Ana tawaana Missouri

Springhill, Daviess County, Missouri, iroun Garth Robinson Oborn

Tuun 7–13

Reirei ao Berita aika Tabu 63

“Are E Roko Mai eta E Bon Tabu”

Te koaua ake a reiakinaki n Reirei ao Berita aika Tabu 63 a kona ni buokiia ataei ake ko reireiniia ni katea aia onimaki iroun Tamara arei Karawa ao Iesu Kristo. Ibukina bwa e tianaki am tai ma ngaiia, iangoia bwa te koaua raa aika a kakaawaki riki nakoia, ni boboto iaon kainnanoia.

Korei Am Namakin

te aikaon ibukin te tibwatibwa

Kaungaa te Tibwatibwa

Iangoi kawai aika beebete, mwakuri ni kario iango a na anganaki ataei aia tai n tibwa te bwai are a reiakinna. Te katooto, katauraoa te mwakoro ni beebwa n abwakiia aika kakaokoro, ao anganiia ataei n tatabemaniia bwa a na rinea teuana n aki beerinoia. Kaoa te ataei are te kabanea n abwabwaki ana beebwa bwa e na moan tibwatibwa.

te aikaon ibukin te anga reirei

Reirei te Reirei: Ataei aika a Uarereke

Reirei ao Berita aika Tabu 63:23

Tamara are i Karawa e tangirai bwa N na reiakina te euangkerio.

Ataei a teimatoa ni karekea te atatai. Buokiia n nooria bwa Tamara are i Karawa e na buokiia n reiakina Taekana ngkana a ongotaeka nakon Ana tua nako.

Waaki ni Kakukurei aika a Kona ni Karaoaki

• Warekia Reirei ao Berita aika Tabu 63:23 nakoia ataei, ao tuangiia bwa a na kakauongo nakon te bwai are e na anganiira te Atua ngkana ti kawakin ana tua nako. Buokiia bwa a na ataia bwa tera “kamiimin” bwaai ake e kona n reireiniia iai te Atua, n aron e kanga arora n riki n ai aron Iesu Kristo.

• Uotia nakon te kiraati tamnei ake a tei ibukin atuun te euangkerio ake a kona n reiakin ataei, n aron te bwabetito, te Tia Kamaiu, tembora, ao a bati riki. Kabaraakii tamnei iaon te timanti, ao anganiia ataei bwa a na ikaruoruo n raira tebaana ni katangaina. Tuangiia bwa a na tibwa tera are a ataia ao ngkana iai aia titiraki iaon atuun nako reirei.

Reirei ao Berita aika Tabu 63:49

N na manga uti.

E kona ngkai ke n taai aika a na roko, ataei ake ko reireiniia ni mweengaraoi n ataia bwa ibukin ana Mwakuri ni Kamaiu te Tia Kamaiu, ni kabane ake a tia ni mate a na manga uti n te bong teuana.

Waaki ni Kakukurei aika a Kona ni Karaoaki

• Kaotia nakoia ataei tamnein temanna are ko tangiria ae e a tia ni mate, ao karakina taekan te aomata anne. Wareka Reirei ao Berita aika Tabu 63:49 nakoia ataei, ao kakoaua bwa n te bong teuana aomata a na “kautaki man te mate” ao a na aki manga mate. Titirakiniia ataei ngkana iai ae a kina ae ea tia ni mate. Kakoaua bwa ti na bane ni manga uti ibukin Iesu Kristo.

• Kaota tamnein maten, taunakin ao Mangautin te Tia Kamaiu (taraa Bokin Tamnein te Euangkerio, nam. 58, 59). Kaoiia bwa a na taetae iaon te bwai are e riki n tamnei. Kaoiia ataei bwa a na wene ngkana ko taekina taunakin Iesu ao a na teiraki ngkai ko taekina Mangautina. Wareka Reirei ao Berita aika Tabu 63:49, ao kaota am koaua bwa ngaira ni kabane tina manga uti man te mate n te bong teuana n ai aron are e riki nakon Iesu.

  Iesu ngke e kaoti nakon Maria

  Bwaro ni Mate n te O n Aroka, iroun Jon McNaughton

Reirei ao Berita aika Tabu 63:64

I riai ni kawakin bwaai aika a tabu ma te karinerine.

Ti maeka n te bong are bwaai aika a tabu n tabetai a kakeaki bonganaia ke a bwainingareaki. Ko kona ni buokiia ataei ni karikirakei aia namakin ni karinerine ibukin bwaai aika a tabu.

Waaki ni Kakukurei aika a Kona ni Karaoaki

• Wareware nakoia ataei man Reirei ao Berita aika Tabu 63:64: “Are E Roko Mai eta E Bon Tabu.” Tuangiia bwa a na iangoia te bwai ae e onoti irouia, n aron aia bwai n takakaro ae mamate nanoia iai ke te boki. A kanga ni kawakinna ao ni kamanoa? Buokiia n iangoi bwaai aika a onoti—ke ae tabu—iroun Tamara are i Karawa. Tera arora n taekini bwaai aikai? Tera arora ae tina karaoi nako iai?

• Bootaki anenea te kuna iaon te karinerine, n aron “Reverently, Quietly” (Aia Boki n Anene Ataei, 26). Buokiia n iangoi kawai ake a kona iai ni kaota te karinerine nakon bwaai aika a tabu.

te aikaon ibukin te anga reirei

Reirei te Reirei: Ataei aika a Ikawai Riki

Reirei ao Berita aika Tabu 63:9–10

Kanikina a roko man te onimaki ao ana kantaninga te Atua.

Ezra Booth e rairaki nakon te Ekaretia imwiin noorakin Iotebwa Timiti ni kamarurunga bain Elsa Johnson. Ma imwiina Ezra e bua ana onimaki, ao e riki bwa te tia tiriburea te Burabeti. Reirei ao Berita aika Tabu 63 iai inanona kauring ni kaeineti ma kataakin katean ara onimaki iaon kanikina, n aron kamarurung aika a kakai, nakon kamatoa n tamnei n te koaua.

Waaki ni Kakukurei aika a Kona ni Karaoaki

• Kaoti tamnein man te kamataata n te wiiki aei n Nakomai, Iriirai—Ibukiia Aomata n Tatabemaniia ao Utu, ao tuangiia ataei bwa Iotebwa Timiti e kabongana te nakoanibonga ni kamarurunga iai bain Elsa Johnson, are e bon tuai man kona ni kabongana inanon uoua te ririki. Kaoiia ataei bwa a na wareka Reirei ao Berita aika Tabu 63:9–10, ao tuangiia bwa a na tibwa te bwai are e taekinna te Uea iaon te onimaki ao kanikina (ke kakai).

• Kaoiia ataei bwa a na korea tamnein te auti iaon te reketaengko ao teuana riki te auti ae tekateka i tabon te turaiangko. Tuangiia ataei bwa te auti e tei ibukin ara onimaki ao ara koaua. Tuangiia bwa a na wareka Reirei ao Berita aika Tabu 63:9–10 ao Ereman 5:12. Imwiina anganiia bwa a na korea te reketangko are ti riai ni katea iaon ara onimaki iaona ao inanon te turaiangko te bwai are ti riai n aki katea ara onimaki iaona. Katereterea bwa te reketangko e anga te tabo ae matoatoa n te kateitei ma te turaiangko e aki mano ao e aki tau. Bukin tera e kaawaki bwa tina katea ara onimaki iaon Iesu Kristo nakon riki iaon bwaai tabeua?

Reirei ao Berita aika Tabu 63:23

Ngkai I kawakin tuua, te Atua e na reireinai Ana koaua.

Bwa “kamimiin abanuean [te Atua]” a ti kona n reke nakoia ake a kawakin ana tua te Atua. Aio bukina ngkai a kamimi irouia aomata aika a mwaiti. Te reirei aei e na buokiia ataei ngkai a ukoukora te koaua.

Waaki ni Kakukurei aika a Kona ni Karaoaki

• Kaotia nakoia ataei tamnein te mwaniba, ao tuangiia bwa a na korea tamnein teuana. Imwiin te ikotaki ni wareka Reirei ao Berita aika Tabu 63:23, buokiia n iangoi koaua ake a atai iaon te euangkerio, ao kaoioa bwa a na korei koaua aikai ni katobibia aia mwanibwa. A kanga koaua aikai ni kabotauaki ma “ran ae maiu”?

Reirei ao Berita aika Tabu 63:58–64

I riai n aki bakanrerea aran te Atua.

Ataei ake ko reireiniia a kona n ongo irouia tabeman n taekina aran te Atua ni bakanrereia n te aro n aki karinerine ao n taetae buaka. Kona kanga ni buokiia n oota bwa aran Tamara are i Karawa ao Iesu Kristo “e riai n taekinaki ma te mwamwannano”? (Reirei ao Berita aika Tabu 63:64).

Waaki ni Kakukurei aika a Kona ni Karaoaki

• Wareware nakoia ataei man Reirei ao Berita aika Tabu 63:58: “Aio bon te bong ni kauring.” Tuangiia bwa a na taetae iaon kauring ake a ongo mai irouia aia karo, taan reirei, ao mataniwi n Ekaretia. Imwiina buokiia ni kakaai kauring mairoun te Uea inanon te kibu 58–64. Tera kawai aika tau ibukin “kabonganaan aran te Atua”? (te kibu 62).

• Rinanona n ikotaki “Taetae” inanon Ibukin Kakorakoraan te Roronrikirake (iteraniba 20–21). Tuangiia ataei bwa a na karaoi boutita aika uarereke ake a na kauringiia te bwai are a reiakinna n aron kabonganaan aran Tamara are i Karawa ao Iesu Kristo.

• Ikotaki anenea kunan te karinerine, n aron “Reverence Is Love” (Aia Boki n Anene Ataei, 31). Tina kanga ni kakoaua bwa ti karinerine ngkana ti taekina Tamara arei Karawa ao Iesu Kristo?

te aikaon ibukin te kamatebwai

Kaungaa te Kamatebwai n te Mweenga

Ngkana e aki tau am tai ni karaoa te iteraniba ibukin waaki ni kakukurei n te wiiki aei, iangoa anganiikia ataei n tatabemaniia bwa a na katia ma aia utu.

Kanakoraoan Ara Anga Reirei

Katea aia koaua raoi ataei. Tabeman ataei a kona n aki namakina te konabwai n reiakina te euangkerio i bon irouia. Teuana te kawai ni katea aia koaua raoi bon kamoamoakiia ngkana a iri waaki n te kiraati. Berita nakoia ataei bwa te Tamnei ae Raoiroi e na buokiia ngkai a kamatebwai.

iteraniba ni waaki ni kakukurei: I riai ni karaoi bwaai aika a tabu ma te karinerine