“Turai 5–11. Reirei ao Berita aika Tabu 76: ‘E na Korakora Kanuangaia Ao A Na Akea Tokin Mimitongiia.,’” Nakomai, Iriirai—Ibukin te Moanrinan: Reirei ao Berita aika Tabu 2021 (2020)
“Turai 5–11. Reirei ao Berita aika Tabu 76,” Nakomai, Iriirai—Ibukin te Moanrinan: 2021
Taenikai, iroun Shaelynn Abel
Turai 5–11
Reirei ao Berita aika Tabu 76
“E na Korakora Kanuangaia Ao A Na Akea Tokin Mimitongiia.”
Ngkana ko kamatebwaia Reirei ao Berita aika Tabu 76, iangoia bwa tera te bwai ae tangiria Tamara are i Karawa bwa a na karaoia ataei n am kiraati bwa aonga n ataa Taekana, te Tia Kamaiu, i boni irouiia, ao tokiia aika akea tokina.
Korei Am Namakin
Kaungaa te Tibwatibwa
Kaoti nakoia ataei tamnei ke iteraniba iaon te waaki ni kakukurei man te kabwarabwara n te wiiki aio ke man kabwarabwara ake imwaina. Tuangiia bwa a na tuangko bwaai ake a noori inanon taian tamnei ao tera are a uringnga ae a reiakinaki mai iai.
Reirei te Reirei: Ataei aika a Uarereke
Reirei ao Berita aika Tabu 76:24
Ngaira ni kabane bon natin te Atua.
E taekinna Beretitenti Dallin H. Oaks bwa ngkana ti reireina “te kairake te iango ae mwaaka ae teuanne ke neienne bon natin te Atua,” ti kona n angan teuanne ke neienne “onimakinana ao te nano ae korakora ni kaaitarai kaangaangan te maiu” (“Powerful Ideas,” Ensign, Nobembwa 1995, 25).
Waaki ni Kakukurei aika a Kona ni Karaoaki
-
Ni buokiia ataei bwa a na ata aia konabwai ni kona n riki n aron te Atua, kakaei kawai ni kaotia nakoia ae maan aika uarereke a ikawai rake n riki n aia aroia aia karo—a kona ataei ni kabotaui tamneia maan ma tamneia maan aika natiia aika uarereke. Kauka te boki ae tabu nakon Reirei ao Berita aika Tabu 76:24, ao tuangiia ataei bwa ngaira ni kabane bon “naati mwaane ao naati aine iroun te Atua.” Kaota am koaua bwa te Atua bon Tamara ao bwa ti kona n rikirake n aekan ara Karo i Karawa.
-
Bootaki n anenea “Ngai Natin te Atua” (Aia Boki n Anene Ataei, 2–3), ao kaoiia ataei bwa a na bon kotoiia ngkana anenea “Ngai.” Tuangiia bwa a na manga anenea riki te anene ni kaokioka, n onea mwiin “Ngai” ma “ngkami” ao ni koteii tabeman riki inanonn te kiraati.
Reirei ao Berita aika Tabu 76:40–42
Iesu Kristo bon te Tia Kamaiua te aonaaba.
Te taeka euangkerio nanona te rongorongo ae raoiroi. Te rongorongo ae raoiroi are e uotia te euangkerio e kangai bwa Iesu Kristo “e roko nakon te aonaaba … ni kaitiakia man taian buakaka ni kabane” (te kibu 41).
Waaki ni Kakukurei aika a Kona ni Karaoaki
-
Tuangiia ataei tabeua rongorongo aika raoiroi aika ko tibwa tia n ongoraei. Tuangiia bwa a na tibwaua te rongorongo ae raoiroi are a ongo. Imwiina tibwauaia mangaia te rongorongo ae raoiroi n te euangkerio man warekan Reirei ao Berita aika Tabu 76:41–42. Titirakiniia ataei bwa e kanga aia namakin n te rongorongo ae raoiroi aei. Tibwauaia mangaia te kimwareirei ae ko karekea man te rongorongo ae raoiroi aei.
-
Kaota tamnein Iesu Kristo. Titirakiniia ataei ngkana ataia bwa tera ae karaoia Iesu Kristo ibukira. Kaotia nakoia ataei te bwai ae bareka ao te bwai ae itiaki (n aron te kawere ae mainaina ao te baa ni beeba), ao kabwarabwara bwa te bure bon ti teboo ma te bareka iaon tamneira, ma e roko Iesu Kristo ni buokiira ni manga kaitiakiira.
TamneiIesu ma ataeiKanakomaia Ataei, iroun J Kirk Richards
Reirei ao Berita aika Tabu 76:62
E tangirai Tamara are i Karawa bwa n na okiria ni maeka ma Ngaia n aki toki.
Miin Iotewa Timiti ma Sidney Rigdon iaon te aba n uea ae te tiretio ’e kaoki kakabwaia aika korakora ae e a tia te Atua ni katauraoi ibukiia Natina, n raonaki ma bwaai aika ti riai ni karaoi bwa ti aonga ni karekei kakabwaia aikanne.
Waaki ni Kakukurei aika a Kona ni Karaoaki
-
Tuangiia ataei taekan uean te mimitong ake teniua ake a noori Iotebwa ao Sidney ni miia. (Ko kona ni wareki nakoia ataei mwakoron ke ni kabane “Mwakoro 26: Uean Karawa ake Teniua” [Karaki n Reirei ao Berita aika Tabu, 97–103] ke kaota te witeo iaon ChurchofJesusChrist.org.) Titirakiniia ataei te bwai ae a tangiria ni kanoan te mii. Kabanea riki am iango iaon kabwarabwarakin te aba n uea ae te tiretio, ao kakoaua bwa aio te tabo ae tangiria Tamara are i Karawa bwa ti na bane ni maeka iai.
-
Warekia nakoia ataei Reirei ao Berita aika Tabu 76:62, ao kaoiia ataei bwa a na korea tamneia ma Tamara are i Karawa ma Iesu Kristo n te aba n uea ae te tiretio.
Reirei te Reirei: Ataei aika a Ikawai Riki
Reirei ao Berita aika Tabu 76:5, 41–42, 69
Iesu Kristo bon au Tia Kamaiu.
Buokiia ataei bwa a na ataia bwa kakabwaia aika moan te kakimwareirei are e a tia te Atua ni beritanii nakoia aika kakaonimaki n te maiu are imwiina ao ti kona n riki ti ibukin te Tia Kamaiu Iesu Kristo.
Waaki ni Kakukurei aika a Kona ni Karaoaki
-
Koroia iaon te burakitbooti Tera ae a tia ni karaoia Iesu Kristo ibukiu? Titirakiniia ataei n tatabemaniia bwa ana warekia ni karaurau te kibu 5, kiibu 41–42, ke te kibu 69 inanon te tiekition 76, n tarai kaeka aika kona n reke nakon titiraki iaon te burakibooti. Tuangiia bwa a na tibwauai aia reke (taraa naba “He Sent His Son,” Aia Boki n Anene Ataei, 34–35). Ti na kanga ni kaota ara kakaitau ibukin te bwai ae a tia ni karaoia te Tia Kamaiu ibukira?
-
Korea te kateniua n Taekan te Onimaki iaon te burakibooti, ni katikui n akea te koroboki iaon taeka aika a kakawaki. Anganiia ataei taeka aika akea aikai iaon mwakoro ni beeba aika uarereke, ao kaoiia bwa ana katikui aia taeka n te tabo ae eti iaon te burakibooti. Tera ae reireiniira taekan te onimaki aei iaon bukin kainnanoan Iesu Kristo? (taraa naba te witeo “Bukin tera Ti Kainnanoa te Tia Kamaiu,” ChurchofJesusChrist.org).
Reirei Ao Berita Aika Tabu 76:12, 15–19, 114–16
Kamatebwaiakan koroboki aika tabu e kona ni buokai “ni kaotaai n ana bwai te Atua.”
Iotebwa Timiti ma Sidney Rigdon a karekei Reirei ao Berita aika Tabu 76 ngke a kabanei aia iango iaon taekan booki aika tabu. Buokiia ataei n nooria bwa e kanga kamatebwaiakan booki aika tabu ni kona ni kaoa te kaotioti rinanon te Tamnei ae Raoiroi.
Waaki ni Kakukurei aika a Kona ni Karaoaki
-
Tuangiia ataei ngkana ataa te bwai ae a karaoia Iotebwa Timiti ma Sidney Rigdon ngke a noora te mii inanon Reirei ao Berita aika Tabu 76. Kaoiia bwa a na wareki kiibu 15–19 ni kakaea. Tibwaua te tai ngke ko karekea te kairi mai ieta ngke ko tabe ni wareki booki aika tabu, ao tuangiia ataei bwa a na taekina taekan te namakin n tamnei ae a karekea ngke a wareki booki aika tabu.
-
Tuangiia ataei bwa a na kaini mataia ao ni kataia ni karaoa te mwakuri, n aron karanakin te tamnei ke kaukan booki aika tabu nakon te kibu ae onoti. Tera bwaai tabeua aika a kaangaanga karaoakiia ngke a kainaki matara ma te tamnei? Bootaki ni wareka Reirei ao Berita aika Tabu 76:12, 15–19, 114–16 ni kakaea te bwai ae ti kainnanoia ni karaoia ni kauki matara ma te tamneii.
Reirei ao Berita aika Tabu 76:50–70
E a ta Tamara are i Karawa ni katauraoa aba n uean mimitongin te tiretio ibukiu.
Atakin taekan mimitongin te tiretio are e a tia te Atua ni katauraoia e kona ni kaungaia ataei n “tokanikai n te onimaki” (te kibu 53) kataaki ao kabwakabwaka aika a rinanoi.
Waaki ni Kakukurei aika a Kona ni Karaoaki
-
Ngkana iai temanna ae titirakiniira, “Bukin tera n na ira Iesu Kristo ao ni kawakin Ana tua?” tera ae ti na taekinna? Kaoiia ataei bwa a na taratarai kaekaaia inanon Reirei ao Berita aika Tabu 76:50–70, are e kabwarabwaraki naake a karekea te maiu ae akea tokina n te aba n uea ae te tiretio. Kariaia ataei bwa a na karaoia n te kaotioti kaekaan te titiraki. Kaota am koaua n taian kakabwaia ae a tia Tamara are i Karawa ni katauraoi ibukira ngkana ti ira Iesu Kristo.
-
Korea tamnein taai ae bubura iaon te mwakoro ni beeba, ao koroia nakon tabeua mwakorokoro ni kamwaninga. Angan te ataei te mwakoro, n raonaki ma kibun taeka aika ana warekaki aikai: Reirei ao Berita aika Tabu 76:51; 76:52; 76:53; 131:1–2. Tuangiia ataei bwa a na kakaea inanon aia kibu te bwai ae ti riai ni karaoia ni karekea te maiu ae akea tokina n te aba n uea ae te tiretio (tabeua kiibu iai inanona te kaeka ae raka iaon teuana), ao koreia iaon aia mwakoro n taai. N aia tai ni bootaki ni mwakuri ni kanim mwakorokoro, kaota am onimaki irouia bwa man ana ibuobuoki te Tia Kamaiu, a kona n tau ibukin te aba n uea ae te tiretio.
Kaungaa te Kamatebwai n te Mweenga
Kaoiia ataei bwa a na kabongana iteranibaan te waaki ni kakukurei n te wiiki aei n reireiniia aia utu te bwai ae a reiakinna n taekan te mii are a karekea Iotebwa Timiti ao Sidney Rigdon.
Kanakoraoan Ara Anga Reirei
Kabonganai koroboki aika tabu. E ngae ngke ataei ake ko reireiniia a tuai kona ni wareware, kabonganai n tainako koroboki aika tabu ngkana ko reireiniia. Kariaia bwa a na ataia ae te koaua are ko tibwauaia a reke man booki aika tabu.