Kam butimaeaki nakon te Maungatabu

Iroun Beretitenti Thomas S. Monson

Ao ngkai ti ongora, a bia riingaki nanora ao ara onimaki a rikirake.

Tariu ao mwaneu, ai kakatongara ngai ni butimwai ngkami nakon te mwaungatabu n te aonaaba ae tamaroa aei. Ti bane ni bootaki n taabo ni kabuta te aonaaba ni kakauongo nakon ao n reirei mairouia taari ao titita aika ti a tia ni katabuia bwa Mataniwi ni Kabuta ao aobitia ni kabuta n te Ekaretia. A tia n ukoukora ana ibuobuoki karawa ibukin te rongorongo ake a na uoti, ao a tia n namakina te kairi ni kaineti ma te bwai ae a na taekinna.

Te maungatabu aei e mwakena te ka 90-n ririki ni kauringa te kanakobwana n te rerio n te maungatabu ni kabuta. N tain te maungatabu n Okitobwa 1924, a kanakoaki tetere n te kanakobwana n te rerio ibukin te moan tai rinanon te tabo ni kanakobwana KSL ae ana bwai te Ekaretia. Te maungatabu naba aei e mwakena te ka 65-n ririki n te kanakobwana n te maungatabu n te terewition. N te maungatabu ni kabuta are e karaoaki n Okitobwa 1949, e moan kanakoaki n te terewition taian tetere rinanon te aono i Salt Lake man te KSL terewition.

Ti kakaitau ibukin kakabwaia man taabo ni kanakobwana aika boou ni kariaia mirion membwa n te Ekaretia ni mataku ao ni kakauongo nakon maungatabu ni kabuta. Tetere n te wiiki ni motirawa aei a tia ni kanakoaki n te kanakobwana rinanon te terewition, rerio, uaea n te terewition, kanakobwana n te tiataraite, ao te Intanete, ao iaon mobwaira tareboon.

Inanon onoua te namwakaina n nako ngke ti kaitibo iai, teuana te tembora ae boou ae tibwa katabuaki ao teuana ae manga katabuaki. Ni Meei Beretitenti Dieter F. Uchtdorf e katabua te Tembora ae Fort Lauderdale Florida. Aia bukamaru kairake ae rangin kakamataku e karaoaki tebongina imwain te katabu. N te bong are imwiina, n te Tabati, Meei 4, e katabuaki te tembora inanon teniua tetere.

Ai tibwa uoua te wiiki n nako ao e reke au tai ni manga katabua te Ogden Utah Tembora, are e moan ni katabuaki n te 1972 iroun Beretitenti Joseph Fielding Smith. Te bukamaru ae rangin ni kakamataku e karaoaki tebongina imwain te manga katabu, ma kairake aika mwaiti aika a karaoi uoua kamataku, aika kakaokoro. Ni kabane 16,000 kairake aika kamataku. Te nebonebo n te manga katabu e karaoaki n te bong are imwiina, ma taan kairiiri n te Ekaretia aika mwaiti aika iri, n raonaki ma taan kairiiri ao te beretitenti n te tembora, ana kauntira, ma buia.

Ara kateitei n te tembora a teimatoa ni matoatoa. N te namwakaina are imwiina e na katabuaki te Phoenix Arizona Tembora ae boou, ao n te ririki are imwiina, n 2015, ti kantaningaia ni katabui ke ni manga katabui e nakon nimaua tembora, ni kaineti ma tiaia.

N aron are I taekinna n Eberi, ngkana tembora ake a kaman katanoataaki a kateaki ao ni katabuaki, ti na karekei 170 tembora aika mwakuri ni kabuta te aonaaba. Ibukina bwa ti kabanea ara tai iaon katiaan tembora ake a kaman tia ni katanoataaki, ti aki n te tai aei katanoataan tembora aika boou. E ngae n anne, n te tai ae na roko, ngkana ti atai kainnano ao ni kunei taabo, katanoata ibukin tembora riki tabeua a na katanoataaki.

E teimatoa n rikirake te Ekaretia. E a raka riki ngkai korakorara iaon 15 te mirion ao n rikirake n te mwaiti. Aia mwakuri ara mitinare a waaki nako n aki karabaaki. Iai ngkai 88,000 mitinare aika a beku, n tibwaua rongorongon te euangkerio ni kabuta te aonaaba. Ti manga kamatoa bwa te mwakuri ni mitinare bon te mwakuri n te nakoanibonga, ao ti kaungaia mwaane aika tau ao ni konabwai ni beku bwa mitinare. Ti rangin ni kakaitau naba ibukiia ataeinaine aika beku naba. A karaoa te mwakuri ae rangin ni kakawaki, e ngae ngke aki kabaeaki iaan te tua bwa a na beku kanga ataeinimwaane.

Ngkai I kaoi ngkami bwa kam na anga ami ibuobuoki nakoia taari ao titita aika a na iri n te bong aei ao ningabong n ara tetere n te maungatabu. Ni kabane naake a tia n tuangaki bwa a na taetae a namakina te katabeaki ae korakora ni karaoana. Ngkana ti kakauongo, a na ringaki nanora ao ara onimaki e rikirake, I tataro ma te nanorinano n aran Iesu Kristo, amen.