tabu n te Utu ao te Bootaki n Utu n te Tairiki

Reirei ao Berita aika Tabu 63:7–12.Rongorongon Ezra Booth n kitana te Ekaretia e ngae ngke e noora kamaiuan Elsa Johnson (tarai kamataata aika kimototo n “Iango ibukin Am Kamatebwai n Koroboki aika Tabu” ao korobanna ake a raona te kabwarabwara aei) e kona n waakina te marooro iaon taian kakai. Tao a kona kaain am utu ni marooroakini kakai ake a tia ni kakorakora am onimaki, n ikotaki ma karaki man am utu ke rongorongon am utu. A kanga ni kamwakura aia onimaki are kainnanoaki ni karekei kakai aikai? Tera ae e reirei Reirei ao Berita aika Tabu 63:7–12 ibukin te reitaki imarenan te onimaki ao taian kakai?

Reirei ao Berita aika Tabu 63:13–19.Ti na kanga ni kamanoira man baika aki raoiroi, n okitaki ma tamnei aika tangako? (Ko kona n kunei ibuobuoki aika a mwaiti ibukia utu iaon AddressingPornography.ChurchofJesusChrist.org.) Tera kakabwaia aika reke man maiuakinan tuan te itiaki?

Reirei ao Berita aika Tabu 63:23.Ko na kanga n buoka am utu n oota bwa a kanga “bwai aika a raba [n te] abanuea,” ke koaua n te euangkerio, n titebo ma “maniban te ran ni kamaiu”? Te katooto, ko kona n nakon te tabo n ran ke te karaanga ae uakaan (ke kaota te witeo ke tamneina). A kanga koauan te euangkerio n titebo ma te ran?

Reirei ao Berita aika Tabu 63:58.Tera kauring ake ti nori n mwakoro 63? Tera tabeua mai buakon kauring aikai ae ti tuangaki irouia taan kairiri n te Ekaretia ngkai?

Reirei ao Berita aika Tabu 63:58–64.Kaota nakoia am utu te bwai ae kakaawaki n ami utu. Tera arora ae kaokoro n tararua te bwai aei nakon baike aki rangi ni kakaawaki? Tera ae reireiniira Reirei ao Berita aika Tabu 63:58–64 iaon taekan baika ti kona ni karaoi n kaota ara karinerine ni baika a tabu?

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae tamaroa: “Reverence Is Love,” Aia Boki n Anene Ataei,31.

Kanakoraoan Am Kamatebwai I Bon Iroum

Maiukini baike ko reiakin. “Ngkai ko namakina te kimwareirei are roko man ootam n te euangkerio, ko kan maiuakin baike ko reiakin. Kataia kaboraoa maium ma am atatai. Karaoan aei e na kakorakora am onimaki, ataibwai, ao koaua” (Tataekina au Euangkerio, 19).

Kamaoan Angan Elsa Johnson, iroun Sam Lawlor