“Tuun 28–Turai 4. Reirei ao Berita aika Tabu 71–75: ‘Akea Te Bwai ni Buaka ae Karaoaki Bwa E na Kaaitarako Ae E na Tokanikai,’” Nakomai Iriirai—Ibukiia Aomata n Tatabemaniia ao Utu: Reirei ao Berita aika Tabu 2021 (2020)
“Tuun 28–Turai 4. Reirei ao Berita aika Tabu 71–75,” Nakomai, Iriirai—Ibukiia Aomata n Tatabemaniia ao Utu: 2021
Kaan ma Nanon te Tia Kawakin Tiibu, iroun Simon Dewey
Tuun 28–Turai 4
Reirei ao Berita aika Tabu 71–75
“Akea Te Bwai ni Buaka ae Karaoaki Bwa E na Kaaitarako Ae E na Tokanikai”
E reirei Unimwaane Quentin L. Cook “Ana kakairi te Tamnei ae Raoiroi n angin te tai e raona te kamatebwai ae onoti ni koroboki aika tabu ao te tataro n te mweenga” (““Te Nano ao te Kabanea n Rairaki nakon Tamara are I Karawa ao te Uea ae Iesu Kristo,” Ensign ke Riaona, Nob. 2018, 10).
Korei Am Namakin
Mangke te ataeinimwaane ngaia, Iotebwa Timiti e kaitarai taan kabuakaka—aika kairiribai—ngke e kataia ni karaoa ana mwakuri te Atua. Ma tao e bon rangi ni kauruakinano ni banen 1831 ngke Ezra Booth e moana kabuakakan te Ekaretia nakoia aomata, ibukina bwa te tia kabuakaka bon kain te aro ngkoa. Ezra e a tia n noora Iotebwa ni kabongana mwaakan te Atua ni kamaoa bain te aine. E a tia ni kaoaki bwa e na raona Iotebwa n te moan tutuo n te aba are Tion i Missouri. Ma e a tia n bua ana onimaki ao, n ana waaki n kabuakaka te Burabeti, e boreti tabeua reeta n ana Nutibeeba Ohio. Ma ana waaki e taraa n kauekea te: “namakin n aki iraorao … are e riki n kaitara te Ekaretia” n te tabo anne (Reirei ao Berita aika Tabu 71, atuun te mwakoro). Tera ae a riai ni karaoia kaain te aro ma te aekaki aei? E ngae ngke e kakaokoro kaekan bwaai nako, e taraa n ae n angin te tai—n ikotaki ma te waaki aei n 1831—mwakoron ana kaeka te Uea bon kamanoan te koaua ao ni kaeti kairua man “tataekinan [te] euangkerio” (te kibu 1). Eng, ana mwakuri te Uea e na iai taan kabuakaka, ma n te kabanea n tai ”akea te bwai ni buaka ae karaoaki bwa e na [kaaitaraa] ae e na tokanikai” (te kibu 9).
Taraa “Ezra Booth and Isaac Morley,” Revelations in Context, 134.
Iango ibukin te Kamatebwai i bon Iroum ni Koroboki aika a Tabu
Te uea e na kakonakia taan kabuakaka Ana mwakuri n Oin ana tai.
Ti kona n tabeiaianga ngkai ti ongo bwanaaia aomata ni kabuakaka ke n kabareka te Ekaretia ke taan kairiiri, riki ngkana ti maaku bwa nake ti kinaia man tangiria a na kona n rootaki ni kabukaka akanne. Ngke e riki naba aei i Ohio n 1831 (taraa atuun te mwakoro n Reirei ao Berita aika Tabu 71), ana taeka te Uea nakon Iotebwa Timiti ao Sidney Rigdon bon te onimaki, tiaki te maaku. Ngkai ko kamatebwaia Reirei ao Berita aika Tabu 71, Tera ae ko nooria ae karikirakea am onimaki iroun te Uea ao Ana mwakuri? Tera am namakin n taekan te kaetieti are e anga te Uea nakoia Ana toro n te waaki aio?
Taraa naba Robert D. Hales, “Christian Courage: The Price of Discipleship,” Ensign ke Riaona, Nob. 2008, 72–75; Jörg Klebingat, “Defending the Faith,” Ensign, Tebetembwa. 2017, 49–53.
Bitiobi bon taan tararua ana waaki abanuean te Uea n te maiu n tamnei ao n rabwata.
Ngke e weteaki Newel K. Whitney bwa e na beku bwa te bitiobi n te Ekaretia, a kaokoro teutana tabena ma tabeia bitiobi n taai aikai. N te katooto, Bitiobi Whitney e tararua taian anganano ao te kariaia n maeka i Missouri, n te aba are Tion. Ma ngkai ko wareka riki rongorongon nakoana ma tabena n Reirei ao Berita aika Tabu 72, ko kona n noori tabeua baike a kakaraoi naba bitiobi n taai aikai—a karaoaki man te nano, e ngae ngke a kaokoro, tabe aikai. Te katooto, baikara kawai ake ko “anga rongorongon am mwakuri” nakon am bitiobi? (kibu 5). N te aro raa ae am bitiobi e “kawakina ana bata ni kaikobwai te Uea” ao n tararuaa aia angabwai kaain te uoote? (taraa kibu 10, 12). Ni baikara ae e a tia ni buokiko iai te bitiobi?
Taraa naba Gospel Topics, “Bishop,” topics.ChurchofJesusChrist.org.
Newel K. Whitney e tabe ibukin ana bata ni kaikobwai te bitiobi.
I kona n kakaei taai n tibwaua te euangkerio.
Ngke a oki Iotebwa Timiti ao Sidney Rigdon man aia mition ae kimototo ibukin karaoan mwin te uruaki are e karaoia Ezra Booth (Taraa Reirei ao Berita aika Tabu 71), e tuangia te Uea bwa a na okira aia mwakuri n rairan te Baibara (taraa Bible Dictionary, “Ana Rairairi Iotebwa Timiti”). Ma E tangiriia naba bwa a na reitinako n tataekina te euangkerio. Ngkai ko wareka Reirei ao Berita aika Tabu 73, iangoia bwa ko na kanga ni karika tataekinan te euangkerio bwa e na teimatoa n, “angaraoi” (te kibu 4)—ke n ae koaua—iteran maium ibuakon tabem ake tabeua.
Reirei ao Berita aika Tabu 75:1–12
Te Uea e kakabwaiaia nake a kakaonimaki n tataekina Ana euangkerio.
Kaekaan te wewete “naako ngkami ni kabuta te aonaba” n tataekina te euangkerio (Reirei ao Berita aika Tabu 68:8), e mwaiti mitinare aika kakaonimaki ake a ukora karabaaban ootaia bwa tera ae e kantaningaia te Uea ni kakoroa bukin te wewete aei. Tera taeka ao kibun taeka aika ko kunei n Reirei ao Berita aika Tabu 75:1–12 ae kaotako n aron tataekinan te euangkerio? Tera kakabwaia ae e berita te Uea nakoia mitinare aika kakaonimaki? Iangoia bwa a kanga kaetieti ao kakabwaia aikai n uaana nakoim ngkai ko tibwaua te euangkerio.
Iango ibukin Kamatebwai ni Koroboki aika Tabu n te Utu ao te Bootaki n Utu n te Tairiki
-
Reirei ao Berita aika Tabu 71.Tera ae a tuangaki Iotebwai Timiti ao Sidney Rigdon bwa a na karaoia ngkana iai tabeman aika a kabuakaka te Ekaretia ao taan kairiri? Ti na kanga n “katauraoa te kawai” ibukiia aomata bwa a na karekea ana kaotioti te Atua? (Reirei ao Berita aika Tabu 71:4).
-
Reirei ao Berita aika Tabu 72:2.A kanga bitiobi ni kakabwaiaia ara utu? Tera ae e a tia ni tuangiira ara bitiobi bwa ti na karaoia, ao ti na kanga ni kamatoa? Tao a kona am utu ni karaoa te reta n karabwa am bitiobi ibukin ana beku.
-
Reirei ao Berita aika Tabu 73:3–4.A na buokaki am utu man reiakinan ana Rairairi Iotebwa Timiti n te Baibara? (taraa Bible Dictionary, “Joseph Smith Translation”). Ko kona n tarai tabeua kibu ake a kaetaki n Ana rairairi Iotebwa Timiti ao marooroakin koaua aika kaakawaki are e kaoti te Uea rinanon te Burabeti. Ibukin te katooto, taraa ana Rairairi Iotebwa Timiti n Karikani Bwaai 14:25–40 ao Karikani Bwaai 50:24–38 n te Bible appendix; tabeua bwaai aika a na taraaki i nano n Mataio 4:1–11; ao Ruka 2:46, bwai ae na taraaki i nano c.
-
Reirei ao Berita aika Tabu 74:7.Tera ae e reireinira te kibu aei n taekan Iesu Kristo ao ataei aika a uarereke?
-
Reirei ao Berita aika Tabu 75:3–5, 13, 16.Ko kona n ibuobuoki ni kaotaa am utu bwa e tangirira te Uea bwa ti na beku Irouna man marooroakinan te kaokoro imarenan “aoriori” ao “[mwakuri] ma [korakorara].” Tao ko kona n rinei tabeua taabe n te auti ao kaoia kaain te utu bwa a na katea aron karaon taabe aikai ma te aoriori ao imwina ma korakoraia ni kabane. Ti na kanga ni beku iroun te Uea ma korakorara ni kabane? Ni kaeineti ma Reirei ao Berita aika Tabu 75:3–5, 13, 16, tera ae E berita nakoia Ana toro aika a kakaonimaki?
Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Te anene ae tamaroa: “Waaki Nako,” Anene n Taromauri, nambwa. 243.
Kanakoraoan Am Kamatebwai I Bon Iroum
Kakaei taeka ao kibun taeka aika kaunganano. Ngkai ko wareware, te Tamnei e na uoti tabeua taeka ke kibun taeka bwa ko na noori. Iangoa korean tabeua taeka ke kibun taeka man Reirei ao Berita aika Tabu 71–75 ae kaungako.
Tamnein te ataeinimwaane ma ana Tia kairiiri n te nakoanibonga iroun D. Keith Larson