Kaaro: Ana Tia Reirei te Euangkerio aika Kakawaki ibukia Natiia
Iroun Tad R. Callister
Beretitenti ni Kabuta n te Reirei n Tabati
Ngke a bane n taekinaki ao ni karaoaki, te mweenga bon te tabo ae nakoraoi ibukin reiakinan ana euangkerio Iesu Kristo.
E taku Ben Carson i bon ibukina, “Ataein te reirei ngai ae te kabanea ni buakaka n au kiraati n au kanimaua ni koraki.” N te taina ao Ben e karaoa te ukeuke n te Numera ae 30 titirakina. Te ataei are iakuuna e kaetiia ao e kaokia nakoina. Te Tia Reirei, Mrs. Williamson, e moanna ni wetea araia ataei ibukin aia bwi. N te kabane, e roko iroun Ben. Man maamaana, e karaurau n atonga te kaeka. Mrs. Williamson, n ana iango e atonga “9,” e kaeka ibukin Ben n ana bwi ae 9 iaon 30 bon te rikirake ae kamiimi. Te ataei are i akuun Ben e takarua, “Tiaki ruaiwa! … Akea ana bwii ...ae eti.” E taku Ben bwa e a tangiria ni kabuaa rabwatana.
N te tai ae ti te arona, tinan Ben, Sonya, iai baika e kaitarai aika e tutukia. Boni ngaia temanna ibuakoia 24 ataei, ae toki ana reirei n ana katenua ni koraki, ao e aki kona ni wareware. E mare ngke 13 ana ririki, ao e raure, iai uoman natina mwaane, ao e kaikawaiia n te tabo ae kainnano i Detroit. E ngae n anne, maiuna e tang iaan baina ao e matoa ana koaua bwa te Atua e na buokiia ma natina mwaane ngkana a karaoa raoi tabeia.
N te bong teuana e a roko te bitaki ae kakaiaki inanon maiuna ao natina mwaane. E kunea bwa aomata aika a nakoraoi maiuia ake e kaitiaki mweengaia iai aia raiburari―ae a wawareware mai iai. Imwiin ana mwakuri e okira mweengana ao n tiringa te terewition are e mataku iai Ben ao tarina. E taku raoi ana taeka: Ataenimwaane e bati te mamataku iroumi n te terewition. Mangkai, kam kona ni mataku teniua te burokuraem n te wiiki. Ni mwaawan ami tai kam na nako n te raiburari―ni wareki uoua booki n te wiiki ao n ribooti nakoiu.
A tounako ataeinimwaane. E taku Ben bwa e bon tuai man waware boki inanon maiuna ae bwanin tii ngkana e tuangaki bwa e na karaoia n te reirei. A ikawii, a ngurengure, a kauntaeka, ma akea te nakoraoi. Ngkanne e a iango Ben, “E kamatata te bwai ae kantaningaia. I aki tangira te tua, ma ana kakatai n noora rikirakera e karaoa te bitaki ni maiu.” Forgot to delete English
Ao e karaoa te bitaki ae korakora (ni maiun Ben). Man ana kaitiua ni koraki e a momoanna n ana kiraati. E reita nako ana reirei i Yale University ni buokaki n te mwane n tikaoratibu, imwiina n te reirei n taokita i Johns Hopkins, ike e koro iai ana ririki ae 33 e a riki bwa te mataniwi n taokita n te korokoro ibukiia ataei ao te tia korokoro ae kinaaki n te aonaaba. E kanga n riki anne? N oina raoi ibukin te tina ae, bon te akea aron maiuna, e karaoa raoi nakoana n aron ae te karo.1
Booki aika tabu a taekina nakoaia kaaro bwa bon tabeia n reireiniia natiia reirein te rairannano, n onimaki iroun Kristo Natin te Atua ae maiu, ao te bwabetito ao ana bwaintituaraoi te Tamnei ae Raoiroi” (D&C 68:25).
N tabera ae kaaro bon ngaira ana taan tia reirei te euangkerio aika kakawaki ngaira ao katoto ibukiia Natira―tiaki te bitiobi, te Reirei n Tabati, Bootaki n Ataeinaine ke te Bootaki n Ataenimwaane, ma kaaro. Ngkai bon aia moan taan tia reirei ngaira ibukin te euangkerio, ti kona n reireiniia te mwaaka ao koauan te Mwakuri ni Kamaiu―ibukin kinakiia ao tokin kawaia ae tabu―ao ni karaoana e anganiia te bwaa ae aan aia kateitei. N te kabanea, te mweenga bon te tabo n reiakinaki ana euangkerio Iesu Kristo. Forgot to delete English
Tao teuana te ririki n nako I karaoa mwiokoau i Beirut, Lebanon. Ni menau ikekei, I reiakina taekan te ataeinaine ae 12 ana ririki, ae Sarah. Ana karo ao uoman tarina mwaane aika ikawai riki a rairaki nakon te Ekaretia i Romania ma a kantaningaaki bwa a na okira abaia ngke 7 ana ririki Sarah. N abaia ao akea te Ekaretia ikekei, akea te iunite ae barongaaki, akea te Reirei n Tabati ke ana burokuraem te Bootaki n Ataeinaine. Imwiin nimaua te ririki te utu aei a ataia bwa iai te mwaanga i Beirut ao, imwaain raoi ae I roko, a kanakoa natia te aine ae Sarah ae 12 ana ririki, n raonaki irouia tarina ma mwaanena ake a ikawai riki bwa a na bwabetitoaki. Ngke I mena ikekei, I karaoa te taromauri iaon te babaire ni kamaiu. Angin te tai e katea baina Sarah ao ni kaekai titiraki.
Imwiin te bootaki, ao ataakin ae ti teutana ana reitaki ma te Ekaretia, I kawaria ao n titiraki, “Sarah, ko kanga n atai kaekaan titiraki akanne?” E waekoa ni kaeka, “E reireinai tinau.” Akea te Ekaretia n aia kaawa, ma iai te euangkerio inanon mweengaia. Tinana bon ana tia reirei ae kakawaki ibukin te euangkerio.
Bon Enoti are e taku, “Ao e a rin inanou taian taeka ake I aki toki n ongo mairoun tamau ake e taetaekina iai te maiu are akea tokina, ma te kimwareirei are e reke irouia aika a itiaki (Enoti 1:3). Akea te nanououa nakon ana tia reirei Enoti ae kakawaki ibukin te euangkerio.
I uringa tamau ae karaua n tekateka ao n rara irarikin te ai, ni wareware ni booki aika tabu ao tabeua booki aika raraoi, ao N na karauai n tekateka n rara irarikina. I uring kaati ake e kawakin ni buuan ana kabaraaki ma taekan booki aika tabu ao Shakespeare ao taeka aika boou ake e na kamatenanoi ao n reiakin. I uring titiraki ibukin te euangkerio ao maroro iaon te taibora n tain te katairiki. I uring taai aika mwaiti ngke e kairiirai tamau ni kawariia aomata aika a kara—ti na kanga n tei ao n anaa te aitikuriim ibukin temanna te aomata ke te katairiki te moa ibukin temanna riki te aomata ke e karebaia te aomata n te mwane ngke e iobai ma ngaia. I namakina te namakin ae raoiroi ao te iango ni kan katotoonga.
I uringa tinau, e kaniia 90 ana ririki ni maiu, ni kuuka n ana tabo ni kuuka ae bubura ngkanne e otinako ma te turee n amwarake. I titirakinna bwa e na nakea. E kaeka, “O I uota te amwarake nakoia ake a kara.” I iango i bon irou, “Tinau, ko a bon kara.” I aki kona ni kabwarabwara au kakaitau ae tau ibukiia au karo, ake bon au tia reirei n te euangkerio aika kakawaki.
Teuana mai buakon bwaai aika kakawaki nanoia irou ake ti kona ni karaoi n aroia kaaro bon reireinaia natira mwaakan te tataro, tiaki tii te waaki n tataro ni katoa tai. Ngke e nang koro 17 au ririki, I katorobubua irarikin au kainiwene ni karaoa au tataro. N akea ataakina irou, e tei tinau n te mataroa. Ngke I a tia, e taku, “Tad, ko bubutia te Uea bwa e na buokiko ni kakaea buum ae tamaroa?”
I rangi n tounako n ana titiraki. Anne bon te bwai ae te kabanea n raroa man au iango. I bon iangoa te bwatiketibooro ao te reirei. Ao ngaia are, I kaeka, “I aki,” ao e kaeka, “Eng, ko riai, natiu, bon te babaire ae rang kakawaki ae ko na bae ni karaoia.” Akanne taeka ake anaa au namakin ma au iango, ao ngaia are ibukin onoua te ririki imwiina I tataro bwa e n a buokai te Atua ni kakaea buu ae tamaroa. Ao, o, E bon kaeka raoi au tataro anne.
N aroia kaaro, ti kona n reireiniia natira bwa a na tataroakin baika iai mwiia n aki toki―n tataro ibukin korakoraia n itiaki man te wenenibure n te aonaaba ae kaangaanga, n ongeaba, ao ni karekea te ninikoria n tei ibukin te eti.
A akea te nanououa bwa angiia ara roronrikirake a tatataro n te tairiki, ma tao angiina a korakai n te anua n aki tatataro n te ingabong. N aroia kaaro, n aron tabeia ae taan reirei ibukin te euangkerio, ti kona ni kaeta aei. Antai te karo n tain ana Boki Moomon ni kanakoia natiia mwaane ni mwaati mai moa n te buaka n akea otangan bwabwaia ao otangan baia ao te kabaang ni kamanoia man aia kanoa aia kairiribai? Ma iraman ibuakora ni kanakoia natira ni mwaati i moan te mataroa ni katoa moaningabong nakon te kabanea ni kakamaku ni marae ni buaka, ni kaitara Tatan, ao ana kariiri aika mwaiti, n akea otangan bwabwaia ao otangan baia ao te kabaang n te tamnei are e roko man mwaakan te tataro? E taku te Uea bwa ti riai n tataro n tainako, bwa ti aonga n tokanikai iaon Tatan” (D&C 10:5). N aroia kaaro ti kona ni kateia inanoia natira te taneiai ao te mwaaka n tataro n te ingabong.
Ti kona naba n reireiniia natira ni kabongana aia tai ma te wanawana. N tabetai n aron Sony Carson, ti kainnanoia ni kanenea ni kamatoa ara babaire n iai tian aia tai ara ataei ma te terewition ao tabeua bwaai ake a mwakuri man te iti, bwa n angiin kaangaanga e anaa aia tai ae mwaiti. N oneamwiina ti kainnanoia ni manga bairei aia tai nako riki nakon waaki ni kakukurei aika boboto iaon te euangkerio. E na iai te totoko n te moantai, tabeua te ngurengure, ma n aron Sonya Carson, ti kainnanoia ni karekea te taratara ao te kantaninga ni waaki ma ngaia. Te bong teuana natira a na oota ao ni kaaitaua are ti a tia ni karaoia. Ngkana ti aki karaoa aio, antai ae e na karaoia?
Ti na bae n titirakiniira ni bane: natira a karekei ara kekeiaki ae te kabanea n tamaroa n te tamnei, n te rabakau, ao te kunimwaan, ke a karekei nikiran ara tai ao ara taarena, imwiin ara anganano ni kabane ni weteara n te Ekaretia ke n ara mwakuri aika ti karekei? N te maiu are e na roko, I aki ataia ngkana te nakoa ae te bitiobi ke te beretitenti n te Bootaki n Aine e na maiu, ma I ataia ngkana te nakoa ae te buumwaane ke te buuaine, te karo te tina, e na reitinako ao ni karineaki, aonaaba n akea tokiia. Anne bukina teuana e bon rang kakawaki ni karinei tabera n aroia kaaro ikai iaon te aba bwa ti aonga ni katauraoi ibukin tabera akana korakora, ma ti te arona n te maiu are e na roko.
N aroia kaaro, ti kona ni waaki ma kakoauan te Atua bwa e aki kona ni katikuira n tii ngaira. E aki kona n anganiira tabera te Atua n akea ana buoka mai ieta―anne I kona ni kakoaua. Ti bia riki bwa kaaro inanon tabera ae tabu, ao ni ikatoatoa ma te Atua, n riki bwa taan reirei aika kakawaki ao katoto ibukiia natira, I tataro n aran Iesu Kristo, amen.