Missouri River

Kauraai i Missouri, iroun Bryan Mark Taylor

Meei 31–Tuun 6

Reirei ao Berita aika Tabu 60–62

“Rabwata ni Kabane a Mena I nanon Baiu,”

Uringnga bwa am kabanea ni tamaroa ni katauraoi n angareirei Reirei ao Berita aika Tabu 60–62 e na roko rinanona am kamatebwai i bon iroum ao kamatebwai n te utu ni mwakoro aikai.

Korei Am Namakin

te aikaon ibukin te tibwatibwa

Kaungaa te Tibwatibwa

Anganiia ataei n tatabemaniia aia tai n tibwaua te bwai teuana are teuanne ke neienne e reiakinna man koroboki aika a tabu rinanon te wiiki ae nako ke man te kiraati n te Moanrinan n te Tabati ae nako. Imwiin aia tibwatibwa ataei n tatabemaniia, tuanga temanna te ataei n te kiraati bwa e na kakimototoa te bwai are e a tia n taekinna teuanne ke neienne.

te aikaon ibukin te anga reirei

Reirei te Reirei: Ataei aika a Uarereke

Reirei ao Berita aika Tabu 60:4; 61:1–2, 36; 62:1

Koroboki aika a tabu a reireinai taekan Iesu Kristo.

Reirei ao Berita aika Tabu 60–62 iai inanona taeka ake a kona ni buokiia ataei ake ko reireiniia n ataia bwa antai Iesu Kristo ao ni karikirakea aia tangira Ibukina.

Waaki ni Kakukurei aika a Kona ni Karaoaki

• Kaota tamnein Iesu Kristo, ao tuangiia ataei bwa a na tibwaia bwa bukin tera a tangira Iesu. Anai kiibu tabeua man Reirei ao Berita aika Tabu 60–62 are a reirei taekan te Tia Kamaiu, ao tibwaia ma ataei (taraa, ibukin te katooto, Reirei ao Berita aika Tabu 60:4; 61:1–2, 36; 62:1). Buokiia ataei bwa a na kaokioka te kibu ma ngkoe. Tibwa am namakin ibukin Iesu Kristo.

• Kaoti tabeua tamnein Iesu man ana mwakuri n ibuobuoki iaon te aba (taraa Bokin tamnei n te Euangkerio, nambwa aika 34–61). Anganiia ataei bwa a na buokiko ni kabwarabwara bwa tera ae karaoia Iesu n taian tamnei. E kanga ni kaota Ana tangira ibukiia natin Tamara arei Karawa? Tuangiia ataei teuana man am kibu ae ko tatangiria ni koroboki aika a tabu are e reirei taekan Iesu.

• Anene ma ataei “I’m Trying to Be like Jesus” (Aia Boki n Anene Ataei, 78–79; taraa naba te witeo n ira aneneana n te ChurchofJesusChrist.org). Ngkai ko anenei kawai n riki n ai aron Iesu, tooki imarenan tai ao titirakiniia ataei bwa a na kabanea te tiententi “I kona n riki n ai aron Iesu man …”

  te Tia Kamaiu ae mangauti

  Ibukin te Kantaninga Aei Ia Roko, iroun Yongsung Kim

Reirei ao Berita aika Tabu 62:3

E tangirai Iesu bwa N na Tibwaua te euangkerio.

Ataei a tatangiria n tibwa te bwai are a ataia ma tabeman. Buokiia n ataia bwa ngkai a tibwa n taekan te euangkerio, Tamara are i Karawa e kukukrei irouia.

Waaki ni Kakukurei aika a Kona ni Karaoaki

• Kabwarabwara bwa te Uea e tuanga te Burabeti Iotebwa Timiti ao taan kairiiri n Ekaretia ake tabeman bwa a na mwananga mai Kirtland, Ohio, nako Jackson County, Missouri. E tuangiia bwa a na tataekina te euangkerio iaon kawaia ao ngkai a okira mweengaia. Wareka Reirei ao Berita aika Tabu 62:3, ao tuangiia ataei bwa a na kakauongo n te bwai are a karaoia mitinare are e kukurei iai te Uea. Kakoaua bwa te Uea e kukurei iroura ngkana ti tibwa te euangkerio ma tabeman.

• Buokiia ataei ni karaoi baeti are e kaotia bwa a tangiria ni kan riki bwa mitinare ibukin te Ekaretia. Anganiia bwa a na kabongana aia baeti ao ni kataneiai n tibwa aia koaua ma tabeman.

• Bootaki n anenea te kuna ibukin tibwauan te euangkerio, n aron “I Want to Be a Missionary Now” (Aia Boki n Anene Ataei,168). Kaoia ataei bwa a na iangoa te bwai are a kona n taekinna ngkana a titirakinaki iroun temanna bwa tera ae tatangiria iroun Iesu ao Ana Ekaretia. Kaoiia bwa a na korei tamnein bwaai ake a tatangirii n ana euangkerio Kristo.

te aikaon ibukin te anga reirei

Reirei te Reirei: Ataei aika a Ikawai Riki

Reirei ao Berita aika Tabu 60:7, 13; 62:3, 9

I kona ni kaurea wiiu n tibwa ana euangkerio Iesu Kristo.

Ana koaua te ataei e kona n rang mwaaka n aron te ikawai, ibukina mwaakan te koaua e aki roko man ana ririki te aomata ke ana taneiai ma man te Tamnei ae Raoiroi. Buokiia ataei ni kona ni mweengaraoi ni kaurei wiia ao n tibwatibwa ma tabeman n te bwai ae a ataia bwa e koaua.

Waaki ni Kakukurei aika a Kona ni Karaoaki

• Tera kakabwaia ake e berita iai te Uea n Reirei ao Berita aika Tabu 60:7; 62:3, 9 nakoia ake a tibwa Ana euangkerio? E kanga tibwauaan te euangkerio ni kakabwaiaia tabeman? Iangoia n tibwa te taneiai man maium ngke ko tibwa te euangkerio—tera kakabwaia aika a roko man am mwakuri? Kaoiia ataei bwa a na tibwaua te bwai ae a tia n rinanona. Ko kona naba n anenea te kuna n taekan aia mwakuri mitinare n aron “Go Forth with Faith” (Anene n Taromauri, no. 263), ao taekina taekan te kakabwaia are e taekinaki n te anene.

• Buokiia ataei ni karaoi kaotioti n taai ake a kona iai n tibwa te euangkerio ma raraoia. Te katooto, tera ae a na taekinna ngkana temanna e titirakiniia bwa bukin tera a nako n taromauri? Ke tao ngkana te rao e nooria bwa a kabongana te mwamwa ae RTE ke ni wareka ana Boki Moomon ao a titiraki? Tera ae a na taekinna?

Reirei ao Berita aika Tabu 60:7; 61:1–2, 36; 62:1

Te Uea e tauraoi ni kabwarai au bure ngkana I raira nanou.

Iotebwa Timiti ao taan kairiiri tabeman n te Ekaretia a bon aki kororaoi. N tabetai a uneaki ao aki taotaona kinnano (taraa “Ezra Booth and Isaac Morley,” Revelations in Context, 133). Ma te Uea e nanoanga nakoia ao n taainako e anga kabwaraan aia bure ngkana a rairi nanoia.

Waaki ni Kakukurei aika a Kona ni Karaoaki

• Wareware ma ataei Reirei ao Berita aika Tabu 60:7; 61:2, ao tuangiia bwa a na kakai taeka ake a titebo inanon kiibu aikai. Kauringiia ataei bwa kaotioti aikai a anganai nakon Iotebwa Timiti ao taan kairiiri ake tabeman n te Ekaretia. Tera ae e tangiria bwa a na ataia te Uea? Tera ae ti reiakinna man kibu aikai n aron ana namakin te Uea ibukira ngkana ti karaoi kaairua?

• Koreia Aekakira Iesu Kristo iaon te burakibooti. Ikotaki wareka Reirei ao Berita aika Tabu 61:1–2, 36; 62:1, ao korei rinanin kaeka nakon te titiraki aei are a kunea ataei inanon te kibu. A kanga anua aika iaon te burakibooti ni buokiira n ataia bwa bukin tera te Tia Kamaiu e tauraoi ni kabwarai ara bure? Tera kawai are ti kona iai n ira Ana banna ni katooto?

Reirei ao Berita aika Tabu 60:5; 61:22; 62:5–8

Te Uea e tangirai bwa N na kabongana inaomatau ao Tamneina ni karaoi rinerine aika raraoi.

Kona kanga ni kabonganai kiibu aikai n reireiniia ataei aron te Uea ni buokiia ni karaoi rinerine aika raraoi?

Waaki ni Kakukurei aika a Kona ni Karaoaki

• Tuangiia ataei bwa a na marooro iaon te tai are a karaoa iai te babaire. A kanga ni bairea te bwai ae a na karaoi? Ikotaki wareka Reirei ao Berita aika Tabu 62:5, 7–8 n ata te bwai are e taekinna te Uea nakoia unimwaane ake a tauraoi ni mwananga mai Missouri nako Kirtland, Ohio. Tera te rinerine are a riai ni karaoia ibukin mwanangaia? Tera ae e a tia n anganiira te Uea are e buokiira ni karaoi rinerine? Tuangiia ataei bwa ko kanga ni tia ni kabongana te kairiiri mairoun te Tamnei ao am motikitaeka ae te kabanea n tamaroa ibukin karaoan am babaire.

• Tibwatibwaia kain te kiraati inanon teniua te kurubu, ao tuangiia ni katoai kurubu bwa a na wareka teuana man kibu aikai, are e kaetieti iai te Uea nakoia tabeman mitinare karaoan aia mwakuri ni mitiare: Reirei ao Berita aika Tabu 60:5; 61:22; 62:5. Tera ae ti ataia man ana kaetieti te Uea ni kiibu aikai? Bukin tera n tabetai e tamaroa ibukira bwa tina kabongana oin ara motikitaeka n onea mwiin tataningaan te kaetieti ae onoti mairoun te Atua iaon ni kabane titiraki?

te aikaon ibukin te kamatebwai

Kaungaa te Kamatebwai n te Mweenga

Kaoia ataei bwa a na kataneiai n tibwa te euangkerio ma kain aia utu. Te katooto, a kona n tibwa te bwai are a tia n reiakinna n te Moanrinan.

Kanakoraoan Ara Anga reirei

Kaota te koaua nakoia kain te kirati. Kaotakin am koaua n taainako e na buokiia ataei ake ko reireiniia ni karekea oin aia koaua. Te koaua e kona n rangi ni bebete n ai aron ae “I ataia bwa Tamara are i Karawa e tangiri ngkami” ke “I namakina te kukurei inanou ngkai I reiakina aron Iesu Kristo.”

iteraniba ibukin waaki ni kakukurei: I kona n tibwaua te euangkerio