Ara Mwakuri n Ibuobuoki ae Onoti
Iroun Unimwaane Hugo E. Martinez
Man te Itingaun
Tangiran Iesu Kristo e riai n riki bwa te tia kairiira ngkana ti na atai kainnanoia naake ti kona ni buokiia n anga tabeua.
Inanon ana Ekaretia Iesu Kristo ibukiia Aika Itiaki ni Boong Aika Kaitira, ti anganaki te tai ao oin ara kakabwaia bwa ti na beku. Ngkai I a tia n riki bwa te membwa, I a tia ni beku n anga aika mwaiti n ai aron te Tari Udine Falabella, taman Unimwaane Enrique R. Falabella, e taneiai n taekina, “ngkana e karaoa te mwakuri n ibuobuoki temanna, e bon bongana ; ngkana e beku te aomata n akean te bwai ao akea bonganana.” Aikai taeka aika ti riai ni kawakin n ara iango ao i nanora.
Man te tai are I weteaki nakon te Kauoua ni Kooram n Itingaun n au ta ni mwakuri n ibuobuoki, I kunea karauan nanou n uringnga bwa te Tia Kamaiu e boboto ana iango iaoia aomata ao utu nako. Ana tangira ao ana mwamwannano nakoia aomata n tatabemania nako e a ti n reireinai bwa E ataai kakawakiia natin te Tama are i Karawa n tatabemaniia ao e kakawaki ibukira bwa ti na kakoaua bwa a buokaki aomata n tatabemaniia ao ni kakorakoraki man ana euangkerio Iesu Kristo.
Inanon booki aika tabu ti warekia:
“Uringa bwa a kakawaki tamnei e korakora i matan te Atua. ...
“Ao ngkana arona bwa ko riai ni mwakuri ni kabane ara bong ... ao n uota, ni kamaiua temanna te tamnei nakoiu, korakorara riki kukureim ma ngaia n abanuean Tamau!”1
Ni kabane tamnei a rangin ni kakawaki iroun te Atua, ibukina bwa ngaira bon Natina ao iai ara konabwai ni kona n riki n ai Arona.2
Tangiran Iesu Kristo e riai n riki bwa te tia kairiira ngkana ti na atai kainnanoia naake ti kona ni buokiia n anga tabeua. Ana reirei ara Uea, Iesu Kristo, e kaota te kawai nakoira. Ao anne aron moanakin ara ibuobuoki i bon iroura: kuneakin kainnano, ngkanne katokan kaangaanga aikanne. N aron are e taekinna Titita Linda K. Burton, te beretitenti ni kabuta n te Bootaki n Aine, e taku, “Tarataraia moa, ao imwiina karaoia.”3
Beretitenti Thomas S. Monson bon ngaia te banna n katoto ae tamaroa n te reirei aei. N Tianuare 2005, e tararua te maungatabu n te bootaki ni kairiiri n te nakoanibonga i Puerto Rico ngke e kabwarabwara bwa e kanga te Tia Kamaiu ao Ana toro ni karaoi mwakuri n ibuobuoki rinanon ara ibuobuoki ae onoti. Ni kainan te bootaki ae moan te nakoraoi anne, e moanna ni kamauriia ni kabane taan kariiri ni kabane n te nakoanibonga ake a roko. N te tai ae waekoa, e nooria bwa temanna mai ibuakoia e matakuakin bwaai mai kiraroa, ni kaokoroa n ti ngaia.
E otinako Beretitenti Monson mai ibuakoia aomata, nakon te tari arei, ao n taetae nakoina. Ma te namakin, José R. Zayas e tuangnga bwa bon te kakai ngkai e a tia ni kawaria ao kaekaan ana tataro ngaia ma kainnabana, Yolanda, are a anga imwaain te botaki. E tuanga Beretitenti Monson bwa e rang mamaara natina te aine ao iai te reta ae e uotia mairoun kainnabana are e tangiria bwa e na anganaki Beretitenti Monson. E a tia te Tari Zayas n tuanga kainnabana ae e na kaangaanga n anga ngkai e na rangin tabetabe Beretitenti Monson. E kakauongo Beretitenti Monson nakon te rongorongo ao e titiraki ibukin te reta, are e warekia ni karaurau. Imwiin e karinna ni buuan ana kooti ao n tuanga te Tari Zayas bwa e na tabeakina te bubuti aei.
N te anga aei, e rootaki te utu anne iroun ara Uea, Iesu Kristo, rinanon Ana burabeti. I kakoauai ana taeka te Tia Kamaiu n ana taetae ni kaikonaki te Itamaria ae moan te raoiroi are e kaineti nakoira: “Ko na nako, ao kakairi i rouna.”4
N Tebetembwa 21, 1998, te Angibuaka ae Georges e orea Puerto Rico, e karika te urubekebeke ae korakora. Titita Martinez, natira aika niman, ao Ngai ti kataia ni kamaiuira man te buaka ae korakora anne ma angin te angibuaka n tiku inanon mweengara. E ngae n anne, ti tokara ara kauoua ni wiiki n akean te ran ao te iti.
Ngke e a bane ara ran, e a bon kaangaanga karekeana riki. N na bon aki mwaninga taekaia taari ake a buokiira ni katauraoa te ran ae onoti, ke N na aki mwaninga te kawai n tangira ake a buokiira iai mitinare aine.
E roko Germán Colón nakon ara auti ma te kaonteina n ran ae te buratitiki ae bubura n te turaki. E tuangiira bwa e karaoia ibukina, n ana taeka, “I ataia ae iai ami ataei aika uarereke aika a kainnanoa te ran.” Tabeua te bong imwiina, Taari aika Noel Muñoz ao Herminio Gómez a katokai teniua tangke n ran aika bubura iaon te turaki ae boraoi aona. A kaoti n ara auti n ae aki kantaningaaki ao ni kanoai bwatoro n ran ma te ran ni mooi, ni kaoiia naba kaain rarikira bwa a na kanoai naba aia bwai.
A kaekaaki ara tataro man aia ibuobuoki ae onoti. Ubuia taari ake teniman a kaota ana tangira Iesu Kristo ibukira, ao aia mwakuri n ibuobuoki—n taekana teuana, aia ibuobuoki ae onoti—a uota ae mwaiti riki nakon ti nimakin te ran inanon maiura. Nakoia natin te Atua mwaane ao aine, a na ataia bwa e kakawaki ae aomata iai nanoia ao n tarai raoi oin mweeraoia.
I kakoaua nakoimi bwa te Tama are i Karawa ao ara Uea, Iesu Kristo, a kinaira n tatabemaniira ao n onoti. Bukin anne, A katauraoi baike ti kainnanoi bwa e aonga n reke ara tai ni kakoroi riki nanon ara konabwai. Inanon te maiu ae mamate aei, A katikuia aomata ake a na buokiira. Ngkanne, ngkana ti riki bwa bwaai ni mwakuri inanon Baia, ti kona ni beku ao ni buokiia naake A kaotia nakoira man te kaotioti.
N anga aei, e na karoko te Uea Iesu Kristo irouia ni kabane natin te Tama are i Karawa. Te Tia Kawakin Tiibu ae Raoiroi e na ikotiia Ana tiibu. E na karaoia temanna imwiin temanna ngkana a kabongana raoi aia rinerine n te maiu ae mamate aei—imwiin ongoia ni bwanaaia Ana toro ao ni karekea aia ibuobuoki. Ngkanne a na kinaa Bwanaana, ao ana Iriiria. Te ibuobuoki ae onoti n aron anne e kakawaki ni kawakinan ara berita aika tabu n te bwabetito.
N aron te kakairi, n riki bwa te katoto ae tamaroa bwa ana reirei Iesu Kristo bon ara moan kabwarabwara nakoia naake ti kona n tibwa Ana euangkerio ma ngaiia. Ngkana ti kauki wiira ao n tibwa ana euangkerio Iesu Kristo ae e a tia ni kaokaki, ti riki bwa “Ana tia kawakin tiibu, ni katabeaki ma kanuaakia tiibu man Ana tawaana ao tiibu te teei man Ana nanai”5; ti riki bwa “ake a mamaara ao a bebete”6 “taan akawaia aomata”7
Ara mwakuri n ibuobuoki ao ara ibuobuoki ae onoti a aki tiatianaki nakoia ake a maiu n te aonaaba aei. Ti kona naba ni karaoa te mwakuri ibukiia maate—ibukiia naake a maeka n te aonaaba n tamnei ao ake, n aia tai ni maiu n rabwata, a aki reke aia tai ni karekei otenanti ni kamaiu n ana euangkerio Iesu Kristo. Ti kona naba ni kawakina te tienoro ao ni koroi rongorongoia ara utu n rairi nanoia ao ni karaoa te mwakuri ibukiia tabeman (aika maiu)—n raonaki ma nanoia aika maiu nakoia aia bakatibu. Bon ti ibukin reitakiia ara utu, te roro teuana ma te roro teuana, n te kabaebae ae akea tokina. Ngkana ti karaoia, ti riki bwaa “taan kamaiu ... iaon maungan Tion.”8
Iai ara tai ae onoti n riki bwa bwaai ni mwakuri inanon Baina. Ti kona naba n riki inanon ara mare, inanon ara utu, ma raoraora, ao aomata ake raora. Anne ara ibuobuoki ae onoti ngkai ngaira ana reirei Iesu Kristo ni koaua.
“Ao ane a na bane ni botaki botanaomata i matana: ao ane E na karaaureia te korakina ma te korakina, n ai aron te tia kawakin-tibu ngkana e karaaureia tibu ma koti:
“Ao ane E na kakia tibu i angataina, ao koti i angamaingina.
“Ao ane e na taku te Uea nakoia ake i angataina, Nako mai, ngkami akana kam kakabaiaki iroun Tamau, kam na ana ueami are katauraoaki i bukimi mai moani karikan aonaba:
“Ba I baki, ao kam kaamarakeai: I kanimoi ao kam kamoai: te iruwa Ngai, ao kam akoai:
“Akea kunnikaiu, ao kam kunnikaiai: I aoraki, ao kam kawarai: I mena i nanon te auti ni kaikain, ao kam nako Iu iai.
“Ao ane a na kaeka ake a raoiroi, ni kangai, te Uea, ti noriko n ningai ngke Ko baki, ao ko ti kaamarakeko? Ao ngke Ko kanimoi ao ti kamoiko?
“Ao ti noriko n ningai ngke Ko iruwa, ao ti akoiko? ao akea kunnikaim, ao ti kunnikaiko?
“Ke ti noriko n ningai ngke Ko aoraki, ke ko mena inanon te auti ni kaikain, ao ti kawariko?
“Ao ane e na kaekaia te Uea ni kangai, E koaua ae I a tuangkami ba ngke kam karaoi baikai nakon temanna ae moan te mangori i buakoia tariu aikai, ao kam karaoia naba nako Iu.”9
Bwa ti na karaoia bon au tataro n aran Iesu Kristo, amen.