Te Katauraoi n te Nakoanibonga
Iroun Beretitenti Henry B. Eyring
Moan ni Kauntira n te Moan Beretitentii
Inanon te katauraoi n te nakoanibonga, “katean te katoto” e kakawaki riki nakon “te angareirei ae tamaroa.”
I kukurei ni bootaki ma ana nakoanibonga te Atua, are e a butanako nakon te aonaaba. I kamoamoa ami onimaki, ami mwakuri, ao ami tataro
Au rongorongon n te tairiki aio bon taekan te Nakoanibonga ae te Aaron. E kaineti naba nakoira ni kabane ni buokan kakoroan nanon ana berita te Uea aio ibukiia ake a taua te bwai are kabwarabawaraaki ni booki aika tabu “bwa te nakoanibonga are inano riki.”1 E aranaki naba bwa te katauraoi n te nakoanibonga. Bon te katauraoi ae mimitong are N nang taekinna n te tairiki aio.
Ana babaire te Uea ibukin Ana mwakuri e kaonaki n te katauraoi. E katauraoa te aonaaba ibukira bwa ti na namakinii kakatai ao taai n te maiu ae mamate. Ngkai ti mena ikai, ti mena n te tai are taekinaki ni booki aika tabu bwa te “tai ni katauraoi.”2
E kabwarabwara te burabeti ae Aramwa bonganan te katauraoi ae korakora ibukin te maiu are aki toki, ike ti na maeka iai n aki toki n taian utu ma te Atua te Tama ao Iesu Kristo.
E kabwarabwara kainnanoan te katauraoi n te aro aei: “Ao ti nooria bwa te mate e roko iaoia aomata, eng, are e a tia n taekinaki iroun Amureki, are bon te mate n rabwata; ma e ngae n anne bon iai te tai are e anganaki te aomata are e na kona iai te aomata n rairananona; ngaia are te maiu aei bon te tai n tarataraki; te tai ni katauraoi n noora te Atua; te tai ni katauraoi ibukin te tai are akea tokina are e a tia n taekinaki iroura, are imwiin mangautiia maate.”3
Ngkai ti a tia n anganaki te tai ni maiu n te maiu ae mamate bon te katauraoi ni kaitibo ma te Atua, te tai ae ti anganaki ni mwakuri n te Nakoanibonga ae Aaron bon te tai ni katauraoira n reiakina arora n anga te buoka ae rang bongana nakoia tabeman. Ngkai E a tia te Uea n anganiira te buoka are ti tangiria n teimatoa raoi n rinanon taian kakatai n te maiu ae mamate, E kanakoa naba buokara n ara katauraoi n te nakoanibonga.
Au rongorongo bon ibukiia ake e kanakoia te Uea n ibuobuoki ni katauraoia naake a tau ni karekea te Nakoanibonga ae te Aaron n aron mwaitia ake iai irouia te Nakoanibonga ae te Aaron. I taetae nakoimi karo. I taetae nakoia bitiobi. Ao I taetae nakoia ake iai irouia te Nakoanibonga ae te Merekitereka ake a onimakinaki bwa iai toaia ao taan reireiniia ataeinimwane ake a mena n te nakoanibonga ni katauraoi.
I taetae ni kamoamoaia ao ni kakaitau ibukimi ngkami ni katobibia te aonnaba ao ake a kakauongo n te tai aio.
I kairua ngkana I aki taekiniia Beretitenti n te mwaanga ao te Bitiobi n au tai n rikirake. I riki bwa te rikan n te roro ae 12 n te mwaanga inanon te mwakoro i mainiku n te United States. E rangi ni uarereke te mwaanga bwa tii ngai ma tariu te ikawai ae kaain te Nakoanibonga ae te Aaron ni karokoa are tamau, are bon ngaia te beretitenti n te mwaanga, e kaoa te mwaane ae ikawai bwa e na kaaina te Ekaretia.
Te aomata ae boou ae rairaki e karekea te Nakoanibonga ae te Aaron ao ma weteana naba e na tararuaia naake iai irouia te Nakoanibonga ae te Aaron. I bon uringa kanga ai aekakin ngkoananoa. I kona ni uringa bwakan baan kai aika tamaroa ngke te aomata ae tibwa rairaki e ira tariu ma ngai ni karaoa te bwai teuana ibukin te aine ae mate buuna. I aki uringa bwa tera te mwakuri anne, ma I uringa te namakin bwa mwakan te nakoanibonga e buokira ni karaoa te bwai are I a ataia rimwi are e taku te Uea bwa ti riai ni kabane ni karaoia bwa e aonga ni kabwaraaki ara bure ao n tauraoi n Noria.
Ngke I uringa te bwai ae riki ngkai, I namakina te kakaitau ibukin te Beretitenti are wetea te aomata ae tibwa rairaki ni buoka te Uea ni katauraoia uoman ataeinimwane are n te taina a na riki bwa taian Bitiobi, ake a tuangaki bwa a na tararuaia aika kananoanga ao aika kainnano ao n tararua naba te katauraoi n te nakoanibonga.
Bon te rikan naba ngai ngke e a mwaing ara utu nakon te uoote ae bubura i Utah. Bon te moan tai are I a tia n namakina mwaakan te kooram ae onrake inanon te Nakoanibonga ae te Aaron. Ni koauana, bon te moan tai ae I noora teuana. Ao imwina bon te moan tai ae I namakina mwaakan ao ana kakabwaia te Bitiobi ae tararua te kooram n ibonga.
E weteai te Bitiobi bwa ana moan tia ibuobuoki n aia kooram ibonga. I uringa bwa e reirei te kooram n tii ngaia—n tabetabe n arona mai imwaina ma tabeman aomata aika mwaatai aika e kona ni weteiia bwa a na reireiniira. E bairei kaintekateka n te kiraatiruum ni kamironron. E katekatekaai n te kaintekateka irarikina mai angataina.
I kona n taraa aon angana ngke e reirei. E taratara naano nakon te taeka ae karauaki n taibinaki raoi ni nen te boki ae karaoaki man kunin te man iaon teuana bubuaniwaena ao ni mwakeni kiibu man koroboki aika tabu ae rang kakamanenaaki are kaukia iaon bubuaniwaena are teaina. I kona n uringa te kukurei ae bati ngkai e karakina taekan te ninikoria man ana boki Taniera ao ana koaua iroun te Tia Kamaiu, te Uea Iesu Kristo.
N na uringa n taainako aron te Uea ni weteiia toam ni mwakuri ma taan katauraoi n te nakoanibonga.
Iai ana Kauntira au Bitiobi aika mwaakaroiroi ao ni bukina aika I aki atai ngkanne, ni mwaitin te tai e weteai iaon te tareboon ni mwengau ao e taku,” Hal I kainnanoiko bwa ko na irai n riki bwa toau ni kakawari. Tetaina, e bon kairai nakon mwengan te aine ae mate buuna ae maeka n tii ngaia n akea kanana inanon ana auti. Ni mwanangara nakon mwengau e katea ana kaa, e kauka te boki ae tabu ao e tuangai bwa bukin tera e tabeakina te aine ae mate buna arei are iai korakorana tiaki tii n tararuaia i bon irouna, ma n taai tabetai n taai aika ana roko, bwa e aonga ni kona ni buokiia tabeman.
Te kakawari riki teuana nakon te mwane ae e a maan n aki roroko n te taromauri. E kaokia au Bitiobi nakoia kaain te Ekaretia. I namakina ana tangira au bitiobi ibukin temanna ae ae taraaki irou bwa te kairiribai ni kakaitara.
N te tai riki teuana ti kawara te mweenga ae iai uoman ataeinaine aika uarereke aika kanakoaki irouia aia karo aika taan manging bwa a na butimwaira n te mataroa. A taku ataeinaine aika uarereke aikai bwa a matu aia karo ma tinaia. E bon tabe n taetae ma ngaia te Bitiobi, moangare ao ni kamoamoa tamaroaia, ae taraana irou bwa tao 10 te miniti ke raka riki. Ngke ti a nako man te mweenga anne, e taetae ma te karaurau, “Arei te kakawari ae nakoraoi. Ataeinaine aika uarereke akekei a na aki kona ni mwaninga ae ti a tia n roko.”
Uoua te kakabwaia are kona n anga teuare te toa n te nakoanibonga are e a ikawai riki bon te onimakinaki ao te mwamwannano. I noora anne ngke e anganaki toan natiu te mwane are e ataibwai riki nakoina n te nakoanibonga. E a tia n riki toana ae e a ikawai bwa te beretitenti n te mition uoua te tai, ao e atia naba ni mwakuri n te aro ni kairiri.
Imwain ae a nako ni kawara teuana te utu e bubuti te tia kairiri ae mwaatai ni kairiri n te nakoanibonga, e butiai bwa e na kawara natiu imwain aia mwananga. A kariaia bwa N na kakauongo. Toana are e a tinia riki nakoina e kaukia ma te tataro, are bubuti iai te buoka. Ao ngkanne e taekina te bwai teuana n aekan aio nakon natiu. “I taku bwa ti na anga te reirei are kanga nanona nakon te utu aei aekan te wewete nakon te rairannano. I taku bwa ana aki butimwaia raoi mai irou. I taku bwa a na butimwaea riki te rongorongo mairoum. Tera namakinan anne iroum?
I uringa te maaku ni matan natiu te mwaane. I kona n tii namakina kakukurein te tai anne ngke e kariaia natiu te onimakinaki.
Tiaki te bwai ae aki baireaki raoi bwa te bitiobi e bootia ni katoaia. Bon man te karaurau ni katauraoi are te toa are ikawai riki e a tia n reiakina aron ana namakin te utu anne are a nang reireiia. Bon man te kairi mai karawa are namakinna bwa tiaki ngaia ae na anga te rongorongo, e na onimakina te kairake ae bon tuai man tataneiai ni weteia natin te Atua aika a ikawai riki nakon te rairannano ao te kamanoaki.
I aki ata mwiin aia kakawari, ma I ataia bwa te Bitiobi anne, te Tia Taua Nakoanibonga ae te Merekitereka, ao te Uea a tia ni katauraoa te ataeinimwaane bwa te mwaane n te nakoanibonga ao n te bong teuana e na bitiobi ngaia.
Ngkai, karaki n tokanikai n aron katauraoan te nakoanibonga n aekan aikai a kinaki iroumi man are kam a tia n noori ao n are kam a tia n tataneiai iai inanon maiumi. Kam a tia n ataia ao n riki bwa Bitiobi, te toa ao taian karo. Kam a tia n noora bain te Uea n ami katauraoi ibukin mwakurin te nakoanibonga are E ataia bwa a mena imwaimi.
Ngaira ni kabane n te nakoanibonga iai tabera ni buoka te Uea ni katauraoia tabeman. Iai bwaai aika ti kona ni karaoi aika bongana riki. Aika a mwakaroiroi nakon kamanenaakin taeka inanon ara anga te reirei e na riki bwa ara bwai ni kakairi ni maiuakinan te reirei.
E rangi ni bongana inanon ara mwakuri n te nakoanibonga kaoakiia aomata nakon Kristo man te onimaki, te rairannano, te bwabetito ao karekean te Tamnei are Raoiroi. Beretitenti Thomas S. Monson, n te katoto, e a tia n anga te reirei are riinga te nano n taian reirei aikanne. Ma ae I ataia ae karaoia ma aomata ao mitinare ao raao n te Ekaretia ngke e tararua te mition i Toronto e kaungaai nakon te mwakuri.
Inanon te katauraoi n te nakoanibonga, “katean te katoto” e kakawaki riki nakon “te anga reirei ae tamaroa.”
Ao anne bukina are booki aika a tabu a rangi ni bongana ni katauraoira n te nakoanibonga. A kaonaki n taian bwai ni kakairi. I namakinna ngkana I kona n nora Aramwa ni karaoa nanon are tuanga te anera ao ni waetata n oki nako n reireiniia aomatan Amonia are a totokoia.4 I kona n namakina te mwaitoro inanon ruun te umwa ni kaikain ngke e tuangaki Iotebwa Timiti iroun te Atua bwa e na korakora bwa e bon tararuaaki.5 Ma iangoan tamnein booki akana tabu akanne, ti kona ni katauraoi n teimatoa inanon ara mwakuri ngkana e taraa ni matoatoa.
Te Tama ke te Bitiobi ke te toa n te kakawari n te mweenga ae ikawai are kaotia bwa e onimakina te tia taua te nakoanibonga ae ataei ae e kona n onea maiuna. E titirakinaki tamau iroun temanna kain Aia Kooram n te Tengaun Ma Uoman n Abotoro ni korea te tiaienti ao te aro iaon te beebwa. Tamau bon te tia rabakau ae kinaaki iaon te Tiaienti ao te tia taua te nakoanibonga ae kakaonimaki. Ma I kona n uringa te tai are anganai te bebwa are koreia ao e taku, “Ikai, Imwain ae I kanakoa aio nakon te Tengaun ma Uoman, I tangiria bwa ko na warekia. Ko na ataia ngkana e eti.” Bon 32 ana ririki n ikawai nakoiu ao e kaangaanga kabotauan wanawanana ao ana ataibwai.
I teimatoa ni kakorakoraaki man te onimakinaki anne mairoun tamau ae rianako ao aomatan te nakoanibonga. I ataia bwa tiaki nanona bwa e aki onimakinai bwa iroun te Atua e kona ao e na tuangai are koaua. Toami ae mwatai e kona ni kakabwaiaia te tia taua te nakoanibonga ae kairake ni katauraoi ike kam kona ni kaota nakoina te aeka ni kakoaua anne. E na buokia ni kakoaua te namakin n tamnei ae rau i bon bukina ngkana e roko bwa n taai tabetai e katoka baina ni kakabwaia ni kamaiua te ataei are taku te taokita bwa e nang mate. Te onimakinaki anne e mwaiti riki buokau iai.
Tokanikaira ni katauraoaia tabeman inanon te nakoanibonga e na roko ni bwanin nakon ae mwaitira aika ti tangiriia. Anne ae na bon koaua ngkana ti riai ni kaetia. Iangoa te tai ngkana te tia taua te Nakoanibonga ae Aaron, tao n taiboran te toa, e kairua ngke e karaoa te otenanti. Bon te bwai ae rawawata. Tabetai te kairua e tangira kaetakina irouia aomata ma karekean te nanobuaka, namakinan te karinanoaki ke bon te totokoaki.
Ko na uringa ana reirei te Uea: “Ti na kaetieti n te tai ae riai ma te etiruru ngkana ti kamwakuraki iroun te Tamnei are Raoiroi, ao ni kaota ngkanne imwina te tangira ae rikirake ibukin te aomata are ti tia ni kaetia, n te aro are ti na aki taraa n riki bwa ana kairiribai.”6
Te taeka ae rikirake iai nanona ae kaokoro ni katauraoaia taan taua te nakoanibonga ngkana a kainnanoa kaetakiia. Te taeka e katautaua rikiraken te tangira are e a kaman mena ikekei. Tera ae “kainnanoaki” bon taekan te rikirake. Ngkami ake ti katauraoia taan taua te nakoanibonga a na nooria ni karaoi kairua ni koaua. Imwaain ae a karekea am tiribure, a riai ni kaman moantaai n namakina am tangira n te aro ae nene. A riai ni kaman namakina am kamoamoa mai inanom imwaain ae a na butimwaea am tiribure.
Te Uea n ti Ngaia E tauia naake n te nakoanibonga are inano riki ma te kantaninga bwa e karinei aia konabwai ao bonganaia Nakoina. Kakauongo nakon taeka aikai, ake a taekinaki iroun Ioane te tia Bwabetito ngke e kaokaki te Nakoanibonga ae te Aaron: “Raona aika ana toro, n aran te Mesia e anga te Nakoanibonga ae te Aaron are tau kingin aia ibuobuoki anera, ao euangerion te rairannano, ao te bwabetito n te kateboaki ibukin kabwaraan bure; Ao e na manga aki kona n anaaki riki mai aonaaba, ni karokoa a manga anga karea riki natin Rewi nakon te Uea inanon te Raoiroi.”7
Te Nakoanibonga ae te Aaron bon reitan te Nakoanibonga ae te Merekitereka ae korakora riki.8 Ngkai te beretitenti n te nakoanibonga ni kabane te Beretitenti n te Ekaretia e tararua naba te katauraoi n te nakoanibonga. Ana rongorongo inanon ririki aika bwaka nako n te nako ni kamaiu e reitaki raoi ma te tua ni uota te euangkerio n rairannano ao te bwabetito nakon maiuia tabeman.
Aia Kooram riikan, taan reirei ao ibonga a aki toki n maroro ni kaniia membwa ni kabane n te kooram nakon te Uea. Beretitentii a katabeia membwa n ibuobuoki n te tangira ao te onimaki. Riikan a kabuta te toa ma te aro ae tamaroa ao te onimaki bwa aonga membwa n namakina te aro ni Kamaiu ao n toki aia kanganga ni kawakin tuua ngkana a karekea te kariki ao te ran.
Taan Reirei ao ibonga a tataro ma toaia ni kakoro bukin tabeia n tararua te Ekaretia, temanna imwin temanna. Ao naka uoman a uaia n tataro ngkana a reiakina kainnanoia ao aia kantaninga atun taian utu. Ngkana a karaoa aei a bon tauraoi nakon te bong ae kakannato ngkana a tararua n aron te karo, n te onimaki, ni bon oin aia utu.
I kakoaua bwa te koraki ake a uaia ni mwakuri n te nakoanibonga a katauraoia aomata ibukin rokon te Uea nakon Ana Ekaretia. E maiu te Atua te Tama. I ataia—I ataia— bwa Iesu bon te Kristo ao e tangirira. Beretitenti Thomas S. Monson bon Ana burabeti te Uea ae maiu. I kakoaua n aran Iesu Kristo ae tabu, amen.