Maeka n Aron are Taekinaki n Aia Taeka Burabeti
Iroun Carol F. McConkie
Te Moan ni Kauntira n Aia Beretitentii Ataeinaine ni Kabuta
N te aro bwa ko na reitaki ma kantaninga mai i ieta, ti kamatoa te burabeti ao n rineia ni maeka n aron are e taekinna.
Tamara are i Karawa e tangiria Natina ni kabane ao e tangiria bwa ana ataia ao ni matata n Ana babaire aei kakukurei. Ngaia ae, E weteiia burabeti, naake a tia ni katabuaki ma te mwaaka ao te kariaiakaki bwa ana mwakuri n aran te Atua ibukin kamaiuakiia Natina. Bon taan uarongorongo n te raoiroi, taan kakoaua iroun Iesu Kristo ao mwakan Ana Mwakuri ni kamaiu ae akea tokina. Iai irouia kingin uean te Atua iaon te aba ao ni kariaia karaoan otenanti ni kamaiu.
N ana Ekaretia te Uea ae koaua, iai ti temanna te aomata iaon te aonaaba n te tai anne are a tia n anganaki te mwaaka aei ao kingin te nakoanibonga aei.”1Ti kamatoa Beretitenti Thomas S. Monson bwa ara burabeti, tia mamata. Ao te tia kaotioti. E kaoti ana taeka te Uea ibukin kairara ao ni kaeta ara Ekaretia ni kabuta. N aron are e kabwarabwara Beretitenti J. . Reuben Clark Jr, “Te Bereitenti n te Ekaretia … n ti ngaia ae iai irouna te kariaiakaki bwa e na karekei kaotioti ibukin te Ekaretia, … ke ni bitii ana reirei te Ekaretia aika bwainaki ngkai.”2
Ni kaineti ma te burabeti ae maiu, te Uea e tuangiia kaain Ana Ekaretia:
“E tuatua bwa ti na ongo nakon ana taeka ao ana tua ni kabane are e na anganiko ngkana a reke irouia, n nakonako n taabo aika tabu i matau;
“Ti riai ni karekei ana taeka te burabeti n ae kanga bon man oin wiin te Uea, ni kabane n te taotaonaki n nano ao te onimaki.
“Ngkana ti karaoi bwaai aikai ao mataroan mone e na aki kona aom. 3
Ni kaineti ma kantaninga mai i karawa, ti boutoka te burabeti ao n rineia bwa ti na ongo nakon a na taeka.
Ti boutokaia naba ana kauntira Beretitenti Monson ao te Kooram n Abotoro n te Tengaun ma Uoman bwa burabeti, taan mamata, ao taan kaotioti. “Iai inaomataia, mwakaia, ao kariaiakaia ni katanoata ana iango ao ana kantaninga [te Uea] , … ni kaineti nakon ,… te Beretitenti n te Ekaretia.”4 A taetae n aran Kristo. A taetae ni burabeti n aran Kristo. A karaoi bwaai ni kabane n aran Iesu Kristo. N aia taeka ti ongo ana bwanaan te Uea ao ti namakina ana tangira te Tia Kamaiu. E taekinna te Uea bwa tera ae a taekinna Ana toro ngkana a tuangaki iroun te Tamnei ae Raoiroi bon te boki ae tabu … ao mwaakan te Atua nakon te kamaiuaki.” 5 Te Uea e taetae bon ti Ngaia: “Tao man oin bwanaau ke man bwanaaia au toro, bon ti te arona.”6
Ti kakaitau ibukin te Ekaretia “ae kateaki iaon taiani boua ake taan tuatua ma burabeti, ao Iesu Kristo naba te atibu are bouan te maninganinga.”7 Ana auti te Uea bon te auti ae baireaki raoi, ao ti aki tangiria bwa ti na kababaki bwa ti na karekea ia kaeka nakon ara titiraki ke tiaki kainnanoia bwa ti na namakina te aki koaua bwa tera te bwana ae ti na iria. Ti aki riai n riki ni katiotioaki, ma ni kakam’aieieaki nako n te angi nako ao te reirei nako.”8 E kaoki ana taeka te Atua rinanon ana toro ae a tia ni katabuaki, “I bukini karaoiroaia ake a itiaki nakoni makurian nakoaia, nakoni kateani rabatani Kristo: ao tokina ba rokora ni kabaneira n te onimaki ae ti teuana, ma ataakin natin te Atua naba.” 9 Ngke ti rineia ni maiu ni kaineti ma aia taeka burabeti, ti mena ni kawain te berita ae tabu are e kairiira nakon te kororaoi ae akea tokina.
Mai iroun te tina ae akea buna ae kataia ni maiu n tain te rongo, ti reiakina bwa tera nanon boutokaan te burabeti. Te Uea e tuanga te burabeti Eria bwa e na nako Tarebata, ike e na kunea iai te aine ae akea buna are e a tia te Atua n tuangnga bwa e na buokia. Ngke e roko Eria n te kaawa, e noora te aine arei n tabeaia. E weteia ao e taku, “I butiko ba ko na uota mai teutana te ran n te mangko, ba N na moi.” 10
“Ao ngke e nako neierei n anaia, ao e weteia [riki], ao e taku, I butiko ba ko na uota mai teutana te berena i nanoni baim.
“Ao e taku neierei, Ngkai iai Iehova ae Atuam, ao bon akea au berena teutana, ba ti te abutana te barau i nanon te baketi, ao ti teutana te b’a ae te oriwa I nanon te batoro: ao noria, I kume n tabeki aia aika uaai, ba N na rin ni karaoia ba kanau ma natiu, ba ti na kanna, ao rimwi ti na mate.”
Ao e kaeka Eria, “Ko na tai maku; naako ao karaoa aron anne ko atonga: ma ko na karaoa moa te berena ae uarereke maiai ba kanau, ao ko na uotia mai nako iu, ao rimwi ko na karaoa kanam ma natim.”11
Iangoia teutana te tai te kangaanga n aron te bwai ae tuanga te aine ae bora ni baki te burabeti bwa e na karaoia. Ni koauana, e kona te Atua ni karekea te amwarake ibukin Ana toro ae onimaki. Ma, e karaoia n aran te Uea, Eria e karaoia n aron are e tuangaki, ao e na tuanga natin te Atua te aine ae tangiraki bwa e na kabanei n anga ana bwai ake iai irouna bwa e aonga ni kamatoa te burabeti.
Ma e Eria e beritana te kakabwaia ibukin te ongotaeka: “Ba e kangai ana taeka te Uea ae Atuaia Iteraera, Ane e na aki kenako kanoan te baketi ni kabane, ao e aki bane naba kanoan te batoro ni b’a.”12 Te Uea e angan te aine ae akea buna bwa e na rineia ao ni kakoaua ao n ongo ana taeka te burabeti.
N te aonaaba e rootaki man akean te raoiroi ao te tamnei, ti a tia n tuangaki bwa ti na boutoka te burabeti. Ngkana ti ongotaeka ni, boutokai, ao ni kamatoai taeka mairoun te burabeti, ti kakoaua bwa iai iroura te onimaki ni kanakoa ma te nanorinano nakon ana kantaninga, wanawanan,ao ana tai te Uea.
Ti kakauongo nakon aia taeka burabeti e ngae ngkana e na taraa n aki tau, e aki riai, ao ni kangaanga. Ni kaineti ma ana kainibaire te aonaaba, iriirakin te burabeti e kona n ribaaki, e aki eti n te tautaeka, ke n aki tataneiai te aba iai. Ma iriirakin te burabeti e eti n tainako. “Ba aroni karawa ngkae e rietata riki nakon aontano, ao ai aron naba arou nako, ba a rietata riki nakon aromi nako, ao ananou nako nakon nanomi nako.”13 “Ko na onimakina Iehova n nanom ni kabane; ao tai mwiokoa oin am ataib’ai.”14
Te Uea e karineia ao n tangiria naake a na ongo nakon ana kaetieti te burabeti. Ibukin te aine ae akea buuna ae kaain Tarebata, te ongotaeka nakon Eria e kamiua ao n tokina maiun natina. N aron are e a tia ni berita te burabeti, “neienne, ao teuanne, ao ana auti, a amwarake inanon boong aika mwaiti … ni kaineti ma ana taeka te Uea, are e taekinaki iroun Eria.”15
Te Uea “e na buoki kainnanoia ake a onimaki Irouna.”16 Aia taeka burabeti bon ti tebo ma te berena nakon tamneira. Ngkana ti taua, ti kakabwaiaki, kamanoaki, ao ni kateimatoaki n te maiu n rabwata ao n tamnei. Ngkana ti kakukureira n aia taeka, ti reiakinaki bwa ti na kanga n nakon Kristo ao ni maiu.
Unimwaane Bruce R. McConkie e koroia bwa rinanoia burabeti “te Uea e kaoti koauan te kamaiuaki … te kamaiuaki are iroun Kristo; ao e iangoia. … te kawai e kairiko nakon te maiu are akea tokina. … Inanon te tai: te Uea e angania ana aomata te kaetieti ae a kainnanoia n te tai are a mena inanon te rawawata ao te kangaanga. Ao ni koauana inanon boong aika imwaira e na iai taai ao ngkana akea ao bon ti wanawanam mairoun te Aua, n ruo mai i karawa ao n taekinaki irouia burabeti, e na kona ni kamaiuia ana aomata.”17
Irou, aia taeka burabeti ake a reiakinaki iroun au tia reirei n au Raurere e anganai te atatai n aron arona bwa e kanga aron tarakin te reitaki n te mare n te berita ae tabu. E anganai aia taeka burabeti te onimaki ao te kantaninga ae I kona ni katauraoi ibukin ao ni karekea te mweenga ae kakukurei. N teimatoa ni kamatebwai aia reirei burabeti, burabeti n taai akekei ao burabeti n taai aikai, a kateimatoaai inanon ririki aika kakua mani kangaanga ni karikiia natira, reireinia, ao ni karikirakeia ataei aika itiman. Aia taeka burabeti inanon booki aika tabu ao reirei man te tabo ni kabwarabwara aei bon taeka ni karaunano, n tangira, ni kakorakora, ao te aroaro ae tamaroa are e kaineti nakoira ni kabane.
Ngkana ti kakauongo raoi nakon aia taeka burabeti, ti katei mwengara ao maiura iaon te aa ni koauana ae akea tokina, bon iaon “te bwa are ara Tia Kaboomwi, are Kristo, natin te Atua, … are kam na riai ni katea iai aami, ana bwa ngkana te riaboro e kanakoa te ang mairouna ae korakora, eng ana kanoa ibuakon te ukeuke n anti, eng, ngkana ni kabane te atibu ae bwaka mai karawa ao te angibuaka ae korakora a bwaka iaomi, bon akea korakoraia iaomi ni katiki ngkami nakon … te nanokawaki ao te maraia ae aki totoki.”18
Iai ara rinerine. Ti kona n rineia n aki tabeakinna, iangoana kanga e aki kakawaki, ke kakea bonganana, ke ni kaitarai ana taeka Kristo ake taekinaki iroun Ana toro ae tia ni katabuaki. Ma e reirei te Tia Kamaiu bwa naake a karaoa aei a na kamwawaaki mai irouia Ana aomata inanon te berita ae tabu.19
Ngkana ti tataro mwaaka ao ni kamatebwaia aia taeka burabeti aika tabu ma te onimaki inanon Kristo, ma nanomi raoi, te Tamnei ae Raoiroi e na taekin koaua nakon ara iango ao nanora. Au kantaninga bwa ti na kauki tanigara bwa a na ongo, nanora bwa ana ota iai, ao ara iango bwa aonga ana bwai te Atua aika raba ni kaotaki nako ira.20
I kaota au kakoaua bwa Iotebwa Timiti bon te burabeti ae weteaki iroun te Atua ngkoa ao ngkai bwa e na kaoka ana euangkerio Iesu Kristo ao Ana nakoanibonga nakon te aonaaba. Ao I kakoaua ae iroun Beretitenti Monson And ti kairaki iroun ana burabeti te Atua n te bong aei ae koaua. Ti kona ni bane n rineia bwa ti na tei ma te burabeti ao ni maiu ni kaineti ma ana taeka ni karokoa ae ti katiteuanaki n te onimaki, kaitiakaki iroun Kristo, ao ni kaonaki ma ana atatai Natin te Atua. N aran Iesu Kristo ae tabu, amen.