Kristo ma te Rorobuaka are Kaubwai,, iroun Heinrich Hofmann

Turai 19–25

Reirei ao Berita aika Tabu 81–83

Ike “E Mwaiti ae e Anganaki E Mwaiti ae Kainnanoaki”

Ngkai ko kamatebwaia Reirei ao Berita aika Tabu 81–83, korei reirei ake a na kona ni buokiko ni karaoa ae raoiroi ibuakoia am utu, raoraom, ao tabeman.

Korei Am Namakin

Ni Maati 1832, te Uea e wetea Jesse Guse bwa ana kauntira Iotebwa Timiti n te Beretitentii n te Nakoanibonga ae Rietaata (ngkai e aranaki bwa te Moan Beretitentii). Reirei ao Berita aika Tabu 81 bon te kaotioti nakon te Tari Gause, are e reireinna n nakoana ae boou man berita nakoina kakabwaia ngkana e beku inanon te kakaonimaki. Ma Jesse Gause e bon aki beku ma te kakaonimaki. Ngaia are Frederick G. Williams e weteaki bwa e na onea mwina, ao aran te Tari Gause e oneaki nakon aran te Tari William n te kaotioti aei.

E taraa n ae te bwai ae uarereke, ma e kaota te koaua ae kakaawaki: Angiin kaotioti ake n Reirei ao Berita aika Tabu a kaeinetaki nakoia aomata aika a onoti, ma ti kona n taainako n ukori kawai n kabotaui nakon maiura (taraa 1 Nibwaai 19:23). Ana reirei te Uea nakon Frederick G. Williams ni “kakorakorai bubuaniwae aika aki konamaki” a kona n kaira ara iango nakoia aomata ake ti kona n kakorakoraia (Reirei ao Berita aika Tabu 81:5). Ana kauring te Uea nakoia membwa n te Kambwana n Katiteuanaaki n “kabaeia ma te berita ae tabu aei” bwa a aonga n karekei kainnanoia e kona n kairi ara iango nakon oin ara berita aika tabu. Ao ana berita te Uea bwa e na bon “bae ngkana kam karaoa ae I taku” e kona n kauringiira Ana berita nakoira ngkana ti ongeaba (Reirei ao Berita aika Tabu 82:10, 15). Ao anne arona, bwa te Uea e a tia n taekinna, “Te bwai are I taekinna nakon temanna I taekinna nakoia ni kabane” (te kibu 5).

Taraa “Newel K. Whitney and the United Firm,” “Jesse Gause: Te Kauntira nakon te Burabeti,” Revelations in Context, 142–47, 155–57.

Iango ibukin te Kamatebwai i bon Iroum ni Koroboki aika a Tabu

Reirei ao Berita aika Tabu 81

I kona ni kakaonimaki ni karaoan tibwangau are e anganai te Uea.

Ko titiraki n tabetai bwa ko na kanga ni kakoroa nanon tabem aika kakaawaki ni maium? Bwa te kauntira nakon te Burabeti Iotebwa Timiti, Frederick G. Williams e bon mwaiti tabena aika a kakaawaki. N te mwakoro 81, te Uea e anganna reirei bwa e na kanga ni katiai tibwangana. Tera ae ko kunea n te mwakoro aei are e kona n ibuobuoki nakoim ni kakoroa nanon tabem ake ko anganaki iroun te Uea?

Aikai tabeua titiraki aika a na buokiko n iango te kibu 5:

• Tera tabeua kawai are te aomata e kona n “mamaara”? Tera ae nanonaki ni “buokakiia” naake a mamaara?

• Tera ae kona n karika bain te aomata bwa a na “tine”? Ti na kanga n “tabekii rake” baai akanne?

• Tera nanon te kibun taeka ae “bubuaniwae ae aki konamaki”? Ti na kanga n “kakorakoraia” naake aki konamaki bubuaniwaeia?

Tao kamatebwaian te kibu aei e na uotia tabeman nakon ami iango ake ko kona ni “buokiia,” “tabekiia rake,” ke n “kakorakoraia.” Tera ae ko na karaoia n tobwai kainnanon te aomata anne?

Te Moan Beretitentii: Sidney Rigdon, Iotebwa Timiti, Frederick G. Williams

Reirei ao Berita aika Tabu 82:1–7

Te Uea e kaoai bwa n na rairanano man mwanuokin au bure.

Ngkai ko wareka Reirei ao Berita aika Tabu 82:1–7, iangoa korean uoua rinanin baika ko reiakin: te kauring ibukin te bure ao koauan te kabwara bure. A na kanga koaua aikai n buokai n kaitarai ana kariri te tia kakaitara?

Reirei ao Berita aika Tabu 82:8–10

Oin Tuua bon kamaiuau ao kamanoau.

Ngkana ngkoe—ke temanna ae ko kina—e a tia n titiraki bwa bukin tera te Uea e anga tuua aika a mwaiti, Reirei ao Berita aika Tabu 82:8–10 e kona n ibuobuoki. Tera nonoori n kiibu aikai are kona n buokiko n kabwarabwara nakon temanna bwa bukin tera ko rineia bwa ko na tou mwiin tuua nako? Ko kona naba n taraia bwa a kanga Ana tua nako ni bita maium. Tera ae ko reiakinna ibukin te Uea ngkai ko wareka te kibu 10?

Taraa naba Reirei ao Berita aika Tabu 130:20–21; Carole M. Stephens, “If Ye Love Me, Keep My Commandments,” Ensign or Riaona, Nobembwa. 2015, 118–20.

Reirei ao Berita aika Tabu 83

“Aine ake a mate buuia ao ataei ake akea aia karo a riai ni buokaki.”

N Eberi 1832, n aron are kairaki iroun te Uea, Iotebwa Timiti e mwananga inanon e kaania 800 te maire n kawariia Aomata aika Itiaki ake a ikotaki i Missouri (taraa Reirei ao Berita aika Tabu 78:9). Teuana te tabo are e kawaria iai kaaina aika aine ake a tia n mate buuia ake a kaikawaiia natiia n tii ngaiia. I buakoia aine aikai bon Phebe Peck ao Anna Rogers, ake a bon kinaaki raoi iroun te Burabeti. I Missouri n 1830 tabun, tuan te aba e anganiia aine ake a tia ni mate buuia te bwaibwai ae memere nakon aia bwai kainnabaia ake a tia n motirawa. Tera ae ko reiakinna man mwakoro 83 iaon ana namakin te Uea ibukiia aine ake a tia n mate buuia ao ataei ake akea aia karo? Iai ae ko kina ae rinanon aei are e kona n kakabwaiaaki man am tangira ao am tobwa?

Taraa naba Itaia 1:17; Iakobo 1:27.

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Reirei ao Berita aika Tabu 81:3.Ko kona n angania kaain te utu beeba aati ao kaoiia bwa a na korea ke n korea tamnein te bwai are a tangiria n tataro ibukina. Marorooakinna bwa tera ae nanonaki n te tataro “n tainako, n kabaibati ao i nanom”

Reirei ao Berita aika Tabu 81:5.N reiakini reirei ake n te kibu aei, a kona kaain te utu n tibwauai katooto ngke a namakina te “mamaara” ke “te aki konamaki” ao temanna e buokiia man kakorakoraiia. Ko kona n matakuakin witeo iaon buokaia tabeman, n aron “Works of God” or “The Miracle of the Roof” (ChurchofJesusChrist.org). Marooroakinna bwa a na kanga am utu n beku i marenaia n aanga aika bebete.

Reirei ao Berita aika Tabu 82:8–10.Tao te takakaro ae uarereke e kona n buoka am utu n namakina te karabwarabwa ibukin ana tua nako te Atua. Temanna kaain te utu e kona n anga kaetieti n buoka temanna kaain te utu are e kabaeaki matana n karaoa te kabuki ke n karaoa te takakaro ae kaangaanga. Iangoa te waaki ae kakukurei ao ae kaunga! Imwina marooroakinna bwa a kanga a na tua nako te Atua n titebo ma kaetieti ake n te takakaro anne.

Reirei ao Berita aika Tabu 82:18–19.Tera ae e kona kaain te utu n “karikirakea ana tarena teuanne [ke neienne]” ao n “karekei riki tabeua tarena”? E na rang kaunga karaon te kaoti tarena n te utu. Iangoi kawai are ko na kaairi tarena ake aki bati n nooraki (n aron ana bwai n tituaraoi te tamnei; taraa Reirei ao Berita aika Tabu 46:11–26). Ti na kanga n kabonganai ara tarena ma tibwauai ara bwai ake iai iroura n kakabwaiaia ara utu ao kaain rarikira? Tera ae nanonaki n kabonganaan ara tarena “ma te mata teuana nakon mimitongin te Atua”?

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae tamaroa: “Have I Done Any Good?” Hymns, nambwa. 223; taraa “Iango ni Kanakoraoa Am Kamatebwai n Utu ni Koroboki Aika Tabu.”

Kanakoraoan Ara Anga Reirei

Anga titiraki aika e kakairi nakon te mwakuri. Tarai titiraki aika a na kairoroia kain am utu n noori anga ake a na kona ni maiuakina te euangkerio ma te nano ae bwanin. “Titiraki aikai bon tiaki titiraki aika a na marorooakinaki; ma bon ibukin temanna ma temanna” (Reirei n Ana Kawai te Tia Kamaiu, 31).

Tamnein Iesu ngke e katoka aorakin te mwaane iroun Dan Burr