Iai Ana Babaire te Uea Ibukira!
Iroun Unimwaane Carlos A. Godoy
Man te Itingaun
Ngkana ti reitinako ni maiu n aron ae ti maiukinna, a na korobukin kakabwaia ake a beritanaki?
Bon te kakabwaia n riki bwa mwakoron te tai ae kakaongora aei ngke a reke aia tai taan taetae n oin aia taetae n te maungatabu ni kabuta. Te kabanea n tai ae I taetae n te biubete, I bon raraoma ibukin au taetae n Imatang. Ngkai, I raraoma ibukin waekoakoan au taetae ni Portuguese. I aki kan taetae ni kabaitiai nakon te kabwarabwara n Imatang.
Ti a tia n rinanona ni kabane ke ti na bae n rinanon taai ni babaire aika kakawaki inanon maiura. I riai ni karekea te nakoa ae onoti ke ae kaokoro? I riai n nako ni mitinare? Bon aei te aomata ae tau bwa N na mareia?
Aikai kaangaanga n aono aika kakaokoro inanon maiura ike te bitaki ae uarereke ni kaetieti e kona n iai mwiina ae kakawaki rimwi. N ana taeka Beretitenti Dieter F. Uchtdorf: “Rinanon ririki ni beku ibukin te Uea …, I reiakinaki bwa te kaokoro imarenan te kukurei ao te rawawata ibukin te aomata, n taian mare, ao utu angin te tai a kaoti bwa te kairua ae uarereke” (“A Matter of a Few Degrees,” Ensign or Liahona, Meei 2008, 58).
Ti na kanga n totokoi kairua aika uarereke aikai inanon te babaire?
N na kabongana te bwai are I rinanona ni kamatata au rongorongo.
Ni banen 1980 tabun, kaain ara utu bon ataei ao kainnabau, Mônica, uoman mai buakoia natira aika aman, ao ngai. Ti maeka i São Paulo, Brazil, I mwakuri n te kambwana ae nakoraoi, E bane au reirei n te iuniwetiri ao e a tia ni bane au tai ni bitiobi n te uoote are ti maeka iai. E nakoraoi te maiu, ao bwaai ni kabane a nakoraoi n aron tarakiia―ni karokoa te bongina ao e roko ni kawarira temanna ngkoa raoraou.
Ni kabanean rokon teuaei, iai te bae e taekinna ma ana titiraki are e a karika kaokoron au iango. E taku, “Carlos a taraa n nakoraoi bwaai ni kabane ibukim, am utu, am mwakuri, ao am ibuobuoki n te Ekaretia, ma—” ao ngkanne e roko te titiraki, “ngkana ko reitinako ni maiu n aron ae ko maiuakinna, a na korobukin kakabwaia ake a beritanaki n ana kakabwaia te tamanuea?”
I aki bae n iangoa ana kakabwaia te tamanuea ibukiu n te aro aei. I warekia man te tai teuana ma teuana ma akea nanou n tarai taian kakabwaia ake a beritanaki n taai rimwi ao n taubwia aron maiu n te tai aei.
Imwiin rokon teuaei, I kabanea nanou nakon ana kakabwaia te tamanuea, ni miimii, “Ngkana ti reitinako ni maiu n aron ae ti maiuakinna, a na korobukin kakabwaia ake a tia ni beritanaki?” Imwiin iangoakina raoi n ae bati, I karekea te namakin bwa tabeua bitaki a bon riai, n irekereke riki ma au reirei ao nakoau.
Bon tiaki te babaire imarenan te bwai ae eti ao ae kairua ma imarenan te bwai ae raoiroi ao ae tamaroa, n aron are e reireiniira Unimwaane Dallin H. Oaks ngke e taku: “Ngai ti iangoi rinerine aika mwaiti, ti riai n uringnga bwa e aki tau te bwai ae raoiroi. Tabeua rinerine a bon tamaroa, ma tabeman a teimatoa n raoiroi” (“Good, Better, Best,” Ensign ke Liahona, Nobembwa. 2007, 104–5).
Ti na kanga ngkanne ni kakoaua bwa ti karaoa te babaire ae tamaroa?
Aikai tabeua reirei ake I a tia n reiakin.
Reirei Nambwa Teuana: Ti Riai n Iangoi Ara Rinerine ma Te Kabane ni Kouru n Ara Iango
Karaoan babaire ake a na rooti maiura ao naake ti tangiriia n akea aia atatai ni mwiin aia babaire a kona n uoti kaangaanga. E ngae n anne, ngkana ti iangoa taekan mwiin taian babaire aikai n taai aika a na roko, ti kona n noora itiakin te kawai ae korakora ae ti na toua n te tai aei.
N atakina bwa antai ngaira, bukin tera ngkai ti mena ikai, ao tera ae kantanigaia te Uea mairoura n te maiu aei e na buokira n anganira te taratara ae rababa riki ae ti kainnanoia.
Ti kona ni kunei katoto inanon booki aika tabu ike e reke iai te atatai ae rababa ae kamatata bwa te kawai ra ae ti na toua.
E taetae Mote nakon te Uea ni kaitara, n reikina te babaire ni kamaiu, ao maikanne e a mataata riki n nakoana ngkai te burabeti ibukin ikotakiia Iteraera.
“Ao te Atua e tuanga Moote, ni kangai: Nooria, bon Ngai te Uea ae te Atua ae Moan te Rietata. …
“… Ao N na kaoti nakoina au karikibwai man baiu. …
“Ao iai au mwakuri ibukim, Moses, natiu” (Moses 1:3–4, 6).
Ma te atatai aei, e a kona Moote n teimatoa raoi inanon ririki ni kataaki inanon te rereua ao ni kaira Iteraera nakon oin mweengana.
Riaai, te burabeti ae kakannato n ana Boki Moomon, e miia te mii, ao inanon miina e reiakina tabena ni kairiia ana utu nakon te aba ni berita.
“Ao e koro bukina bwa e tua te Uea nakon tamau, inanon te mii, bwa e riai ni kairiia ana utu ao ni mwananga nakon te rereua.
“… Ao e kitana ana auti ma aban rikina, ma ana koora, ma ana tirewa, ma ana bwai aika kakawaki” (1 Nibwaai 2:2, 4).
E teimatoa Riaai ni kakaonimaki nakon te mii aei n aki ongei kaangaanga n te mwananga ao ni kitana maiuna ae mweengaraoi i Ierutarem.
Te burabeti ae Iotebwa Timiti bon temanna te katoto ae kakannato. Rinanon kaotioti aika mwaiti, ni moanaki ma te Moan Kaotioti, e a kona ni kabwanina ana mition ni kaoka te euangkerio (taraa Joseph Smith—History 1:1–26).
Ao tera arora? Tera ae kantaningaia te Uea mairoura n tatabemaniira?
Ti aki kainnanoa nooran te anera bwa ti na karekea te atatai. Iai ara boki aika tabu, te tembora, burabeti aika maiu, ara kakabwaia mairoun te tamanuea, taan kairiiri aika anainano, ao ni bwaai nako, te kona n karekea te kaotioti ae onoti ni kairii ara babaire
Reirei Nambwa Uoua: Ti Kainnanoia bwa Ti na Katauraoi ibukin Kakaewenako Ake A na Roko
Te kabanea n nakoraoi ni kawai n te maiu a rangin ni bebete. N angin te tai, ni koauana bon kaitaraana. Ti kona n tarai aia katoto burabeti ake I a tibwa tia n taekin.
Moote, Riaai, ao Iotebwa Timiti a aki bebete mwanangaia e boni ngae ngke a bon koaua aia babaire.
Ti anga nanora ni kabooa mwiin ara babaire? Ti tauraoi ni kitan ara tabo aika kamweengaraoi ni kawara te tabo riki ae tamaroa?
N oki rikaaki nakon baike I rinanona n au kakabwaia mairoun te tamanuea, I a roko n tokin te tai anne are I riai ni kakaea reitan au reirei ao ni bubuti ibukin te tikaoratibu man te iuniwetiri ae Amerika. Ngkana I rineaki, N na bae ni kitana au mwakuri, ni kabooi nakoi ara bwai ni kabane, ao n nako ni maeka n te United States bwa ataein te reirei inanon uoua te ririki.
Ukeuke n aron te TOEFL ao te GMAT a riki bwa moan kakaewenako aika a na kaitaraaki, E anaa teniua te ririki ni katauraoi, angiina “tiaki,” ao tabeua “tao” imwaain ae I butimwaeaki n te iuniwetiri. I teimatoa n uringa rokon au tareboon ni kabanean te kateniua n ririki mairoun te aomata are e tabe ma te tikaoratibu.
E taku, “Carlos, Carlos, iai au rongorongo tabeua aika tamaroa ao aika aki raraoi ibukim. Te rongorongo ae raoiroi bwa ko mena ibuakoia aika kateniman n te ririki aei.” Tii iai teuana te mwaawa n te tai anne. “Te rongorongo ae aki raoiroi bwa teuane e rineaki bon natin te aomata ae kakannato, are teuane temanna bon natin naba ae kakannato, ao ngkanne ai ngkoe.”
I waekoa ni kaeka, “Ao Ngai … bon natin te Atua.”
Ae kakukurei, rikim ni karo iaon te aba e aki motikaki bukina, ao I butimwaeaki n te ririki anne, n 1992.
Ngaira natin te Atua ae moan te Mwaaka. Bon ngaia Tamara, E tangirira, ao iai Ana babaire ibukira. Ti aki maeka ikai n te maiu aei tii ni kabanei ara tai, n rikirake ni kara, ao ni mate. E tangirira te Atua bwa ti na rikirake ao ni karekei ara konabwai.
N ana taeka Beretitenti Thomas S. Monson: “Ngkami n tatabemani ngkami, ake a iein ke n tia ni mare, n aki tara te ririki, iai am tai n reiakinaki ao n rikirake. Karababa rabakaum, n te wanawana ao n te tamnei, nakon am kabanea ni konabwai” (“The Mighty Strength of the Relief Society,” Ensign, Nobembwa. 1997, 95).
Reirei Nambwa Teniua: Ti Kainnanoia n Tibwa Te Mii Aei ma Aomata ake Ti Tangiriia
E karaoa ana kabanea ni kona Riaai ni buokiia Reimwan ma Remuera n oota ni kakawakin te bitaki are a karaoia. N te koaua are a aki tibwa miin tamaia e karikiia bwa a na ngurengure n aia tai ni mwananga. Nibwaai, n te itera teuana, e ukoukora te Uea n te aro bwa e na noora are e nooria tamana.
“Ao e koro bukina bwa ngke I a tia ngai, Nibwaai n ongora n ana taeka ni kabane tamau, ni kaineti ma baike e noori inanon miina ni burabeti, … Ngai … Ngai … e korakora nanou n tangiria bwa N na nooria, N na ongo, ao n atai baikai, rinanon mwaakan te Tamnei ae Raoiroi” (1 Nibwaai 10:17).
Ma te mii aei, e a kona Nibwaai tiaki n tii kaitarai kakaewenako ni mwanangana ma ni kaira naba ana utu ngkana e bon riai.
Taraakina bwa ngkana ti baireia bwa ti na toua te kawai, a na rootaki aomata ake ti tangiriia, ao tabeman ana bae naba n tibwa nakoira mwiin aia rinerine. N riaina, a na kona n noora are ti nooria ao n tibwa ara onimaki ae ti te arona. E aki bebete aei n tainako, ma ngkana e riki, e na bebete riki te mwananga.
N au taneiai ae onoti are I kamanena bwa au kabwarabwara, I aki nanououa ni kainnanoa ana boutoka kainnabau. A tabe ni uarereke ataei ao akea te bae mwaiti ae e na iangoaki, ma ana boutoka kainnabau e kakawaki. I uringa anne, n te moan, Ngai ma Mônica ti kainnanoia bwa ti na karaurau ni maroroakina te bitaki n ara babaire ni karokoa are e namakinna bwa e mwengaraoi ao ni motika nanona. Te mii ae tibwaaki aei e karaoia tiaki n tii boutoka te bitaki ma e riki naba bwa te mwakoro ae kakawaki iaon te tokanikai.
I ataia bwa iai ana babaire te Uea ibukira n te maiu aei. E ataira. E ataa te bwai ae tamaroa ibukira. Tii ibukina ngkai a nakoraoi bwaai tiaki nanona bwa ti aki riai n iango n te tai teuana ma teuana ngkana iai te bwai ae tamaroa. Ngkana ti reitinako ni maiu n aron ae ti maiuakinna, a na korobukin kakabwaia ake a beritanaki?
E maiu te Atua. Boni Ngaia Tamara. E maiu te Tia Kamaiu Iesu Kristo, ao I ataia bwa rinanon Ana karea ni kabomwi ti kona ni kunea te korakora ni kaitarai kakaewenakoara ni katoa tai. N aran Iesu Kristo, amen.