“Turai 5–11. Reirei ao Berita aika Tabu 76: ‘E na Korakora Kanuangaia ao E na Akea Tokin Mimitongiia,’” Nakomai, Iriirai—Ibukiia Aomata n Tatabemaniia ao Utu: Reirei ao Berita aika Tabu 2021 (2020)
“Turai 5–11. Reirei ao Berita aika Tabu 76,” Nakomai, Iriirai—Ibukiia Aomata n Tatabemaniia ao Utu: 2021
Kamanoaki, iroun Shaelynn Abel
Turai 5–11
Reirei ao Berita aika Tabu 76
“E na Korakora Kanuangaia ao a na Akea Tokin Mimitongiia”
Ni mwakoro 76, te Uea e kabwarabwara bwa mwaitira are E kan kaota iai te koaua nakoira (tarai kiibu 7–10). Wareki koroboki aika tabu ma te onimaki bwa e aonga Ngaia ni kona n kaota nakoim “ana bwai nako te Atua” (te kibu 12) are ko kainanoi n atai. Imwina korei nonoori ake ko karekei “ngke [kam bon] mena naba iaan ana kairiri te Tamnei” (kiibu 28, 80, 113).
Korei Am Namakin
“Tera ae na riki nakoiu imwiin mateu?” A kuri ni bane aaro nako n te aonaaba are a kaeka te titiraki aei n te kaeka teuana ma teuana. Inanon tienture aika bati, e mwaiti katei ni kiritian, ake a kabonganai reirein te Baibara, a tia n reirei iaon karawa ma moone, ao baretaiti ibukiia ake a raoiroi ao te kamarakaki ibukia ake a buakaka. Ma e bon kona ana botanaomata te aonaaba ae bwanin ni kaokoroaki nakon te raoiroi ma te buakaka? Tera raoi nanon te taeka ae karawa? Ni Beberuare 1832, Iotebwa Timiti ao Sidney Rigdon a titiraki bwa iai riki ae riai n ataaki ibukin te botoniango aio (taraa Reirei ao Berita aika Tabu 76, atuun te mwakoro).
Bon iai riki. Ao ngke ti iangoi raoi bwaai aikai, e “ringa matan [ootara] te Uea ao a kaukaki, ao e oota nako mimitongin te Uea i rarikira” (te kibu 19). Iotebwa ao Sidney a karekea te kaotioti ae moan te kamiimi, ae abwabwaki, ae oota, n te aro are Aomata aika Itiaki a aranna bwa “te Kaotioti.” E kauka wintoon karawa ao e anganiia natin te Atua te oota ae abwabwaki ibukin te maiu ae akea tokina. Te kaotioti aei e kaotia bwa karawa e tamaroa man abwabwaki man rooti bwaai nako riki nakon are a kantaningaia aomata. E raka riki ana nanoanga ma raoiroin te Atua nakon are ti kona n oota iai. Ao natin te Atua iai aia tabo ae akea tokina are mimitong riki nakon are ti kona n iangoia.
Taraa Aika Itiaki, 1:147–50; “Te Kaotioti,” Revelations in Context, 148–54.
Iango ibukin te Kamatebwai i bon Iroum ni Koroboki aika a Tabu
Te kamaiuaki e roko rinanon Kristo, Natin te Atua.
Ngke Wilford Woodruff e wareka te kaotioti are kabwarabwaraki ni mwakoro 76, e taku, “I namakina te tangira ibukin te Uea ae akea n ai arona” (taraa “Voices of the Restoration” ni banen te kamataata aei). Tao iai iroum namakin n aekakin aikai ngkai ko wareka te kaotioti aei. E koaua bwa, akea ibuakon kakabwaia aika mimitong are a kabwarabwaraki n te mwakoro 76 ake a na reke ngkana akea te Tia Kamaiu. Tao ko kona n katebenakoi kiibu n te mwakoro 76 are a mwanewea te Uea Iesu Kristo. Tera ae a reireiniko kiibu aikai ibukina ao Tabena i nanon ana kainibaire te Atua? E kanga n roota am namakin i bukina? Ngkai ko wareware man iango, ko kona n karekei namakin bwa ko na kanga n “[karekea] te koaua ibukin Iesu” ao ni “kakaonimaki” i nanona (kiibu 51, 79).
Reirei ao Berita aika Tabu 76:39–44, 50–112
Te Atua e tangiria bwa e na kamaiuia “ni kabane ana karikibwai baina.”
Tabeman aomata, n ikotaki ma tabeman kaain te Ekaretia n taai akekei, a kaitaraa te kaotioti are n te mwakoro 76 ibukina bwa e reirei bwa e na kuri ni bane aomata ni kamaiuaki ao ni karekea teuana mimitongin te abanuea. Aia kaitara e roko, ibukina bwa, a bon aki oota n aron te Atua ao Ana reitaki nakoira. Ngkai ko wareka te kaotioti aei, tera ae ko reiakinna ibukin anuan te Atua ao Ana baire ibukiia Natina?
Taraa te kaokoro imarenan te kamaiuaki (man te mate n rabwata ao n tamnei; taraa kiibu 39, 43–44) ao te karietataaki (maeka ma te Atua ao te riki n ai Arona; taraa kiibu 50–70).
Taraa naba Ioane 3:16–17; Reirei ao Berita aika Tabu 132:20–25.
Reirei ao Berita aika Tabu 76:50–70, 92–95
Tamau are i Karawa e tangirai bwa n na karekea te maiu ae akea tokina n te abanuea ae te teretirio.
Ko a tia n titiraki—ke n raraoma—bwa ko na tau ke ko aki n karekea te abanuea ae te teretio? N te tai are ko wareka iai kabwarabwaraia naake a na karekea te abanuea aio (taraa kiibu 50–70, 92–95), irarikin are kona kakaei bwaai ake ko riai n karaoi, tarai baika e a tia n karaoia te Atua—ao are e karaoia ngkai—ni buokiko n riki n ai Arona. Man warekan te kaotioti aei n te aro aei e bita am namakin ibukin oin am mwakuri?
Ko kona naba n iangoia bwa bon te kakabwaia ae abwabwaki ataakin kabwarabwaraan abanuean te teretio. E kanga te kaotioti ibukin abanuean te teretio n bita am taratara ao aron maiuakinan maium aei ni katoa bong?
Taraa naba Mote 1:39; Joy D. Jones, “Value beyond Measure,” Ensign ke Riaona, Nobembwa. 2017, 13–15; J. Devn Cornish, “Am I Good Enough? N na Kona n Roko Iai?” Ensign ke Riaona, Nobembwa. 2016, 32–34.
Iotebwa Timiti e noora te mii ni burabeti ibukin karinanin te mimitong n te ruu aio.
Iango ibukin Kamatebwai ni Koroboki aika Tabu n te Utu ao te Bootakin te Utu n te Tairiki
-
Reirei ao Berita aika Tabu 76:22–24, 50–52, 78–79, 81–82.Tera ae ti reiakinna man kiibu aikai iaon kakaawakin ara koaua? Tera kakaawakin ara koaua nakon te maiu ae akea tokina? E kona n ibuobuoki taraan nanon kakaonimaki ni marooroakinana bwa ti na kanga n “kakaonimaki n te koaua ibukin Iesu” (te kibu 79). Kam kona n anenea “I Will Be Valiant” (Aia Boki n Anene Ataei, 162).
-
Reirei ao Berita aika Tabu 76:24.A kona am utu n tarai reitaki imarenan koaua ake n te mwakoro 76 ao ake a reireiaki n “Ngai Natin te Atua” (Aia Boki n Anene Ataei, 2–3); teuana ibuakon koaua aikai e kuneaki n Reirei ao Berita aika Tabu 76:24. E na kanga ni kaokoro te aonaaba ngkana aomata ni kabane a oota bwa ngaira natin te Atua? E kanga te koaua aio ni bita aroarom nakoia tabeman? Tao taraan tamnein natin te Atua aika mwaane ao aine ake a kakaokoro iaon te aonaaba e kona ni buoka am utu n iangoa te titiraki aei. (Taraa naba “Video Presentation: I Am a Child of God,” ChurchofJesusChrist.org.)
Iangoa te bootaki n anenea “Ngai Natin te Atua.” ao tarai reitaki ake tabeua nakon reirei ake n mwakoro 76 (taraa, te katooto, kiibu 12, 62, 96).
-
Reirei ao Berita aika Tabu 76:40–41.Ngkana ti na kakimototoi taian “rongorongo aika kakukurei” (te kibu 40), ke rongorongo aika tamaroa, ni kiibu aikai bwa atuun te rongorongo n te nutibeeba ke te tweet, tera ae ti na taekinna? Tera rongorongo aika kakukurei ake tabeua ake ti kunei n mwakoro 76?
-
Reirei ao Berita aika Tabu 76:50–70.Ko na kanga n buoka am utu n ingainga nakon man katauraoi nakon te maiu ae akea tokina n abanuean te teretirio? Kam kona n bootaki n kakaei tamnei, kiibu, ao aia reirei burabeti are a na iri ma mwakoro n taeka ake inanon Reirei ao Berita aika Tabu 76:50–70. Ko kona n kunei bwaai aikai n ana Maekatiin te Ekaretia, n ChurchofJesusChrist.org, ke n bwaai aika a na taraaki inano n koroboki aika tabu. Ngkanne ko kona n boboti tamnei aikai, kiibu, ao reirei nako aon te boutita are e kona n kauringa am utu n aia kouru aika akea tokiia.
Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Te anene ae tamaroa: “I Ataia E Maiu Iesu,” Anene n Taromauri, nambwa. 34.
Bwanaa n Kaokan Bwaai: Koaua ibukin “te Kaotioti”
Wilford Woodruff
Wilford Woodruff e kaaina te Ekaretia n Ritembwa 1833, e kaania uoua te ririki imwin are Iotebwa Timiti ao Sidney Rigdon a karekea te kaotioti are kaotaki n Reirei ao Berita aika Tabu 76. E maeka i Nu Ioki n te tai anne ao e reiakina taekan “te Kaotioti” mairouia mitinare ake a beku n te tabo anne. Ririki ake imwina e taekina ana namakin ibukin te kaotioti aio:
“I reireinaki man ataeiu bwa bon ti teuana Karawa ao teuana Moone, ao n tuangakiu bwa naake a buakaka ti teuana tuaaia ao naake a raoiroi teuana mimitongiia. …
“… Ngke I wareka te kaotioti aei … , e kaotaa au iango ao e anganai te kukurei ae abwabwaki, e mataata irou bwa te Atua are e anga te reirei anne nakon te aomata e bon wanawana, e raoiroi man koaua, iai irouna anua aika tamaroa ao iango ma atatai aika tamaroa, I namakinna bwa E aki bibitaki ana tangira, nanoanga, motiraoi, ao motikitaeka, ao I namakina te tangira ae bati ibukin te Uea n ae raka riki nakon are mai imwaina inanon maiu.”1
“Te Kaotioti’ [bon] te kaotioti are anga riki te oota, te koaua ma te reirei ae raka riki nakon kaotioti nako ake a mena ni booki ake ti kona n wareki. E buokiira bwa ti na mataata raoi n arora ngkai, ti roko mai ia, buki tera ti mena ikai, ao ti na nakea. Aomata nako a kona n ataia rinanon te kaotioti anne bwa tera tabena ao arora n taai rake aikai.”2
“Imwain ae I noora Iotebwa I aki tabe bwa ikawaira ngaia, ke ataeira ngaia; I aki tabe bwa tera taraakina—bwa e mwarairai ke e kororo irana; te aomata are e karekea te kaotioti anne bon ana burabeti te Atua. I ataia i bon irou.”3
Phebe Crosby Peck
Ngke Phebe Peck e ongora irouia Iotebwa ma Sidney n reirei iaon “te Kaotioti,” e bon maeka i Missouri ao iai niman natina ao akea buuna. Te kaotioti e rootia man kaungaa bwa e na korea aio n tibwaua are e a tia n reiakinna mairouia ana utu ake ana koraki:
“Te Uea e kaoti rabakau aika raba ibukin Abanueana are i Karawa nakoia Natina. … Iotebwa Timiti ao Sidney Rigdon a kawarira imwin te kamwaitoro ae nako, ao e mwaiti ara bobotaki aika a kakukurei ngke ti mena ikekei, ao a kaotaki nakoira Ana mwakuri aika raba, are e anganai te rau ae bati. Ti a kona n noora ruon te Atua ni kamangoria n katauraoi taabo n rau ibukiia natina. Ao naake a na aki karekea bwaninin te euangkerio ao n tei bwa tautia aika kakaonimaki n ana mwakuri Kristo a aki kona n maeka i matan te Tama ma Te Nati. Ma iai te tabo are e katauraoaki ibukiia naake a aki karekea te euangkerio, ma bon te tabo are mimitongina e aki roota te maeka n Abanuean te teretirio. N na aki taekina ae bati riki ibukin bwaai aikai ngkai a tia n boretiaki ao a butanako nakon te aonaaba. Ao tao e na reke am tai n wareware boni ngkoe, ao ngkana ko wareware, au kantaninga bwa ko na wareware ma te nano ae karaurau man tataromwaaka, ibukin bwaai ake a riai n taraaki. Ao nanou bwa kam na wareki man kamatebwai baikai, bwa bon ngaia are e anganira te kukurei n te aonaaba aei ao n te aonaaba ae na roko.”4
Karinanin Mimitong, iroun Annie Henrie Nader