Iesu ma te tiibu

Dear to the Heart of the Shepherd, iroun Simon Dewey

Tuun 28–Turai 4

Reirei ao Berita aika Tabu 71–75

“Akea Bwai ni Buaka ae Karaoaki Ni Kaaitarako Ae e Na Tokanikai”

Ataei ake ko reireiniia a kona n reiakina ae mwaiti n te kiraati, ma a na reiakina ae mwaiti riki ngkana a karikirakea te anua ni kamatebwaiakan koroboki aika tabu ni mweengaia. Iangoia bwa ko na kanga ni kaunga ao ni boutoka reiakinan te euangkerio inanon te mweenga.

Korea am namakin

te aikaon ibukin te tibwatibwa

Kaungaa te Tibwatibwa

Kaoia ataei bwa a na kamronron n tekateka iaon te timanti, ao karabinoa te booro nakon temanna mai ibuakoia. Tuanga te ataei anne bwa e na tibwaua te bwai are teuanne ke neienne e a tibwa tia n reiakinna n taekan te euangkerio ni mweengana ke n te Moanrinan. Imwiina kaoa te ataei anne bwa e na karabinoa te booro nakon temanna. Kaokiokia ni karokoa a bane n reke aia tai n tibwatibwa ataei.

te aikaon ibukin te anga reirei

Reirei te Reirei: Ataei aika a Uarereke

Reirei ao Berita aika Tabu 72:2, 10

E a tia te Uea ni wetea te bitiobi bwa e na buokai.

Ataei aika uarereke a na aki bati n ataa ae mwaiti n te bwai ae e karaoia aia bitiobi ni beku ibukiia ao membwa n te uoote ake tabeman. Ko kona ni buokiia ni kakaitau ibukin ana mwakuri n ibuobuoki aia bitiobi.

Waaki ni Kakukurei aika a Kona ni Karaoaki

• Uoti bwaai nakon te kiraati ake a tei ibukin taben te bitiobi, n aron beban te kabwianibwai, booki aika tabu, ke tamnein te bitiobi ngke e anga reirei (taraa te tamnei n tokin te kabwarabwara n te wiiki aio inanon Nakomai, Iriirai—Ibukiia n Tatabemaniia ao Utu). Wareka Reirei ao Berita aika Tabu 72:2, ao kabwarabwara bwa e a tia te Uea ni wetea te bitiobi bwa e na buokiira. Kabonganai bwaai aika ko uoti bwa e na buokiia ataei n atai tabeua bwaai aika e karaoi te bitiobi ni buoka te uoote.

• Kairiia ataei n nakonako mangaia nakon ana aobiti te bitiobi (ko na bae n tangiria n reitaki ma taan reirei ake tabeman). Kabwarabwaraa ibukiia tabeua taai aika a na kona ni kaitibo iai ma te bitiobi n ana aobiti (n aron te intawiu n te bwabetito ke rinanoan mwiin te kabwianibwai). Tuangiia ataei bwa ko kanga n tia ni kakabwaiaaki man ana ibuobuoki te bitiobi.

• Buokiia ataei ni karaoi kaati aika ana angan te bitiobi, ni kaitaua n te bwai ae a tia ni karaoia ni buoka ana mwakuri te Uea.

Reirei ao Berita aika Tabu 75:3

I kona n anga au kabanea n tamaroa n ibuobuoki nakon te Uea.

Riki n aia ririki ni kairake, a kona ataei ni kunea te kimwareirei ni karaoa aia kabanea n tamaroa ni kawakin ana tua te Uea.

Waaki ni Kakukurei aika a Kona ni Karaoaki

• Kaoiia ataei n tatabemaniia nako bwa a na katea kain aron karaoan te mwakuri n ibuobuoki, n aron kaitiakan te ruu n te taromauri ke kaitiakan bwaai n amwarake n te mweenga. Wareka Reirei ao Berita aika Tabu 75:3, ao titirakiniia ataei ni kaota aron karaoakina ma te taningaroti ngkana ko kangai “ke n taningaroti” ao kaotia bwa ko na kanga ni mwakuri korakora ngkana ko kangai “ma mwakuri ma korakoram.” Bukin tera e kakawaki bwa ti na karaoa ara kabanea n tamaroa ngkana ti beku ibukin te Uea?

• Tibwauaia ma ataei ana karaki Beretitenti Dieter F. Uchtdorf iaon taekan te mwakuri man “Two Principles for Any Economy” (Ensign ke Riaona, Nobembwa 2009, 55–58). E kanga aron ara namakin ngkana ti ataia bwa ti a tia ni karaoa ara kabanea n tamaroa?

• Anenea te kuna iaon te botaki ni mwakuri, n aron “When We’re Helping” (Aia Boki n Anene Ataei, 198). Buokiia ataei ni karaoi kaia ake ana titebo ma taekana.

  bukibuki ao baene n amwarake

  Membwa n te Ekaretia n taai akekei n tabetai a anga amwarake nakon te Ekaretia ni buokiia tabeman.

te aikaon ibukin te anga reirei

Reirei te Reirei: Ataei aika a Ikawai Riki

Reirei ao Berita aika Tabu 71

I kona ni kamanoa te koaua man tibwauakin au koaua.

E aki kantaningaia ataei te Uea bwa a na anga kaeka nakon ana kairiribai te Ekaretia n te kawai are E wetea Iotebwa Timiti ao Sidney Rigdon bwa a na karaoia. Ma ko kona ni buokiia ataei bwa ana ataia ae aia koaua n te kakoaua ae bebete e kona n iai mwiina ae korakora iaoia tabeman.

Waaki ni Kakukurei aika a Kona ni Karaoaki

• Kabongana atuun tiekition ibukin Reirei ao Berita aika Tabu 71 ke “Mwakoro 25: Iotebwa Timiti ao Sidney Rigdon A Nakon aia Mition” (Karaki man Reirei ao Berita aika Tabu 96) n reireiniia ataei taekan bwaai ake a riki are e kaunga tiekition 71. Wareka Reirei ao Berita aika Tabu 71:1 ma ataei, ao buokiia ni kakaea te bwai ae tangiria te Uea bwa a na karaoia Iotebwa ma Sidney ibukin aia “namakin aika aki iraorao” aomata nakon te Ekaretia (atuun tiekition). Tera ae E taekinna bwa a na anganaki bwa e na buokiia? Ti na kanga n riki n ai aron Iotebwa ao Sideny?

• Kaoiia ataei bwa a na kataneiai ni kakauoman n aron tibwauakina ma tabeman te bwai ae ataia n taekan te Ekaretia. Te katooto, a kona n tibwaua te koaua ae bebete ke n tibwaua teuana Taekan te Onimaki.

Reirei ao Berita aika Tabu 72:8

E weteia bitiobi te Uea bwa ana Buokia ni karaoa Ana Mwakuri .

E kona te bitiobi ni karekea te kakaiiri ae tamaroa ni maiun te aomata ae kairake. Tera ae ko kona ni karaoia ni buokiia ataei n ataa taben te bitiobi bwa ngaia te tia tei ibukin te Uea Iesu Kristo?

Waaki ni Kakukurei aika a Kona ni Karaoaki

• Kabwarabwara bwa n 1831 te Uea e wetea ana bitiobi te Ekaretia, Edward Partridge, bwa e na mwaing mai Kirtland, Ohio, bwa e na riki bwa te bitiobi i Independence, Missouri (taraa “Mwakoro 17: Te Moan Bitiobi n te Ekaretia,” Karaki man Reirei ao Berita aika Tabu, 64–66). Wareka Reirei ao Berita aika a Tabu 72:8 ma ataei, ao n tuangiia bwa a na kakauongo bwa antai ae e tia ni weteaki iroun te Uea bwa te bitiobi ae boou i Kirtland. Bukin tera te Uea e weteia bitiobi? Tibwauaia ma ataei te taneiai ngke ko kakabwaiakaki man ana ibuobuoki te bitiobi.

• Kaoiia ataei bwa a na koroi ni karinani tabeua bwaai aika a tia n noori aika e karaoi te bitiobi ni buokiia aomata n te uoote. Tuangiia ataei bwa a na korea tamnein te bitiobi ni karaoa te bwai ae a taekinna. Kaota am koaua bwa e weteaki am bitiobi iroun te Uea bwa Ana toro. Bukin tera ti kakaitau ngkai e a tia te Uea ni wetea te bitiobi n ara uoote?

Reirei ao Berita aika Tabu 73:3

Te Uea e tuanga Iotebwa Timiti bwa e na kaoti koaua aika kakawaki ake a bua man te Baibara.

Ngkai mwakoron ana wewete ni burabeti, e tuangaki Iotebwa Timiti iroun te Uea bwa e na manga karaoa rinanoan te Baibara ni kairaki mai ieta. Manga rinanoan karinrin aikai, are e atongnga te Uea bwa te “rairairi” (Reirei ao Berita aika Tabu 90:13), e kaoki koaua aika kakawaki ake a tia ni bua ke ni kamwaingaki man te Baibara inanon tienture aika mwaiti.

Waaki ni Kakukurei aika a Kona ni Karaoaki

• Kabwarabwara bwa ngke e oki Iotebwa Timiti ao Sidney Rigdon man te mition ae uarereke irarikin Kirtland, Ohio, e tangiriia te Uea bwa a na wakina te mwakuri iaon te karikirake ae kakawaki. Kaoiia ataei bwa a na wareka Reirei ao Berita aika Tabu 73:3 ni kakaea bwa tera raoi te karikirake anne. Ni buokiia ataei bwa a na ataia bwa tera ae tangiria te Uea bwa a na rairia Iotebwa ao Sidney, warekia ma ngaia mwakoron karinrin n te Rikitinare n te Baibara “Joseph Smith Translation (JST).”

• Kabuta katoton te Baibara, ao kariaia ataei bwa ana kaukia ao n nooria bwa iraua baana inanona. Kaoiia ataei bwa a na iangoia ae a tuangaki bwa ana raira te Baibara nakon te taetae teuana. Tera bwaai aika a na kona iai ni karaoi tabeua kaairua? Kabwarabwara bwa ngkana a rairairi aomata ke ni kaewea te Baibara imwain Iotebwa Timiti, a karaoi tabeua kaairua, ao n tabetai a kanakoi tabeua koaua aika kakawaki. Te Uea e tuanga te Burabeti Iotebwa Timiti bwa e na karaoi kaetakiia aika kairaki mai ieta. Bukin tera e kakawaki ana mwakuri Iotebwa Timiti nakoira?

te aikaon ibukin te kamatebwai

Kaungaa te Kamatebwai n te Mweenga

Kaoiia ataei bwa a na rinea te bwai teuana ae ana karaoia ibukin te bwai ae a reiakinna n te bong aei, n aron kaitauan te bitiobi ibukin ana mwakuri n ibuobuoki ke ni katauraoia ni kamanoi aia koaua man reiakinan Taekan te Onimaki.

Kanakoraoan Ara Anga Reirei

Kairekerekei ara namakin ake ti kabonganai. “Angiia ataei (ao ikawai) a bati ae a reiakinna ngkana a kaairaki taian namakin aika mwaiti. Kakaei kawai ni buokiia ataei ni kabonganai aia namakin n aron aia taratara, kakauongo, ao namakin n aia tai ni reirei” (Teaching in the Savior’s Way, 25).

iteraniba iaon te waaki ni kakukurei: te bitiobi e buokiia kaain te uoote