Te Toa—Manga Kabouan te Tamnei
Iroun Cheryl A. Esplin
Kauoman ni Kauntira n te Buraimwari Beretitentii ni Kabuta
E rau te tamnei ao nanora a manga kabouaki. Te berita n te toa bon te berita bwa e na “memena Tamneina irou[ra].”
Te kurubu n ataeinnaine a titirakinai n te taina, “Tera ae ko tangiria ni kan ataia ngke rorora ngkoe?” Ngkana I kona ni kaeka te titiraki anne ngkai, N na kaira te iango aei: “Tera ngke arona bwa rorou ngkami I ota n aron kakawakin te toa n te aro ae tamaroa riki nakon are ngkekei. Tera ngke I ota n te toa n aron are e a tia ni kabwarabwara Unimwaane Jeffrey R. Holland. E taku, ‘Teuana mai ibuakon te kakao are ti karekea n te otenanti n te toa bwa ko na rinanon te maiu n tamnei ni koaua, te reitaki ae tabu, manga kabouan tamneira.’1”
E na kanga te toa “n riki bwa te namakin n te maiu n tamnei ni koaua, te katiteuanaaki, manga kabouan te tamnei, ni katoa wiiki?
Te toa e riki bwa kakorakoran te namakin n te maiu n tamnei ngkana ti kakauongo nakon te tataro n toa ao manga kabaeakira riki n ara berita ae tabu. Ni karaoan aei, ti riai n anga nanora ni katoka iaora aran Iesu Kristo.2 N taekinan te berita aei, Beretitenti Henry B. Eyring e reirei: “Nanon anne bwa ti riai n taraira bwa ngaira Ana bwai. Ti na karimoa moa inanon maiura. Ti na tangira te bwai are e tangiria ke tera te aonaaba are e reireiniira bwa ti na tangiria.”3
Ngkana ti ana te toa, ti berita naba bwa tina “uringnga n tainako”4 Iesu Kristo. N te tairiki imwain are E tauraki n te kaibangaki, Kristo e ikotiia Ana Abotoro ni katobibia ao n anganiia te toa. E urua te kariki, kakabwaia, man taku, “Anaia, kanna, aio kannuringan rabwatau are I anga bwa karea ibukimi.”5 Imwiina e ana te mwangko ni wain, kakabwaia, anganiia Ana Abotoro bwa a na nimma, man taku, “Aio kauringan raraau … , are e kakawaeaki ibukiia aika mwaiti ao ana kakoaua arau.”6
Ibuakoia Nibwaite ao riki ni Manga Kaokan Ana Ekaretia ni boong aika kaitira, E manga kaokia riki bwa ti na ana te toa ni kauringaa Ngaia.7
Ngkai ti kana te toa, ti kakoaua nakon te Atua bwa ti na ururinga Natina n tainako, tiaki tii n tain te otenanti n te toa ae uarereke. Aio nanona bwa ti na reitinako n tara ana banna ni katoto te Tia Kamaiu ao n reirei ni kairi ara iango, ara rinerine, ao ara mwakuri.8
Te tataro n toa e kauringiira naba bwa ti riai ni “kawakin ana tua.”9
E taku Iesu, “Ngkana kam tangirai, ao tou mwiin au tua” 10 Te toa e anganiira te tai ibukin tuoakira ibon iroura ao te tai ni biti nanora ao ara kantaninga nakon te Atua. Te ongotaeka nakon tuua e uota te mwaaka n te euangkerio inanon maiura ao te rau ae korakora ao te maiu n tamnei.
Te toa e karekea te tai ibukin te namakin ni koaua n te maiu n tamnei ngkai ti tara mwakana ni kamaiu ara Tia Kamaiu rinanon Ana mwakuri ni kamaiu. Te tia kairiiri n aia bootaki Kairake n Ataeinnaine e a tibwa ata karekean te korakora are ti karekea ngkai ti mwakuri korakora ni iangoaraoi kanakin te toa. Mwakuri ni kabanei bwaai aika tangiraki n Rikirakem Ibon Iroum, e katea ana kouru bwa e na iangoa taekan te kuna n taromauri n toa ao n taromauri.
Ni katoa wiiki, e taubwiia arona ibon irouna n tain te toa. E uringii kairua ake e karaoi, ao e kamatoa inanona bwa e na karaoa ae tamaroa riki n te wiiki are imwiina. E kukurei bwa e kona ni karaoa ae eti ao ni kaitiakaki. N tanrikaaki nakon are e a tia n rinanona, e taku, “I mwakuri iaon te rairannano ni mwakoron te Mwakuri ni Kamaiu.”
N te Tabati teuana imwiin taraakin ana kekeiaki, e a tabe n namakina te nanokawaki ao te nanououa. E kona n nooria bwa e manga karaoa naba te kairua are mai imwaina ao e a okioki naba, wiiki nakon te wiiki. Ma imwiina e reke te namakin irouna ae onoti are e katinanikua te itera ae bubura n te Mwakuri ni Kamaiu—mwakan ana kamaiu Kristo. E mwaninga taekan ana ibuobuoki te Tia Kamaiu are e karikia n arona are e tangiria ao ni beku iaon ana kona.
N iangoan aei n ana iango, e uringa te wiiki are mai imwaina. E taku: “Namakinan te kukurei e urua te nanokawaki ngke I noria bwa E a tia n anganai tibwangau aika mwaiti ao au konabwai. I nooria ma te kakaitau n aron te konabwai are I karekea ni kainnanou bwa ngke I uarereke ao e bon aki rang ota. I nooria n te bong aei ao I namakinna I aki kona ni katiaa te bwai riki teuana, I kona n anga taeka ni kakorakora nakon raraou. I a tia ni kaota te taotaonannano are e kaota kaitaraau.”
E kainiin: “Ngke I kaitaua te Atua ibukin mwakana ni kamaiu inanon maiu ao I namakina riki te kukurei nakon te waaki n rairannano are I mwakuri inanona. I tara te wiiki are imwiina ma te kantaninga ae boou.”
Unimwane Melvin J. Ballard e reirei aron te karaunnano ao te namakin ni kaitiakaki n te toa are e rinanona. E taku:
“Antai ae e mena ikekei ibuakora ae e aki rau tamneina n ana taeka, iango, ke ana mwakuri, man te Tabati nakon te Tabati? Ti karaoi bwai ake ti rawawata man kan kabwaraaki ara bure iai… Aron karekean kabwaraan ara bure … bon te rairannano man ara bure, ni kaitaraia naake a tia ni bure ke ni kairua nakoira ao ni karekea kabwaraan ara bure ao imwina kamaoaki n nakon te taibora n toa are, ngkana ti rairinanora ma te koaua ao ni kaoki arora nakon aroia ae tau, e na kabwaraaki ara bure, ao e na roko te raunnano inanora. …
“Ngai te tia kakoaua,” e taku Unimwaane Ballard, “bwa iai te tamnei are e ira karaoan te toa are e kabueei nanora man atura nakon waera; ko namakina korakain te tamnei ni kamaoaki, ao te rawawata ae kabebeteaki. Kamanoaki ao te kakukurei e roko inanon are e tau ao e kokoaua nanona ni kan ana te amwarake ae kanan te tamnei.”11
Nanora aika korakai a kona ni kamarurungaki ao ni manga kabouaki tiaki tii ibukin te kariki ma te ran ma e kauringiira naba n ana angakarea te Tia Kamaiu n Irikona ao n raraana ma ibukin te kanikina are e kauringiira bwa E na riki n tainako bwa “te berena ni kamaiu12 ao te ran ae maiu.” 13
Imwiin anganakiia Nibwaite te toa, e taku Iesu:
“Ane e kana te kariki aei e kana rabwatau nakon tamneina; ao ane e mooi n te wain aei e mooi n raraau nakon tamneiu; ao e na bon aki manga oki ni baki ke n taka tamneina, ma e na bon nuai.
“Ao ngkanne, ngke a tia aomata ake a uanao n amwarake ao ni mooi, nooria, a bon kaonaki n te Tamnei.”14
Ma taeka aikai, Kristo e reireiniira bwa te Tamnei e na kamarurunga ao e kaboua tamneira. Te berita n kakabwaia n te toa bwa ti na “[raonaki] n tainako iroun Tamneina.”15
Ngkana I ana te toa, n tabetai I katamneia n au iango te tamnei are e kaota manga utin te Tia kamaiu ma baina aika tangaina, ai aron ae E tauraoi ni butimwaira n ana inga n Tangira. I tangira te korobanna aei. Ngkana I iangoa ni kabutan te toa; tamneiu e tabekakirake ao I kona n ongo ana taeka te Tia Kamaiu: “Nooria, e aroraki baiu ae nanoanga nakoimi, ao ane e roko nakoiu ao N na butimwaia; ao a na kakabwaiaki akana a na roko nakoiu.”16
Naake iai irouia te Nakoanibonga ae te Aaron a tei ibukin te Tia Kamaiu ngkana a tauraoi, kakabwaiaki; ao a bwaatina te toa. Ngkai te nakoanibonga e arora baina n anga te ai aron te Tia Kamaiu are e taakini baina n nanoanga; ni kaoira n tatabemaniira n ana te bwaintangira ae kakaawaki n tangira are e katauraoaki rinanon Ana angakarea ni kamaiu―bwaintangira n te rairannano, kabwarabure, karaunano, ao n onimaki.17
Mwaitin ae ti iangoa kakawakin te toa, mwaitin aika a nano man tabu riki nakoira. Aio are e kaotia te karo ae 96 ana ririki ngke e titiraki natina, “Tamau, bukin tera ngkai ko nako n taromauri? Ko aki nooraba, ko aki kona n ongo, e kangaanga te mamananga iroum. Bukin tera ko nako n taromauri?” E kaeka te karo, “Ngkana tain te toa. I riai n nako n toa.”
Ti bia ngaira n tatabemaniira n roko nakon bootakin te toa n tauraoi ni karekea “te namakin ni koaua n te tamnei, te reitaki ae tabu, manga kabouan tamneira.”18
I ataia bwa Tamara are i Karawa ao ara Tia kamaiu a maiu. I kakaitau ibukin te toa ni karekea te namakin n Aia tangira ao ni karekea te Tamnei. N aran Iesu Kristo, amen.