E Mena Ia Am Taratara?

Iroun Unimwaane Lynn G. Robbins

Man te Beretitentii n te Itingaun

Tamnei

Ni kataia ni kakukureiia tabeman imwaain kakukureian te Atua bon kabitaraean te moan ao te kauoua ni korakora n tua.

“E mena ia am taratara?” Beretitenti Boyd K. Packer e katounakoai ma te titiraki ni kamwaninga aei ngke ti kaai ni mwananga i bukin ni moan mwiokoau ae boou ae te Itingaun. I bon aki oota iai. “Te Itingaun,” e reitianako, “ti aki tabena bwa e na taetae nakoia burabeti n tei ibukiia kaain te Ekaretia ni kabuta, ma te burabeti nakoia aomata. Tai mwaninga e mena ia am taratara!” Bon te reirei ae mwaakaroiroi.

Ni kataia ni kakukureiia tabeman imwaain kakukureian te Atua bon kabitaraean te moan ao te kauoua ni korakora n tua (taraa Mataio 22:37–39). E kamwaninganako bwa e mena ia ara taratara. Ao riki, ti bane ni karaoa te kairua anne ibukin maakakiia aomata. N Itaia e kauringiira te Uea, “Tai maaka bukinami irouia aomata” (Itaia 51:7; taraa naba 2 Nibwaai 8:7). Ni miin Riaai, te maaku ae e moanaki man te kotokoto ni kaenaena man te kateitei are e korakora mani bubura, ni karaoia aika mwaiti bwa a na mwaninga bwa e mena ia aia taratara ao a kitana te kai ao a “maamaa” (taraa 1 Nibwaai 8:25–28).

Ana anainano te aomata aei e kataia ni bita anuan te aomata, ngkana tiaki te katei, ma man karaoan temanna bwa e na kairua ni kamaraka temanna. Ti ukoukora te maiu n rau ma naake a kotokoto ni baia, ma ngkana maakan te aomata e kariirira ni kakoaua te bure, e riki bwa “te aonikatatai” ni kaineti ma ana boki Taeka n Rabakau (taraa Taeka n Rabakau 29:25). Te aonikatatai e niniwana ni karaoaki nakon ara bubuti nakon ara itera n ara mwakuri n nanoanga ni katauaki ke ni katamaroa te bwai are e kabuakakaki iroun te Atua. Ibukin maamaran te onimaki, e kona n riki bwa te bwai ni kabwakabwaka. N aron te katoto, tabeman kairake ni mitinare a uota maakan te aomata nakon te tabo ni mitinare ao ni kairua n aki ribootina aki ongeaban toana nakon aia beretitenti n te mition ibukina bwa a aki kan urua nanon toaia ae aki ongeaba. Babaire n te katei ae karaoaki bon man uringan riain te moan ao te kauoua ni korakora n tua (taraa Mataio 22:37–39). Ngke a ataia mitinare aika aki oota aikai bwa a bukintaeka iroun te Atua ao tiaki toaia, e riai n anganiia te ninikoria ni bita aia taratara.

N ana roro ni kairake ae 22, e ngae Iotebwa Timiti n mwaninga bwa e mena ia ana taratara ngke e kaokiokia ni butia te Uea ana kariaia ibukin Martin Harris n tangoan 116 baan te boki. Tao e kan kaota ana kakaitau Iotebwa nakon Martin ibukin ana boutoka. Ti ataia bwa Iotebwa e rangin ingainga ibukiia tabeman ake anoria bwa a na tei mangaia ni boutokakina ni kaitarai taeka ni kawekewe are e a butanako ibukina.

Baikara bukina iroun Iotebwa, ke n aroia ni karaoiroiia n taraakia, te Uea e bon aki ko na n kariaia ao e na bon boaia: “Mwaitira am tai ni kairua …ao ni kariaia aomata bwa a na anaa nanom. Bwa, nooria, ko riai n aki maaka te aomata nakon ao ko na maaka te Atua” (D&C 3:6–7; e kairaki ma katuruturuana). Te taneiai ae anainano aei e buoka Iotebwa n uringanga, n aki totoki, bwa e mena ia ana taratara.

Ngkana a kataia aomata ni karaoa ae raoiroi ma aomata, a kona n aki ataia bwa e a bua onimakinaia iroun te Atua. Te iango e kona temanna ni kakukureia te Atua ao n te tai ae titebo e kakeaa ataakia ake aki ongeaba tiaki te inanonano ma te kamwamwane, ke te baka n raoiroi ke te kataia n “toro ibukiia tooro aika uoman” (Mataio 6:24; 3 Nibwaai 13:24).

Ngkai ti tangira te ninikoria ni kaitarai kaangaanga, te kanikina n ninikoria e tokanikai iaon maakan te aomata. Te katooto, ana tataro Taniera e buokia ni kataraia raian, ma te bwai are e karika ninikoriana bon kakawenakoan te Uea ae Taraiati (taraa Taniera 6). Te aekaki n ninikoria anne bon ana bwaintituaraoi te Tamnei nakoia ake a maaka te Atua ake a tatataro. Ana tataro te Uea n aine are Etita e anganna naba te ninikoria anne ni kaitara buuna, te Uea Aatueruti, n ataia bwa e anga maiuna ni karaoa anne (taraa Etita 4:8–16).

Te ninikoria tiaki tii teuana aan te raoiroi, ma n aron ae taraia C. S. Lewis: “Te ninikoria bon … rinanin nako te raoiroi n taai ni kakatai. … Birato e nanoanga ma bon te kaangaanga.”¹ Te Uea Erote e rawawata n te bubuti ni kabakuan roroan Ioane te Tia Bwabetito ma e kan kakukureiia “naake ake a tekateka ma ngaia n amwarake” (Mataio 14:9). Te Uea Noa e tauraoi ni kainaomata Abinataai ni karokoa are ana anainano te aomata mairouia ana ibonga aika buakaka a karaoia bwa e na mamaara. (taraa Motiaea 17:11–12). Te Uea Tauro e aki ongeaba n ana taeka te Uea man kawakinan te urubwai n te buaka ibukina e “maakuia aomata, ao e ongeaba ni bwanaaia” (1 Tamuera 15:24). Ni katoka ana kakaitara Iteraera ni maungan Tinai, E kaara te kao ae karaoaki man te koora Aaron, ni mwaninga e mena ia ana taratara (taraa Te Otinako 32). Angiina mataniwi n tautaeka a “kakoaua [te Uea]; ma ibukiia Bwaritaio a aki kaotibure nakoina, n tokina a kakioaki nakon man te tinekaoki: B’a a tangira riki neboakia irouia aomata nakon te neboaki are mairoun te Atua” (Ioane 12:42–43). A kanoaki booki aika tabu ma aekakin katoto aikai.

Ongora ngkai nakon tabeua katoto aika a anainano::

Te moan, Moomon: “Nooria, I taetae ma te ninikoria n iai te kariaiakaki mairoun te Atua; ao I aki maaka te bwai are e na karaoia te aomata; bwa te tangira are e kororaoi e kakioa nako te maaku ni kabane” (Moronaai 8:16; e kairaki ma katuruturuana).
Nibwaai: “Mangaia are I aki koroi bwaai aika bwain aon te aonaaba ake a kan ongora iai aomata, ma I koroi baika a tau ma nanon te Atua ma baika tiaki bwain te aonaaba.” (1 Nibwaai 6:5).
Kaaben Moronaai: “Nooria, Ngai bon Moronaai, mataniwia ami mataniwi. I aki ukoukora te mwaaka ma I kan kamauna. I aki ukoukora ana karinerine te aonaaba, ma mimitongin Atuau, ao inaomataia ma mweraoin abau” (Aramwa 60:36).

E korakora ninikorian Moronaai n uringakina bwa e mena ia ana taratara are e taekinaki ibukina, “Bwa ngke arona bwa aomata ngkai, ao ngkoa, ao n taai aika a na roko a bane ni katotonga Moronaai, nooria, a na bon mamaara mwaakan mone n aki toki; eng, ao te riaboro e na bon akea korakorana iaoia nanoia natia aomata” (Aramwa 48:17).

Burabeti rinanon ririki a aki toki n ekakinako n te kotokoto ni kakaniko. Bukin tera? Ni kaineti ma koroboki aika tabu, aio bukina “taan bure e matoatoa butimwaean te koaua irouia, bwa a rootaki iai.” (1 Nephi 16:2), n aron ana taratara Beretitenti Harold B. Lee, “A rootaki aomata n te bwai ae eti!”² Aroia ni kakaniko, ni bon koauana, te bure e kataia ni kakoaua i bon irouna, n aron Korioa are e a kariaia n te kabane, “I a kaman ataia bwa bon iai te Atua” (Aramwa 30:52). E a anaaki nanon Korioa n ana mwamwanai are e a kakoauai oin ana kewe (taraa Aramwa 30:53).

Taan kakaniko a aki toki ni kabureia burabeti ni kanakoraoan aroia ngkai ke ni bwanikiriniia A kataia n anainano ke ni karawawata naba te Ekaretia ni kakeerikaka ana kainibaire te Atua ni kaboraoia ma kateia ae aki riai, are n ana taeka Unimwaane Neal A. Maxwell, “e na karikirakea kukureiam i bon iroum, n oneamwiin aki nakoraoim i bon iroum”³ ao te rairannano. Kakeerikakan ana kainibaire te Uea ni kaboraoia ma katein te botanaomata ae aki riai—kitanan te Ekaretia. Angiina aro ibuakoia Nibwaite uoua te tienture imwin kawarakia iroun te Tia Kamaiu e moanna ni “kabebetea” te tua, n tangoa ana kibuntaeka Unimwaane Holland.⁴

Ngkai ko ongora n te rongorongo aei man 4 n Nibwaai, tarai bwaai aika ti te arona n ara bong: “Ao e a koro bukina bwa ngke e a bane uabubua ao te bwina te ririki a mwaiti ekaretia n te aba; eng, a mwaiti ekaretia ake a taekinna bwa a ataa Kristo, ma a bon kakewei mwaitin kanoan ana euangkerio, n te aro are a butimwaei aekan nako te buakaka, ao a bon angan are e bareka te bwai ae tabu are e riai n tabuaki ibukin aki tauna. (4 Nibwaai 1:27).

Te bwai ae e riki ni boong aikai! Tabeman membwa a aki ataia ae reke n te bwai ni kamwane ngkana a anaaki nanoia ni butimwaai bwain te aba ke te katei “aia katei aia bakatibu” (D&C 93:39) aika aki boraoi ma katein te euangkerio. Tabeman a teimatoa, ni mwamwanai i bon irouia ao ni kakeaia i bon irouia, bubuti ke n tangiroroia bwa bitiobi a na kakeerikaka te kainibaire iaon beeba ni kariaia nakon te tembora, entootimente ibukin te reirei, beeba ni bubuti n nako ni mitinare. E aki bebete te riki ni bitiobi iaan te aekaki ni karawawata aei. E ngae n anne, n aron te Tia Kamaiu are e katiaka te tembora ni kamanoa tabuna (taraa Ioane 2:15–16), bitiobi n te bong aei a weteaki n ninikora ni kamanoa ana kainibaire te tembora. Bon te Tia Kamaiu are e taku bwa E na kaotia nakoia ana aomata inanon te nanoanga … ngkana a kawakin ana tua ana aomata ao a aki kabareka ana auti ae tabu (taraa D&C 110:7–8).

Te Tia Kamaiu, ara katoto ae kakannato, e kababanea nanona n aki toki iaon Tamana. E tangiriia ao n toro ibukiia Ana aomata ma e taku, “I aki kaeka te kamoamoaki mairouia aomata”. (Ioane 5:41). E tangiriia aomata ake e reireiniia bwa a na Iriiria, ma e aki ukoukora aia bubuti. Ngkana ko karaoa te mwakuri n tangira, n aron kamarurungan te aoraki, te bwaintituaraoi e roko man te bubuti “akea ae ko na tuangnga: (Mataio 8:4; Mareko 7:36; Ruka 5:14; 8:56). N iterana, aio bon totokoan te kinaaki ae koaua n Iriiria n aki tabe ma Ana konabwai n tutuki (taraa Mataio 4:24). E kabuakakaia Bwaretaio ibukin karaoan mwakuri aika raraoi bwa a na nooraki irouia aomata (taraa Mataio 6:5).

Te Tia Kamaiu, bon te aomata ae kororaoi are e maeka ngkoa, are te kabanea n ninikoria. Ni maiuna, e kaitaraki irouia taan bukibuki ma e aki tabe ma aia kakaniko. Bon tii ngaia te aomata ae aki mwaninga n tetaina bwa e mena ia ana taratara. “I aki toki ni karaoi baike E kakatonga iai [te Tama]” (Ioane 8:29; e kairaki ma katuruturuana), ao “I aki ukoukora tauan au taeka, ma I ukoukora tauan ana taeka Teuare e kanakomaiai” (Ioane 5:30).

Imarenan 3 Nibwaai mwakoro 11 ao 3 Nibwaai mwakoro 28, te Tia Kamaiu e kamanena te atu n taeka ae te Tama tao 150 te tai, ni kamatata raoi nakoia Nibwaite bwa E mena ikekei n tei ibukin Tamana. Ao mairoun Ioane mwakoro 14 nakon 17, te Tia Kamaiu e kainetia nakon te Tama tao 50 te tai. E angaraoi ni kawai nako, Bon Ngaia Ana reirei Tamana ae kororaoi. N nooran te Nati bon nooran te Tama (taraa Ioane 14:9). N ongora iroun te Nati bon te ongora iroun te Tama (taraa Ioane 5:36). E reke, inanona, taraakina ae ti te arona ma Tama. Tamana ao Ngaia a babe b riki n teuana (taraa Ioane 17:21–22). E kororaoi ana atatai bwa e mena ia ana taratara.

E bia kakorakoraira ana katoto aika a anainano ni kaitarai aia bwai ni kamwane tabeman ke ara kainikatonga bon mairoura. E bia anganiira te ninikoria n aki maaku ke ni kakukureia naake a na abeaniira. E bia anai nanora ni karaoan ae raoiroi n aki ataaki bwa antai n aron ara kona ao n aki “ukora kamoamoakira mairouia aomata (D&C 121:35). Ao e bia buokiira n uring n tainako Ana katoto ae akea kabotauaia are bon “te moan ao te kabanea ni korakora n tua” (Mataio 22:38). Ngkana tabeman a tangiroaea te kariaiakaki ni kaitara ana tua te Atua, au kantaninga ti na ururingnga bwa antai Ana reirei ngaira, ao e mena ia ara taratara, bon au tataro n aran Iesu Kristo, amen.