I Aonga n Atai Bwaai aikai I Bon Irou.
Iroun Unimwane Craig C. Christensen
Man te Beretitenti n te Itingaun
N reirei i bon ibukira bwa ana euangkerio Iesu Kristo e bon koaua e kona n riki bwa teuana te kabane ni korakora ao ni kakukurei n taneiai n te maiu.
Tariu aika kam tangiraki, ti teimatoa ni kaungaaki man ana banna ni katoto ao ana mwakuri n te nakoanibonga Beretitenti Thomas S. Monson. N tai aika tibwa nako, tabeman riikan a titirakinaki, “Tera ae ko mataiakinna riki iroun Beretitenti Monson?” Temanna te riikan e kauringa aron Beretitenti Monson, ngke e uarereke, e anga ana bwaintangira nakoia raoraona ake a kainnano. Temanna e taekina aron Beretitenti n tabeakin kainnanoia aine ake a tia ni mate buuia n ana uoote. Te kateniman e katoutoua atuna bwa e weteaki bwa te Abotoro ngke e moan uarereke ao e a tia ni kakabwaiaia aomata ni katobibia te aonaaba. Imwina te ataeinimwane temanna e taku, “Te bwai ae I rang mataiakinna riki iroun Beretitenti Monson bon ana koaua ae matoatoa.”
Te koaua, ti bane n tia n namakina ana kakoaua ae onoti te burabeti iroun te Tia Kamaiu ae Iesu Kristo ao kabaeakina n tainako n iriira ana wirikiriki te Tamnei. Ma ni katoai bwaai ake e rinanona e tibwai, Beretitenti Monson e kaoira ni maiuakina te euangkerio ae bwanin riki ao n ukeuke ao ni kakorakorai oin ara kakoaua i bon iroura. Uringnga te bwai are e taku man te bwabete aei tabeua te maungatabu n nako: “N te aro bwa ti aonga n totokoi ananinano nakon te kawai ae bure … ti riai n iai oin ara koaua. Tao ngkoe 12 ke 112—ke n taabo nako imarenana—ko kona n ataia i bon iroum bwa ana euangkerio Iesu e koaua.”1
E ngae ngke au rongorongo n te tairiki aei e kairaki nakoia naake a kaan riki nakon 12 nakon 112, reirei ake I tibwai a kaineti nakoia ni kabane. Ni kaekaan ana maroro Beretitenti Monson, N na titiraki: Kam ataia n tatabemani ngkami bwa te euangkerio e koaua? Ti kona n taekinna ma te aki nanokokoraki bwa ara koaua bon mai iroura? N taekina riki ana taeka Beretitenti Monson: “I kamatoa bwa karekean te koaua ae matoatoa iroun ara Tia Kamaiu ao Ana euangkerio e na kawakiniko man te bure ao te buakaka are katobibiko. … Ngkana ko tuai ni karekea oin am koaua, bwa aia koaua tabeman a na bon uotiko nakon ae rarora.”2
I Atai Bwaai Aikai I Bon Irou
Reiakinana i bon iroura bwa ana euangkerio Iesu Kristo are e kaokaki e koaua e kona n riki bwa te kabanea ni korakora ao ni kakukurei n namakin ni maium. Ti kona ni waaki mai iaon aia koaua tabeman—n taekinna, n aron are a karaoia taan buaka, “Ti bon aki nanououa bwa a ataa aio tinara.”3 Aio te kawai ae tamaroa ni waakina ara koaua, ma ti riai ni buokiia bwa a na rikirake n te itera anne. Ni kakorakoraira ni maiuakina te euangkerio, akea riki te bwai ae e kakawaki nakon karekean ao kakorakoraan oin am kakoaua. Ti riai ni bane ni kona n taekinna, n aron Aramwa, “I atai bwaai aikai i bon irou.”4
“Ao kam kanga n taku bwa I atai koauaia?” e reitia Aramwa. “Nooria, I taku nakoimi bwa a kaotaki koauaia nakoiu iroun tamnein te ?atua ae tabu. Nooria, I a tia n aki mamatam ao n tataro inanon bong aika a mwaiti bwa I aonga n atai bwaai aikai i bon irou. Ao ngkai I bon atai irou bwa a akoaua.”5
I Kan Noori Bwaai ake E a Tia n Noori Tamau
N aron Aramwa, Nibwaai e roko naba irouna te koaua i bon irouna. Imwiin ana kakauongo nakon tamana n taekin bwaai ake e rinanona n te maiu n tamnei aika a mwaiti, Nibwaai e tangiria n atai bwaai ake e atai tamana. Aio e raka riki nakon bon ti te kan atatai—bon te bwai are e bwaruia ao ni kan mooi iai.” E ngae ngke he bon rangi n ataei, ma e bon rangi ni korakora rabwatau, ao ni korakora naba nanou ni kan atai kanoan ana bwai te Atua aika raba,6 man mwaakan te Tamnei ae Raoiroi.”7
N aron Nibwaai “tekateka man uring baike inanou ao e uotai nako Tamnein te Uea, nako taubukin te maunga ae moan te rietata,” ike e titiraki iai, “Nooria, tera ae ko tangiria?” Ana kaeka e bebete: “I kan noori bwaai ake e a tia n noori tamau.”8 Ibukin nanona ni kakoaua ao ana mwakuri korakora, Nibwaai e kakabwaiaaki n te bwai ae korakora. E karekea te kakoaua n bungiakin, maiun, ao maten te Tia Kamaiu Iesu Kristo; e noora waeraken ana Boki Moomon ao Kaokan bwai n te euangkerio n te kabanea ni bong—ni kabane n tokin ana kan atatai i bon ibukina.9
Bwaai aika e rinanona aikai ma te Uea e katauraoa Nibwaai ibukin te kakaitara ao kakaewenako ake e na kaitarai n te tai ae e waekoa. A karikia bwa e na aki konamaki n tei ni matoa ngkana tabeman man ana utu a rootaki. E aki kona ni karaoa aei ibukina bwa e reiakinna ibon irouna ao e ataia ibon irouna. E a tia ni kakabwaiaaki n oin ana koaua.
E na Butiia te Atua
N aekan Nibwaai, te Burabeti Iotebwa Timiti ngaia naba “e rang n ataei” ngke e wirikirikiaki ana iango n iangoa te koaua n te maiu n tamnei. Iroun Iotebwa, bon te tai ae “korakora te mwengabuaka iai,” ni katobibiaki n kauntaba ao rongorongo aika aki matata n taekan aro. E tangiria n ataia bwa te ekaretia ra ae eti.10 Kaungaaki man taeka aikai n te Baibara: “Ngkana akea ana rabakau temanna i buakomi, ao e na butiia te Atua,”11 e karaoia i bon irouna bwa e na karekea te kaeka. Ibukin ana onimaki ao ibukina bwa te Atua iai ana mwakuri ae e onoti ibukina bwa e na karaoia, Iotebwa e karekea te mii ae mimitong n noora te Atua te Tama ao Natina, Iesu Kristo, ao n reirei i bon irouna n te bwai are e na karaoia.
Ko noria n te banna are e rinanona Iotebwa ko kona ni kataia ni karekean ke ni kakorakoraan oin am koaua? Iotebwa e kariaia koroboki aika a tabu bwa e na riinga nanona. E iangoia raoi n te aro ae nano ao e karaoi n oin ake a riki nakoina. Imwina e karaoa are e a tia n reiakinna. N tokina bon te Moan Mii ae mimitong—ao bwaai ni kabane ake a roko imwiina. Te Ekaretia aei e bon kuneaki iaon reirei ake—ikotaki ma te 14 n ririki n ataeinimwane ae te tia kawakiniman—e kona n butiia te Atua” ao e karekea te kaeka nakon ana tataro.
Ngaia are Tera te Kakoaua?
N tabetai ti ongo irouia membwa n te Ekaretia n taekina aia koaua n te euangkerio bon aia bwai ae moan te kakaawaki. Bon ana bwaintangira ae tabu te Atua are e roko nakoira man mwaakan te Tamnei ae Raoiroi. Bon te rau, n aki nanokokoraki are ti karekea ngkai ti kamatebwai, tataro, ao ni maiuakina te euangkerio. Bon te namakin iroun te Tamnei ae Raoiroi ni kaota ana kakoaua nakon tamneira bwa te bwai are ti reiakinna ao ni karaoia e bon eti.
Tabeman aomata a taekina te koaua kanga ai aron mwiin te tooti—are e maiu ke e mate, kona karekea te koaua, ke ko aki. N koauana, te kakoaua ai aron riki te aroka are e rikirake inanon mwaneka aika kakaokoro n ikawairake ao n rikirake. Tabeua aroka aika rietata iaon te aba a kuneaki n te Redwood National Park i maeaon te United States. Ngkana ko tei iaan aroka aika totoakaei aikai, ko na mimii bwa ni katoai kaai a riki man te koraa ae bingiingi. Aron naba ara koaua. E ngae ngke a waaki man te namakin n te maiu n tamnei ae ti teuana, a rikirake ao a ikawairake inanon te tai rinanon kakamwarakeaia n tainako ao rinanon taneiai n te maiu n tamnei.
E bon aki kakubanako, imwina, bwa ngke te burabeti Aramwa e kabwarabwara aron rikiraken te koaua, e taekina te aroka are e rikirake man te kora. “Ngkana ti angan te koraa nnena, bwa e na unikaki inanom, nooria, ngkana bon te koraa ni koaua, ke te koraa ae raoiroi, ngkana ko aki tewenakoa n am kakewekewe, … e na bon rikirake inanom, ao ngkana ko namakini namakin aika a kakamwakuri, kam na kangai inanomi―E na bon riai bwa te koraa ae raoiroi aio, ke bwa e raoiroi te taeka, bwa e moanna ni kabubura tamneiu, eng, e moanna ni kangkang irou.”12
Aio n tabetai moan waakin ara koaua: ma ana taeka te Atua ae tabu, kakukurei, kakoaua n namakin bwa a taekinaki a koaua. E ngae n anne, n tamaroan namakin aikai, bon tii te moan waaki. Am mwakuri ni karikirakea am koaua e tuai n tia—ae raka riki nakon te mwakuri n rikiraken te kaiuraura e na tia ngkana moan bwebwena e teberake mai aontano. Ngkana ti baka n aki nooria ke n totokoi moan wirikiriki aika moan roko n te maiu n tamnei, ngkana ti aki kamwarakei man reitinako ni kamatebwai koroboki aika tabu ao n tataro n ukoukori riki namakin ma te Tamnei, ara namakin a na bua ao ara koaua ana maunanako.
Ngke e kateia Aramwa: “Ngkana ko mwanuokina te kai, man aki iangoa kamwarakeana, nooria e na bon aki reke wakaana, ao ngkana e roko kabuebuen taai ma ni kabuekia, ibukina bwa akea wakaana e na bon rai, ao ko na routia man tewenakoa.”13
N angiin bwaai aika ririki, ara koaua a na rikirake n aron rikiraken te aroka: teutana imwiin teutana, n te aro are ko kuri aki kona n noria, i mwiin ara tararua ae teimatoa ao ara mwakuri korakora. “Ma ngkana kam kamwarakea te taeka, eng, kamwarakea te kai ngkana e waaki ni maiu, n ami onimaki ma te botumwaaka ae korakora, ma e tataonannano, n ingainga n nakon uaana; ao e na bon karika wakaana; ao nooria e na riki bwa te kai ae bwebwerake nakon te maiu ae aki totoki.”14
Ngkai Bon te Tai; N te Bong Aei bon Bongina
Oin au koaua e waaki ngke I kamatebwai ao n iangoi reirei ake a reke n ana Boki Moomon. Ngke I katorobubua ni butiia te Atua n te tataro n nanorinano, te Tamnei ae Raoiroi e kakoaua inanou bwa te bwai are I warekia e bon koaua. Moantain ataakina e kairaki nakon au koaua n euangkerio ake tabeua a koaua, ibukina ngke e reirei Beretitenti Monson: “Ngkana e eti bwa e koaua ana Boki Moomon, ngkanne ira are bon te burabeti ni koaua Iotebwa Timiti are e noora te Atua te Tama ae Akea Tokina ao Natina, Iesu Kristo. E rimwiin naba are te euangkerio e kaokaki ni boong aika kaitira rinanon Iotebwa Timiti—n ikotaki ma kaokan te Nakoanibonga ae te Aaron ao te Merekitereka.”15 Man te bong anne, I a tia ni karekei namakin aika a mwaiti iroun te Tamnei ae Raoiroi are e a tia ni kamatoa nakoiu bwa Iesu Kristo bon te Tia Kamaiuia te aonaaba ao Ana euangkerio are e kaokaki e bon koaua. Ma Aramwa, I kona n taekinna ma te koaua bwa I atai bwaai aikai i bon irou.
Raoraou aika kairake, ngkai te tai ao n te bong aei n reirei ken i manga kamatoa ibukira bwa e koaua te euangkerio. Ngaira n tatabemaniira iai ara mwakuri aika tin a karaoi. Ni katian te mwakuri anne, ao ni kamanoaki man ana anainano te aonaaba ake a taraa ni kaoti n akea bitakiia ti riai ni karekea ana onimaki Aramwa. Nibwaai, ao Iotebwa Timiti ae kairake ngke karekea ao ni karikirakea oin ana koaua.
N aron te kairake n riikan are I moan taekinna, I mataiakina Beretitenti Monson ibukin ana koaua. Ai aron te kai-uraura ae rikirake n abwabwaki, n aron ana koaua Beretitenti Monson e a ia n rikirake ao n tamaroa riki ni katoabong. Ti kona n ataia i bon iroura, n ai aron are e reke iroun Beretitenti Monson, bwa Iesu Kristo bon ara Tia Kamaiu ao te Tia Kamaiua te aonaaba, bwa Iotebwa Timiti bon te burabeti ibukin Kaokan bwai, n ikotaki ma ana nakoanibonga te Atua are e kaokaki. Ti uota te nakoanibonga ae tabu. Ti bia reiakin bwaai aikai ao n ataia i bon iroura bon au tataro ae nanorinano n aran Iesu Kristo, amen.