Tuun 21–27

Reirei ao Berita aika Tabu 67–70

“Kakawakina … ai aron Kaubwain te Aonaba ae Bwanin”

E ngae ngke angiina kaotioti ake n Reirei ao Berita aika Tabu a kaineti nakoia aomata aika a onoti n taai aika a onoti, bon “kabwaia ibukia aomata ni kabane” (“Aia koaua Abotoro ake Tengaun ma Uoman nakon Koauan te Boki ae Reirei ao Berita aika Tabu,” Kabwarabwara nakon Reirei ao Berita aika Tabu). Ngkai ko kamatebwai, tarai koaua ao reirei ake a manena ibukim.

Korei Am Namakin

Man 1828 nakon 1831, te Burabeti Iotebwa Timiti e karekei kaotioti aika mwaiti mairoun te Uea, n ikotaki ma reirei aika tabu ibukiia tabeman, kaetieti n aron kairan te Ekaretia, ao kaotioti aika kaunganano ibukin bong aika kaitira. Ma e mwaiti Aomata aika Itiaki ake a tuai warekii. Kaotioti aikai a bon tuai boretiaki, ao tabeua kaobi ake a tauraoi a koreaki n bon te bai n beeba aika a aki kanimaki i buakoia membwa ao n uouotaki irouia mitinare.

Ngkanne, n Nobembwa 1831, Iotebwa e tewea te bowi ma taan kairiiri n te Ekaretia n marorooakina boretian kaotioti aikai. Imwin ukoran ana kantaninga te Uea, taan kairiiri aikai a karaoa te baire ibukin Boretian te Boki n Tua—are bon arana imwain kinaakina bwa Reirei ao Berita aika Tabu. N te tai ae tawe aomata ni kabane a na kona n wareki ana taeka te Atua are kaotaki rinanon te burabeti, kaotioti aika kiraati bwa “kiingin bwaai aika raba n uean ara Tia Kamaiu a manga onimakinaki iai aomata.” Ibukin aei ao tabeua riki bukina, Aika Itiaki ngkekei ao ngkai a tarai kaotioti aikai bwa “kakawakiia bon… kaubwain te Aonaaba ni kabuta” (Reirei ao Berita aika Tabu 70, atuun te mwakoro).

Taraa Aika Itiaki, 1:140–43.

Iango ibukin te Kamatebwai i bon Iroum ni Koroboki aika a Tabu

Reirei ao Berita aika Tabu 67:1–9; 68:3–6

E tei te Atua i rarikia Ana toro ao n taeka ake a taekin n Arana.

Te moti bwa e na boretiaki kaotioti are e karekea Iotebwa Timiti e taraa n ae bebete, ma tabeman taan kairiiri n te Ekaretia n taai akekei a taku bwa tiaki te iango ae tamaroa. Teuana te tabeaianga bon te mwarara n tuan te koroboki are e kabonganai Iotebwa Timiti n korei kaotioti aikai. Te kaotioti n mwakoro 67 e kaoti n kaeka te raraoma anne. Tera ae kam reiakinna ibukiia burabeti ao te kaotioti man kiibu 1–9? Tera riki nonoori ae ko karekei man 68:3–6?

Imwain ae e boreetiaki te Boki n Tua, tabeman taan kairiiri n te Ekaretia a tiaaina te kakoaua ae koreaki bwa kaotioti ake n te boki a bon koaua. N nooran kaobiin aia koaua, taraa “Testimony, circa 2 November 1831,” Revelation Book 1, 121, josephsmithpapers.org.

Reirei ao Berita aika Tabu 68:1–8

Kakairi mairoun te Tamnei ae Raoiroi e kaota ana nanon te Uea.

Taeka n kiibu aikai a taekinaki ngke Orson Hyde ao tabeman a weteaki bwa “e na katanoata te euangkerio ae akea tokina, mai iroun Tamnein te Atua ae maiu, man te botanaomata teuana nakon te botanaomata teuana, ao man te aba teuana nakon te aba teuana” (kibu 1). E na kanga te katanoata are n kibu 4 n buoka temanna are e kanakoaki bwa e na tataekina te euangkerio? A kanga taeka aikai n kaineti nakoim? Iangoa te tai ngke ko “kairaki iroun te Tamnei ae Raoiroi” (kibu 3) n taekina ke n karaoa te bwai teuana. Tera ae ko kunea n kiibu aikai are kona n anganiko onimakinam i bon iroum n irii ana wirikiriki te tamnei?

Reirei ao Berita aika Tabu 68:25–28

A katabeaki kaaro bwa a na reireiniia natiia.

Titita Joy D. Jones, Beretitenti ni kabuta n te Buraimwari, e reirei, “… [Teuana] kiingin buokakiia ataei n tuuka karaoan te bure e moanaki man moan rikiraken te ataei ni waantongaiia n te tangira ao ana reirei te euangkerio—man koroboki aika tabu, Taekan te Onimaki, te boki Ibukin Kakorakorakia te Roronrikirake anenen te Moanrinan, anene n taromauri, ao oin ara koaua—ake a na kairiia ataei nakon te Tia Kamaiu” (“A Sin-Resistant Generation,” Ensign ke Riaona, Meei 2017, 88).

N kaeineti ma Reirei ao Berita aika Tabu 68:25–28, tera tabeua mai ibuakon “rerein te euangkerio aika bebete” are mwaneweia Titita Jones are a riai kaaro n reireiniia natiia? Bukin tera a anganaki kaaro te tabe ae kakaawaki aei? Tera ae ko na taekinna nakon te karo are e namakina te aki tau n reirei baikai nakoia natina?

Taraa naba Tad R. Callister, “Parents: The Prime Gospel Teachers of Their Children,” Ensign ke Riaona, Nobembwa. 2014, 32–34.

Te mweenga bon te tabo ae tamaroa ibukiia ataei n reiakina te euangkerio.

Iango ibukin Kamatebwai ni Koroboki aika Tabu n te Utu ao te Bootakin te Utu n te Tairiki

Reirei ao Berita aika Tabu 67:10–14.E kanga te bakantang, te maaku, ao te kainikatonga n tukiira man kaanian te Uea? Bukin tera e aki kona n maiu te “aro n aomata” i matan te Uea? (kibu 12; taraa naba Motiaea 3:19). Tera ae ti kunei n kiibu aikai are kaungaira bwa ti na “reitinako n te tataonaki nano ni karokoa [ti] a kororaoi”? (kibu 13).

N te utu, kam kona naba n manga wareka ana reirei Unimwaane Jeffrey R. Holland “Be Ye Therefore Perfect—Eventually” (Ensign ke Riaona, Nobembwa. 2017, 40–42).

Reirei ao Berita aika Tabu 68:3–4.A kona kaain te utu n tibwaua karakinaia are e kakorakora aia onimaki bwa aia taeka ana toro te Uea bon “ana kantaninga te Uea,” “ana iango te Uea,” ao “mwaakan te Atua nakon te kamaiuaki” (kibu 4). Ke a kona n kakaea te rongorongo man te maungatabu are tibwa nako are kaeineti nakon te kakaewenako are e kaitaraa am utu.

Reirei ao Berita aika Tabu 68:25–35.Iai inanon kiibu aikai reirei aika kakawaki nakoia “kaain Tion” (kibu 26). Tera ae ti namakinna bwa ti na katamaroaa imwin warekan kiibu aikai? E na rangi ni kaunga karaoan tamnei ake a kabwarabwarai tabeua reirei ake n kiibu aikai ao karabakiia i nanon mwengami. Ngkanne, ni boong rake ngkana iai temanna ae kunea te tamnei, kam kona ni kabongana te tai anne n reirei taekan te reirei anne. Bukin tera te mweenga te tabo ae tamaroa ibukiia ataei bwa a na reiakinii iai baikai?

Reirei ao Berita aika Tabu 69:1–2.Oliver Cowdery e kanakoaki nako Missouri ma beeba ake a koreaki iai ana kaotioti te Burabeti ake a na boreetiaki, n ikotaki ma te mwane ni buoka katean te Ekaretia ikekei. Tera te kauring are e anga te Uea n kibu 1 ibukin mwanangan Oliver? Bukin tera e kakaawaki te maiu i buakoia aomata “ake a na kokoaua ao n kakaonimaki”? (kibu 1). N ningai taai are raoraora a kairiira nakon karaoan rinerine aika raoiroi ke aika buakaka? Ti na kanga n riki bwa te banna ae raoiroi nakoia tabeman?

Reirei ao Berita aika Tabu 70:1–4.Te Uea e anganiia tabeman unimwaane te katabeaki n tararua boretian kaotioti aikai. E ngae ngke akea raoi tabera ae aekan aio, n te aro raa ae ti kona n taraaki iai bwa “taan tararua iaon tenaan kaotioti ao tuua”? (te kibu 3).

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae tamaroa: “Home Can Be a Heaven on Earth,” Anene n Taromauri, nambwa. 298.

Kanakoraoan Ara Anga Reirei

Maiuakin kanoan koroboki aika tabu n maiura. Imwin warekan te kibu teuana, kaoiia kaain te utu bwa a na kauaana nakon maiuia. N aron te katooto, ko kona ni kaoiia bwa a na iangoi baika a titebo are a kona n kaitarai are iai naba inanona reirein te euangkerio akanne.

Te Boki n Tua, imwain ae aranaki bwa Reirei ao Berita aika Tabu, e boreetiaki n te tabo ni boreeti n aron aei.