Karinean Reirein te Euangkerio ma te Kimwareirei
Iroun Beretitenti Dieter F. Uchtdorf
Kauoman ni Kauntira n te Moan Beretitentii
Onimakina mwaakan Iesu Kristo ni kamaiu; kawakin Ana tua nako. N taekana teuana―maiuakina te euangkerio ma te kimwareirei.
Mwaneu aika kam tangiraki, raoraou aika tangiraki ao ana reirei Iesu Kristo aika kakabwaiaki. I rangin ni kakaitau n reken te tai aei ni mena ibuakomi ngkai ti a manga kauka ana maungatabu ni kabuta n Ana Ekaretia Iesu Kristo ni Boong Aika Kaitira. N te wiiki ae na roko ao e na kaitibo te Moan ni Beretitentii ao Abotoro ake Tengaun ma Uoman ma Mataniwi ni Kabuta ni kabane ma taan kairiiri ni bootaki ni kabuta ao nikiran ara tetere n ara maungatabu ni kabuta n te aonaaba a na karaoaki n te Kaonobong ao te Tabati ae e na roko. I rangin ni kakaitau riki nakon Beretitenti Thomas S. Monson, ana burabeti te Atua ibukin tuangakiu bwa N na tei ibukin te Moan Beretitentii ngkana I taetae nakoia ainen te Ekaretia.
Ngke I tabe n iangoia bwa tera ae N na taekinna, e okirikaki au iango nakon te aine are e a tia ni kanakoraoa maiu ao ni buokai rinanon kakaewenako n te maiu ae mamate aei. I rangin ni kakaitau ibukin tibu te unaine are n ririki aika nako e a tia n iangoia bwa e na kairia ana utu nakon ana bootaki n toa te Moomon. I rangin ni kakaitau ibukin Titita Ewig, ainen Tiaman ae akea buna ae a kara, are e rairaki arana n Ingiriti bwa “Titita Eternal.” Ngaia are e kanakoa te kakao ae kakukurei ao ni kamimi nakon tibu te unaine. I rangin ni kakaitau ibukin tinau, are e kairiia aman ataei rinanon te mangaongao n tain te Buaka n te Aonaaba II. I iangoa naba natiu te aine, tibu te aine, ao ana kariki riki tabeman te aine ae onimaki are n te taina e na iria.
Ao, eng, I rangin ni kakaitau n akea tokina nakon kainabau, Harriet, are e katika nanou ngke te kairake ngaia, e tabeakina te tabe n tina ae moan te rawawata n ara utu ae uarereke, n tei ma ngai n tabena n tina, ao n tangira ao ni kakukureia natira, tibura, ao tibutorura. E a tia n riki bwa te korakora inanon mweengara inanon taai aika raraoi ao aika buakaka. E uota te kukurei inanon maiuia naake a kina.
Kabaneana, I rangin ni kakaitau nakoimi ni kabane, aine aika mirion ni kabuta te aonaaba n roroia nako aika a karaoa ae bati ni katea abanuean te Atua. I kakaitau nakoimi ibukin kawai aika aki reke warekaia aika kam a tia ni karekea mai ieta, ni kakorakora, ao ni kakabwaiaia aomata aika kam kinaia.
Natin te Atua Aine
I rangin ni kukurei ni mena ibuakoia natin te Atua aine. Ngkana ti anenea te anene “Ngai Natin te Atua,” taekana e kakorakorai nanora. N iangoa raoi te koaua aei—ae ngaira bon naati mairouia kaaro mai i karawa 1— e anganira te ota bwa ti nako ma ia, bukin tera ngkai ti mena ikai ao tera ae tau ibukira nakon taai aika ana roko.
E raoiroi bwa ko na uringnga n tainako bwa ngkoe bon natin te Atua. E na anganiko te atatai aei te korakora inanon am kanganga ni maium ao ni kaungako ni kakoroi nanon bwaai aika kakawaki. E ngae n anne, e kakawaki naba bwa ko na uringnga bwa ngkai ngkoe natiia kaaro aika akea tokina te aine bon tiaki te kinaaki ae ko karekea ao ko na aki kabua te kinaaki anne. Ko na teimatoa n akea tokina n riki bwa natin te Atua te aine ngkoe. Iai ana kouru Tamam are i Karawa ibukim, ma rikim mai ieta n tingaia e aki kakoaua rikim mai ieta. E kanakomaiko te Atua bwa ko na katauraoi ibukin te tai ae na roko ae raka riki nakon te bwai ae ko kona ni iangoia.
Ana kakabwaia te Atua ake e a tia ni beritan nakoia aika onimaki a kakimwareirei ao n anainano. Ibuakoia bon “kaintokanuea, abanuea, te aba ae tautaekanaki iroun te uea, ao te mwaaka, te tautaeka n inaomata, ni kabane rietata ao rababa.”2 Ao e karekea ae mwaiti riki nakon kakoauana ae te aomata bon Natin te Atua n tau nakon kakabwaia aika akea aron kabotauaia.
Ma ti na kanga ni kakoroi bukiia?
E a tia te Tia Kamaiu ni kaeka te titiraki aei n ara tai:
“E taekinna bwa arona ni kawakin Ana tua e aki kona ni karekea te mimitong aei.
“Ba e wariki i te mataroa, ao e irariki te kawai are e nako n te maiu. …
“… Ngaia ae ti riai ni karekea Ana tua.”3
Ibukin bukina aei, ti taekina taekan te nakonako ni kawaia ana reirei.
Ti taetae iaon te ongotaeka nakon ana tua te Atua.
Ti taetae iaon maiuakinan te euangkerio ma te kimwareirei, ma nanora ni kabane, ao ni korakorara ni kabane, n ara iango, ao n tamneira ni kabane.
E Ata te Bwai ae Ti aki Ataia te Atua
Ma ibukiia tabeman mai ibuakora, te ongotaeka nakon ana tua te Atua e aki rangin ni kakukurei nakoia. Ti a butimwaia: e na iai tabeua aika a tara ni kanganga ke n aki rangin n anainano—tuua aika ti a kaan nako iai ma nanon te ataei ae tekateka imatan te raurau ma kanoana aika banikai aika kamarurung ma a ribaaki. Ti kaota te ninikoria ao te ungannano ao ni imanonoira n ongotaeka n te aro bwa ti aonga ni waaki nako nakon waaki ni kakukurei riki tabeua.
Tao n taai n aron aikai, ti kona n titiraki, “Ti kainnanoia raoi n ongotaeka nakon ana tua ni kabane te Atua?”
Au kaeka nakon te titiraki aei e bebete:
I taku bwa e ata te bwai ae ti aki ataia te Atua— Bwaai aika a riaon ara atatai! Tamara are i Karawa bon te aomata ae akea tokina are ana atatai, wanawanana, ao rabakauna a korakora riki nakon ake iroura.4 Tiaki ti anne, ma akea naba tokin ana tangira, ana nanoanga, ao n tara te kouru ae ti teuana: ao ni uota te maiu ae mamate ao ae akea tokina.5
N taekana teuana, E aki ti ata te bwai ae tamaroa ibukim; E tangiriko naba bwa ko na rinea te bwai ae te kabanea n tamaroa ibukim.
Ngkana ko kakoaua aei ma nanom ni kabane—ngkana ko kakoaua raoi ana mition Tamara are i Karawa ae tamaroa ae na uotiarake ao ni kamimitongiia Natina ao E ata raoi aron karaoana—e aki raoi ngkana ko kamoamoai ao n iri Ana tua, riki tabeua ake a tara ni kangaanga? Tiaki n ae ti riai n iri kawai ake E a tia n anga bwa e na kairira rinanon te rotongitong ao kataaki inanon te maiu ae mamate? A mwaken kawai n oki nakon mweengara i karawa! Man rineakin ana kawai te Tama are i Karawa, ko kawenea aam mai ieta ibukin rikirakem bon iroum bwa natin te Atua te aine are e na kakabwaiako inanon maium.
E kangai mwakoron ara kakaewenako, I taku, ti iangoia bwa a bane n rokanaki Ana kakabwaia te Atua n te tabo ae rangin ni bubura i karawa, ma e aki kona n anganiira ti ngkana ti ongotaeka nakon tabeua bwaai aika kainnanoaki ae E a tia ni kawenei aika matoatoa ao n akea inaomatam n rinerine iai. Ma tiaki aron anne tua ni kabane. Ni koauana, te Tama are i Karawa e aki toki ni kakabwaiaira. Bon makura, raraomara, ao te bure are, ae kanga aron te kiaba, are e tuki kakabwaia aikai n roko iroura.
Ana tua bon kaetieti aika tangira ao ibuobuoki mai ieta aika a na totokoi rokon kakabwaia, n te aro bwa ti na teimatoa ni karekei kakabwaia mai i karawa.
Ti riai ni butimwaia bwa Ana tua te Atua tiaki ti karinanin iango aika raraoi. Ti aki “bwaai ni kamwane” man te Intanete ke te taetae n anainano man te baba ae te Pinterest. Bon reirei mai ieta, aika a boboto iaon koaua aika akea tokiia, aika kanakoaki bwa ana uota te rau n te aonaaba aei, ao te maiu ae akea tokina n te aonaaba ae na roko.”6
Ngaia ae iai ara rinerine. Ni kaineti ma te kantaninga ae teuana, iai ana iango te aonaaba ma bukina ao ana kawai aika aki kona ni waeaki. E ngae n anne, iai ana taeka te Atua nakoia Natina—Wanawanana ae akea tokina, Ana berita aika koaua, ao Ana kaetieti n tangira ibukin te oki nako Ina n te mimitong, te tangira, ao n te mwaaka.
Te rinerine e nakoim!
Te Tia Kariki taari, taano, ao itoi aika aki kona ni warekaki e a roko iroum n te bong aei! E anga te kaetieti ibukin karekean te kukurei, te rau, ao te maiu are akea tokina!
N te aro bwa ko na tau ibukin kakabwaia aika kakimwareirei aikai, kamwakura te onimaki, katoka iaom aran Kristo, ukoukoria n te taeka ao te mwakuri, ao n teimatoa n “riki bwa taan kakoaua ibukin te Atua n taainako ao ni bwaai nako, n taabo nako.”7
Bwa Bukin Tera e riai te Ongotaeka
N te tai are ko ata iai katein te Atua ni koaua ao Ana tua, ko na ata raoi riki arom ao te kantaninga ibukin rikim mai ieta. Ma aio, nanom ibukin irakin tuua e bitaki, ao e a riki inanom ae korakora maiuakinan te euangkerio ma te kimwareirei.
Te katoto, naake a tara te roroko n te bootaki n Taromauri bwa te kawai nakon temanna ma temanna ni kakorakora aia tangira iroun te Atua, a kunea te rau, tabekiia rake tabeman, ukoukora te Tamnei, ao ni kaboui aia berita bwa ana irira Iesu Kristo a na karekea te atatai ae tamaroa riki nakoia naake a kabanea aia tai n iri boowi. Mwaneu, e rangin ni kakawaki bwa ti na kaei bootaki n te Tabati, ma I rangin ni koaua bwa Tamara are i Karawa e rangin n tabeaianga riki ibukin ara onimaki ao ara rairannano nakon waare ibukin te roroko.
Aio te katoto riki teuana:
Te tina ae akea buuna ma natina aika uoman e rootaki n te aoraki ae te bwatata. Eng, e bon aki maan imwain ae a ituaki naba natina . Te mwakuri ibukin tararuakiia natina aika uarereke e tara n rangi ni bati ibukin te kairake n tina. Ao, n tokina, te auti ae rangin n ititiaki e a moanna ni mangaongao ao ni barekareka. Bwain amwarake aika bareka a uatao inanon te tingki, ao bareka a uatao n tabo nako.
Ngke e mangaongao ma ataei aika tangitang—ao n tangiria n tang naba—te karebwerebwe e roko n te mataroa. Bon ana tia kakawari n te mweenga. A kona n nora ana kangaanga te tina ae te kairake. A kona n nora ana auti, ana tabo n amwarake. A kona n ongo tangiia ataei.
Ngkai, ngke arona bwa a tia aine aikai n ti tabe ma katian aia kakawari are a tia n anganaki ni katoa namwakaina, a na bae n tia n angan te tina te raurau ni keeke, ngke a taekinna bwa a ururingnga n te Bootaki n Aine n te wiiki ae nako, ao n taekin taeka n aron, “Kariaia bwa ti na ataia ngkana iai te bwai ae ti kona ni karaoia!” Ngkanne a rangin ni kukurei iaon kawaia, ni kakaitau bwa a tia ni karekea 100 te betienti ibukin te namwakaina teuana.
Ni bon arona, aine aikai bon ana reirei ni koaua Kristo. A ata kainnanon raoia n aine arei ao ni kamwakuri aia tarena ao aia konabwai aika mwaiti. A kaitiaka te mangaongao, a uota te ota ao te itiaki nakon te mweenga, ao ni wetea raoraoia bwa e na uoti amwarake aika ana kainanoaki riki. Ngke e a bane aia mwakuri ao ni kabo nakoina, a katuka te kairake n tina anne ma ran ni mata—ran ni mata ni kakaitau ao n tangira.
Man te tai anne, ana iango te kairake n tina iaon te kakawari n reirei e bitaki. “I ataia,” e taku, “bwa aki kawarai aomata ti ibukina bwa a tia ni kabaeaki bwa a na karaoia.”
Eng, taan reirei n te mweenga a riai ni kakaonimaki ni karaoi aia kakawari ni katoa namwakaina, ni kabane n aki katuka te bwai ae moan te kakawaki ibukin tera irarikin te tua: aei n tangira te Atua ao raoraom.
Ngkana ti tara ana tua te Atua ao tabera ni katea Abanueana n aron te bwai ae ko na kaetia man bwaai aika ko na karaoi, ti mwaninga te bwai ae kakawaki n te reirei. Ti mwaninga te rikirake are e reke man maiuakinan ana tua Tamara are i Karawa ma te kimwareirei.
Te nakonako ni kawain te tia reirei e aki riai n riki bwa te atatai ae aki raoiroi. E “karewerewe riki nakon bwaai aika karewe.”8 Tiaki te rawawata are e na uotiira rikaki. Taetae ni burabeti a karekea te namakin ae kakukurei ao n aki kananououa nakoira. E kaungaira ma te onimaki, te kantaninga, ao te mwakuri n ibuobuoki. E kaona tamneira ma te ota n taai n roo ao n rau inanon taai n nanokawaki.
E anganiira te mwaka mai ieta ao te kimwareirei ae akea tokina.
Maiuakina te Euangkerio ma te Kimwareirei
Mwaneu n te euangkerio aika tangiraki, n aki tabe bwa 8 ke 108, iai te bwai teuana ae I taku bwa kam ota raoi iai ao n ataia:
Kam tangiraki.
Kam tangiraki irouia ami karo i karawa.
Te Tia Karikibwai ae Akea tiana ao akea tokina e kinako! E tabe iroum.
Eng, te Atua e tangiriko n te bong aei ao n tainako.
E aki tataninga n tangiriko ni karokoa ae ko tokanikai iaon mamaram ao kateim aika buakaka. E tangiriko n te bong aei ma ataakin ni kabane am kanganga. E ataia ae ko nako Ina ma te namakin ae koaua ao te tataro ae iai nanona. E atai taai aika e a tia ni kerikaki iai am onimaki ao am koaua—riki inanon rikiraken te rotongitong. E atai ami kabwaka. E atai nanokawakimi n taai aika ko a tia n aki karaoi bwaai aika a riai ni karaoaki ke ni bwaka. Ma E teimatoa n tangiriko.
Ao te Atua e atai ami tokanikai; e ngae ngke a tara ni uarereke nakoim, E butimwaai ao e kakaitau ibukiia n tatabeua nako. E tangiriko ibukin kawarakiia tabeman. E tangiriko ibukin kawarakiia ao buokaia tabeman n i buobuoki n uotaia aika rawawata—riki ngkana ko kekeiaki ma oin am kanganga.
E atai bwaai ni kabane ibukim. E kinako raoi—E ataiko bwa antai raoi ngkoe. Ao E tangiriko—n te bong aei ao n taainako!
N am katautau e na iai mwiina nakon Tamara are i Karawa ngkana a nakoraoi aron katikiraoam, kunnikaim, iram, ao ukinibaim? N am iango raoiroim nako Ina e bitaki ni kaineti ma iraman taan iriiri aika ko karekeia iaon Instagram ke Pinterest? N am iango e tangiriko bwa ko na raraoma ke n nanokawaki ngkana tabeman aki-iraorao ke aki-iriko n te Facebook ke n te Twitter? N am iango tarakim, tiaitin am kunnikai, ke kinakim e karika te kaokoro teutana ni kororaoim nakon Temanna are e karika te aonaaba?
E tangiriko tiaki ibukina bwa antai ngkoe n te bong aei ma ibukin naba te aomata ao te ota ngaia are e anganiko te konabwai ao te nano n riki nako iai.
E raka nakon are ko kona n iangoia, E tangiriko bwa ko na karekea te bwai ae ko uaiakinna—n oki nakon mweengam ma te karineaki.
I kakoaua bwa te kawai ni kakoroa nanon aei bon man katukan te nano ae babakanikawai ao te kantaninga ae aki tau man buokaia tabeman. Titita, onimaki ni mwaakan Iesu Kristo ni kamaiu; kawakin Ana tua. N taekana riki teuana—maiuakina te euangkerio ma te kukurei.
Bon au tataro bwa ko na rinanon te tangira ae tamaroa ae kabouaki ao ni karababaki ibukin te Atua inanon maium; bwa ko na karekea te onimaki, te nano ae korakora, ao te kabaeaki n reirei ana tua te Atua, karikirakei inanom, ao maiuakina te euangkerio ma te kukurei.
I berita bwa ngkana ko karaoia, ko na kunea ae bon ngkoe te kabanea n tamaroa—ngkoe raoi ni koaua. Ko na kunea bwa tera raoi ae nanonaki n te riki bwa natin te Atua ae akea tokina, aia Uea aika a raoiroi.N aei I kakoauai ao I katikui au kakabwaia iroumi ngkai ana Abotoro te Uea, n aran Iesu Kristo, amen.