Kristo ma te Rorobuaka ae Kaubwai,, iroun Heinrich Hoffman

Turai 19–25

Reirei ao Berita aika Tabu 81:83

E “Mwaiti ae E Anganaki e Mwaiti ae Na Kainanoaki Mai irouna”

E na kanga te kaotioti n Reirei ao Berita aika Tabu 81–83 ni buokiia ataei aika ko reireiniia ni karaoa ae raoiroi ibuakoia ana utu ao raoraoia?

Korei Am Namakin

Kaungaa te Tibwatibwa

Kaoiia ataei bwa a na tibwaua te bwai teuana ae a karaoia ni buoka temanna n te wiiki aei. E na kanga buokaia tabeman ni buokiira ni kaan riki ma ara Tia Kamaiu?

Reirei te Reirei: Ataei aika a Uarereke

Reirei ao Berita aika Tabu 81:3

I riai n tataro n taainako.

Ngke e weteaki Frederick G. Williams iroun te Uea bwa te kauntira nakon Beretitenti Iotebwa Timiti, E reireina Frederick bwa e na “kakaonimaki … n tataro n taainako.”

Waaki ni Kakukurei aika a Kona ni Karaoaki

• Wareka nakoia ataei ana reirei te Uea bwa ko na “kakaonimaki … n tataro n tainako, ni bwanaam ao inanom, ibuakoia aomata ke n ti ngkoe” (Reirei ao Berita aika Tabu 81:3). Kabwarabwara bwa e nanonaki n tataro inanora, ao n tibwaua oin am katooto. Buokiia ataei bwa a na iangoi taai ngke a kona n tataro “ibuakoia aomata ke n ti ngaiia.”

• Reireiniia ataei aron te tataro. Kamatataa ae a kona ni kaitaua Tamara are i Karawa ibukin aia kakabwaia ao n Tuangnga ibukin bwaai aika a kainnanoi. Te anene ibukin te tataro, n aron “I Thank Thee, Dear Father” (Aia Boki n Anene Ataei, 7), e kona ni buokia ataei n ataia bwa tera ae ana taekinna n aia tataro. Anganiia ataei aia tai n taekina te tataro ae uarereke.

• Tuangiia ataei bwa a na iangoi bwaai aika a na kona ni kaaitaua ia Tamara are i Karawa ibukin ke Titirakinna ibukin. Kariaia bwa ana koroi tamnein bwaai aikai ao n tibwauai ma kain te kiraati.

Reirei ao Berita aika Tabu 81:5; 82:19

I kona ni buokiia nake irarikiu.

Tamara are i Karawa e atai kainnanoia Natina n tatabemaniia nako, ao e aki toki ni kabonganaia aomata tabeman—n aroia ataei aika ko reireiniia—ni buokia ni kakoroi nanon kainnano aikanne. Ko na kanga n buokiia ataei ni kinai kainnanoia tabeman ao ni buokiia?

Waaki ni Kakukurei aika a Kona ni Karaoaki

• Wareka Reirei ao Berita aika Tabu 81:5 nakoia ataei, ao buokiia n atai kibu n taeka n aron “buokiia ake a mamaara” ao “tabekirake baai ake a tine.” Tuangiia bwa ana katea kain kawai aika ti kona ni karaoia n te bwai ae titiraki te Uea n te kibu aei. Kabonganai tamnei ke witeo n taekin karakinan Iesu Kristo aika bebete ngke e buokiia tabeman (taraa Gospel Art Book, nambwa 41, 42, 46, 47, 55; biblevideos.ChurchofJesusChrist.org). Ti na kanga n ira ana banna ni katooto te Tia Kamaiu ni buokiia tabeman?

• Anenea te ka aua ni kibu n “I Feel My Savior’s Love” (Aia Boki n Anene Ataei, 74–75) ke te anene riki teuana ibukin te ibuobuoki. Taekina taekan te tai ngke e buokiko temanna n namakina ana tangira te Tia Kamaiu ngke e buokiko.

• Wareka Reirei ao Berita aika Tabu 82:19 nakoia ataei, ni kamatata te kibu n taeka “ukoukoran nanon kain rarikina.” Kabwarabwara bwa e nanonaki n ae karaoan bwaai aika a na buokiia kaain rarikira—n raonaki ma ara utu. Buokiia ataei n iangoi kawai ake a kona iai ni beku ibukin temanna n te wiiki aei.

  

  E tuangiira te Atua bwa ti na buokiia tabeman ni kaota ara tangira Ibukina.

Reirei ao Berita aika Tabu 82:10

E beritani kakabwaia te Atua ngkana I onimakinna.

Ngke a ikawai, ana miimi ataei bwa bukin tera e anganiira te Atua tuua aika rangin ni mwaiti. Ko kona ni buokiia ataei n ataia bwa E anganiira tuua bwa e na kakabwaiaira.

Waaki ni Kakukurei aika a Kona ni Karaoaki

• Buokiia ataei bwa ana iangoi tuua ake e a tia te Atua n anganiira (taraa, te katooto, Te Otinako 20:4–17; Mataio 22:37–39; Reirei ao Berita aika Tabu 89:5–17). Korei tamnei iaon te burakibooti ni buokiia ataei n atai ao n uring tuua aikai. Anga katooto bwa a kanga ana tua te Atua ni kona ni kakabwaiaira ao ni kamanoira.

• Warekia nakoia ataei, “Ngai, te Uea, I bae ngkana kam karaoa ae I taku” (Reirei ao Berita aika Tabu 82:10). Tuangiia ataei bwa ana kaokioka te kibun taeka aei tabeua te tai ma ngkoe, ao iangoi kawai ni buokiia n uringnga, n aron kaoakiia bwa a na uboubo nakon tain te mwanewe. Kakoaua bwa ngkana ti kawakin ana tua te Atua, E na kateimatoai Ana berita nakoira.

Reirei te Reirei: Ataei aika a Ikawai Riki

Reirei ao Berita aika Tabu 81:3

I kona n tataro ni “bwanaau ao [inanou].”

Ko na kanga ni kaungaia ataei bwa a na rairaki nakon te Uea “n te tataro n taainako” ngkana a kainnano?

Waaki ni Kakukurei aika a Kona ni Karaoaki

• Kaoa temanna bwa e na wareka Reirei ao Berita aika Tabu 81:3, ao titirakiniia ataei nanon ae ko na tataro “[i] nanom.” Tibwaua am taneiai ngke ko tataro ni kabaibati ke inanom ao te Uea e buokiko. Tuangiia naba ataei bwa a na tibwauai oin aia taneiai. E kanga te tataro ni uotiira ni kaniira riki nakon Tamara are i Karawa?

• Wareware ke aneneia ma ataei te anene iaon taekan te tataro, n aron “Ko Kautinako n te Ingabong?” ke “Secret Prayer” (Anene n Taromauri, nambwa 140, 144). Kaoia ataei bwa ana tibwaua te kibun taeka man te anene are e buokiia n ata te bwai teuana ibukin te tataro. Anganiia te tai bwa a na iangoa te bwai ae ana kona ni karaoia ni kanakoraoa aia tataro ao koroi aia iango.

Reirei ao Berita aika Tabu 81:5

E tangirai te Atua bwa n na buokiia ao ni kakorakoraia naake a kainnano.

Buokiia ataei ni kaotaia bwa e rangin n rawata te kawai aika a kona ni buokiia aia utu, raoraoia, ao kaain rarikiia ni katoa bong.

Waaki ni Kakukurei aika a Kona ni Karaoaki

• Koroi tamnein baai ao bubuaniwae iaon te burakibooti. Tuangiia ataei bwa ana wareka Reirei ao Berita aika Tabu 81:5 n reirei te bwai ae taekinna te Uea ibukin bwain te rabwata aikai. Mataku n te witeo “Pass It On” (ChurchofJesusChrist.org), ke tibwauaia bwa ko kanga ao ataei n tia n nooriia aomata ni buokiia i bon irouia. Ti na kanga n ataia riki aomata aika a kainnano irarikira? Kaoiia ataei bwa a na buoka temanna te aomata n te wiiki aei. Ibukin iango iaon kawai ni buokiia tabeman, anenea te kuna iaon te mwakuri n ibuobuoki, n aron “Have I Done Any Good?” (Anene n Taromauri, nambwa 223).

• Kaoiia ataei bwa a na teina aron karaoan te tomino (ke bwaai aika ti tebo) ngkai atong kawai aika a kona ni buokiia iai tabeman. Tuanga te ataei bwa a na orea teuana te tomino ao taraia bwa e kanga mwiina nakoia ake tabeua. E kanga ara mwakuri n ibuobuoki n iai mwiina ae ti tebo iaoia aomata aika irarikira? (Taraa naba te witeo “Dominoes,” ChurchofJesusChrist.org.) Taekina ana mwakuri n ibuobuoki n tangira temanna ae kaungako bwa ko na buoka temanna.

Reirei ao Berita aika Tabu 82:8–10

E beritani kakabwaia te Atua ngkana I Onimakinna.

Ngkai a rikirake aia onimaki ataei n ana berita te Atua, nanoia ni karinei Ana tua e na rikirake.

Waaki ni Kakukurei aika a Kona ni Karaoaki

• Kaoiia ataei n iangoia bwa iai raoraoia ae iangoia bwa e a tia te Atua n anga tuua aika mwaiti. Tuangiia bwa a na ukoukora Reirei ao Berita aika Tabu 82:8–10 ibukin te bwai ae na buokiia raoraoia n ataia bwa bukin tera e anga tuua te Atua. Tibwauaia bwa e kanga ana tua te Atua n tia ni kakabwaiako, ao ni kaoiia ataei bwa a na tibwauai naba aia iango.

• Ni buokiia ataei bwa a na ataa ana berita Tamara are i Karawa nakoira, tibwaua te kiraati nakon teniua te kurubu, ao anganiia kurubu n tatabeua teuana mai ibuakon koroboki aika tabu aikai bwa ana wareki: Reirei ao Berita aika Tabu 1:37–38; 82:10; 130:20–21. Kaoiia bwa a na tibwaua te bwai ae a reiakinna n taekan ana berita Tamara are i Karawa. E kanga ara ongotaeka n iai mwiina nakon kakabwaia aika ti kona ni karekei? Buokiia ataei n iangoi katooto man maiuia ke man koroboki aika tabu ngkana te ongotaeka e uoti kakabwaia mairoun te Atua.

• Tibwaua aia taneiai are e kakoauai reirei ake a reireinaki inanon Reirei ao Berita aika Tabu 82:8–10. Ko kanga n roko n onimaki iroun te Uea ao Ana berita?

Kaungaa te Kamatebwai n te Mweenga

Kaoa te ataei bwa e na iangoia bwa a na kanga n tangiria ni buoka temanna inanon aia utu n te wiiki aei. N tain te reirei n te wiiki ae na roko, tuangiia bwa a na tibwaua te bwai ae a karaoia.

Kanakoraoan Ara Anga reirei

Buokiia ataei bwa a na riki bwa taan reiakinaki aika a tamaroa riki. Te angareirei e raka riki nanona nakon ae ti taekinan te koaua. E nanonaki n ae buokaia tabeman ni karikirakea te toronibwai n te tamnei. Irarikin are ti tuangakiia ataei aroia ni buokiia tabeman, te katooto, kaungaia bwa a na iangoi oin aia iango.